Mana pisipaspa predicashallasun

¿HAYK’AQLLAPAS sinchi sayk’usqa mana kallpayoq tarikuspayki yuyaykurankichu predicayta saqepunaykipaq? Yaqapaschá sasa kanman aguantananchispaq Dios serviyninchispi sinchi hark’asqa otaq llakisqa, onqosqa kasqanchisrayku, chaymantapas escuelapi llank’anapi compañeronchiskunaq turiawasqanchisrayku, predicasqanchista mana uyarisqankurayku ima. Jesuspa ejemplonmi ichaqa anchata kallpachawasunman. Payqa “qhepaman q’ochukunanta yachaspa[n]” sinchi sasachakuykunata aguantaran (Heb. 12:2). Yacharanmi Taytanta Satanás imaymanamanta yanqa tumpasqanta sut’iman orqoqtin sonqonta kusirichinanta (Pro. 27:11).

Qanpas kusichinkin Diosta sichus mana sayk’uspa predicashallanki chayqa. Ichaqa, ¿imatan ruwawaq sasachakuykuna kaqtin predicanaykipaq kallpayki pisiyashasqanta reparaspa? Kuraqña Krystyna sutiyoq iñiqmasinchismi imaymanamanta onqollanpuni, paymi nin: “Sapa kutillanmi sayk’usqa mana kallpayoq tarikuni. Mayninpiqa kuraqña kasqayrayku onqospaymi otaq imamantapas llakikuspay manaña kusikuywanchu predicani”, nispa. ¿Imaynatan sasachakuykunaña kaqtinpas predicashallawaq?

Profetakunamanta yachay

Mana sayk’uspa predicashanallanchispaqqa ñawpaq tiempopi profetakuna hina yuyaykunanchispaqmi kallpachakunanchis. Jeremiasmanta yachasun. Jehová Dios profeta kananpaq akllasqanta yachaspanqa manchakuranmi chay llank’ay hunt’ayta. Ichaqa tukuy sonqonwan Diosman hap’ipakusqanmi yanaparan tawa chunka wata masta sasa llank’ayninta hunt’ananpaq (Jer. 1:6; 20:7-11).

Iñiqmasinchis Henrytaqa Jeremiaspa aguantasqanmi anchata kallpachan. Paymi nin: “Qanchis chunka wata masña predicasqaypin mayninpi desanimakurani runakunaq mana allin tratawasqankuwan mana uyariy munasqankuwan ima. Chhaynapi tarikuspayqa Jeremiaspin piensani, paytaqa Diosta munakusqanmi payman anchata hap’ipakusqanmi kallpacharan Diospa juicionmanta willashanallanpaq”, nispa (Jer. 1:17). Jeremiaspa aguantasqanqa Rafal iñiqmasinchistapas kallpacharanmi, paymi nin: “Jeremiasqa runakunaq cheqnisqan kasqanpi yuyaykunanmantaqa Jehová Diospi confiaspan imapaqchus kamachisqa kasqanta hunt’aran. Chaytaqa yuyarillanipunin”, nispa.

Profeta Isaiaspa ejemplompas askha cristianokunatan yanaparan mana sayk’uspa predicashanallankupaq. Jehová Diosqa willaranñan Isaiasman Israel runakuna mana uyarinankumanta: “Kay runakunaq sonqonta rumiyachiy, ninrinkutapas roqt’uyachiy”, nispa. Chhaynaqa, ¿yanqapaqchu profeta predicanman? Diosqa manan chhaynatachu qhawariran. Isaiaspas manan chhaynatachu qhawariran, chayraykun Diospa kamachisqanta chaskispa kusikuywan niran: “Ñoqan kaypi kashani, ñoqata kachaway”, nispa (Isa. 6:8-10). Chay llank’aynintaqa tukunankaman hunt’aran. ¿Qanpas chhayna valorwanchu predicanki? ¿Tukuy atisqaykitachu ruwashanki Reinomanta predicanaykipaq kamachisqa kasqaykita hunt’anaykipaq?

