Tukuy sonqo Jehová Diosta yupaychasun

“Yupaychana wasiykitan sinchitapuni munakuni.” (JUAN 2:17.)

1, 2. ¿Imatan Jesús ruwaran templopi 30 watapi, imarayku?

CHAYPIPAS kashawaq hina yuyaykuy: 30 watan kashan, Jesús predicayta qallarisqanmantaqa soqta killañan pasarun kunantaq Jerusalenta rishan Pascua fiestapaq. Chayaspanmi templota rin chaypin tarin “torokuna, ovejakuna, palomakuna vendeqkunata, hinallataq tiyaykuspa qolqe cambiaqkunatapas”. Hinaspan waskhamanta hasut’ita ruwaruspa chay animalkunata qarqomun, vendeqkunataq phawaylla lloqsimunku. Cambiaqkunaq mesankutapas tikrarparispan qolqenkuta hich’arparin, paloma vendeqkunatataq kamachin tukuy kaqninkuta orqospa ripunankupaq (Juan 2:13-16).

² ¿Imaraykun Jesús chayta ruwaran? Payqa anchatan Dios yupaychana wasita munakuran. Chaymi comerciantekunata niran: “¿Imaynan Yayaypa wasintaqa qhatuna wasiman tukuchishankichis?” nispa. Qatikuqninkunataq chayta rikuspa yuyariranku ñawpa watakunapiraq Davidpa qelqasqanta: “Yupaychana wasiykimantan anchatapuni sientini” (Juan 2:16, 17; Sal. 69:9).

3. a) ¿Iman sientiy? b) ¿Imatan sapankanchis tapukunanchis?

³ Jesusqa comerciantekunata qarqomuran yupaychana wasimanta anchata sientisqanraykun. Sientiy simiqa “hukkunapi otaq imapipas anchata interesakuymi”. Kay tiempopi qanchis millón masña Jehová Diosta serviq cristianokunaqa sapankanchismi kayta tapukunanchis: “¿Imaynatan astawan rikuchiyman Diospa wasinta anchata munakusqayta?” nispa. Chay tapuyta kutichinapaqqa ñawpaqta qhawarisunchis kay tiempopi imatachus Diospa wasin representasqanta, chaymantapas yachasunmi imaynatas ñawpaq tiempopi hunt’aq sonqowan Diosta serviq runakuna rikuchiranku Diospa wasinta ancha munakusqankuta. Ruwasqankuqa yachaqakunanchispaqmi qelqasqa karan, chaymanta yachayqa kallpachawasunchá sonqomanta Diosta servinanchispaq (Rom. 15:4).

Diospa wasin: ñawpaq tiempopi kay tiempopipas

4. ¿Imapaqmi karan Salomonpa ruwachisqan templo?

⁴ Israelpiqa Diospa wasin karan Jerusalén llaqtapi yupaychana wasin. Ichaqa manan chaywanqa nishanchischu chaypin tiyaran nispa. Pay kikinmi niran: “Hanaq pachan kamachikuy tiyanay, hallp’a pachataq chakiypa samanan. Chhaynaqa, ¿imayna wasitan perqapuwankichis? ¿Mayneqpitaq samakuyman?” nispa (Isa. 66:1). Salomonpa ruwachisqan templotaqa Diospa wasin nikuran chaypi Jehová Diosta yupaychasqankurayku paymanta mañakunapaq wasi kasqanrayku iman (1 Rey. 8:27-30).

5. ¿Iman kay tiempopi Diospa wasin?

⁵ Kay tiempopi Diospa wasinqa manan Jerusalén llaqtapichu nitaq maypichu ruwasqa wasi kashan. Wasinqa Cristoq sacrificio ruwasqanrayku munayninman hina yupaychananchispaq Diospa allichasqanmi. Chay espiritual templopin teqsimuyuntinmanta Diosta serviq cristianokuna payta alabanku (Isa. 60:4, 8, 13; Hech. 17:24; Heb. 8:5; 9:24).

6. ¿Ima reykunan Judá suyupi kallpachakuranku tukuy sonqo Diosta yupaychakunanpaq?

