1. ¿Imatan llapa Diosta serviqkuna ruwananchis?

ONQOSQA otaq sayk’usqa kashaspaqa manan munasunmanchu juj carrerapi phawaytaqa riki. Ichaqa Apóstol Pabloq nisqan jina, Diosta serviqkunaqa juj carrerapin phawashanchis (Heb. 12:1). Kuraqña, sullk’aña pisi kallpayoqña kashaspapas mana pisipaspan phawashanallanchis Diospa qosqan premiota chaskinanchispaq (Mat. 24:13).

2. 2 Timoteo 4:7, 8 nisqanman jina, ¿imaraykun Pablo mana iskayaspa jujkunata kallpacharan?

² Pablon niran: “Phawamusqay carreratapas tukunaykamañan phawamuni”, nispa. Chaymi mana iskayaspa jujkunata kallpacharan (leey 2 Timoteo 4:7, 8). Ichaqa, ¿ima carrerapi phawaymantan Pablo rimasharan?

3. ¿Ima ruwasqanchistan Pablo tupanachiran carrerapi phawaywan?

³ Allinta yachachinanpaqmi Pabloqa mayninpi willaq Grecia llaqtapi runakunaq imachus ruwasqanta (1 Cor. 9:25-27; 2 Tim. 2:5). Chaymantapas askha kutipin tupanachiran Jehová Dios serviyta carrerapi phawaywan (1 Cor. 9:24; Gál. 2:2; Filip. 2:16). Chay carrerapi phawaytaqa qallarinchis Diosta servinanchispaq bautizakuspan (1 Ped. 3:21). Phawaytataq tukusunchis Jehová Dios wiñay kausay premiota qowaqtinchis (Mat. 25:31-34, 46; 2 Tim. 4:8).

4. ¿Imakunamantan kaypi yachasunchis?

⁴ ¿Imaynapin tupanman karuta phaway Jehová Diosta servisqanchiswan? Ñaupaqta, may rinanchis ñanllantan phawananchis. Iskaypi, maymanchus chayananchismanmi yuyayninchista churananchis. Kinsapi, ima sasachakuytapas  atipaspan phawashanallanchis. Sapankamantan kaypi yachasunchis.

5. ¿May ñanllantan phawananchis? ¿Imanaqtinmi chay ñannillanta phawananchis?

⁵ Juj carrerapi phawaq runakuna premiota chaskinankupaqqa maynintachus rinankupaq kamachiranku chayllantan phawananku. Chhaynallataqmi wiñay kausay premiota chaskinapaqpas may rinanchis ñanllatan phawananchis, chaywanqa nishanchis Diospa kamachisqanman jina kausananchismantan (Hech. 20:24; 1 Ped. 2:21). Satanaspas qatikuqninkunapas manan munankuchu Dios servinanchista, aswanmi munanku paykunawan kuska millaykunapi purinanchista (1 Ped. 4:4). Diosta servisqanchismantan asipayawanchis, ninkutaq: “Noqaykuqa libren kayku” nispa, ichaqa manan chhaynachu (2 Ped. 2:19).

6. ¿Imatan yachasunman Brianmanta?

⁶ Satanaspa kamachisqan runakunaq phawasqanku ñanta riyta munaqqa, ratollan reparan mana librechu kasqanta aswanpas kamachi kapusqanta (Rom. 6:16). Rimasun Brian hermanonchismanta. Wawa kashaqtinmi tayta-mamanqa yachachisqa Diospa kamachisqanman jina kausananpaq. Waynacha kashaspan ichaqa piensasqa chayta kasukuspa mana kusisqachu kananpaq. Jinan Satanaspa munasqanman jina kausayta qallaripusqa. Paymi nin: “Manan piensaranichu munasqayman jina kausaspa millay viciokunaman urmanaytaqa”, nispa. Payqa droga mijuyta, machayta, qhelli juchapi puriyta imas qallarisqa. Chaymi nillantaq: “Tiempowanqa fuerte drogakunatan mijurani, manan saqeyta atiranichu, chaymi chay vicioypaq jujkunamanraq drogakunata vendeq kani”, nispa. Chay qhepamanmi ichaqa cambiaspa Diospa kamachisqanman jina kausayta qallaripusqa, mana allin ruwasqanta saqepuspataq 2001 watapi bautizakapusqa. Kunanqa kusisqan Jehová Diosta servishan. *