Isaías hina mana pisipaspa predicashanallapaqqa manan runakuna mana chaskiwasqanchispichu yuyaykunanchis. Rafal iñiqmasinchismi willawanchis imaynas runakunaq k’amisqanwan mana pisipanchu chaymanta, paymi nin: “Pipas serviciopi mana allinta tratawaqtinqa kallpachakunin chaypi mana piensanaypaq. Runakunaqa derechonkupin kashanku imayna kutichinankupaqpas”, nispa. Anan nillantaq: “Manan yuyaykunichu imapas predicasqaypi pisipachiwananpaq kaqkunapiqa. Manaraq predicaq lloqsishaspan Diosmanta mañakuni, sapa p’unchaypaq textotapas leeni, chaymi yanapawan mana allin kaqkunapi mana yuyaykunaypaq”, nispa.

Ezequielpas Babiloniaman preso apasqa k’ullu judío runakuna ukhupin profetizaran (Eze. 2:6). Sichus huk millay runa Diospa juicionmanta  Ezequielpa mana willasqanrayku wañunman chayqa, paymi chay runaq wañusqanmanta huchachasqa kanman. Jehová Diosmi profetata niran: “Qanmanta[n] cuentata mañasqayki chay runaq wañusqanmanta”, nispa (Eze. 3:17, 18).

Henryqa kallpachakunmi Ezequiel hina yuyaykunanpaq, chayraykun nin: “Askha runakunan peligropi tarikushanku, ñoqaqa manan pi runaq wañusqanmantapas huchachasqa kayta munanichu”, nispa (Hech. 20:26, 27). Zbigniew hermanonchispas kaqllatataqmi yuyaykun: “Ezequielqa willashanallanmi karan imataña runakuna rimaqtinkupas, chay ruwasqanmi yanapawan Kamaqninchis hina predicayta qhawarinaypaq”.

Manan sapanchischu kashanchis

Predicaspaqa manan mayqenninchispas sapallanchischu kashanchis. Llapanchispas “Diospa llank’aysiq-masinkunan” kanchis apóstol Pablo hina (1 Cor. 3:9). Ñawpaqpi rimasqanchis hina Krystynaqa mayninpin mana kallpayoq sientekun, chaymi nin: “Sapa kutillanmi Jehová Diosta rogakuni kallpata qowananpaq, payqa kallpachawanpunin”, nispa. Arí, mana sayk’uspa predicashanallanchispaqqa Diospa espirituntan necesitanchis (Zac. 4:6).

Allin willakuykunata predicaqtinchisqa Diospa kallpanmi yanapawanchis santo espirituq rurunta rikuchinanchispaq (Gál. 5:22, 23). Chaytaqmi yanapawanchis imaña kaqtinpas sasachakuykunata aguantaspa predicashanallanchispaq. Henry iñiqmasinchismi nin: “Predicayqa yanapawanmi imayna kasqayta qhawarikunaypaq, chhaynapin yachani pacienciayoq kayta, runakunatapas sumaq tratayta, manataqmi faciltachu imawanpas pisipani”, nispa. Sichus sasachakuykunaña kaqtinpas predicashallasun chayqa, astawanmi rikuchisun santo espirituq rurun sumaq kaqkunata.

Jehová Diosqa angelninkunawanmi predicación llank’ayta aparishan (Apo. 14:6). Bibliaq willasqan hina, angelkunaqa “waranqaq waranqan” sinchi askhallañan kanku (Apo. 5:11). Angelkunaqa Jesuspa umallisqanmi kay Allpapi Dios serviqkunata yanapashanku. Chhayna yanapawashasqanchista ¿yuyarinkichu predicashaspa?

Anan nin: “Ñoqaqa yuyaykullanipunin angelkuna predicasqanchispi yanapawashasqanchista chaymi kallpachawan; anchatan valorani paykuna Jehová Diospa Jesucristoq umallisqan yanapawasqanchismanta”, nispa. ¡May sumaqmi angelkunawan kuska predicasqanchisqa!

¿Imanisunmantaq iñiqmasinchiskunamantari? Jehová Diosta hunt’aq sonqowan serviq cristianokunataqa askhatan aswan allinta reqsiyta atisunman, chayqa paypa sumaq bendicionninmi. Proverbios 27:17 nin: “Fierrotaqa fierrowanmi filochanku, chay hinatan runataqa runamasin allinyachin [kallpachan]”, chaypi nisqan hina qanpas chaskirankipunichá iñiqmasinchiskunaq yanapayninta.

