CASARASQAKUNAPAQ
1. Casarakushaspa prometekusqaykitan junt’anayki
¿IMATAQ CHAYRI?
Casarakusqanku p’unchayqa warmi-qharin ninakunku: “Kunanmantapachan munakusayki imaña kaqtinpas manan jayk’aqpas saqesaykichu”, nispa. Chaytan sonqonkupi jap’ikunku, chaymi imaña kaqtinpas mana t’aqanakunkuchu.
Wakin casarasqakunaqa familiankuna amigonkuna qhawarinallanpaqmi allinta kausanku, chhayna kausayqa llakikunapaqmi. Familiapi kusisqa kausanapaqqa munakuy, respeto iman kanan.
BIBLIAPIN NISHAN: “Qosapas manan esposantaqa saqenanchu”, nispa (1 Corintios 7:11).
Miguelmi * nin: “Casarakusqaykichis p’unchaypi prometekusqaykichista yuyarinkichis chayqa, manan ratullachu imawanpas phiñakunkichis, yanapasunkichistaqmi ima sasachakuy kaqtinpas sumaqllata allichanaykichispaq, jinan imaña kaqtinpas mana t’aqanakuypiqa piensankichischu”, nispa.
¿IMARAYKUN PROMETESQAYKIWAN JUNT’ANAYKI?
Sichus casarakusqayki p’unchaypi prometesqaykita mana kasukuyta munankichu chayqa, ima sasachakuypas kaqtinmi niwaq: “Kay warmiwanqa otaq kay qhariwanqa manan jayk’aqpas allintaqa kausaymanchu”, nispa. Jinaspa t’aqanakuyllapiña piensawaq.
Yenin nin: “Askha runakunan casarakushaspa sonqonkupi ninku: ‘Kay warmiwan otaq kay qhariwan mana allinchu kasaq chayqa, t’aqanakapusaqmi’, nispa. Sichus chay yuyay casarakuranki chayqa prometekusqaykiqa yanqapaqmi karan”, nispa.
¿IMAKUNATAN RUWAWAQ?
KAYKUNATAN TAPUKUNAYKI
¿Qosaykiwan otaq esposaykiwan phiñachinakuspaykichis imatan ruwanki?
¿Yanqapaqmi casarakurani nispachu ninki?
¿Jujwan casarakuyman karan chayqa, allinmi kayman nispachu ninki?
¿Sapa kutillachu “t’aqaqapusaqmi”, “jujwanmi casarakusaq” nispa ninki?
Sichus mayqenllamanpas “ari” nispa kutichiranki chayqa, tukuy atisqaykitan kallpachakunayki qosaykiwan otaq esposaykiwan allinta kausanaykipaq.
WARMI-QHARI PARLARIYCHIS
¿Casarakushaspa prometenakusqanchista manañachu kasukuyta munanchis? ¿Imaraykun chay pasashanman?
¿Imatan ruwasunman casarakusqanchis p’unchaypi prometenakusqanchista junt’ananchispaq?
KAYKUNATAWANMI RUWAWAQCHIS
Imallatapas apaspan juj papelchapi qelqawaq “anchatan munakuyki” nispa.
Qosaykiq otaq esposaykiq fotontan llank’anaykipi jap’inayki.
Sapa p’unchaymi wajanakunaykichis llak’anapiña kaspapas, maypiña kaspapas.
BIBLIAPIN NISHAN: “Diospa jujllachasqantaqa ama pipas t’aqachunchu” nispa (Mateo 19:6).
^ párr. 7 Wakin sutikunaqa cambiasqan kashan.