7. Mateo 7:13, 14 nisqanman jina, ¿ima iskay ñanmi ñaupanchispi kashan?

⁷ Kallpachakunanchismi allin kaq ñanpi phawashanallanchispaq. Satanasqa wiñay kausayman apaq ñañu ñanpi phawasqanchismanta lloqsipuspa askha runakunaq phawasqan jatun ñanpi phawananchistan munan. Chay jatun ñanta phawayqa manan sasachu, ichaqa wañuymanmi apan  (leey Mateo 7:13, 14). Allin kaq ñanmanta ama lloqsinapaqqa Jehová Diospin confiananchis, kamachiwasqanchistataq kasukunanchis.

8. ¿Imatan phawaqkuna ruwanku urmaspanku?

⁸ Allin phawaq runakunaqa mana urmanankupaqmi ñaupaqllaman qhawanku. Chaywanpas mayninpiqa urmankumanmi qonqaylla t’oqoman saruspa otaq phawaqmasin tanqarpariqtin. Chaywanpas paykunaqa sayarispan phawashallanku. Yuyayninkupas manan urmasqankupichu kashan aswanpas maymanchus chayanankupin, premiota chaskinankupi ima.

9. ¿Imatan urmaspa ruwananchis?

⁹ Diosta servispapas askha kutipin urmasunman. Yaqapaschá mayninpi mana piensaspa imatapas rimasunman ruwasunmanpas. Mayninpiqa iñiqmasinchispaschá mana allinta ruwawasunman. Chaykunawanqa manan llakikunanchischu, llapanchispas juchayoqmi kanchis. Chaymantapas phawasqanchis ñanqa ñañullan, chaymi phawashaspaqa mana piensay jujkunata tanqarparisunman. Arí, mana munashaspan iñiqmasinchiskunata qonqay phiñachisunman. Chaychá apóstol Pablopas niran: “Perdonanakuychis razonwanña pipaqpas phiñasqa kashankichis chaypas”, nispa (Col. 3:13). Ichaqa, manan imachus urmachiwaranchis chaypichu yuyayninchisqa kashanan, aswanpas premiota chaskinanchispin. Urmaruspaqa jujmanta sayarispan phawashanallanchis, manan phiñasqallachu kashananchis. Mana chayqa manañan phawashasunmanchu, nitaq premiotapas chaskisunmanchu. Jinaspapas wiñay kausay ñanpi phawaqkunatan jark’asunman.

10. ¿Imatan ruwananchis jujkunata ama jark’ananchispaq?

¹⁰ Carrerapi phawaq iñiqmasinchiskunata ama jark’ananchispaqqa juj ladomanmi ayqerinanchis. ¿Imaynatan chayta ruwasunman? Manan munasqanchisman jinachu imatapas ruwananchis, nitaqmi noqallanchispichu piensananchis (Rom. 14:13, 19-21; 1 Cor. 8:9, 13). Juj carrerapi phawaq runakunaqa  premiota ganay yuyaywanmi paykunapura atipanakunku. Paykunaqa manan jujkunapi piensankuchu, chaymi ñaupaqpi kanankupaq tukuy atisqankuta kallpachakunku. Noqanchismi ichaqa mana ganay yuyaywanchu phawashanchis (Gál. 5:26; 6:4). Chaymi noqanchisqa jujkuna jujkunawan yanapanakuspa phawananchis, chhaynapin iñiqmasinchiskunapas wiñay kausay premiota chaskinqaku. Pabloq nisqan jina, manan munaynillanchistachu maskhananchis, aswanpas jujkunaq munaynintawanmi maskhananchis (Filip. 2:4).

11. ¿Imapin phawaqkuna yuyaykunku? ¿Imaraykun chaypi yuyaykunku?

¹¹ Jinaspapas allin phawaq runakunaq yuyayninqa maymanchus chayanankupin kashan, manaña ñawinkuwan rikunkuchu chaypas, ñapas chayaruspa premiota chaskishankumanña jinatan yuyaykunku. Chaypi yuyayninku kasqanmi paykunataqa kallpachan phawashanallankupaq.