Iñiqmasinchiskunawan kuska predicaspaqa aswan allin predicaytan yachanchis. Elżbietan nin: “Huk iñiqmasinchiskunawan predicaspayqa paykuna munakusqaytan rikuchini kaqllataq predicasqay runakunamanpas”, nispa. ¿Qanpas kallpachakuwaqchu sapanka iñiqmasinchiskunawan predicanaykipaq? Chayta ruwanki chayqa aswantan predicasqaykipi kusikunki.

Allinta samay kallpachakuytaq Dioswan allinpi kanaykipaq

Kusisqa predicanapaqqa allin horariotan ruwakunanchis Bibliata huk qelqakunata estudianapaq, allinta samanapaqpas. Arí, cuidananchismi saludninchista iñiyninchistapas mana pisipananchispaq.

Biblian nin: “K’uchi runaq yuyaykusqankunaqa allinmankaman tukun”, nispa (Pro. 21:5). Zygmunt hermanonchismi 88 watanpi kashan, paymi nin: “Ima ruwanaypaqpas allintataq tiempoyta t’aqani chayqa, kusikuywanmi predicani chhaynapin tiempoy aypawan astawan predicanaypaq”, nispa.

Bibliamanta allinta yachayqa kallpachawanchismi yanapawanchistaq aswan allinta predicananchispaq. Kallpata hap’inanchispaqqa mikhunanchismi chhaynallataqmi predicashanallanchispaqpas espiritual mikhuyta mikhunanchis. Sichus sapa p’unchay leesunchis Bibliata, allin yuyayniyoq hunt’aq kamachiq “tiempollanpi” apachimuwasqanchis qelqakunatapas chayqa, kallpatan hap’isun allin willakuykunata predicananchispaq (Mat. 24:45-47).

Elżbieta iñiqmasinchisqa huk ruwanankunatan saqepuran aswan allinta predicananpaq. Kaytan nin: “Kunanqa manañan nishutachu televisionta  qhawani, chhaynapin allinta preparakuni predicanaypaq. Ch’isin Bibliata leespayqa predicamusqay runakunapin piensani. Chaymantapas maskhanin paykunapaq hina textokunata, qelqanchiskunapi temakunatapas chaykunawan yanapanaypaq”, nispa.

Allinta samanki chayqa manan kallpayki pisiyanqachu, aswan allintataq predicanki. Ichaqa q’ochukuykunallapi purinki chayqa, sayk’usqan predicanaykipaq tarikunki. Predicaypi allinta llank’aq Andrzej iñiqmasinchismi nin: “Mana allinta samaqtinchisqa sayk’usqan kanchis, sayk’usqa kaspaqa Dios serviyninchispin pisipasunman. Ñoqaqa tukuy atisqaytan kallpachakuni chhaynapi ama tarikunaypaq”, nispa (Ecl. 4:6, NM).

Kallpachakunchisña allin willakuykunata willananchispaq chaypas, pisillan chaskinku. Jehová Diosmi ichaqa mana hayk’aqpas ruwasqanchista qonqanqachu, chayqa maytan kallpachawanchis (Heb. 6:10). Askha runakunaña ñoqanchiswan mana rimayta munankuchu chaypas, yaqapaschá ripusqanchis qhepamanqa visitasqanchismanta rimankuman. Ezequielpa tiemponpi hinan kanman, runakunaqa “yachanqakupunin paykuna ukhupi huk profetaq kasqanta” (Eze 2:5). Yachasqanchis hina predicananchispaq kamachisqa kasqanchista hunt’ananchispaqqa kallpachakunanchismi, ichaqa askha bendicionkunan kan ñoqanchispaq allin sonqowan uyarikuq runakunapaqpas.

Zygmunt iñiqmasinchismi nin: “Allin willakuykunata predicayqa yanapawanchismi Diospa munayninman hina kawsananchispaq, payta runamasinchista munakusqanchista rikuchinanchispaqpas”. Andrzej iñiqmasinchispas nillantaqmi: “Runakuna qespichisqa kanankupaq llank’aypi yanapakuyqa may sumaqmi, kay ruwayqa manañan hayk’aqpas kay tiempopi hina aparikunqañachu”, nispa. Qanpas mana pisipaspa predicashallanki chayqa, askha bendicionkunatan chaskinki (2 Cor. 4:1, 2).

[31 paginapi fotokuna]

Mana sayk’uspa predicashanallapaqqa allintan samananchis, cuidakunanchistaqmi iñiyninchispi ama pisipananchispaq