Ama imawanpas hark’achikusunchu ‘allin kaqkuna willana’ p’unchaypi

SAMARIA llaqta punkupin lepra onqoyniyoq tawa runakuna kasharanku limosnata mañakuspa, manataqmi pipas imallatapas qoyusqakuchu. Siria llaqtamanta soldadokunan llaqtankuta muyuykuranku, chaymi runakunaqa yarqaymanta wañusharanku, ñan huk wawatapas mikhusqakuña (2 Rey. 6:24-29). Chaykunata rikuspan lepra onqoyniyoq runakunaqa mana maytapas riyta atirankuchu.

Manañataq yacharankuchu wañunankutapas kawsanankutapas chayqa Siria soldadokunaq karpa-karpanman tutallapi rinankupaqmi yuyaykuranku. Karpakunaman chayaqtinkutaq ch’in kashasqa, manan guardiakunapas soldadokunapas kasqachu, asnokuna caballokunallan chaypi watarayashasqa. Hinan susigollawan huknin karpaman haykuranku, mana pitapas chaypi tarispataq chaypi tarisqankuta mikhuranku ukyaranku ima. Chaypin tarillarankutaq qorita, qolqeta, p’achakunata, imaymanakunatawan, chaytataq astayuspa pakayamuranku. Arí, sirio runakunaqa pasapusqakun. ¿Iman sucedesqa? Jehová Diosmi milagrota ruwaspa Siria soldadokunaman uyarichisqa hatun ejercitoq hamushasqanta hina. Chayta mancharikuspan paykunaqa imaymanankuta saqeyuspa phawaylla ayqekusqaku.

Chay lepra onqoyniyoq runakunaqa imaymanakunatan astayusharanku. Chayllamanmi yuyariranku llaqtapi runakuna yarqaymanta wañushasqankuta. Chaymi conciencianku nanaqtin llakisqa ninakuranku: “Manan allintachu ruwashanchis. Kunanpachan kay allin kaqtaqa willamunanchis”, nispa. Chaymi paykunaqa phawaylla Samaria llaqtata riranku tukuy imaymana tarisqankumanta willamuq (2 Rey. 7:1-11).

Paykuna hinan ñoqanchispas ‘allin kaqkunata willana’ tiempopi kawsashanchis. ¿Iman chay allinkaq willakuykuna? ‘Kay tiempo p’uchukapunanpaqña kashasqanmanta’ rimaspan Jesús chaymanta rimaran, kaytan niran: “Qhapaqsuyumanta [Reinomanta] allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p’uchukayqa chayamunqa”, nispa (Mat. 24:3, 14). ¿Imatan ruwananchis chaykunata yachashaspa?

Kay kawsaypa llakichiyninkunan urmachiwasunman

Lepra onqoyniyoq runakunaqa imaymana tarisqankupi afanakuspan mana yuyarirankuchu llaqtamasinku yarqaymanta wañushasqankuta. Arí, paykunallapin yuyaykuranku. ¿Tarikusunmanchu ñoqanchispas chhaynapi? Ari. Jesuspunin willaran tukukuy p’unchaykunapi ‘kayneqpi chayneqpi yarqay’ kananmanta (Luc. 21:7, 11). Chaymi qatikuqninkunata niran: “Cuidakuychis qankuna kikiykichista, paqtataq sonqoykichis rumiyanman viciokunawan, machaywan, kay kawsaypa llakichikuyninwan”, nispa (Luc. 21:34). Chayraykun cuidakunanchis ‘kay allin kaqkuna willana’ p’unchaypi tiyasqanchista mana imawanpas qonqananchispaq.

Diospa munayninta imamantapas ñawpaqta ruwaq Blessing sutiyoq iñiqmasimanta yachasun. Payqa manaraq estudionta tukushaspan precursora karan. Chaymantataq Benín suyupi Betel wasipi llank’aq cristianowan casarakuran, hinan paypas Betelman haykupuran. Paymi nin: “Cuartokunata limpiaspan llank’ani, ancha kusisqan kani chay llank’anaywan”, nispa. Payqa  chunka iskayniyoq watañan tukuy tiemponwan Diosta servishan, kusisqataqmi kashan ‘allin kaqta willana’ tiempopi llank’ashasqanmanta.

