1. ¿Jehová Diospa ima prometewasqanchistan suyakushanchis?

 JEHOVÁ DIOSMI prometewanchis wiñay kausayta chaskinanchispaq, chaytan noqanchisqa suyakushanchis. Wakinmi suyakushanku janaq pachapi wiñaypaq kausayta (1 Cor. 15:50, 53). Yaqa llapa runakunataq suyakushanku kay jallp’api wiñaypaq kusisqa kausayta, chaypiqa manan onqoyqa kanqañachu (Apo. 21:3, 4). Janaq pachapiña kay jallp’apiña tiyasun chaypas llapanchismi Jehová Diosta mayta agradecekunchis wiñay kausay suyakuyta qowasqanchismanta.

2. ¿Iman suyakuyniyoq kay?

² ¿Imataq suyakuyniyoq kayri? Bibliaq nisqan jina jamuq tiempopi imapas allin kananta suyakuymi. ¿Imaraykun mana iskayanchischu jamuq tiempopi imapas allin kananpi? Jehová Dios chayta prometewasqanchisraykun (Rom. 15:13). Jinaspapas allintan yachanchis Jehová Diosqa imatapas prometesqantaqa junt’asqanta (Núm. 23:19). Chhaynaqa manan noqanchisqa yanqallachu comunta ninchis: “Jamuq tiempopiqa allillanmi imapas kanqa”, nispaqa. Noqanchisqa allintan Jehová Diostaqa reqsinchis, chaymi jamuq tiempopi suyakuyninchismantaqa manapuni iskayanchischu.

3. ¿Imakunatan kay yachachikuypi yachasunchis? (Salmos 27:14).

³ Jehová Diosninchisqa maytan munakuwanchis, chaymi munan paypi confiananchista (leey Salmos 27:14). Sichus Jehová Diospa prometewasqanchispi mana iskayaspa suyakusun chayqa ima pruebatapas aguantallasunmi, sasachakuykunaña jamunqa chaypas manan llakisqachu kasunchis. ¿Imaynatan suyakuyniyoq kay yanapawanchis? ¿Imaraykun ninchis suyakuyqa ancla jinan casco jinan nispa? ¿Imatan ruwasunman aswan allin suyakuyniyoq kananchispaq? Chaykunamantan kaypi yachasun.

4. ¿Imaraykun suyakuyninchis ancla jina? (Hebreos 6:19).

⁴ Apóstol Pablon suyakuyta anclawan tupanachirqan (leey Hebreos 6:19). Apóstol Pabloqa viajallaqpunin barcopi chaypin rikurqan imaynata sinchi wayra jamuqtin anclaqa barcota qaqata  sayachisqanta. Juj kutinmi barcopi viajashaqtin sinchi wayra jamurqan, jinan marinerokunaqa unuman anclata wijch’uykurqanku chhaynapi barconku rumiman ama waqtakunanpaq (Hech. 27:29, 39-41). Chhaynallataqmi suyakuyninchispas. Ima sasachakuyña jamuqtinpas qaqatan sayachiwanchis chhaynapi Jehová Diosmanta amapuni t’aqakunanchispaq. Noqanchisqa allintan yachanchis kay tiempopi sasachakuykunaqa jamuq tiempopi tukupunanta, chaymi yanapawanchis amapuni pisipananchispaq. Chaymantapas Jesusmi niwarqanchis: “Qankunatapas qatikachallasunkichistaqmi”, nispa (Juan 15:20). Chay ratukunapipas Jehová Diospi suyakuyqa yanapawanchismi. Jehová Diosmi prometewarqanchis junt’aq sonqolla kaqtinchisqa premiota qowananchista.

5. ¿Imaynatan Jesusta suyakuyniyoq kasqan yanaparqan wañuy patapiña tarikurqan chaypas?

⁵ Jesustapas suyakuyniyoq kasqanmi yanaparqan wañupunan p’unchaykama Jehová Diosta tukuy sonqonwan servinanpaq. Payqa yacharqanmi ñak’arichispa wañuchinankuta, chaywanpas Jehová Diospin confiarqan chaymi thaj kasharqan. 33 watapin Pentecostés fiestapi apóstol Pedro Jesusmanta willaq profeciata leerqan. Chaypin nirqan: “Suyakuyniyoqmi kausasaqpas. Qanqa manan Sepulturapi saqerpariwankichu, manataqmi cuerpoy ismunantapas munankichu […]; anchatan kusikusaq sumaqta qhawariwasqaykiwan”, nispa (Hech. 2:25-28; Sal. 16:8-11). Yacharqanña Jesús wañupunanta chaypas Jehová Dios kausarichimpunanpin suyakurqan, jinaspapas janaq pachapi jujmanta papanwan kuska tiyapunanpin piensarqan (Heb. 12:2, 3).