12. ¿Imatan munakuq Diosninchis prometewanchis?

¹² Munakuq kasqanraykun Jehová Diosqa prometewanchis carrerapi phaway tukuqkunaman, wiñay kausay premiota qowananchispaq. Bibliapiqa willawanchismi premionchista chaskispa imayna kausananchista. Chaymi piensananchis imaynas jamuq tiempopi kausayninchis kanqa chaypi. Sichus chay sumaq kausaypi piensashallasun chayqa, mana pisipaspan phawashallasun.

13. ¿Piqpa yanapayninwanmi carrerapi phawashanchis?

¹³ Ñaupaq Grecia llaqtapi phawaqkunaqa sayk’usqaña kashaspapas cuerponkuña nanaqtinpas phawashallaqkun. Paykunaqa aguantaqku kallpayoq kasqankurayku allinta preparakusqankurayku iman. Noqanchispas preparasqan karanchis Jehová Diosta servinanchispaq. Chaymantapas Jehová Diosqa qowasunmi kallpata. Chaypaqmi ichaqa paypi confiananchis, sichus confiasun chayqa, allintan kallpachawasun preparawasun ima (1 Ped. 5:10).

14. ¿Imaynatan 2 Corintios 12:9, 10 textoq nisqan yanapawanchis sasachakuykunata aguantananchispaq?

¹⁴ Apóstol Pabloqa imaymana sasachakuykunapin tarikuran. Paytaqa millaytan k’amiqku qatikachaqku ima. Chaymantapas juj llakikuykunapin tarikuq, chaymi niran: ‘Sinchi nanaymi noqapi kiska jinaraq kashan’, nispa (2 Cor. 12:7). Chhayna sasachakuykunapiña Pablo tarikuran chaypas manan pisiparanchu, aswanpas Jehová Diospin confiaran (leey 2 Corintios 12:9, 10). Chaymi Jehová Diosqa yanapallaqpuni.

15. ¿Imaraykun Jehová Diospi confiananchis?

¹⁵ Apóstol Pablota jinapaschá noqanchistapas Diospi iñisqanchisrayku runakuna millayta k’amiwasun qatikachawasun ima. Jinaspapas yaqapaschá onqosqa otaq nishu sayk’usqa kashanchis. Sichus Pablo jina Jehová Diospi confiasun chayqa, ima sasachakuypiña tarikuqtinchispas yanapawasunmi payqa.

16. ¿Imatan onqosqa iñiqmasikunapas ruwashallanku?

¹⁶ Camapi kaqkuna, silla de ruedas nisqapi kaqkuna, mana rikuqkunapas, ¿atinkumanchu qhali waynakunawan kuska phawayta? Arí, atinkumanmi. Askha kuraq iñiqmasikuna, onqosqa iñiqmasikunapas phawashallankun wiñay kausayman apaq carrerapi. Ichaqa manan kallpankuwanchu aswanpas Jehová Diospa qosqan kallpanwanmi. Paykunaqa juñunakuykunatan uyarinku telefonopi otaq grabasqata. Diosmantapas  willashallankun familiankuman, doctorkunaman, enfermerakunamanpas.

17. ¿Imaynatan Jehová Dios qhawarin kuraq otaq onqosqa iñiqmasinchiskunata?

¹⁷ Kuraqpas onqosqapas kasqaykirayku manaña llapa munasqaykitachu ruwawaq chaypas, ama llakikuychu nitaq piensaychu: “Manapaschá wiñay kausayman apaq ñanpi phawayta atisaqchu”, nispaqa. Diosqa munakusunkin paypi iñisqaykirayku, askha watakuna servisqaykirayku ima. Kunanmi astawanqa yanapayninta maskhanayki, payqa manan saqerparisunkichu (Sal. 9:10). Aswanmi qanwan kashanqa. Juj onqosqa hermananchismi niran: “Astawan onqopusqayraykun manaña ñaupaqpi jinañachu Diosmanta willani. Ichaqa yachanin jujkunaman pisillataña willasqaywanpas Jehová Dios kusikusqanta”, nispa. Llakisqa kashaspaqa yuyarinanchismi Jehová Dios noqanchiswan kashasqanta. Pabloq ruwasqantataq ruwananchis, paymi niran: “Chaymi kusikuni Cristorayku pisi kallpa kaspa. [...] Pisi kallpa kaspan noqaqa atiyniyoq kani”, nispa (2 Cor. 12:10).

