1, 2. a) ¿Imaynan sientekunchis Jesuspa vidanmanta yachaspa? b) ¿Imatan kay yachachikuypi yachasunchis?

 MAYQEN familianchispas wañupuqtinqa sonqonchismi nanan. Wañupusqan p’unchaykuna qhepamanqa astawanraqmi yuyarinchis imaymana nanayninkunata imayna wañupusqantapas, chaykunata yuyarispaqa waqanchisraqmi. Ichaqa tiempoq pasasqanman jinaqa pisi-pisimantan chaykunata qonqapunchis, jinaspa yuyarinchis imayna runa kasqanta, chansakuqchus asichikuqchus kasqanta, imakunatas allinninchispaq niwarqanchis chaytapas.

² Chhaynatan Jesuspa ñak’arisqanta wañupusqanta yuyarispapas sonqonchisraq nanan. Chaykunatan yuyarinchis Jesuspa wañupusqanta yuyarinapaq killapi Bibliata leespa (1 Cor. 11:24, 25). Ichaqa noqanchisrayku ruwasqanta yachaspaqa anchatan kusikunchis. Chaymantapas imakunatan kay tiempopi ruwashan imakunatan jamuq tiempopipas ruwanqa chayta yachayqa anchatan kallpachawanchis. Chaykunapin reparanchis Jesusqa noqanchista munakuwasqanchisrayku wañusqanta. Chhaynaqa, ¿imaynatan chay ruwasqanmanta agradecido kasqanchista rikuchisunman? Chaykunamantan kay yachachikuypi yachasunchis.

3. ¿Imaraykun agradecido kashanchis Jesús noqanchisrayku wañusqanmanta?

³ Maytan agradecekunchis Jesuspa kausayninmantapas wañusqanmantapas yuyarispaqa. Kay pachapi Jesús kashaspaqa runakunatan yachachirqan imatas Diospa gobiernon ruwanqa chayta, chay yachachikuykunaqa may allinpunin noqanchispaqqa. Jesuspa wañusqanraykun atinchis Jesuswanpas Jehová Dioswanpas  amigontin kayta, chaymi chay ruwasqankumantaqa anchata agradecikunchis. Jesuspi iñiqkunaqa sumaq suyakuyniyoqmi kanchis, qhepa tiempomanqa juj sumaq paraisopin tiyasunchis, wajmantan wañuqninchiskunawanpas tupasunchis (Juan 5:28, 29; Rom. 6:23). Ichaqa manan Diosmanpas Jesusmanpas pagayta atisunmanchu noqanchisrayku tukuy ruwasqankumantaqa (Rom. 5:8, 20, 21). Chhaynaqa, ¿imaynatan paykunaman rikuchisunman agradecido kasqanchista?

4. ¿Imatan María Magdalena ruwarqan Jesuspa ruwasqanmanta agradecido kasqanta rikuchinanpaq? (Kay parrafopaq dibujota qhaway).

⁴ Yachasun imas pasarqan María Magdalenawan chayta. Payqa khuyaytan ñak’arisharqan, paypa cuerponpiqa qanchis supaykunan kasharqan, chaywanqa mana valeqpaq jinachá qhawarikurqan. ¿Imaynan pay sientekunman karqan cuerponmanta chay supaykunata Jesús orqopuqtin? May agradecisqachá payqa kasharqan, chayraykuchá Jesusta qatikurqan, kaqninkunatapas kallpantapas qorqan Jesustapas discipulonkunatapas sumaqta atiendenanpaq (Luc. 8:1-3). Mariaqa kusisqan kasharqan Jesús payta yanapasqanmanta, chaywanpas payqa manan yacharqanchu qhepaman Jesús imachus ruwananta. Jesusqa vidantan llapa runakunarayku qonan karqan chhaynapi paypi iñiqkuna wiñay kausayta chaskinankupaq (Juan 3:16). Mariaqa tukuy atisqantan ruwarqan agradecido kasqanta rikuchinanpaq, Jesusta wañuchisqanku p’unchaypas Mariaqa chaypin kasharqan Jesustapas jujkunatapas kallpachananpaq (Juan 19:25). Jesuspa wañupusqan qhepamanpas Mariaqa iskay warmikunapiwanmi Jesuspa sepulturanman rirqanku sumaq q’apaq jawinakunata apayukuspa chaywan Jesuspa cuerponta llusinankupaq (Mar. 16:1, 2). Jehová Diosqa bendecirqanmi Mariataqa chay ruwasqanmanta. ¡May kusisqachá kasharqan Jesuspa kausarimpusqanta rikuspaqa paywan tupaspapas! Jesús kausarimpuspaqa Mariawanmi ñaupaqta rimarqan (Juan 20:11-18).

