Yuyaykushallasun premio chaskinanchispi

“Ñawpaqllamanpunin phawashani, [...] premiota chaskinaypaq.” (FILI. 3:14.)

1. ¿Ima premiota aypananpaqmi apóstol Pablo kallpachakuran?

APÓSTOL Pabloqa allin familiamantan hamuran, paytan reqsikullantaq Tarso llaqtamanta Saulo nispa. Paytaqa Kamachikuy Simita yachachiq allin reqsisqa Gamalielmi ñawpa taytankunaq religionninta yachachiran (Hech. 22:3). Payqa profesionninwan kay pachapi k’ancharinanpaq hinan karan. Ichaqa qonqayllamantan religionninta saqepuspa cristianoman tukupuran. Chaymantapachan kallpachakuran mana hayk’aq tukukuq kawsayta aypananpaq, Diospa Reinonpi rey sacerdote kananpaq ima, ¡chayqa tukuy imamantapas aswan valorniyoq premion karan! (Mat. 6:10; Apo. 7:4; 20:6).

2, 3. ¿Imaynatan Pablo hanaq pachapaq premionta qhawariran?

² Pabloqa ancha allinpaqmi chay premiota qhawariran, chaytaqa yachanchis kay nisqanpin: “Tukuy imakunachus ancha chaniyoq kawarqan chaykunatan kunanqa Cristopi iñisqayrayku mana imapaq valeqta qhawapuni. Chaykunamantapas astawanqa tukuy imaymanayoq kaytapas mana valeq q’opata hinan qhawani Señorniy Jesucristota reqsinaypaq. Payta reqsiymi may chaniyoqpuniqa. Cristoraykun lliwta saqepuni, hinaspa q’opata hina qhawarini Cristota chaskikuspa” (Fili. 3:7, 8). Pabloqa runakunapaq Diospa munayninta yachasqanmantapachan kay pachapi runakunaq aypasqan qhapaq kayta, allin qhawarisqa kayta, hukkunatapas mana valeq q’opata hina qhawariran.

³ Chaymantapachan payqa kallpachakuran Jehová Diosta Churintawan astawan reqsinanpaq, Jesús kikinmi Taytanmanta mañakuspa nisqa: “Chay wiñay kawsayqa kaymi: Qan sapallayki cheqaq Diosta, kachamuwasqayki ñoqa Jesucristotawan reqsiyninku”, nispa (Juan 17:3, Edición 1988). Chay wiñay kawsayman aypaytan apóstol Pabloqa munaran, chaytan Filipenses 3:14 textopi nisqan rikuchin: “Ñawpaqllamanpunin phawashani, Jesucristowan hukllachasqa kaspay premiota chaskinaypaq, chaypaqmi Diosqa hanaq pachaman waqyawarqan”. Arí, payqa yuyaykullaqpunin premio chaskinanpi, chay premioqa karan hanaq pachapi wiñay kawsay, Diospa Reinonpi kamachikuq kanan iman.

Hallp’api wiñay kawsay

4, 5. ¿Ima premiotan chaskinqaku kunan tiempo millonninpi Diosta serviqkuna?

⁴ Ichaqa yaqa llapa Diosta serviqkunapaqmi kay Hallp’api wiñay kawsay premionku kanqa, ¡may allinmi chayman aypanapaq kallpachakuyqa! (Sal. 37:11, 29.) Chay kawsayman aypayqa manan mosqoyllachu, Jesusmi prometeran: “Kusisamiyoqmi llamp’u sonqoyoqkunaqa, paykunaqa kay pacha hallp’atan herenciapaq chaskinqaku”, nispa (Mat. 5:5). Salmo 2:8 versiculoq nisqan hina, Criston kay Hallp’ata chaskinanpaq ñawpaq kaq herederoqa, 144.000 runakunataq paywan kuska hanaq pachamanta kamachimunqaku (Dan. 7:13, 14, 22, 27). Wak ovejamanta kaqkunan ichaqa Diospa Reinon kamachisqan kay Hallp’api tiyanqaku, chay herenciatan “Diosqa kay pacha kamasqamantapacha [paykunapaq] wakichirqan” (Mat. 25:34, 46). Diosqa hunt’anqapunin promesankunata payqa ‘manan llullakunmanchu’ (Tito 1:2). Chayraykun ñoqanchispas Josué hina promesankunapi confiasunman, paymi Israel runakunata kallpacharan: “Ñawpaqtaraqmi munani qankuna tukuy alma, tukuy sonqo Señor Diospa sumaq nisqasuykichista llapanta hunt’asqanta reqsikunaykichista, payqa  llapantapunin rimarisqantaqa hunt’arqan”, nispa (Jos. 23:14).