6. ¿Imanirqanmi juj hermanonchis suyakuymanta?

⁶ Kay tiempokunapipas askha hermanonchiskunan imaymana pruebakunata atipashanku suyakuyniyoq kasqankurayku. Rimasunchis Leonard Chinn hermanonchismanta, payqa Inglaterra nacionpin tukuy sonqonwan Jehová Diosta servirqan. Primera Guerra Mundial kasqan tiempopin Leonard hermanonchista carcelman wisq’arqanku guerraman mana riyta munasqanmanta. Paytaqa iskay killan sapallanta wisq’arqanku, chaymantataq sasa llank’anakunata ruwachirqanku. Tiempowanmi pay nirqan: “Chay pruebakunapi tarikuspan sut’ita repararqani Jehová Diospa promesankunapi suyakuy mayta yanapawasqanchista. Profetakunaq, apostolkunaq, Jesuspa ejemplon iman yanapawanchis ima pruebatapas aguantananchispaq. Jinaspapas Bibliapi kaq Jehová Diospa promesankunan yanapawanchis jamuq tiempopi sumaq kausay kananpi astawan piensananchispaq”, nispa. Noqanchispas Leonard hermanonchis jina kallpachakusun suyakuyninchis ancla jina kananpaq.

7. ¿Imaynatan pruebakunata atipasqanchis yanapawanchis aswan suyakuyniyoq kananchispaq? (Romanos 5:3-5; Santiago 1:12).

⁷ Imaymana pruebakunata atipaspaqa astawanmi Jehová Diospa promesankuna junt’akunanpi suyakunchis. ¿Imarayku? Pruebakunapi tarikuspaqa sut’itan reparanchis Jehová Dios yanapawasqanchista. Jinaspapas chay pruebakunata atipaqtinchisqa Jehová Diosqa sumaqtan qhawariwanchis (leey Romanos 5:3-5; Santiago 1:12). Satanasqa maytan munashan chay pruebakunapi tarikuspa pisipananchista, Jehová Diosmi ichaqa yanapawasun chay pruebakunata atipananchispaq.

8. ¿Imaraykun suyakuyninchis casco jina? (1 Tesalonicenses 5:8).

⁸ Chaymantapas Bibliapin nillantaq suyakuyninchisqa casco jina kasqanta (leey 1 Tesalonicenses 5:8). Soldadokunaqa cascotan churakuqku umankupi enemigonku ama k’irinanpaq. Noqanchistapas Satanasmi yuyayninchista k’iriyta munawanchis, paymi munan mana allinkunata piensananchista. Chaymi sapa p’unchay imaymana tentacionkunata churawanchis. Imaynan juj casco soldadokunaq umanta jark’aq chhaynatan suyakuyniyoq kasqanchispas yuyayninchista jark’awanchis Jehová Diosta tukuy sonqowan servishanallanchispaq.

9. ¿Imaynatan kausanku mana suyakuyniyoq runakuna?

 ⁹ Wiñay kausayta chaskinanchispi suyakusqanchismi yanapawanchis allinta imatapas decidinanchispaq. Ichaqa imachus munasqallanchispi piensasun chayqa qonqarapusunmanmi wiñay kausay suyakuyninchista, jinaspa mana allinkunata ruwayta qallarisunman. Chaymi ñaupa tiempo Corinto cristianokunatapas pasarqan, paykunaqa manan iñipurqankuchu kausarimpuy kananpi, qonqarapurqankun Jehová Diospa chay prometesqanta (1 Cor. 15:12). Apóstol Pabloq nisqan jina kausarimpuypi mana iñiqkunaqa comuntan kausayta qallaripurqanku. Chaymi nirqanku: “Mijusunchis ujasunchis paqarinmi wañupusun”, nispa (1 Cor. 15:32). Kay tiempokunapipas askha runakunan mana confiankuchu Jehová Diospa promesankunapi, chaymi munasqankuman jinalla mana allinkunata ruwaspa kausanku. Noqanchismi ichaqa Jehová Diospa prometewasqanchispi confianchis. Chhaynaqa, suyakuyniyoq kasqanchisqa casco jinan yuyayninchista jark’awanchis, chhaynapi ama noqallanchispaqchu kausananchispaq aswanpas Jehová Diosllapaqña kausananchispaq, chhaynapi Jehová Diospa amigon wiñaypaq kananchispaq (1 Cor. 15:33, 34).