⁶ 997 watapin manaraq Jesús hamushaqtin, Israelpi kamachikuy iskayman t’aqakuran. Judá suyupi kamachikuq chunka isqonniyoq reykunamantan tawa kallpachakuranku kamachisqanku runakuna Diosta tukuy sonqomanta yupaychanankupaq. Paykunan karanku Asá,  Jehosafat, Ezequías, Josías. ¿Imatan paykunamanta yachasunman?

Tukuy sonqowan Diosta servispaqa bendicionkunatan chaskisun

7, 8. a) ¿Imatan ruwananchis Jehová Dios bendeciwananchispaq? b) ¿Asá reypa ima mana allin ruwasqantan mana ruwananchischu?

⁷ Rey Asá kamachishaqtinmi Jehová Dios profetakunata kacharan llaqtanta allin ñanpi pusananpaq. Biblian willan Obedpa churin profeta Azariasmanta, paypa rimasqanmi Asá reypa sonqonta kuyurichisqa Judá suyupi llapa idolokunata ch’usaqyachinanpaq (leeychis 2 Crónicas 15:1-8). Reypa chay ruwasqanqa llaqtatan hukllacharan. Jerusalén llaqtapin huk hatun huñukuyta ruwaran, chaymanmi hamuranku kamachisqan runakuna hinallataq Israel suyumanta askha runakunapas. Chaypin Diosman llapanku prometeranku hunt’aq sonqowan servinankupaq. Biblian nin: “Kunkayoqta Señor Diosman jurarqanku, hinaspa kusikuymanta qaparirqanku, cornetata waqratapas tocallarqankutaq. Chaymi llapan Judá runakunaqa tukuy sonqowan juraspa prometekusqankumanta anchata kusikurqanku. Sonqopas-sonqon Señor Diosta maskharqanku, chaymi Señor Diosqa paykunawan tarichikurqan, sumaqtataq suyuntinpi kawsachirqan”, nispa (2 Cró. 15:9-15). Ñoqanchistapas Jehová Diosqa bendeciwasunmi sichus tukuy sonqowan servisun chayqa (Mar. 12:30).

⁸ Tiempowanmi ichaqa rey Asá sinchita phiñakuran profeta Hananiq anyasqanmanta (2 Cró. 16:7-10). Kunanqa umalliqkunawanmi Jehová Diosqa yuyaychawanchis. ¿Imaninchismi Bibliawan yuyaychawaqtinchis? ¿Agradecekunchischu icha phiñakunchischu?

9. ¿Ima sasachaypin tarikuranku Jehosafat lliw Judá runakunawan, imatan ruwaranku?

⁹ Jehosafat kamachishaqtinmi Ammón, Moab, Seír orqomanta runakuna ima huñukuspa Judá contra maqanakuq risharanku. ¿Imatan rey Jehosafat ruwaran? Lliw Judá runakunatan esposankuta, wawankutawan huñuran Diospa wasinpi mañakunankupaq (leeychis 2 Crónicas 20:3-6). Yupaychana wasita inagurakushaqtin Salomonpa rimasqanman hinan rey Jehosafat khaynata rogakuran: “Diosnillayku, valekuykikun kay ruwasqankuta chaninchanaykipaq. Ñoqaykuqqa manan kallpayku kanchu, chay sinchi askha soldadokunawan tupanaykupaq. Paykunan ñoqayku contra hamun, manan imanayta atiykuchu, ichaqa qanllamanmi hap’ipakuykiku”, nispa (2 Cró. 20:12, 13). Rey mañakuyta tukuqtintaq ‘chay huñukuypi kashaq’ Leví runa Jahazielman Diospa espiritun hunt’aykuran, chaymi payqa runakunata kallpacharan Diospi confianankupaq (leeychis 2 Crónicas 20:14-17).

10. a) ¿Piwanmi Dios Jehosafatman llaqtamanwan willachiran ima ruwanankuta? b) ¿Imaynatan rikuchinchis Diospa yanapayninta valorasqanchista?