⁵ Mosoq pachapiqa manan kay tiempopi hina imaymana llakikuykuna kanqañachu. Manañan kanqachu guerrakuna mana chanin ruwaykuna. Chinkapunqan wakcha kay, onqoykuna, wañuypas. Manan ima nanaypas kanqañachu kay Hallp’ataq huk sumaq paraisoman tukupunqa. Mana hayk’aq kusikusqanchista hinan chaypiqa q’ochukusun. Sapa p’unchay kawsaspan ancha kusisqa kasun. ¡May sumaqmi chay premioqa!

6, 7. a) ¿Imaynatan Jesús rikuchiran Paraisopi sumaq kawsay kananta? b) ¿Ima suyakuymi kan wañuqkunapaq?

⁶ Kay Hallp’api Jesús kashaqtinmi Diosqa santo espiritunta payman qoran, chhaynapi Diospa Reinonpi kamachiqtin pachantinpi ancha allin ruwaykuna kananta rikuchiwananchispaq. Bibliaq nisqan hina, Jesusqa kinsa chunka pusaqniyoq wataña such’u kashaq runatan hampiran (leeychis Juan 5:5-9). Huk kutipitaq ‘ñawsa naceq runata’ hampiran. Imayna qhaliyasqanmanta tapuqtinkun chay runaqa Jesusmanta niran: “Manan hayk’aqpas uyarikurqanchu ñawsapuni naceqpa ñawin kicharisqamantaqa. Manachus Diosmanta pay kanman chayqa, manan imatapas ruwayta atinmanchu”, nispa (Juan 9:1, 6, 7, 32, 33). Jesusqa chay milagrokunata ruwaran Diospa atiynin paypi kasqanraykun. Maytaña rispapas ‘onqosqakunataqa qhaliyachiranmi’ (Luc. 9:11).

⁷ Jesusqa manan onqosqakunata such’ukunallatachu hampiran, wañusqakunatapas kawsarichiranmi. Huk kutinmi 12 watanpi kashaq sipascha wañuran, chaymantan tayta-maman sinchita waqasharanku. Jesustaq chay sipaschaq kasqanman chayaspa niran: “Sipascha, qantan niyki, sayariy”, nispa. Sipaschataq sayarirospa puririran. ¡Imaynataraqchá tayta-mamanpas hukkunapas kusikuranku! (Leeychis Marcos 5:38-42.) Hamuq tiempopipas ancha kusikuymi kanqa waranqa waranqanpi ‘chanin mana chanin [runakuna] wañusqankumanta’ kawsarimuqtinku (Hech. 24:15; Juan 5:28, 29). Paykunaqa llapallankun atinqaku huk sumaq kawsay qallariyta wiñaypaq kawsaytapas.

8, 9. a) ¿Iman sucedenqa Waranqa Wata Kamachikuypi Adanpa huchanrayku imaymana nanaykunawan? b) ¿Imayna juzgasqan kanqaku kawsarimpuqkuna?

⁸ Kawsarimuqkunaqa manan manaraq wañushaspa huchallikusqankumantachu juzgasqa kanqaku, chhayna kaqtinqa hukmanta wañunankupaqmi huchachasqa kankuman (Rom. 6:7). Waranqa Wata Kamachikuypiqa pisi pisimantan Diospaq hunt’aq runakuna Jesuspa sacrificionrayku mana huchayoq ch’uyaman tukupunqaku (Rom. 8:21). “Señor Diosqa wiñaypaqmi wañuytapas chinkachinqa, llapaq ñawinmantan waqaytapas ch’akichinqa.” (Isaías 25:8.) Chaymantapas Bibliaqa willanmi mosoq ‘librokuna kicharisqa kananmanta’, chaywanmi yachanchis mosoq pachapi tiyaqkunapaq mosoq yachachikuykuna kananta (Apo. 20:12). Kay pacha pisi pisimanta paraisoman tukushaqtinqa “runakunan yachan[qa]ku imachus chanin-kay kasqanta” (Isa. 26:9).

⁹ Apocalipsis 20:12 nin: “Wañusqankumanta kawsarimpuqkunaqa imatachus ruwasqankuman hinan juzgasqa karqanku, librokunapi qelqasqa kasqanman hina”, nispa. Chaypi nisqan hina, kawsarimuqkunataqa juzgakunqa manan ñawpaqpi huchallikusqankumantachu, aswanpas kawsarimusqanku qhepaman imatachus ruwasqankuman hinan. Chaymi rikuchin Jehová Dios ancha khuyapayakuq, munakuq, chanin kasqanta. Chaymantapas kawsarimuqkunaqa qonqapunqakun kay millay pachapi imaymana llakikuykunapi tarikusqankuta, chaykunaqa “qonqasqan kapunqa, manañan yuyarisqapasñachu kanqa” (Isa. 65:17). Sumaq yachachikuykunatan chaskinqaku lliwmi kusisqa kawsanqaku, chayraykun ñawpaq llakikuykunaqa qonqasqa kapunqa (Apo 21:4). Armagedonmanta lloqsiq ‘ancha askha runakunapaqpas’ chhayna kusikuymi kanqa (Apo. 7:9, 10, 14).