10. ¿Imaynatan suyakuyniyoq kay yanapawanchis yanqapaq Diosta servisqanchista piensaqtinchis?

¹⁰ Wakinninchisqa yaqapaschá nisunman: “Noqaqa imapipas pantarushallanin. Noqaqa manachus jina wiñay kausaytaqa chaskiymanchu. Yanqapaqmi Diostaqa servishani”, nispa. Chhayna piensaymantan suyakuyninchisqa casco jina jark’allawanchistaq. Yaqapas chhaynatan Elifazpas Jobta nirqan: “¿Wañuq runa atinmanchu ch’uya kayta? […] Diosqa manan angelninkunapipas confianchu, janaq pachapas paypa ñawinpaqqa manan ch’uyachu”, nispa (Job 15:14, 15). ¿Cheqaqchu chay nisqan karqan? Manan, Satanasqa chhayna piensananchistan munan. Payqa yachanmi chhaynata sapa kuti piensaqtinchisqa pisi-pisimanta Jehová Diospa promesankunapi manaña confiananchista, chayraykun kallpachakunanchis amapuni chhaynata piensananchispaq. Aswanpas suyakusun Jehová Dios llapa prometewasqanchista junt’ananpi. Jehová Diosqa maytan munashan llapa serviqninkuna wiñaypaq kausanankuta, chayraykun payqa sapankanchistapas yanapawasunchis (1 Tim. 2:3, 4).

11. ¿Imaraykun pacienciawan suyakunanchis Jehová Dios promesankunata junt’ananpi?

¹¹ Manaraqtaq Jehová Diospa wakin promesankuna junt’akushanchu chayqa yaqapaschá pisikallpayasunman, chayraykun kallpachakushanallanchis chay promesankuna junt’akunanpi suyakunanchispaq. Noqanchisqa yaqapaschá unayña suyakushanchis Jehová Diospa promesankuna junt’akunanta, Jehová Diospaqmi ichaqa pisi tiempollaraq kashan (2 Ped. 3:8, 9). Jehová Diosqa junt’anqapunin prometesqantaqa. Ichaqa manan noqanchispa piensasqanchisman jinachu ni munasqanchis tiempopipaschu junt’anqa, aswanpas Jehová Diospa yuyaykusqanman jinan chaykunaqa junt’akunqa. Chayraykun noqanchisqa pacienciawan suyakushananchis chaykuna junt’akunanta (Sant. 5:7, 8).

12. Hebreos 11:1, 6 nisqan jina, ¿imaynatan Diospi iñisqanchis yanapawanchis promesankuna junt’akunanpi astawan suyakunanchispaq?

¹² Jehová Diospa ladollanpi kasunchis chayqa manan iskayasunchu Jehová Dios promesankunata junt’ananpi, aswanpas suyakushallasunmi. Bibliaq nisqan jina, sichus Jehová Dios cheqaqpuni kasqanpi iñisunchis chayqa manan iskayasunchu “maskhaqninkunamanpas premiota qoq kasqanmantaqa” (leey Hebreos 11:1, 6). Chhaynaqa, sichus astawan Jehová Diospi iñisunchis chayqa astawanmi confiasunchis llapa promesankunata junt’ananpi. ¿Imatan ruwasunman Jehová Diospi astawan iñinanchispaq, promesankunapi suyakusqanchispas qaqa kananpaq?

13. ¿Imakunan yanapawasunman Jehová Diospa amigon kananchispaq?

¹³ Jehová Diosmanta mañakusun, simin qelqatapas leesun. Manaña Jehová Diosta rikunchischu  chaypas atisunmanmi paypa amigon kaytaqa. Chaypaqmi paymanta sapa p’unchay mañakunanchis, payqa uyariwasunpunin mañakusqanchistaqa (Jer. 29:11, 12). Niwasqanchista uyarinanchispaqtaq simin qelqata leenanchis jinaspa chaykunapi yuyaymanananchis. Chaykunan yanapawasun paypa amigon kananchispaq. Bibliapin willashan imaynata Jehová Dios serviqninkunata yanaparqan chayta, chayta reparaspan Jehová Dios promesankunata junt’ananpi astawan suyakunchis. Bibliapin nin: “Ñaupaqpi qelqasqa kaqkunaqa yachachiwananchispaqmi qelqasqa karqan; chaymantapas Diospa simin qelqan kallpachawanchis, aguantananchispaqpas yanapawanchis, chaymi suyakuyniyoqpas kanchis”, nispa (Rom. 15:4).

