Sichus juj hermano esposanmanta divorciakuspa jujwan casarakunman chayqa ñaupaq kaq casarakusqanqa manan valenñachu. Chayta allinta entiendenanchispaq Jesuspa nisqanmanta yachasun.

Mateo 19:9 textopin Jesús niran imaraykullas casarasqakuna divorcianakunanku chayta. Chay textopin nin: “Pipas esposan qhelli juchaman mana urmashaqtin paymanta t’aqakuspa jujwan casarakunman chayqa, pantay juchamanmi urmashanman”, nispa. Jesuspa nisqan jina casarasqakunaqa qhelli jucha kallaqtinmi divorcianakuyta atinku. Ichaqa sichus juj hermano esposanmanta divorciakunman qhelli jucha mana kashaqtin jinaspa jujwan casarakunman chayqa qhelli juchamanmi urmashan. a

Sichus juj hermano qhelli juchata ruwanman jinaspa esposanmanta divorciakunman chayqa, ¿librepunichu kanman jujwan casarakunanpaq? Manapaschá. Juj hermano qhelli juchamanña urmanman chaypas esposanmi qhawarinan divorciakunqachus icha perdonanqachus chaytaqa. Esposan divorciakuyta munaqtinqa divorcianakunankupaq documentotan firmananku, chhaynapin iskayninku libre kanku jujmanta casarakunankupaq.

Mayninpiqa yaqapaschá hermanaqa qosanpa qhelli jucha ruwasqanta perdonayta munanman chhaynapi paymanta ama divorciakunanpaq. Chhaynaña kaqtinpas yaqapaschá qosaqa esposanwan manaña casarasqa kayta munaspa paymanta divorciakapunman. Esposanña perdonayta munaran chaypas paymanta divorciakuspaqa manan Bibliaq nisqanman jinachu ruwashanman, chayraykun mana atinmanchu jujwan casarakuytaqa. Ichaqa sichus Bibliaq nisqanta mana kasukuspa esposanmanta divorciakunmanpuni jinaspa jujwan casarakunman chayqa jujmantan qhelli juchata ruwashanman. Chay pasaqtinqa jujmantan umalliqkunaqa comité judicial nisqata ruwananku (1 Cor. 5:1, 2; 6:9, 10).

Sichus juj hermano Bibliaq nisqanta mana kasukuspa jujwan casarakunman chayqa, ¿imaynatan iñiq t’aqapi iñiqmasinchiskuna chayta qhawarinkuman? Bibliaq nisqanman jina, ¿valenmanraqchu ñaupa casarakusqan? ¿Atinmanraqchu divorciasqa hermana ñaupaq kaq qosanta perdonayta? ¿Pantay juchapichu juj hermano kashanman esposanmanta divorciakuspa jujwan casarakuspa?

Ñaupaqpin piensaranchis esposanmanta divorciakuspa jujwan casarakuq hermanoqa qhelli juchapi kananpaq ¿Imarayku? Ñaupaq kaq esposan manaraq wañupusqanrayku, manaraq jujwan casarakusqanrayku otaq mana ima qhelli juchamanpas urmasqanrayku. Ichaqa manan Jesusqa chaymantaqa imaniranpaschu. Aswanpas yachachiranmi qhelli jucha mana kashaqtin esposanmanta divorciakuspa jujwan casarakuspaqa pantay juchaman urmasqanta. Chhaynaqa,  sichus juj iñiqmasi pantay jucha kaqtin esposanmanta divorciakapunman jinaspa jujwan casarakapunman chayqa manañan ñaupaq casarakusqanqa valenñachu.

Sichus juj hermano esposanmanta divorciakuspa jujwan casarakunman chayqa manañan ñaupaq kaq esposaqa atinmanñachu ñaupaq kaq qosanta perdonayta. Ñaupaq kaq esposaqa manañan chaymantaqa llakikunanñachu. Chhaynaqa, manan ñaupaq kaq esposan kausasqanraykuchu jujwan casarakuq hermanotaqa nisunman: “Payqa juchapin kashan”, nispaqa. b

Ñaupaqpi yachamusqanchis jina yaqapaschá juj hermanoqa qhelli juchaman urmasqanrayku divorciakapuran. Chaymantapas yaqapaschá juj hermanoqa qhelli jucha mana kashaqtin esposanmanta divorciakuspa jujwan casarakunman. Otaq qhelli jucha mana kashaqtin esposanmanta divorciakusqan qhepamanña qhelli juchaman urmanman, jinaspa jujwan casarakunman ñaupaq kaq esposanña perdonayta munanman chaypas. Qhelli jucha mana kashaqtin jujwan casarakuspaqa pantay juchamanmi urmashan, chhaynapin ñaupaq kaq casarakusqanqa manaña valenñachu. 1980 watamanta, 15 febrero killamanta, La Atalaya qelqanchispi 30 paginapi nisqan jina, esposanmanta divorciakuspa jujwan casarakuq hermanoqa manañan atinmanchu ñaupaq kaq esposanwan jujmanta casarakuytaqa. Chhaynaqa, ñaupaq kaq casarakusqanqa manañan valepunñachu.

Sichus juj hermanonchis qhelli jucha mana kashaqtin esposanmanta divorciakuspa jujwan casarakunman chayqa pantay juchamanmi urmashanman. Chhayna juchapi urmaq hermanotaqa umalliqkunan comité judicial nisqata ruwanku. Sichus chay hermano juj hermanawan jujmanta casarakunman chayqa chay hermanatapas comité judicial nisqatan ruwanqaku qhelli juchaman urmasqankurayku. Chhaynaqa manapaschá chay hermanoqa usqhayllachu Diospa llaqtanpi ima llank’aytapas chaskikunqa. Chaypaqqa yaqapaschá unayta suyakunan kanqa. Chaymantapas umalliqkunan qhawarinanku allinchus ñaupaq kaq esposan wawankunapas kashanku icha manachus chayta, chayman jinañan atinman ima llank’aytapas chaskikuytaqa (Mal. 2:14-16).

Qhelli jucha mana kashaqtin esposanchismanta otaq qosanchismanta divorciakuyqa manan allinchu. Chayta ruwaspaqa imaymana sasachakuykunapin tarikusunman. Chayraykun kallpachakunanchis Jehová Dios jina casado kausayninchista qhawarinanchispaq (Ecl. 5:4, 5; Heb. 13:4).