Wawanchistaqa wanachinanchis, rimapayaspanchis, yachachispanchis, mana allin portakusqanta corregispanchis iman. Yanapananchismi allin runa kananpaq, chhaynapin imatapas allin yuyaywan ruwanqa.

Kay tiempopiqa askha tayta-mamakunan manchakunku wawanku wanachiyta, paykunaqa ninkun: “Wanachiyman chayqa, sonqontan k’iriyman”, nispa. Allin tayta-mamakunan ichaqa wawankuta sumaqllata yachachinku kasukuq kayta.

Pamela nin: “Wawakunamanqa sut’itan yachachinanchis imakunatas ruwananku imakunatas mana ruwanankuchu chayta, chaymi yanapanqa kuraq kaspanku allin yuyaywan imatapas ruwanankupaq, chhaynapin manan sasachakuykunapi tarikunqakuchu”, nispa.

Ruwasqanman jina wanachiy otaq felicitay. Sichus wawayki mana kasusunkichu chayqa correginaykin. Allinkuna ruwasqanmantataq “kusa waway” nispa ninayki.

Cristinan nin: “Kay tiempopi wawakunaqa manañan tayta-mamankuta kasukunkuñachu, chaymi wawaykuna kasukuwaqtinkuqa ‘kusa waway’ nispa nini. Chayta ruwaqtiymi mana allin ruwasqankumanta wanachinay kaqtinqa wawaykunaqa uyariwanku”, nispa.

BIBLIAPIN NISHAN: “Imatachus runaqa tarpunqa chayllatataqmi cosechanqapas”, nispa (Gálatas 6:7).

Allin yuyaywan wawaykita wanachiy. Wawaykita wanachinaykipaqqa qhawarinaykin edadninta, maykama imatapas ruwayta atisqanta, mana allin ruwasqan juchachus manachus chaytapas. Sichus wawayki kamachisqaykita mana kasukushanchu chayqa, yaqapaschá khaynata wanachiwaq: Sichus wawayki celularwan nishuta pujllasqanrayku, mana tareankunata ruwashanchu chayqa, juj tiempon celularninta chaskiwaq. Ichaqa manan yanqapas qasiqa wawaykiwan phiñakunaykichu.

Wilber nin: “Wawayta wanachinaypaqqa ñawpaqtan tapukuni: “¿Yuyaypichu chayta ruwanman karan icha mana reparakuspachu chayta ruwaran? Wakin wawakunaqa sapa kutillanmi mana allinta ruwanku, wakintaqmi juj kutillapi mana allinta ruwarunku, chhayna kaqtinqa manan kaqllatachu wawaykikunata wanachinayki”, nispa.

BIBLIAPIN NISHAN: “Taytakuna, ama wawaykichista colerachiychischu, chhaynapi mana umphuyanankupaq”, nispa (Colosenses 3:21).

Sumaqllata wanachiy. Sumaqllata wawaykita wanachinki chayqa, kasukunqakun, reparakunqakutaqmi mana allin ruwashasqankuta.

Danielmi nin: “Wawayku imatapas mana allinta ruwaqtinqa paytan niyku: ‘Waway kusisqan kashayku allinkuna ruwasqaykimanta, mana allin ruwasqaykita saqepunki chayqa aswan allin runan kanki, noqaykupas yanapasaykikun”, nispa.

BIBLIAPIN NISHAN: “Pipas munakuqqa pacienciakuqmi, sumaq sonqon”, nispa (1 Corintios 13:4).