Eclesiastés 5:8 nisqanpi piensasun, chaypin nin: “Mayqen llaqtapipas wajchakuna ñak’arishaqta rikunki, jinallataq chaninchaytapas kuskachaytapas waqllichisqata rikunki chayqa, aman chaywan musphankichu. jatun kamachikuqtaqa juj aswan jatun kamachikuqmi qhawamushan, chay iskay jatun kamachikuqkunatapas aswan jatun kamachikuqraqmi qhawamushan”, nispa.

Kaypi nisqanqa sut’illantan willashan kay pacha gobiernokuna imayna kamachikusqankumanta. Chaymantapas yuyarichiwanchismi Jehová Diosqa runakunaq gobiernonmanta aswan allin gobierno kasqanta, chaymi sonqochawanchis.

Eclesiastés 5:8 rimashan mana allin kaqkunata ruwaq kamachiqmanta, chay kamachikuqmi mana chaninta ruwan wajchakunata. Ichaqa yuyarinanmi paymanta aswan jatun kamachikuq kasqanta, paykunamantapas aswan jatun kamachikuqkuna kasqantapas. Chaywanpas llapa chay gobiernokunaqa mana chanintan ruwankuman, chay jawataq runakunaqa sufrinkuman.

Manaña chaykunata allichayta atisumanchu chaypas, Jehová Diosqa qhawamushanmi llapa kay pachapi gobiernokunaq ruwasqanta, chayqa maytapunin sonqochawanchis. Chaymantapas Jehová Diosmanta mañakuspan llakikuyninchiskunata payman saqesunman (Sal. 55:22; Filip. 4:6, 7). Jehová Diosqa “kay pachantintan qhawashan tukuy sonqo payta serviqkunarayku atiyninta rikuchinanpaq” (2 Crón. 16:9).

Chhaynaqa, Eclesiastés 5:8 nisqanmi yachachiwanchis kay pachapi kamachikuqkunaqa mana kaqllachu kasqankuta, aswanpas juj kamachikuqmantaqa kanpunin aswan atiyniyoq kamachikuqkuna. Astawanqa yuyarichiwanchismi Jehová Dios paykunamanta aswan jatun kamachikuq kasqanta. Tukuy atiyniyoq Diosqa kay pachantintan qhawashan, chanintaqmi kanpas, churin Jesuspas chhaynallataqmi.