1, 2. ¿Imaynatan Isaías 65:16, 17 textoq nisqan kallpachawanchis sasachakuykunata aguantashanallanchispaq?

JUJ kaq asambleanchispa titulonmi niran: “¡Kallpachakushallay!”, nispa. Chay asambleanchismi aparikuran 2017 watapi. Chay asambleapin kallpachawaranchis sasachakuykunata aguantashanallanchispaq. Chay asambleanchispa aparikusqanmantaqa ñan tawa wataña pasarun, chaywanpas kallpachakushanallanchismi sasachakuykunata aguantashanallanchispaq.

² Llapanchismi imaymana sasachakuykunapi tarikushanchis. Wakinninchispaqqa yaqapaschá familianchiskunapas amigonchiskunapas wañukapuranku. Chaymantapas yaqapaschá sinchita onqoshanchis otaq kuraqña kapushanchis. Yaqapaschá terremotopas unu lloqllapas pasasqanrayku mana imayoq qhepakapuranchis. Wakinninchisqa yaqapaschá coronavirus onqoywanpas jap’ichikuranchis otaq qatiykachasqapas kashanchis. Ichaqa pisi tiempollamantan llapa sasachakuyninchiskunaqa tukukapunqa (leey Isaías 65:16, 17).

3. ¿Imaraykun kallpachakunanchis sasachakuykunata aguantananchispaq?

³ Kay pachapi kausayqa sinchi sasapunin kashan. Llapanchismi imaymana sasachakuykunapi tarikushanchis, ichaqa pisi tiempollamantan aswan sasachakuykunapiraq tarikusunchis (Mat. 24:21). Chaymi kunanmantapacha mana pisipaspa sasachakuykunata aguantashanallanchis. Jesusmi niran: “Allinta aguantaspan vidaykichistaqa salvankichis”, nispa (Luc. 21:19). Wakin hermanonchiskunapas imaymana sasachakuykunapin tarikushanku, ichaqa pacienciawanmi chaykunata aguantashanku. Paykunaq ejemplonpi piensaymi yanapawasunchis sasachakuykunata aguantashanallanchispaq.

4. ¿Piqpa ejemplonmi yanapawasunchis sasachakuykunata aguantananchispaq?

⁴ ¿Piqpa ejemplonmi yanapawasunchis sasachakuykunata aguantananchispaq? Jehová Diospa ejemplonmi. Kay pachataqa Satanasmi kamachishan, chaymi kay pachapi kausayqa sinchi  mana allinpuni kashan. Jehová Diosqa atiyniyoqmi Satanastapas millay runakunatapas chinkachinanpaq, ichaqa pacienciawanmi chaykunata aguantashan (Rom. 9:22). ¿Imakunatan Jehová Dios pacienciawan aguantashan? Kunanmi isqonmanta yachasunchis.

5. a) ¿Imaynatan Saqra Jehová Diospa sutinta qhellichashan? b) ¿Imaynan sientekunki Jehová Diospa sutinta pisichasqankuta rikuspa?

⁵ Sutinta pisichasqankuta. Jehová Diosqa munanmi sutinta respetananchista (Isa. 42:8). Ichaqa 6.000 watakuna masñan Saqraqa Jehová Diospa sutinta qhellichashan (Sal. 74:10, 18, 23). Chayqa qallariran Edén huertapin, chaypin Saqraqa llullakuspa Jehová Diosta yanqamanta tumparan, jinaspa Adantawan Evatawan creechiran kusisqa kanankuta Jehová Dios jark’akusqanta (Gén. 3:1-5). Chhaynatan Saqraqa kunankamapas Jehová Diospa sutinta qhellichashan. Chayta rikuspan Jesusqa kay pachapi kashaspa sinchitapuni llakikuran. Chaymi discipulonkunata niran: “Qankunaqa khaynatan mañakunkichis: ‘Yayayku janaq pachapi kaq, sutiyki ch’uyapaq jap’isqa kachun’”, nispa (Mat. 6:9).

6. ¿Imaraykun Jehová Dios jinallata qhawashan kamachikunanpaq derechoyoq kasqanta pisichasqankuta?

⁶ Kamachikunanpaq derechoyoq kasqanta iskayachisqankuta. Jehová Diosllan allin kamachikuqqa, payllan janaq pachapipas kay pachapipas kamachikunanpaq derechoyoqqa (Apo. 4:11). Saqran ichaqa angelkunatapas runakunatapas engañashan. Payqa munanmi “Jehová Diosqa manan kamachikunanpaq derechoyoqchu” nispa piensananchista. Chayta sut’inchananpaqmi Jehová Diosqa jinallata qhawashan runakuna kamachinakunanchista (Jer. 10:23). Ichaqa pisi tiempollamantan Saqrapas runakunapas yachanqaku Jehová Dioslla allin kamachikuq kasqanta. Paypa gobiernonmi kay pachamanqa thaj kausayta apamunqa.

