Runakunaqa kallpachakunkun honrado, sumaq sonqo, qoykukuq, respetoyoq kanankupaq. Qanri, ¿kallpachakunkichu honrado kanaykipaq? Honrado kanki chayqa wawaykikunatapas yanapankichá honrado kanankupaq.

Chaymantapas allin runakunaqa allin llank’aqmi kanku, manan suwakunkuchu, manan pitapas cheqnipakunkuchu, jujkunatapas khuyapayankun. Wayna-sipaskunaqa mana sasachakuspallan kallpachakunku chhayna kanankupaq.

BIBLIAPIN NISHAN: “Wawata yachachiy imaynatachus kausananpaq, machuyapuspapas manapunin chaytaqa qonqanqachu”, nispa (Proverbios 22:6).

Kay tiempopin astawanqa yanapananchis allin runa kanankupaq. Karinan nin: “Kay tiempopiqa celularpi imaymana mana allin ruwaykunan kashan, chaymi wawanchiskunaqa mana reparasqallanchis celularpi mana allinkunata qhawashankuman ladonchispiña kashaqtinkupas”, nispa.

BIBLIAPI NISHAN: “Wiñasqa kaqkunan ichaqa khamuna mijunataña mijunku; paykunaq yuyayninkuqa allin preparasqan kashan allin kaqta mana allin kaqtapas reparanankupaq, yuyayninkuta allinta llank’achisqankurayku”, nispa (Hebreos 5:14).

Respetoyoq kayqa allinpunin. Pitapas valekuspaqa “ama jinachu kay, gracias” nispan ninanchis, chaymantapas jujkunatan yanaparinanchis. Kay tiempopiqa askha runakunan manaña chhaynachu kanku, aswanpas paykunaqa celularninkuta qhawaspallañan kashanku.

BIBLIAPIN NISHAN: “Imaynatachus runakuna ruwanasuykichista munankichis, chhaynallatataq qankunapas paykunata ruwaychis”, nispa (Lucas 6:31).

Sut’ita willay ima ruwaykunachus mana allin kasqanta. Wakin yachaq runakunan ninku: Sichus tayta-mamakuna allinta yachachinqaku pikunallas warmi-qhari jina puñunkuman chayta chayqa, wawakunaqa manan faciltachu qhelli juchata ruwanqaku.

KAYKUNATAN RUWAWAQ: Wawaykita yachachinaykipaqmi kayta ruwawaq: Radiopi otaq televisionpi wañuchinakuymanta willamushan chayqa chay raton wawaykita niwaq: “Kay ruwasqankuqa manapunimá allinchu”, nispa. Jinaspa tapuwaq: “¿Imanaqtinmi wakin runakuna chhayna kanku?”, nispa.

Victormi nin: “Wawakunaqa allintan yachananku ima ruwaykunas allin, ima ruwaykunas mana allinchu chayta, chhaynapin paykunaqa yachanqaku imatapas allinta ruwayta”, nispa.

Respetoyoq kanankupaq yachachiy. Wawaykitaqa juch’uyninmantapachan yachachinayki imatapas mañakuspa “ama jinachu kay, gracias” nispa ninankupaq. Padres sin fronteras libropin nin: Wawakunataqa juch’uyninmantapachan yachachinanchis yanapakuq kayta, sumaq sonqo khuyapayakuq kayta, chaymi paykunaqa yachanqaku jujkunata yanapayta”, nispa.

KAYKUNATAN RUWAWAQ: Wawaykitaqa yachachinaykin wasipi imallapipas yanapakunanpaq, chhaynapin yachanqa jujkuna yanapayta.

Tara nin: “Sichus wawaykita yachachinki wasipi plato maqlliyta, p’acha t’aqsayta, wayk’uyta, wasi pichayta ima chayqa, sapallan tiyaspaqa manan sasachu paypaqqa kanqa chaykunata ruway”, nispa.