¿Yuyashankichu?

Qanpaqqa sumaqchá karqan chayllaraq lloqsimuq Qhawaq revistakunata leey. Chhayna kaqtinqa, ¿kutichiwaqchu qatimuq tapuykunata?

• Huk kutinmi Jesús Pedrota unupi heq’epananmanta salvarqan, ¿imatan chaymanta yachanchis? (Mat. 14:28-31.)

Sichus huk iñiqmasinchista reparanchis iñiyninpi chiriyapushaqta hina chayqa, makinchistapas haywarisunman hinan sumaqta kallpachananchis (15/9, 8 página).

• ¿Imakunatan Jehová Dios aguantanan karqan huchamanta librawananchispaq?

Rikurqanmi wawanmanta burlakusqankuta ñak’arichisqankutapas. Abrahampa ruwasqanmi rikuchirqan qhepaman Diospa ruwananta, payqa liston kasharqan churin Isaacta sacrificiopi haywananpaq. Jehová Diosqa consentirqanmi Churinta suwata hina wañuchinankuta (15/9, 28, 29 paginakuna).

• ¿Imaynatan Bibliata entiendewaq?

Bibliata entiendenaykipaqqa Diosmantan santo espiritunta mañakunayki, manan kasunaykichu Biblia contra rimaqkunataqa, yachaytataq munanayki Bibliata yuyaychaq Diosmanta. Chaymantapas yanapachikunaykin huk yachaqwan (1/10, 4-7 paginakuna).

• ¿Imanaqtinmi sapa p’unchay Diosta uyarinanchis?

Bibliata leeyqa espejopi qhawakuy hinan (Sant. 1:23-25). Diospa yuyaychasqan kasqanraykun Bibliaqa yanapawanchis imayna runa kasqanchista qhawarikunanchispaq. Askha kutitaña Bibliata leesunman chaypas, tarisunpunin mosoq yachachikuykunata chaykunan yanapawasun aswan allinta kawsananchispaq. Chaykunataqa manan ñawpaqpi leespanchis repararqanchischu. ¿Imarayku? ‘Kay pachaq imaynachus kasqan [...] tukukapuqlla’ kasqanrayku otaq cambiashasqanrayku. Chayraykun imaynapi tarikusqanchispas cambiashallan (1/10, 13, 14 paginakuna).

• ¿Imatan yachachiwanchis ‘wasi sayarichiymanta’ rimaq Proverbios 24:27 texto?

Manaraq casarakuyta piensashaspan qhariqa preparasqa kashanan casado kawsaypi imaymana ruwanankunata hunt’ananpaq. Chaykunan kanman familianta mantienenanpaq llank’anan, familianta espiritualpi yachachinan ima (15/10, 12 página).

• ¿Imatan tayta-mamakuna ruwankuman familiapi Diosta yupaychasqankumanta beneficiakunankupaq?

Hayk’aq tutata familiapi Diosta yupaychanaykichispaq, fijaychis huk p’unchayta huk horatawan, respetaychistaq chay horariota. Chaymantapas semanapi huk horatawan churaychis, chhaynapi imapas qonqaylla karuqtinqa chay horapi estudianaykichispaq (15/10, 29 página).

• ¿Huñunakuykunapi huk hermana makiwan rimaqkunapaq t’ikraqtin, tapakunanchu umanta?

Kay tiempopiqa cienciaq ñawparisqanwanmi makiwan rimaqkunapaq t’ikraqkunataqa hatun televisionkunapi rikukun, huñunakuypi kaqkunaqa llapankun payta qhawanku. Discurso qoqtataq manaña rikunkupaschu. Chayraykun necesario makiwan rimaqkunapaq t’ikraq hermanakuna umankuta tapakunanku. Chhaynapin rikuchinqaku mana paykunachu yachachisqankuta (15/11, 12, 13 paginakuna).

• ¿Imaynatan astawan iñiqmasinchiskunata munakusunman?

Huñunakuypi iñiqmasinchiskunata napayuspaqa, yaqapaschá unayña otaq chayllaraq mana tupasqayki iñiqmasikunawan pisillatapas parlariwaq. Asambleaman rispaykipas iñiqmasikunaman asuykuspa paykunawan reqsinakuy (15/11, 20-24 paginakuna).

• ¿Imaraykun Jehová Dioswan Jesuswan allin ejemplo kanku sumaq trataq kanapaq?

Ancha hatun kamachikuqña chaypas Jehová Diosqa respetowanmi sumaqta runakunata tratan. Chaytan rikuchirqan Abrahanwan Moiseswan ima rimaspa (Gén. 13:14; Éxo. 4:6, NM). Chaymantapas payqa liston kashan uyariwananchispaq (Gén. 18:23-32). Jesuspas sumaqtan runakunata chaskirqan yanaparqantaq imachus necesitasqankupi. Hinaspapas respetowanmi sutinkumanta waqyaq (15/11, 25 página).