7. a) ¿Pikunan Jehová Dios contra jatariranku? b) ¿Imatan pisi tiempollamanta Jehová Dios paykunawan ruwanqa?

⁷ Angelkunapas runakunapas Jehová Dios contra jatarisqankuta. Jehová Diosqa ch’uyatan angelkunatapas runakunatapas kamaran. Ichaqa juj angelmi Jehová Dios contra jatariran, chhaynapin Satanasman tukupuran. Adanpas Evapas ch’uya runakunan karanku, ichaqa paykunapas Jehová Dios contran jatariranku (Jud. 6). Tiempowanqa wakin angelkunapas runakunapas Jehová Diospa contranpin jatarillarankutaq. Chay qhepamanpas kikin Israel llaqtanmi Jehová Dios contra sayariran, jinaspa pantasqa dioskunata adorayta qallariranku (Isa. 63:8, 10). Angelkunaña runakunaña Jehová Dios contra jatariranku chaypas Jehová Diosqa llapa chaykunatan aguantashan. Ichaqa pisi tiempollamantan phiñakuynin p’unchay chayamuqtin llapa pay contra kaqkunata wiñaypaq chinkachipunqa. ¡Chay p’unchayqa may kusikunapaqchá Jehová Diospaqpas noqanchispaqpas kanqa!

8, 9. a) ¿Ima llulla yachachikuykunatan Satanás Jehová Diosmanta paqarichiran? b) ¿Imatan ruwananchis Satanás llulla kasqanta rikuchinanchispaq?

⁸ Tuta p’unchay Satanás Jehová Diosta yanqamanta tumpasqanta. Satanasmi Jobta tumparan interesraykulla Jehová Diosta servisqanta (Job 1:8-11; 2:3-5). Chhaynatan kunanpas llapa Jehová Dios serviqkunata tumpashan (Apo. 12:10). Chhaynataña Satanás noqanchistapas tumpawashanchis chaypas kallpachakunanchismi ima sasachakuytapas aguantashanallanchispaq, chhaynapin rikuchisunchis Satanás llulla kasqanta. Chayta ruwasunchis chayqa Jehová Diosmi Jobta jina bendeciwasunchis (Sant. 5:11).

⁹ Satanasmi religionpi umallikunata utilizan Jehová Diosmanta llullakuspa yachachinankupaq. Chaymi runakuna imaymana sasachakuykunapi tarikuqtinku khaynata yachachinku:  “Diospa castigonmi kaykunaqa”, nispa. Chaymantapas juj wawa wañupuqtinmi tayta-mamankuta ninku: “Diosmi cielopi juj angelchata munaran, chaymi wawaykitaqa apakapun”, nispa. Chhayna llulla yachachikuykunawanmi Jehová Diosta k’aminku. Noqanchismi ichaqa yachanchis chay yachachikuykunaqa mana cheqaqchu kasqanta. Chayraykun onqosqaña kashaspapas ima sasachakuykunapiña tarikushaspapas manapuni chhaynapi tarikusqanchismantaqa Jehová Diosta tumpananchischu. Aswanpas llapa runakunamanmi willamunanchis Jehová Diosqa munakuq Dios kasqanta, pisi tiempollamanta llapa ñak’ariykunata tukuchipunantapas. Chayta ruwaspan Jehová Diosta kusichisunchis, Satanaspa llulla kasqantataq sut’iman orqosunchis (Prov. 27:11).

10. ¿Imatan Jehová Diosmanta yachasunman Salmos 22:23, 24 textoq nisqanmanta?

¹⁰ Serviqninkunaq ñak’arisqanta. Jehová Diosqa khuyapayakuq Diosmi. Payqa sinchitan llakikun imaymana sasachakuykunapi tarikuspa ñak’ariqtichis, onqoqtinchis, payta servisqanchisrayku runakuna qatiykachawaqtinchis ima (leey Salmos 22:23, 24). Bibliaq nisqan jina ñak’ariqtinchisqa Jehová Diospa sonqonmi nanan, chaymi pisi tiempollamanta kay pachapi llapa ñak’ariykunata chinkachipunqa (Éx. 3:7, 8; Isa. 63:9). Chaymi Bibliapas nin: “Paymi ñawinkumanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu. Arí, ñaupaq kaqkunaqa manañan kanqachu”, nispa (Apo. 21:4).