¹⁰ Rikusqanchis hina, Diosqa Jahazielwanmi Jehosafatman Judá runakunamanwan willaran ima ruwanankuta. Kay tiempopiqa “allin yuyayniyoq hunt’aq kamachi[wanmi]” Diosqa kallpachawanchis pusawanchispas. Chayraykun kasukunanchis respetananchis umalliqkunata, paykunaqa kallpachakunkun Diospa ovejankunata michinankupaq allin yuyayniyoq hunt’aq kamachiq nisqanman hina ruwanankupaqpas (Mat. 24:45; 1 Tes. 5:12, 13).

11, 12. ¿Imatan yachanchis Jehosafatmanta kamachisqan runakunamantapas?

¹¹ Imaynan Jehosafatpas Judá runakunawan kuska huñukuranku Diospa yanapayninta maskhanankupaq, chhaynatan ñoqanchispas congregacionpi iñiqmasinchiskunawan huñukushanallanchis. Sichus qanpas nishu sasachakuykunapi tarikuspa mana imanaytapas atishankichu chayqa, Jehosafat Judá runakuna hina Jehová Diospa yanapayninta mañakuy tukuy sonqowantaq payman hap’ipakuy (Pro. 3:5, 6; Fili. 4:6, 7). Maypiña tarikunki chaypas, mañakuqtiykiqa ‘pachantinpi kaq iñiqmasinchiskunawanpas’ kashawaq hinan sientekunki (1 Ped. 5:9).

¹² Jehosafatqa llaqtantinmi kasukuranku Jahazielwan Diospa nisqanta. ¿Iman chay ruwasqankumanta karan? Paykunan maqanakuypi atiparanku, chaymi Jerusalenman “ancha kusisqa” kutipuranku hinaspa “Señor Dios yupaychana wasita rirqanku, arpata, tawtinkuta, cornetatawan  tocaspanku” (2 Cró. 20:27, 28). Kunanpas ñoqanchisqa hatunchananchismi Jehová Diosta, kasukunanchistaq allin yuyayniyoq hunt’aq kamachiwan ima niwasqanchistapas.

Huñukunanchis wasikunata cuidasun

13. ¿Imakunatan Ezequías ruwaran kamachiyta qallarishaspa?

¹³ Rey Ezequiasqa Dios yupaychaypi ancha interesakusqantan rikuchiran kamachiyta qallarisqan killapi yupaychana wasita hukmanta kichachispa allichachispa ima. Sacerdotekunata Leví runakunatawan huñuspan kamachiran Diospa wasinta limpianankupaq, chay ruwaytan chunka soqtayoq p’unchayllapi tukuranku (leeychis 2 Crónicas 29:16-18). Chay ruwasqankun yuyarichiwanchis kay tiempopi Huñunakunanchis Wasita allichasqanchista limpiasqanchista ima. ¿Hayk’aqllapas uyarirankichu iñiqmasinchiskuna kusikuywan llank’asqankuta qhawarispa pipas admirakusqanmanta? Arí, Jehová Diosta yupaychanapaq tukuy sonqomanta kallpachakuyqa paytan hatunchan.

14, 15. ¿Ima ruwaymi Jehová Diosta hatunchan? Ejemplokunata willay.

¹⁴ Inglaterra nacionpin huk llaqtapi iñiqmasinchiskuna rimanakusqaku Huñunakuna Wasita allichanankupaq. Ichaqa ladonpi tiyaq vecinon mana munaranchu allichanankuta. ¿Imatan iñiqmasinchiskuna ruwaranku? Chay vecinoq hallp’anta Huñunakuna Wasitawan t’aqaq perqan urmayunanpaqña kasharan, chaymi iñiqmasinchiskunaqa sumaqllata vecinota rimapayaranku gratislla perqantawan allichanankupaq. Yaqa llapan perqatataq allichananku karan chayqa, anchatan iñiqmasinchiskunaqa llank’aranku. Chayta rikuspan vecinoqa manaña ñawpaqpi hinañachu yuyaykuran, chaymi kunanqa Huñunakuna Wasita cuidaypi imaraq yanapakunpas.