5. ¿Imaynatan Jehová Diostapas Jesustapas tukuy ruwasqankumanta agradecido kasqanchista rikuchisunman?

⁵ Noqanchispas agradecido kasqanchistaqa  rikuchillasunmantaqmi Jehová Diostapas Jesustapas noqanchisrayku imaymana ruwasqankumanta. ¿Imaynata? Tiemponchista, kallpanchista, qolqenchista iman churasunman Diospa gobiernonta yanapakunanchispaq. Yaqapaschá Dios yupaychana wasikuna allichaypi otaq jatarichiypipas yanapakusunman.

6. ¿Imaraykun nisunman: “Jesuspa wañusqanqa juj regalon sapanka jujninchispaq”, nispa?

⁶ Jehová Diospas Jesuspas may munakuwasqanchispi piensaspaqa kallpachakunchismi paykunatapas munakunanchispaq (1 Juan 4:10, 19). Jesús noqanchisrayku wañusqanta yachaspaqa astawanraqmi paykunata munakunchis. Apóstol Pablopas may agradecisqan kasharqan chay regalo chaskisqanmantaqa, chayraykuchá payqa Galacia iñiq t’aqakunaman carta apachisqanpi qelqarqan: “Diospa Churinpi iñispan kausashani, paymi noqata munakuwaspa noqarayku wañurqan”, nispa (Gál. 2:20). Jesuspa wañusqanraykun sapankanchispas atinchis Jehová Dioswan amigontin kayta (Juan 6:44). ¿Imaynan sientekunki Jehová Dios qanrayku wawanta kachamusqanmanta? ¿Manachu astawan munakunki Jehová Diosta churin Jesustapas? Chaymi tapukunanchis: “¿Imata ruwaspan rikuchiyman agradecido kasqayta Jehová Diospas Jesuspas noqarayku ruwasqankumanta?”, nispa.

7. Fotopi rikusqanchis jina, ¿imata ruwaspan rikuchillanchistaq Jehová Diostapas Jesustapas munakusqanchista? (2 Corintios 5:14, 15; 6:1, 2).

⁷ Jehová Diostapas Jesustapas munakusqanchismi tanqawanchis jujkunata munakunanchispaq (leey 2 Corintios 5:14, 15; 6:1, 2). Chay munakuytaqa rikuchinchis llapa runakunaman Jehová Diosmanta yachachispan. Ima colorniyoqña kankuman chaypas, qhapaqña, wajchaña, ima llaqtamantaña kankuman chaypas willanchismi Jehová Diosmantaqa. Chayta ruwaspan Jehová Diosta yanapakushanchis, “payqa llapa runapas salvasqa kanantan munan, cheqaq kaqtapas allinta yachanankutan munan” (1 Tim. 2:4).

8. ¿Imata ruwaspan rikuchisunman Jehová Diostapas Jesustapas munakusqanchista?

 ⁸ Chaymantapas sonqomantan hermanonchiskunata munakunanchis, chayta ruwaspaqa Jehová Diostapas Jesustapas munakusqanchistan rikuchinchis (1 Juan 4:21). Chaymi sasachakuykunapi tarikuqtinkupas atisqanchisman jina hermanonchiskunata yanaparinanchis. Chaymantapas kallpachakunanchismi llakipi tarikuq hermanonchiskunata sonqochananchispaq, onqosqa tarikuq hermanonchiskunaman visitananchispaq, llaki onqoywan tarikuq hermanonchiskunatapas kallpachananchispaq ima (2 Cor. 1:3-7; 1 Tes. 5:11, 14). Chaymantapas llapa hermanonchiskunapaqmi Jehová Diosmanta mañapunanchis, Bibliaq nisqan jina “chanin runaq rogakuyninqa ancha atiyniyoqmi jujkunata yanapananpaq” (Sant. 5:16).

9. ¿Imata ruwaspan rikuchillasunmantaq hermanonchiskunata munakusqanchista?

⁹ ¿Imaynatan rikuchillasunmantaq hermanonchiskunata munakusqanchista? Paykunawan sumaqta kausaspan. Imataña ruwawasunman chaypas sonqomantan paykunata perdonananchis, Jehová Dios imachus ruwasqanpin piensananchis. Jehová Diosqa sapallan churintan kay pachaman kachamurqan sinchita sufrispa wañunanpaq chhaynapi juchanchiskunamanta perdonasqa kananchispaq, chayraykun noqanchispas kallpachakunanchis hermanonchiskunata sonqomanta perdonananchispaq. Noqanchisqa manan Jesuspa willasqan millay kamachi jinaqa kananchischu, chay kamachitaqa patronninmi manunmanta perdonapurqan, paymi ichaqa juj kamachimasinta mana perdonayta munarqanchu (Mat. 18:23-35). Noqanchisqa manan chay millay kamachi jinachu kananchis. Sichus mayqen hermanowanpas phiñachinakurqanchis chayqa tukuy atisqanchistan kallpachakunanchis manaraq Jesuspa wañupusqanta yuyarishaspa iñiqmasinchiswan sumaqllata allichananchispaq (Mat. 5:23, 24). Chayta ruwaspan rikuchisunchis Jehová Diostapas Jesustapas munakusqanchista.

