¿Imaraykun encargana, imaynatan ruwana?

HUK ruwayta encargayqa ñan karanña manaraq Hallp’anchis kashaqtin. Jehová Diosqa sapan Churintan ñawpaqta kamaran, hinaspa chay Churi ‘llank’aysiran’ universota kamananpaq (Pro. 8:22, 23, 30; Juan 1:3). Ñawpaq warmi qharitan Dios kamachiran: ‘Kay pachaman hunt’aychis, chaypi munayniyoq kaychis’, nispa (Gén. 1:28). Arí, paykunamanmi Diosqa encargaran Hallp’antinta paraisoman tukuchinankupaq. Rikusqanchis hina, qallariymantapachan Jehová Diosqa ruwaykunata hukkunaman encargaran chaytan serviqninkunapas ruwanku.

¿Iman encargay? ¿Imaraykun umalliqkuna congregacionpi wakin ruwanankuta hukkunaman encargananku? ¿Imaynatan chayta ruwankuman?

¿Iman encargay?

Encargayqa huk runata rantinchispi ruwananpaq churaymi. Huk simipitaq, ruwananchista hunt’anapaq hukkunawan yanapachikuymi.

Congregacionpi ima ruwanankupaqpas kamachisqa iñiqmasikunaqa hunt’anankun ruwanankuwan, willanankun chay ruway imayna aparikushasqanmanta, chaymantapas tapukunankun encargaq hermanota imayna ruwanankupaq. Chaywanpas encargaq hermanon interesakunan chay ruway hunt’akunanpaq, chayraykun  payqa yachanan imayna ruwashasqanta, yanapayta necesitaqtintaq yanapanan. Yaqapaschá wakinqa ninkuman: “¿Imapaqtaq hukkunaman encargayman ñoqa ruwayta atishaqtiy?” nispa.

¿Imaraykun hukkunaman encargana?

Kaypi yuyaykusun: Jehová Diosqa ñawpaqtan phiwi Churinta kamaran, hinaspan qhepaman Churin yanaparan tukuy imaymanata kamananpaq. Biblian nin: “Paywanmi Diosqa kamarqan hanaq pachapi tukuy ima kaqkunatapas, kay pachapi kaqkunatapas, rikusqa kaqkunatapas, mana rikusqa kaqkunatapas”, nispa (Col. 1:16). Kamaqninchis Diosqa atiranmi pay sapallan tukuy ima ruwaytapas, ichaqa munaranmi Churin paywan kuska llank’aspa kusikunanta (Pro. 8:31, NM). Chaymi Churitaqa yanaparan Taytanta aswan allinta reqsinanpaq. Chhaynapin Diosqa sapallan Churinta allinta prepararan.

Hallp’api kashaspan Jesucristoqa Taytan hina ruwaykunata hukkunaman encargaran. Qatikuqninkunatan predicanankupaq prepararan. Ñawpaqtaqa chunka iskayniyoq qatikuqninkunatan kacharan, chaymantataq 70 * qatikuqninkunata (Luc. 9:1-6; 10:1-7). Chhaynapin may llaqtamanpas chayaqtin, runakunaq sonqon preparasqaña karan Jesusta uyarinankupaq. Hanaq pachaman kutipunanpaqmi Jesusqa preparasqa qatikuqninkunaman hatun llank’aykunata encargaran. Hukninpi, pachantinpin predicananku karan (Mat. 24:45-47; Hech. 1:8).

Cristiana congregacionpipas encargarankun ruwaykunata, chhaynapin iñiqkunata prepararanku. Apóstol Pablon Timoteota niran: “Yachachiy confiakuna iñiq runakunaman, paykunapas wakichisqa kaspa hukkunaman yachachinankupaq”, nispa (2 Tim. 2:2). Arí, experienciayoq hermanokunaqa yachachinankun hukkunata, chhaynapi paykunapas hukkunatañataq yachachinankupaq.

Wakin ruwananta hukkunaman encargaq umalliqqa paykunawan kuskan kusikunqa yachachispa, Diospa ovejankunata michispapas. Hukllaqa manan lliwta ruwayta atinmanchu, chayraykun umalliqkunaqa huk iñiqmasikunawan yanapachikunku. Biblian nin: “K’umuykukuqmi [...] yachayniyoq kapunqa”, nispa (Pro. 11:2). K’umuykukuq kaspaqa manan ñoqallanchischu tukuy imatapas ruwayta munasun. Sichus huklla tukuy imatapas ruwanman chayqa sayk’upunmanmi, manañataq tiempon kanmanchu familianpaq. Chayraykun yachayniyoq runaqa hukkunawan yanapachikun. Coordinadorqa huk ancianokunatan ninman congregacionpi cuentakunata revisanankupaq. Chhaynapin chay umalliqkunapas yachanqaku congregacionpi hayk’a qolqe kashasqanta.