¹⁵ Jehová Diospa testigonkunaqa pachantinpin askha wasikunata sayarichinku. Tukuy tiemponkuwan llank’aq siervos internacionales nisqa iñiqmasinchiskunan kikin llaqtankumanta kaq yanapakuqkunawan sayarichinku Huñunakuna Wasikunata, asambleata ruwanapaq Wasikunata, Betel wasikunata ima. Sam iñiqmasinchismi ingeniero especialista calefacción, ventilación, acondicionamiento de aire nisqakunata churananpaq. Paymi esposan Ruthwan Europa, África lado askha nacionkunapi llank’aranku. Maytaña rispapas iñiqmasinchiskunawan kuskan predicanku. Sammi willawanchis imarayku chay llank’aypi  yanapakusqanmanta: “Reqsinin Betel wasikunapi llank’aq askha iñiqmasinchiskunata, paykunan kallpachawaranku. Tukuy sonqowan kusikuywan llank’asqankuta rikuspaymi ñoqapas paykuna hina llank’ayta munarani”, ninmi

Diospa kamachikuyninkunata kasukusun

16, 17. ¿Ima ruwaytan Diosta serviqkuna tukuy sonqomanta apariranku, ima bendiciontan chaymanta chaskiranku?

¹⁶ Rey Ezequiasqa yupaychana wasita allichachisqanmantapas, ñawpaqpi Diospa kamachisqanman hinan kaqmanta Pascua fiesta ruwachiran (leeychis 2 Crónicas 30:1, 4, 5). Paymi, Jerusalén llaqtapi tiyaq runakunapiwan Judá suyuntinman Israel suyuntinmanwan willachiranku Jerusalenman hamunankupaq. Invitacionkunaqa hinantinmanmi rakisqa karan (2 Cró. 30:6-9).

¹⁷ Ñoqanchispas askha watañan paykuna hina invitacionkunata rakimushanchis. Sapa watanmi lliw runakunaman sumaq invitacionkunata rakimuranchis ñoqanchiswan kuska Jesuspa wañusqanta yuyarinankupaq, chaytan ruwanchis Jesuspa kamachisqanta kasukuspa (Luc. 22:19, 20). Chay invitacionkunata imayna rakinapaqqa Predicayta Yachanapaq Huñunakuypin yacharanchis, tukuy sonqowantaqmi chay llank’ayta apariranchis. ¿Bendeciranchu Jehová Dios chay ruwasqanchista? ¡Arí, bendeciranmi! Qayna watan qanchis millón Testigokuna teqsimuyuntinpi Jesuspa wañusqanta yuyarinapaq invitacionkunata rakiranchis, chayraykun huñukuranchis 17.790.631 runakuna.

18. ¿Imapaqmi yanapawasun tukuy sonqowan Diosta serviy?

¹⁸ Biblian nin: “Ezequiasqa Israelpa Diosnin Señormanmi hap’ipakurqan. Judá suyupi reykunaqa ñawpaqkaqpas qhepakaqpas manan pay hinaqa karqanchu. Ezequiasqa Señor Diosman k’askan kawsarqan, manataq hayk’aqpas paymanta t’aqakurqanchu, aswanpas Señor Diospa Moisesman kamachisqan simikunatan hunt’arqan”, nispa (2 Rey. 18:5, 6). Kallpachakusun Ezequías hina kananchispaq. Tukuy sonqowan Diosta yupaychaymi yanapawasun payman astawan ‘k’askakunanchispaq’ wiñay kawsay premionchista ama qonqananchispaqpas (Deu. 30:16).

Usqhaylla kasukusun

19. ¿Imaynatan Diosta serviqkuna rikuchinku Conmemoracionpi interesakusqankuta?