10. a) ¿Imaynan mosoq pachapi kawsay kanqa? b) ¿Iman yanapasunki premioykita ama qonqanaykipaq?

¹⁰ Mosoq pachapiqa “manan mayqellanpas: ‘Onqosqan kani’, ninqachu” (Isa. 33:24). Manataqmi  pipas wañunqachu. Tiempowanqa manan ima nanaypas kanqañachu runakunaqa sapa illarimuytan rikch’arimunqaku sumaq kawsaywan q’ochukunankupaq. Paykunapi anchata interesakuq askha amigokunayoqmi kanqaku, llank’asqankuwanpas kusikunqakun. ¡May kusikuymá chayqa! Isaías 33:24; 35:5-7 textokunapi profeciakunata leespa yuyaymanay. Chaypipas kashawaq hina yuyaykuy. Chaymi yanapasunki hamuq tiempopi premioykita ama qonqanaykipaq.

Premionkuta qonqaqkuna

11. ¿Imayna sonqoyoqmi Salomón karan kamachiyta qallarishaqtin?

¹¹ Maypachachus yachanchis hamuq tiempopi sumaq premio suyawasqanchista chayqa, manan imaraykupas chay premionchista qonqananchischu imaynan wakinkuna qonqaranku hinata. Salomonmanta qhawarisunchis. Israel llaqtapi kamachiyta qallarishaspaqa huch’uyaykuspan Diosmanta mañakuran allin yachayta, allinkaqta mana allinkaqta reparananpaq yuyayta, chhaynapi llaqtata kamachinanpaq (leeychis 1 Reyes 3:6-12). Bibliaq nisqan hina, “Diosmi Salomonman allin yachayta allin yuyaytawan qorqan, chaymi lamar-qocha patapi aqo hinaraq yachayninqa karqan. Chaymi Salomonqa Egipto runakunamantapas, inti lloqsimuy lado runakunamantapas aswan allin yachaysapa karqan” (1 Rey. 4:29-32).

12. ¿Imatan nisqaña Jehová Dios Israel llaqtapi kamachiq reykunata?

¹² Jehová Diosqa ñawpaqmantañan llaqtapi rey kaqkunata nisqa ‘ama askha caballokunata huñunankupaq’, ‘amataq askha warmiyoqpaschu kanankupaq’, chhaynapi sonqonku mana waqllinanpaq (Deu. 17:14-17). Askha caballokunata huñuspaqa enemigokunamanta llaqtata amachananpaq runakunaq kallpanpi confiasqantan reyqa rikuchinman karan, manataq Jehová Diospi confiasqantachu. Askha warmiyoq kaypas manan allinchu karan, wakin warmikunaqa huk llaqtakunamanta kaspankun wak dioskunata yupaychaspa reypa sonqonta waqllichinkuman cheqaq Diosta qonqapunanpaq.

13. ¿Imakunata ruwaspan Salomón Diospa kamachikuyninkunata mana kasuranchu?

 ¹³ Salomonqa manan Jehová Diospa kamachisqanta kasukuranchu. Waranqanpin caballokunata huñuran soldadonkunapas askhan karan (1 Rey. 4:26). Esposankunan 700 karan tiyaqmasin warmikunataq 300, chay warmikunaqa askhan huk llaqtakunamanta karanku. Paykunan Salomonpa “sonqonta q’ewichirqan, hinan wak dioskunata yupaycharqan, payqa manan taytan David hinachu tukuy sonqo Diosnin Señor Diosman hap’ipaykukurqan”. Chayraykun Diosqa niran: “Ñoqan kamachisqayki suyuta qechupusqayki”, nispa (1 Rey. 11:1-6, 11).

14. ¿Imaynapin tukuranku Salomonpas Israel runakunapas mana kasukuq kasqankurayku?

¹⁴ Cheqaq Diosta yupaychayqa ancha chaniyoqmi, Salomonqa chayta qonqaspan wak dioskunata yupaychayta qallariran. Tiempowanqa llapa Israel runakunan wak dioskunata yupaycharanku, chayraykun Jerusalén llaqtaqa 607 watapi thunichisqa karan. Chay qhepaman judío runakuna kallpachakurankuña hukmanta cheqaq Diosta yupaychanankupaq chaypas, pachak watakuna qhepamanmi Jesús niran: “Diospa qhapaqsuyunqa qankunamanta qechusqan kanqa, paypa munayninman hina ruwaqkunamantaq qonqa”, nispa. Chaymantan nillarantaq: “Wasiykichismi purunyapunqa”, nispa (Mat. 21:43; 23:37, 38). Chay hinapunin karan, Israel runakunaqa mana kasukuq kasqankuraykun manaña Diospa llaqtanchu kapuranku. 70 watapin Roma suyumanta soldadokuna Jerusalén llaqtata templontawan thunichiranku, chay kutipi mana wañuq judiokunataq kamachi kanankupaq apasqa karanku.