11. ¿Imaynan Jehová Dios sientekun amigonkuna wañupuqtin?

¹¹ Amigonkunaq wañusqanta. ¿Imaynan Jehová Dios sientekun amigonkuna wañupuqtin? Sonqonmi nanan. Ichaqa maytan munashan paykunata jujmanta kausarichimpuyta (Job 14:15). Diosqa maytachá munashan amigon Abrahanwan tupayta (Sant. 2:23).  Chaymantapas maytachá munashan Moisesta kausarichimpuyta (Éx. 33:11). Munashanchá Davidpa takisqantapas juj salmistakunaq takisqantapas jujmanta uyariyta (Sal. 104:33). Jehová Diospa amigonkunaña wañupuranku chaypas Jehová Diosqa manan paykunata qonqanchu (Isa. 49:15). Aswanpas Jehová Diosqa yuyashallanmi amigonkuna imayna kasqankuta. Chaymi Bibliapas nin: “Paypaqqa llapankupas kausashanmi”, nispa (Luc. 20:38). Pisi tiempollamantan Jehová Diosqa llapa amigonkunata kausarichimpunqa, jinaspan jujmanta paykunaq mañakusqankuta uyarinqa, yupaychasqankutapas kusisqan chaskinqa. Wakinninchispaqqa yaqapaschá munakusqanchis runakuna wañukapuranku, chaymi kausarimpuymanta yachayqa anchatapuni kallpachawanchis.

12. ¿Imakunata rikuspan Jehová Dios llakikun?

¹² Millay runakuna runamasinkuta sufrichisqankuta. Adanwan Evawan Dios contra jatarisqankuqa manapunin allinchu karan. Jehová Diosqa yacharanñan chay causa mana allinkunapi runakuna tarikunankuta. Chaymantapachan runakunaqa runamasinkuta sufrichishanku, Jehová Diosqa cheqnikunmi chhayna runakunata. Ichaqa khuyapayanmi mana imayoq wajcha viudakunatapas mana tayta-mamayoq wajcha wawakunatapas (Zac. 7:9, 10). Astawanqa carcelpi tarikuq hermanonchiskunamantan llakikun. Jinaspapas paykunawan kuskan mana allinkunata aguantashan. Jehová Diosqa anchatapunin munakun payrayku carcelpi tarikuq hermanonchiskunataqa.

13. ¿Imaynatan kay tiempopi runakuna kausashanku? Ichaqa, ¿imatan paykunawan pisi tiempollamanta Jehová Dios ruwanqa?

¹³ Qhelli ruwaykunapi runakunaq purisqankuta. Jehová Diosqa payman rijch’akuqtan kamawaranchis. Satanasmi ichaqa qhelli ruwaykunapi urmananchista munan. Chaytan Noepa tiemponpipas ruwaran. Chaymi Bibliapas nin: “Señor Diosmi rikuran kay pachapi runakunaq sinchi mana allin kasqanta, sonqonkuq lliu yuyaykusqanpas mana allinllapuni kasqantawan. Jinan Señor Diosqa khuyayta llakikuran kay pachapi runata ruwasqanmanta, sonqontapas mayta nanachikuran”, nispa (Gén. 6:5, 6, 11). Kay tiempopi wakin runakunapas chhaynan kashanku. Paykunaqa mana p’enqarikuspan imaymana qhelli ruwaykunapi purishanku. Wakinqa mana casarakuspan tiyanku otaq warmipurapas qharipurapas casarakunku. Chaykunata rikuspan Satanasqa anchatapuni kusikun (Efes. 4:18, 19). Satanasqa astawanmi kusikun Jehová Diosta serviq runakuna qhelli juchaman urmaqtinku. Jehová Diosmi ichaqa mana jinallatachu chaykunata qhawanqa. Pisi tiempollamantan chhayna runakunata wiñaypaq chinkachipunqa.

14. ¿Imatan runakuna kay pachawanpas animalkunawanpas ruwashanku?