Ima ruwanankupaqpas encargasqa iñiqmasikunaqa chaypi llank’aspan aswan allinta yachanqaku, encargaq hermanopas qhawarinqan ima ruway atisqanta. Arí, umalliqkunaqa chaypin ‘ñawpaqta allinta qhawarinkuman’ imaynata llank’ananta hunt’ashasqanta, chhaynapin reparankuman allin siervo ministerialchus kanman icha manachus chayta (1 Tim. 3:10).

Chaymantapas, ruwanankuta yanapachikuq umalliqkunaqa hukkunapi confiasqankutan rikuchinku. Pabloqa prepararanmi Timoteota misionerota hina llank’achispa. Chhaynapin munasqa amigontin kapuranku, chayraykun Pablo Timoteota niran: “Iñiypi cheqaq churiy”, nispa (1 Tim. 1:2). Chhaynallataqmi Jehová Dioswan Jesuswanpas karan, tukuy imaymanata kamaypi kuska llank’ashaqtinku. Chayrayku ruwanankuta hukkunawan yanapachikuq umalliqkunaqa paykunawan aswan allinta reqsinakunkuman.

 ¿Imaraykun wakin mana encargankuchu?

Yachankuña hukkunaman encargay allin kasqanta chaypas, wakin umalliqkunaqa manan chaytachu ruwanku, yaqapaschá paykunaqa piensanku hukkunawan yanapachikuspa manaña autoridadniyoqchu kanankupaq. Otaq piensankuman paykunallawan tukuy imapas ruwakunanta. Ichaqa yuyarinan, manaraq hanaq pachaman ripushaspan Jesús huk hatun llank’ayta qatikuqninkunaman encargaran, chaytaqa ruwaran paymantapas aswantaraq llank’anankuta yachashaspan (Mat. 28:19, 20; Juan 14:12).

Otaq huk umalliqqa mana encargayta munanmanchu ñawpaqpi encargasqanta mana allinta ruwasqankurayku, hinaspa piensanman paylla allinta usqhaylla imatapas ruwananpaq. Ichaqa Pablomanta yachasunchis, payqa yacharanmi hukkunaman encargay allin kasqanta, yachallarantaqmi mana lliw yachachisqan runachu paypa munasqanman hina ruwanankuta. Chayllaraq misionero llank’aypi purishaqtinmi Pabloqa Marcos waynata prepararan paywan kuska llank’ananpaq, Marcosmi ichaqa llank’ananta saqespa wasinman kutipusqa, chaywanqa anchatan Pablo llakikuran (Hech. 13:13; 15:37, 38). Ichaqa manan chayraykuchu hukkunata manaña prepararan. Yachasqanchis hina, Timoteotan pusaran paywan llank’ananpaq, aswan chaniyoq llank’aykunata aparinanpaq preparasqaña kashaqtintaq Éfeso llaqtapi saqeran, chaymantapas kamachiranmi congregacionpi umalliqkunata, siervo ministerialkunata ima nombrananpaq (1 Tim. 1:3; 3:1-10, 12, 13; 5:22).

Kunanpas umalliqkunaqa manan huk hermano llank’ananta mana allinta hunt’asqanraykuchu manaña hukkunata preparananku. Ancha allinmi hukkunapi confiay yanapaypas. Ichaqa, ¿imakunatan qhawarinanku encargaqkuna?

¿Imaynatan encargana?

Pimanpas encarganapaqqa ñawpaqtaraqmi qhawarina allintachus hunt’anman chay llank’ayta icha manachus chayta. Jerusalenpi mikhunata rakinapaq mana pipas kaqtinmi apostolkuna akllaranku ‘qanchis qharikunata [...] Santo Espirituwan hunt’a kaqkunata, yachayniyoq’ kaqkunata ima (Hech. 6:3). Sichus ruwananwan mana hunt’aq runaman encarganki chayqa, manapaschá kamachisqaykita ruwanqachu. Chayrayku ñawpaqtaqa pisillata ruwananpaq qowaq, chay ruwayta hunt’aqtinqa, yaqapaschá importante llank’aykunata encargawaq.

Chaymantapas hukkunatawanmi qhawarinanku. Runakunaqa manan llapanchispas kaqllachu kanchis, nitaqmi kaq experienciayoqchu kasunman. Yaqapaschá acomodadorpaqqa allin kanman hukkunata sumaqta trataq hermano, imatapas ordenpi allin ruwaq hermanotaq congregacionpi secretariota yanapananpaq allin kanman. Decoración nisqamanta yachaq hermanamantaq encargankuman Conmemoracionpaq t’ikata churananpaq.