15. ¿Pikunan premionkuta qonqapuranku?

¹⁵ Judas Iscariotepas Jesuspa huknin apostolnin kashaspan sumaq premionta qonqapuran. Payqa uyariranmi Jesuspa ancha allin yachachikuyninkunata, rikurantaqmi santo espirituq yanapayninwan milagrokuna ruwasqantapas. Ichaqa manan sonqonta waqaycharanchu. Jesús apostolkunawan qolqe churasqanku cajatan hap’iran “hinaspan chay qolqemanta suwakullaqpuni” (Juan 12:6). Payqa qolqe sonqo kasqanraykun Jesusta hap’ichinanpaq kinsa chunka qolqeta chaskikuran iskay uya umalliq sacerdotekunamanta (Mat. 26:14-16). Apóstol Pabloq puriqmasin Demaspas sonqonta mana waqaychasqanraykun aswan allin kaqkunata qonqapuran. Paymantan Pablo niran: “Demasqa kay pacha kaqkunata munakuspanmi saqerpariwan”, nispa (2 Tim. 4:10; leeychis Proverbios 4:23).

Ñawpaq tiempopi sucedesqanqa yachananchispaqmi

16, 17. a) ¿Ima sasachaypin cristianokuna tarikunchis? b) ¿Iman yanapawasun Saqraq trampankunata atipanapaq?

¹⁶ Kay tukukuy sasa tiempopi kawsaq cristianokunaqa allintan yuyaykunanchis ñawpaq tiempopi chay runakunata sucedesqanpi. Biblian nin: “Ñawpa taytanchiskunata tukuy chay sucedesqankunaqa ñoqanchispa yachaqakunanchispaqmi karqan, ñoqanchisqa p’uchukay tiempopin kashanchis, chaymi chaykunaqa anyawananchispaq qelqasqa karqan”, nispa (1 Cor. 10:11; 2 Tim. 3:1, 13).

¹⁷ “Kay pacha kamachiq diosqa” yachanmi ‘tiempon pisillaña kasqanta’ (2 Cor. 4:4; Apo. 12:12). Chayraykun payqa tukuy atisqanta ruwanqa cristianokunata urmachinanpaq, chhaynapi Diosta mana kasukunankupaq. Kay pachaqa makinpin kashan, chaymi mana allin yuyaykusqankunata mast’arishan. Jehová Diosmi ichaqa llaqtanta yanapan ‘hatun atiyta’ qospa (2 Cor. 4:7). Chay hatun atiymi yanapawasun Saqraq churawasqanchis ima sasachaytapas atipananchispaq. Yachanchismi Jehová Dios ‘mañakuqninkunaman Santo Espiritunta qosqanta’ chayraykun mañakushanallanchis (Luc. 11:13).

18. ¿Imaynatan kay millay pachata qhawarinanchis?

¹⁸ Pisi tiempollamantañan Satanaspa kamachisqan pachamanta kacharichisqa kasun, chayta yachaypas kallpachawanchismi. “Kay pachaqa tukukapushanmi, tukuy imaymana mana chanin munayninkunapiwan. Diospa munayninta ruwaqmi ichaqa wiñaypaq kawsanqa.” (1 Juan 2:17.) Ñataq Satanaspa kamachisqan pacha tukupunqaña chayqa manan ima allintapas chaypiqa tarisunmanchu, Jehová  Dioswan wiñaypaq allinpi kayllan cheqaq valorniyoqqa. Kay pachaqa unuman chinkayapunanpaqña kashaq barco hinan, Diosmi ichaqa hunt’aq serviqninkunaman huk boteta qon mana wañunankupaq, chay boteqa Diospa llaqtanmi. Ñan kay promesa hunt’akunqaña: “Millay runakunaqa wikch’usqapunin kanqaku, Señor Diosta suyakuqkunan ichaqa kay hallp’ata chaskinqaku” (Sal. 37:9). Paraisoqa kayllapiñan kashan, chayrayku yuyaykushallasunpuni chay sumaq premionchispi.

¿Yuyarishankichu?

• ¿Imaynatan apóstol Pablo premionta qhawariran?

• ¿Imaynatan mosoq pachapi tiyaqkunata juzgakunqa?

• ¿Ima ruwaymi kay tiempopi tukuy imamantapas cheqaq valorniyoq?

[Tapuykuna]

[12, 13 paginakunapi dibujo]

Paraisomanta Bibliapi leespa, ¿chaypipas kashawaq hinachu yuyaykunki?