¹⁴ Kamasqan allpa pachata malograsqankuta. Kay tiempopi runakunaqa ‘runamasinta mana allinta ruwanallanpaqmi munaychakun’. Chaymantapas manan Jehová Diospa kamachisqanman jinachu animalkunatapas plantakunatapas cuidanku (Ecl. 8:9; Gén. 1:28). Chayta rikuspan científico runakunapas ninku: “Manachus kay allpa pachanchista cuidasunchis chayqa, kay watakunallapin imaymana clase animalkunapas plantakunapas chinkapunqa”, nispa. Chayta uyarispan wakin runakunaqa sinchi llakisqa kashanku. Jehová Diosmi ichaqa ‘allpa pacha malograqkunata ch’usaqman tukuchipunqa’, jinaspa kay pachata sumaq paraisoman tukuchipunqa. ¡Chayqa may kusikunapaqmi! (Apo. 11:18; Isa. 35:1.)

15, 16. ¿Iman yanapawasunchis Jehová Dios jina ima sasachakuykunatapas aguantashanallanchispaq?

¹⁵ Jehová Diosqa ñaupa tiempomantapachan imaymana mana allinkunata aguantashan  (qhaway “ ¿Imakunatan Jehová Dios aguantashan?” nisqata). Jehová Diosqa atinmanmi kunan rato millay runakunata chinkachiyta, ichaqa pacienciawanmi aguantashan, cuidawashanchistaqmi kanpas. Kaypi yuyaykuy: ¿Imatan ruwawaq sichus juj doctor nisunkiman “wawaykiqa malmi nacemunqa, jinaspapas pisi tiempollan kausanqa” nispa nisuqtiyki? Yachawaqña wawayki mal nacemunanta chaypas, kallpachakuwaqmi wawaykita munakusqaykirayku sumaqta cuidanaykipaq ¿riki?

¹⁶ Noqanchispas chay wawa jinan Adanwan Evawan juchallikusqankurayku juchayoq nacemunchis (1 Juan 4:19). Chhaynaña kaqtinpas Jehová Diosqa anchatapunin munakuwanchis, chaymi cuidawashanchispas yanapawashanchispas. Jinaspapas Jehová Diosqa atiyniyoqmi kay pachapi mana allin ruwaykunata tukuchinanpaq. Chaytan pisi tiempollamanta ruwanqa (Mat. 24:36). Jehová Diosqa anchatapunin munakuwanchis. Chaymi kallpachakunanchis ima sasachakuytapas aguantashanallanchispaq.

17. ¿Imaynatan Hebreos 12:2, 3 nisqan yanapawanchis Jesús jina sasachakuykunata aguantananchispaq?

¹⁷ Jesustapas Jehová Diospa ejemplonmi yanaparan imaymana sasachakuykunata aguantananpaq. Paytaqa kay pachapi kashaqtinmi millayta k’amiranku, pisicharanku, k’aspipi warkuspataq wañuchiranku (leey Hebreos 12:2, 3). Noqanchistapas Jehová Diospa ejemplonmi yanapawasunchis sasachakuykunata aguantashanallanchispaq.

18. 2 Pedro 3:9 nisqan jina, ¿imaraykun Jehová Diospa pacienciakusqan allinninchispaq?

¹⁸ (Leey 2 Pedro 3:9). Jehová Diosqa yachanmi millay runakunata jayk’aq chinkachipunanta. Ichaqa pacienciawanmi tukuy mana allin ruwaykunata aguantashan. Pacienciakusqanraykun kunanpas millonninpi runakuna payta servishanku. Manachus aguantanman karan chayqa manan noqanchispas nacesunmanchu karan, manataqmi Jehová Diostapas reqsisunmanchu karan. Chaymi Jehová Diosta agradecekunanchis pacienciayoq kasqanmanta. Chaymantapas kallpachakunanchismi sasachakuykunata aguantananchispaq. Chayta ruwasunchis chayqa sumaq kausaytan paraisopi chaskisunchis. Chaypiraqmi allinta reparasunchis mana allin kausayta Jehová Diospa aguantasqanqa allinninchispaqpuni kasqanta.

19. ¿Imata ruwananchispaqmi kallpachakunanchis, imarayku?

¹⁹ Jehová Diospa ejemplonmi yanapawasunchis ima sasachakuykunatapas kusisqa aguantananchispaq. Jehová Diosqa Satanaspa mana allin ruwasqankunatan rikumushan, ichaqa pacienciawanmi chaykunata aguantashan (1 Tim. 1:11). Jehová Diosqa pisi tiempollamantan sutinta ch’uyanchanqa, kay pachapi millay runakunata chinkachispataq wiñaypaq kamachinqa. Chaytan noqanchisqa pacienciawan suyakunanchis. Sichus kallpachakusunchis imaymana sasachakuykunata aguantananchispaq chayqa kusisqan kasunchis, jinaspapas ‘wiñay kausay coronatan chaskikusunchis’ (Sant. 1:12).