10, 11. ¿Imaynatan umalliqkuna rikuchinkuman Jesuspa kamachisqanta kasukusqankuta? (1 Pedro 5:1, 2).

¹⁰ ¿Imaynatan umalliqkunapas rikuchinkuman Jehová Diostapas Jesustapas munakusqankuta? Iñiq t’aqapi llapa iñiqmasikunata sumaqta cuidaspan (leey 1 Pedro 5:1, 2). Jesusqa chayta ruwananpaqmi apóstol Pedrotapas nirqan, Pedroqa kinsa kutitan Jesusta negarqan, chay qhepamanqa maytachá munarqan Jesús perdonananta. Jesusqa kausarimpusqan qhepamanmi Pedrota tapurqan: “Juanpa wawan Simón, ¿kaykunamanta astawanchu munakuwanki?”, nispa. Jinan Pedroqa nirqan: “Arí, Señor, yachashankimá riki qanta munakusqaytaqa”, nispa. Jesustaq payta nirqan: “Chhaynaqa, ovejachaykunata michipuway”, nispa (Juan 21:15-17). Apóstol Pedroqa munasharqanmi Jesuspa kamachisqanta kasukuyta, jinaspapas Jesusta munakusqanraykun iñiq t’aqapi hermanokunata sumaqta cuidarqan.

¹¹ Jesuspa wañupusqan p’unchayta manaraq yuyarishaspa ¿imaynatan umalliqkuna rikuchinkuman Jesuspa kamachisqanta kasukusqankuta? Umalliqkunaqa kallpachakunankun llapa iñiqmasikunata kallpachanankupaq, iñiyninkupi chiriyapuq hermanokunatapas yanapanankupaq, chayta ruwaspan rikuchinqaku Jehová Diostawan Jesustawan munakusqankuta (Ezeq. 34:11, 12). Chaymantapas sumaqtan napaykunanku juñunakuykunaman chayllaraq jamuq estudiantekunata, jinaspapas paykunataqa iñiqmasinchista jinañan qhawarinanku chhaynapi astawan iñiyninkupi wiñarinankupaq.

12. ¿Imaynatan Jesuspa nisqan kallpachawanchis ama manchakuq kananchispaq? (Juan 16:32, 33).

¹² Manaraq wañupushaspan Jesusqa discipulonkunata nirqan: “Kay pachapiqa imaymana sasachakuykunapin tarikunkichis, ichaqa,  ¡kallpachakuychis!, noqaqa ñan atipaniña kay pachata”, nispa (leey Juan 16:32, 33). ¿Iman Jesusta yanaparqan enemigonkunata ama manchakunanpaq, aswanpas wañupunankama junt’aq sonqolla kananpaq? Jehová Diospi confiaymi yanaparqan. Jesusqa yacharqanmi discipulonkunaqa sasachakuykunapi tarikunankuta qatiykachasqa ima tarikunankutapas, chaymi Jehová Diosta valekurqan discipulonkunata cuidananpaq (Juan 17:11). ¿Imaynatan chaymanta yachay yanapawanchis ama manchakuq kananchispaq? Yachasqanchis jina Jehová Diosqa tukuy atiyniyoqmi, chaymi mana mayqen enemigonchistapas manchakunanchischu (1 Juan 4:4). Jinaspapas noqanchisqa manan sapallanchischu kashanchis Jehová Diosmi cuidashawanchis, sichus paypi confiasunchis chayqa manan imatapas manchakusunchu.

13. ¿Imaynatan Arimatea llaqtayoq José rikuchirqan mana manchakuq kasqanta?

¹³ Yachasun Arimatea llaqtayoq José runamanta. Joseqa Jatun Juntamanta jujninmi karqan allin respetasqataqmi karqanpas, ichaqa runakunatan manchakurqan. Apóstol Juanpa nisqan jina Joseqa “Jesuspa discipulonmi karqan, ichaqa judiokunata manchakusqanraykun mana chayta jujkunaman willarqanchu” (Juan 19:38). Manchakurqanña José runakunata chaypas tiempowanqa kallpatan jap’irqan, jinaspa Pilatomanta permisota mañakurqan Jesuspa cuerponta apananpaq (Mar. 15:42, 43). Chay qhepamanqa llapa runakunan yacharqanku Joseqa Jesuspa qatikuqnin kasqanta.