14. ¿Imaraykun Jehová Dios ñaupaqpi promesankuna junt’asqanpi yuyaymanananchis?

¹⁴ Imaynata Jehová Dios ñaupaqpi promesankunata junt’asqanpi yuyaymanasun. Abrahanwan Sarawanqa yuyaqñan karqanku, chayraykun manaña atirqankuchu wawayoq kaytaqa. Jehová Diosmi ichaqa paykunata prometerqan wawayoq kanankupaq (Gén. 18:10). ¿Iñirqanchu Abrahán Diospa prometesqanpi? Arí, iñirqanmi. Biblian nin: “Abrahanqa iñiywanmi suyakurqan askha nacionkunaq taytan kananta”, nispa (Rom. 4:18). Runaq ñawinpaqqa Jehová Diospa prometesqanqa mana junt’ay atiy jinan karqan, Abrahanmi ichaqa iñirqan Jehová Dios prometesqanta junt’ananpi. Chhaynata Diospa prometesqanpi confiasqankuraykun paykunaqa wawayoq kapurqanku (Rom. 4:19-21). Chaykunata leespan reparanchis Jehová Diosqa ima prometesqantapas junt’aqpuni kasqanta mana atikunanpaq jinataña noqanchis qhawarisunman chaypas.

15. ¿Imaraykun yuyaymanananchis imaynata Jehová Dios yanapawashasqanchispi?

¹⁵ Imaynata Jehová Dios yanapawasqanchispi yuyaymanasun. ¿Reparashanchischu imaynata Jehová Dios prometewasqanchista sapa p’unchay junt’ashasqanta? Jesusmi prometerqan Jehová Diosqa imachus kausananchispaq  necesitasqanchistaqa sapa p’unchay qowananchista (Mat. 6:32, 33). Chaymantapas Jesusmi prometerqan Jehová Diosqa santo espiritunta qowananchista (Luc. 11:13). ¿Junt’ashanchu Jehová Dios chaykuna prometewasqanchista? Arí, junt’ashanmi. Chaymantapas Jehová Diosmi prometewarqanchis juchanchista perdonawananchispaq, sonqochawananchispaq, simin qelqatapas manapuni faltachiwananchispaq; chaykunatapas Jehová Diosqa junt’ashanmi (Mat. 6:14; 24:45; 2 Cor. 1:3). Sichus yuyaymanasun imaynata Jehová Dios prometewasqanchista junt’ashasqanpi chayqa manan iskayasunchu jamuq tiempopipas promesankunata junt’ananpi.

16. ¿Imaraykun nisunman “suyakuyqa Jehová Diospa sumaq regalonmi” nispa?

¹⁶ Llapanchismi suyakushanchis wiñay kausayta, chayqa Jehová Diospa sumaq regalonmi. Chay prometewasqanchistaqa Jehová Diosqa junt’anqapunin. Kaypi yachamusqanchis jina suyakuyqa ancla jinan, chaymi yanapawanchis ima pruebatapas atipananchispaq, qatikachaytapas wañuytapas ama manchakunanchispaq. Chaymantapas suyakuyninchisqa casco jinan yuyayninchista jark’awanchis, chhaynapi allin kaqkunallapi piensananchispaq, mana allin kaqkunatataq umanchismanta orqopunanchispaq. Jehová Diosqa anchatan munakuwanchis chaymi payqa munan wiñay kausayta suyakunanchista, sichus chaykunata suyakusun chayqa astawanmi Jehová Diosman asuykusunchis. Chayrayku kallpachakushallasun ama iskayaspa Jehová Diospi suyakushanallanchispaq.

17. ¿Imaraykun suyakuyninchiswan kusisqa kashananchis?

¹⁷ Apóstol Pablon Roma llaqtapi tiyaq cristianokunata nirqan: “Suyakuyniykichiswan kusikuychis”, nispa (Rom. 12:12). Apóstol Pablopas kusisqan kasharqan janaq pachapi wiñay kausayta chaskinanpi, payqa manapunin iskayarqanchu Jehová Dios chay prometesqanta junt’ananpi. Noqanchispas suyakuyninchismantaqa kusisqan kashanchis. Bibliaq nisqan jina Jehová Diosqa llapa prometesqantaqa junt’anqapunin. Juj salmos qelqaqmi nirqan: “May kusisqan Diosnin Jehová Diospi suyakuqqa. […] Payqa rimasqanta tukuy tiempo junt’aq Diosmi”, nispa (Sal. 146:5, 6).