18. ¿Ima sasachakuypin tarikunku llaki onqoywan kaqkuna?

¹⁸ Wiñay kausayman apaq ñanta wakin phawaqkunaqa jujkunaq mana reparasqan otaq mana entiendesqanmi llaki onqoywan kashanku. ¿Imanaqtinmi paykunapaq sasa chhaynapi tarikuy? Sichus pipas makin p’akisqa kashan otaq silla de ruedas nisqapi kashan chayqa, jujkunaqa yanapankun paykunata. Llaki onqoyniyoq runata rikuspan ichaqa piensasunman mana onqosqa kananpaq. Ichaqa onqosqan kashan, chakin p’akisqa runa jinan kashan. Chaymi noqanchisqa paykunatapas khuyapayananchis.

19. ¿Imatan yachasunman Mefibosetwan imachus pasasqanmanta?

¹⁹ Mefibóset runamanta yachaymi jujkunaq mana entiendesqan iñiqmasikunata yanapanman (2 Sam. 4:4). Mefibosetqa wist’un karan. Rey Davidtaq mana allinta yachashaspa payta juzgaran. Mefibosetqa manan chay jawaqa phiñakuranchu. Aswanmi agradecesqa kasharan allinkunata chaskisqanmanta. Chaymantapas Davidtan gracias niran ñaupaqpi khuyapayasqanmanta (2 Sam. 9:6-10). Mana allintaña David payta juzgaran chaypas allinkuna pasashasqanpin payqa masta piensaran. Davidña pantaran chaypas, manan chaywanchu phiñakuran nitaq Diostachu tumparan Davidpa chay ruwasqanmanta. Aswanmi Diospa churasqan reyta yanapaypi yuyayninta churaran  (2 Sam. 16:1-4; 19:24-30). Jehová Diosqa yanapawanachispaqmi Mefibosetpa imachus ruwasqanta Bibliapi qelqachiran (Rom. 15:4).

20. ¿Imatan wakin iñiqmasikuna ruwashanku llaki onqoywanña kashanku chaypas? ¿Imaynatan Jehová Dios qhawarin paykunaq ruwasqankuta?

²⁰ Sinchi llakisqa kaspan wakin iñiqmasikunaqa sapa p’unchaypas mana munankuchu juj runakunawan kayta. Chaywanpas jamushallankun juñunakuykunaman asambleakunamanpas. Chaymantapas willashallankun Diosmanta sasaña mana reqsisqanku runakunawan rimay kaqtinpas. Sichus chhaynapi tarikushanki chayqa, ama qonqaychu askha iñiqmasikunan qan jina kashanku. Jinaspapas Jehová Diosqa maytan kusikun sonqomanta kallpachakusqaykiwan. Aguantasqaykiwanmi rikuchishanki Jehová Dios yanapasqasuykita kallpata qosqasuykitapas * (Filip. 4:6, 7; 1 Ped. 5:7). Jehová Diosninchisqa anchatan kusikun llaki onqoywanña otaq ima onqoywanña kashaspapas payta servishallaqtinchis.

21. ¿Imata ruwananchispaqmi Jehová Dios yanapawashallasun?

²¹ Qhawarisqanchis jina ñaupa tiempopi juj carrerapi phawaqkunaqa jujnillanku premiota chaskinankupaqmi phawaqku. Jehová Diosta serviqkunan ichaqa tukukuykama aguantasun chayqa llapallanchis wiñay kausay premiota chaskisunchis (Juan 3:16). Juj carrerapi phawaq runakunaqa kallpayoq waynan kananku, mana chayqa manan ganayta atinkumanchu. Noqanchismi ichaqa kuraqña onqosqaña kashanchis chaypas wiñay kausayman apaq carrerapi phawashallanchis (2 Cor. 4:16). Jehová Diospa yanapayninwanqa tukunanchiskaman chay carrerata phawasunchis.