¿Imakunapin tiemponchista usuchishasunman?

Qanchis chunka qatikuqninkunata predicanankupaq kachashaspan Jesús niran: “Cosechanaqa askhallañan, llank’aqkunan ichaqa pisilla. Chay hinaqa, chakrayoqta valekuychis cosechanman llank’aqkunata kachananpaq”, nispa (Luc. 10:2). Sichus chakrapi llank’aq mana tiemponpichu llank’asqanta hoqarinman chayqa, mikhuyninmi ismurapunman. Chhaynallataqmi predicaywanpas kanman, sichus mana usqhayllachu predicasunman chayqa, askha runakunan wañunkuman. Chaymi Jesusqa nillarantaq: ‘Aman ñanpiqa pitapas napaykunkichischu’, nispa (Luc. 10:4). Griego rimaypi “napaykun” nispaqa manan “imaynallan kashanki” otaq “buenos días” nispa ninallamantachu nishan. Aswanmi rimashan amigokunawan tuparuspa marq’arinakuymanta sayayuspa unayta rimanamantawan. Cristianokunaqa usqhayllan runakunaman willamunanku karan chaymi manapuni imapipas tiemponkuta usuchinankuchu karan.

¿May tukuytan tiemponchista usuchishasunman? runakunaqa unayñan tiemponkuta usuchishanku televisionta qhawaspa. Ichaqa, kallantaqmi telefono, celular, computadorapas. Chaymantan Gran Bretaña suyupi tapuranku waranqa runakunata, paykunaqa 88 minutotas telefonopi rimanku, 62 minutota celularpi, computadorapi 53 minutota, mensajeta apachispataq 22 minutota. Killapi chaykunata yupasunman chayqa iskay precursor auxiliarpa ruwasqanmanta aswanraqmi lloqsin. Chaymi tapukunanchis: “¿Hayk’a tiempon chay ruwaykunapi kani?” nispa.

Ernst hinallataq Hildegard Seliger casarasqa cristianokunan tiemponkuta mana usuchiqkuchu. Paykunaqa Alemania, Rusia suyukunapin tawa chunka wata carcelpi kasqaku, chaymanta lloqsinpuspankutaq wañunankukama precursor karanku.

Askha runakunan Seliger cristianokunaman cartakunata apachiqku, chaymi munaspaqa chay cartakunata leespa chaykunaman kutichispa tiyankuman karan. Ichaqa Jehová Diospa munayninta ruwaymi paykunapaqqa aswan allin karan.

Llapanchispas munanchismi amigonchiskunawan familianchiswanpas parlariyta, chayqa manan huchachu. Mayninpiqa horqonapunin tiempota chay ruwaykunapaqpas. Ichaqa pisillatan chaykunapaq tiempota t’aqananchis mana chayqa manan tiemponchis kanmanchu ‘kay allin kaqkuna willana’ p’unchaypi predicanapaq.

Ama sayk’uspa allin willakuykunata willasun

Ancha allinpunin ‘allin kaqkunata willananchis’ tiempopi kawsayqa. Ama lepra onqoyniyoq runakuna ñawpaqpi ruwasqankuta hinaqa ruwasunchu. Paykunan qhepamanña ninakuranku: “Manan allintachu ruwashanchis”, nispa. Ñoqanchispas ama kay pacha ruwaykunapi afanakusunchu, aswanpas tukuy atisqanchista ruwasun Diosmanta predicananchispaq.

Apóstol Pablopas allin ejemplon karan ñoqanchispaq. Iskay chunka wata predicasqanpi yuyaymanaspan niran: “Cristomanta allin willakuykunata hinantinman hunt’aykachini”, nispa (Rom. 15:19). Arí, Pabloqa tukuy sonqonwanmi predicashallaran. Pay hina tukuy sonqowan predicashallasun ‘kay allin kaqkuna willananchis’ tiempopi.

[28 paginapi foto]

Blessing cristianaqa manan precursora kasqanta saqeranchu imaña kaqtinpas.

[29 paginapi foto]

Seliger cristianokunaqa manan tiemponkuna usuchirankuchu