¹⁹ Rey Josiaspas kamachiranmi Pascua fiestata ruwakunanpaq (2 Rey. 23:21-23; 2 Cró. 35:1-19). Ñoqanchispas kay tiempopiqa ñawpaqmantañan allichakunchis asambleanchiskunaman, Jesuspa wañusqanta yuyarinapaq huñunakuymanpas rinanchispaq. Wakin nacionkunapi huk iñiqmasinchiskunaqa kawsayninkuta imaraqmi peligroman churanku Cristoq wañusqanta kuska yuyarinankupaq. Umalliqkunapas chay huñunakuyta anchata valorasqankuraykun kallpachakunku chaypi lliw iñiqmasikuna kanankupaq, kuraqkunapas onqosqakunapas.

20. a) ¿Iman sucederan rey Josías kamachishaqtin, imatan ruwaran? b) ¿Imatan yachanchis Josiaspa ruwasqanmanta?

²⁰ Rey Josiasmi kamachiran yupaychana wasita allichanankupaq. Wasita allichashaqtinkun sacerdote Hilcias “Señor Diospa Moiseswan qosqan kamachikuy qelqa k’uyuta” tariran hinaspa chayta Safanman qoran, paymi reypa secretarion karan. Safantaq chay qelqata reyman apaspa leeran (leeychis 2 Crónicas 34:14-18). ¿Imatan Josías ruwaran chayta uyarispa? Llakikuymantan p’achanta llik’iran, hinan chay rato kamachin runakunata kacharan Jehová Diosta tapumunankupaq. Jehová Diosqa profetiza Huldawanmi huchacharan  Judá suyupi wak dioskunaman k’umuykusqankuta, chaymantapas willaranmi hatun llakita chaypi tiyaqkunaman chayachinanta. Josiasmi ichaqa usqhaylla llapa wak’a dioskunata ch’usaqman tukuchiran, chayraykun Diosqa payta bendeciran (2 Cró. 34:19-28). ¿Imatan chaymanta yachanchis? Ñoqanchispas Josías hinan kananchis. Usqhayllan Diospa kamachikuyninkunata kasukunanchis. Sichus Israel runakuna hina mana hunt’aq sonqowanchu Diosta servisunman kamachikuyninkunatapas mana kasukusunmanchu chayqa, manan bendicionninta chaskisunchu. Ichaqa sichus Josías hina kallpachakusun Dios yupaychayninchis ch’uya kananpaq chayqa, manan qonqanqachu ruwasqanchista.

21, 22. a) ¿Imaraykun kallpachakunanchis tukuy sonqowan Diosta yupaychananchispaq? b) ¿Imamantan hamuq estudiopi qhawarisun?

²¹ Asá, Jehosafat, Ezequías, Josías reykunaqa allin ejemplon karanku Diospa wasinpi anchata interesakusqankupi tukuy sonqomanta Diosta yupaychasqankupipas. Ñoqanchispas Diospin confiananchis kallpachakunanchistaq tukuy sonqowan yupaychananchispaq. Tukuy imamantapas astawanqa kusichiwasun Dioswan pusachikuy, kamachikuyninkunata, llaqtanpi umalliqkunatapas kasukuymi.

²² Hamuq estudiopin qhawarisunchis tukuy sonqowan allin willakuykuna predicaymanta, wayna sipaskunatapas kallpachanqan kusikuywan tukuy sonqo Jehová Diosta servinankupaq. Qhawarillasuntaq Satanaspa huk trampanmanta, imaynatas chayman mana urmasunmanchu chaytapas. Sichus sonqomanta Diospa kamachikuyninkunata kasukusun chayqa, aswan aswantan Churin Jesusman rikch’akusunchis, paymantan Biblia nin: “Yupaychana wasiykimantan anchatapuni sientini”, nispa (Sal. 69:9; 119:111, 129; 1 Ped. 2:21).

¿Yuyashankichu?

• ¿Imaynatan Diosta servinanchis bendicionninta chaskinanchispaq, imarayku?

• ¿Imaynatan rikuchisunman Jehová Diospi confiasqanchista?

• ¿Imaynatan tupan Diospa kamachikuyninkunata kasukuy payta sonqomanta yupaychaywan?

[Tapuykuna]

[9 paginapi dibujokuna]

¿Imaynatan Asá, Jehosafat, Ezequías, Josías reykuna rikuchiranku Dios yupaychaypi anchata interesakusqankuta?