Imatapas ruwakunanpaq encargaq hermanoqa sut’itan willanan imayna ruwananta. Juan Bautista manaraq qatikuqninkunata Jesusman kachashaspaqa allintan paykunaman sut’incharan imata yachay munasqanta imayna tapunankutapas (Luc. 7:18-20). Jesuspas qatikuqninkunatan kamachiran milagrota ruwaspa askha runaman mikhuchisqanmanta puchuq mikhunata hoqarinankupaq, chaytaqa paykunañan ruwananku karan (Juan 6:12, 13). Allinta sut’inchanankuqa  ima ruwaychus kasqanmantan dependenqa, preparasqachus kashan icha manachus chaymantawan. Imaynaña kaqtinpas, encargaqpas llank’anata chaskiqpas yachanankun imayna ruwakunanta, chay llank’ay imayna aparikushasqanmanta, hayk’a tiempomanta willana kasqantapas. Iskayninkun yachananku llank’ayta chaskiq iñiqmasi maykamachus payllamanta ruwananta. Hayk’a tiempopi tukunan kaqtinpas willananmi, chhaynapin llank’ayta chaskiqpas yuyaykunman atinmanchus icha manachus chayta, hayk’a tiempopi tukunanpaq kamachinanmantaqa.

Ima ruwananpaqpas kamachisqa hermanoqa chaskinanmi tukuy ima necesitasqanta ruwananta hunt’ananpaq. Hukkunapas yachanankun chay ruwaymanta encargado chay iñiqmasinchis kashasqanta. Jesusqa huk qatikuqninkunaq uyarishasqanmi Pedrota niran: “Qanmanmi Hanaq pacha qhapaqsuyuman haykuna llavekunata qosqayki”, nispa (Mat. 16:13-19). Chhaynallataqmi congregacionpipas, mayninpiqa allinmi kanman huk ruwaymanta huk hermano encargado kashasqanta iñiqmasikunaq yachananku.

Chaymantapas allin yuyaywan ruwaqmi kana. Sichus huk umalliq qhawashallanqa huk iñiqmasiman encargasqan llank’ayta chayqa, paypi mana confiasqantan rikuchinqa. Mayninpiqa manapaschá munasqanman hinapunichu ruwanqa. Ichaqa sichus mana nishutachu qhawashanqa chayqa, tiempowanmi experienciata hap’inqa mana iskayaspataq ruwanqa. Ichaqa manan chayraykuchu umalliqqa manaña imayna ruwashasqanpi interesakunan. Jehová Diospas wawanwanña yanapachikuran imaymanata kamananpaq chaypas, paywan kuskan llank’asharan. Churintan niran: “Runata ruwasunchis ñoqanchisman rikch’akuqta”, nispa (Gén. 1:26). Chayrayku huk ruwayta aparinanpaq kamachisqayki iñiqmasita sumaqta kallpachay yanapaytaq. Chaymantapas yanapawaqmi imaynatachus chay ruwayta aparishasqanta qhawarispa. Mana allinta ruwashaqtinqa yanapay imaynata ruwananpaq. Yuyariy, chay llank’ay qosqaykimantaqa qanmi responsable kanki (Luc. 12:48).

Congregacionpi umalliqkunaqa huk iñiqmasikunapi interesakuspan llank’anakunata encargaranku, chhaynapin llank’ayta chaskiqkunata yanapanku. Chhaynaqa, umalliqkunaqa yuyaykunankun hukkunaman encargay ancha allin kasqanpi, imayna ruwanankupipas, chhaynapin Jehová Dios hina ruwashanqaku.

[Uranpi willakuy]

[29 paginapi recuadro]

ENCARGASPAQA,

• hukkunawanmi kusikunchis ruwayninkuta hunt’aqtinku

• astawanraqmi ruwanchis

• yachayniyoq k’umuykukuq kasqanchistan rikuchinchis

• hukkunatan preparanchis

• hukkunapi confiasqanchistan rikuchinchis

[30 paginapi recuadro]

¿IMAYNATAN ENCARGANA?

• Yachasqanman hina llank’anata qoy

• Ima ruwaytapas encargaspaqa allinta yachachiy

• Niy imaynata ruwananpaq

• Ruwananpaq ima necesitasqanta qoy

• Ruwasqanpi interesakuy kallpachaytaq

• Chay llank’aymantaqa qanmi responsable kanki

[31 paginapi fotokuna]

Encargayqa imatapas ruwananpaq hukta kamachiymi imayna ruwashasqanpi interesakuytaq