14. ¿Imatan ruwananchis runakunata ama manchakunanchispaq?

¹⁴ Noqanchispas yaqapaschá José jina jujkunata manchakunchis, yaqapaschá manchakunchis escuelanchispipas llank’ananchispipas Jehová Diospa testigon kasqanchista jujkunaman willayta otaq manchakushanchis bautizakuyta Diosmanta willaq lloqsiytapas. Chhaynapi tarikuspaqa manan pisipananchischu, aswanpas Jehová Diospa yanapaynintan mañakunanchis ama manchakuq kananchispaq. Jehová Diosqa uyarinqan mañakusqanchista, paymi yanapawasun runakunata ama manchakunanchispaq (Isa. 41:10, 13).

15. ¿Imaynan Jesuspa discipulonkuna karqanku Jesuspa kausarimpusqanta rikuspa? (Lucas 24:52, 53).

¹⁵ Jesuspa wañupusqan qhepamanmi discipulonkunaqa sinchi llakisqa kasharqanku. Jesusqa allin amigontinmi discipulonkunawan karqanku chaymi wañupusqan qhepamanqa mana ima suyakuyniyoq jina llakisqa qhepakurqanku (Luc. 24:17-21). Kausarimpusqan qhepamanmi ichaqa Jesusqa discipulonkunaman rijurirqan jinaspa willarqan wañusqanwan Bibliapi profeciakunata  junt’asqanta. Jinaspapas juj sumaq llank’aytan paykunaman qorqan (Luc. 24:26, 27, 45-48). Jesusqa tawa chunka p’unchaykuna qhepamanmi janaq pachaman kutipurqan, chay kutipaqqa manañan llakisqañachu Jesuspa discipulonkunaqa karqanku aswanpas kusisqan kasharqanku jujmanta kausarimusqanta rikuspa. Jinaspapas yacharqankun Jesusqa paykunata tukuy tiempo yanapananta, chhaynapi llank’ayninkuta junt’anankupaq. Chaymi tukuy tiempo kusisqa Jehová Diosta servirqanku (leey Lucas 24:52, 53; Hech. 5:42).

16. ¿Imata ruwananchispaqmi kallpachakunanchis Jesuspa discipulonkuna jina?

¹⁶ Noqanchispas Jesuspa discipulonkuna jinan kallpachakunanchis Jehová Diosta sapa p’unchay kusisqa servinanchispaq. Chaytaqa manan Jesuspa wañusqanta yuyarinapaq semanakunallapichu ruwananchis, aswanpas sapa p’unchaymi kallpachakunanchis Jehová Diospa gobiernonta ñaupaqman churananchispaq. Chaytan wakin hermanonchiskunapas ruwashanku, wakinqa llank’anankutan cambiarqanku astawan Diosmanta willanankupaq, juñunakuykunaman rinankupaq, familiapi sapa semana estudianankupaqpas. Wakinqa wasinkuta imaymanankuta saqespan juj ladokunaman astakurqanku Diosmanta astawan willanankupaq. Noqanchispas paykuna jinan kallpachakunanchis Jehová Diosta astawan servinanchispaq chayta ruwasunchis chayqa Jehová Diosmi bendeciwasunchis paypa gobiernonta ñaupaqman churasqanchismanta (Prov. 10:22; Mat. 6:32, 33).

17. ¿Imata ruwananchispaqmi kallpachakunanchis Jesuspa wañupusqan p’unchay manaraq chayamushaqtin? (Kay parrafopaq fotota qhaway).

¹⁷ Maytan munashanchis martes 4 abril p’unchay chayamunanta, chay p’unchaypiqa Jesuspa wañupusqantan yuyarisunchis. Ichaqa manan chay p’unchaytaraqchu suyananchis Jesuspa vidanmanta, wañusqanmanta, Jehová Diospas Jesuspas anchata munakuwasqanchismanta yuyaymanananchispaqqa. Aswanpas ñaupaqmantañan tiemponchista t’aqananchis chaykunapi yuyaymanananchispaq. Chaypaqmi leesunman Mosoq Pacha Bibliapi “Astawan yachanapaq B12” nisqata “Jesuspa wañupunan semana” nisqa parteta. Chaykunata estudiaymi yanapawasun agradecikuq kananchispaq, munakuq kananchispaq, ama manchakuq kananchispaq, Jehová Diosta kusisqa servinanchispaqpas. Kallpachakunanchismi chaypi yachasqanchisman jina kausananchispaq, tukuy chaykunata ruwananchispaq kallpachakusunchis chayqa allinpaqmi Jesusqa qhawarinqa llapa kallpachakusqanchista (Apo. 2:19).