¿Imaraykun Jehová Diosman qokunanchis?

“Yupaychasqay Diosniypa angelninmi ch’isi tuta rikhuriwa[rqan].” (HECH. 27:23.)

1. a) ¿Imatan huk runa ruwanan bautizakunanpaq? b) ¿Ima tapuykunatan kutichisun?

“JESUCRISTOQ sacrificakusqanrayku, ¿ñachu huchaykikunamanta khuyayta llakipakuspa Jehová Diosman qokurqankiña munayninta ruwanaykipaq?” Chhaynatan nin bautizakuqkunapaq discurso tukuyta ruwakuq huknin tapuy. Ichaqa, ¿imaraykun cristianokuna Jehová Diosman qokunanku? ¿Imaynapin chay ruwasqanku allinninkupaq? ¿Imaraykun chayta ruwanankupuni Jehová Dios servicionkuta chaskinanpaq? Chay tapuykunaman kutichiykunata tarinapaqqa, ñawpaqtan entiendenanchis imachus qokuy kasqanta.

2. ¿Imataq qokuyri?

² ¿Imataq qokuyri? Chay tapuypaq kutichiyta tarinanchispaqqa, apóstol Pabloq rimasqanmi yanapawasun chaytan rimarqan chinkayapunanpaqña kashaq barcopi. Apostolmi, ‘Diosniy’ nispa Jehová Diosta nirqan, chaywanmi rikuchisharqan pay Diospa kaqnin kasqanta (leey Hechos 27:22-24). Yachanchismi kay pachaqa “Saqraq munaychakusqan” kashasqanta, cristianokunan ichaqa Jehová Diospa kaqnin kanchis (1 Juan 5:19). ¿Imaynapin paypa kanchis? Payman qokuspanchismi otaq mañakuypi payta servinanchispaq prometekuspanchis, chay qhepamantaq bautizakuspanchis.

3. ¿Imatan Jesús rikuchirqan bautizakusqanwan, imatan qatikuqninkunapas ruwanku?

³ Jesusmi chaypaq ejemplota saqewarqanchis bautizakusqan p’unchaypi, Taytanpa munayninta ruwananpaq decidikusqanta sut’ita hukkunaman rikuchiqtin. Payqa Diosman dedicasqa Israel nacionpitaq nacerqan chayqa, manañan necesitarqanchu wakmanta Diosman qokuyta. Bautizakuspaqa mana Kamachikuy Simiq ima mañasqantachu ruwasharqan, aswanpas Jehová Diostan nisharqan: “Munayniykita ruwanaypaqmi hamushani”, nispa (Heb. 10:7; Luc. 3:21). Bautizakusqanwanmi rikuchisharqan Taytanta munayninta ruwananpaq listo kashasqanta. Cristianokunaqa Jesuspa ejemplontan qatikunchis  bautizakuspa, ñoqanchismi ichaqa chaywan hukkunaman rikuchinchis mañakuypi Diosman qokusqanchista.

Diosman qokusqanchisqa allinninchispaqmi

4. Davidwan Jonatanwan amigontin kasqanku, ¿imatan yachachiwanchis amigonchispaq hunt’aq kanapaq kallpachakuymanta?

⁴ Diosta servinapaq prometekuyqa manan pukllaychu, chayta ruwanapaqqa allintan yuyaykuna. Ichaqa, ¿imakunapin allinninchispaq kanman? Chayta entiendenapaq qhawarisunchis imaynapi runakunaq comprometekusqanku allinpuni kasqanta. Amigontin kaymanta ñawpaqta rimasunchis. Amigoyoq kanapaqqa ñoqanchisraqmi amigo kananchis. Chaypaqmi ichaqa kikinchismanta munananchis kallpachakunanchistaq amigonchispaq hunt’aq kanapaq. Rimasunchis Jonatanmanta Davidmantawan, paykunaqa sumaq amigontinmi karqanku, wiñaypaq amigontin kanankupaqmi rimanakurqanku (leey 1 Samuel 17:57; 18:1, 3). Kunanqa manañan askhachu paykuna hina amigonkupaq hunt’aq kanku. Ichaqa ñawpaq tiempopi hinan kay tiempopipas allin amigokunaqa iskayninku hunt’aq kanku (Pro. 17:17; 18:24).

5. ¿Imatan huk kamachi ruwayta atirqan khuyapayakuq patronninwan qhepakunanpaq?

⁵ Moisesman Diospa qosqan kamachikuymi rimashallantaq hunt’aq kaymanta, huk kamachi wañunankama patronninta servinanpaq promesa ruwasqanmanta. Chaymantan Éxodo 21:5, 6 nin: “Kamachitaqchus ninqa: Ñoqaqa munakunin patronniyta. Warmiyta, wawaykunatapas, kamachilla kakusaq, nispa chayqa, patronninmi Dios yupaychana wasiman pusaspa, payta punkumanpas otaq punku k’aspimanpas sayaykachispa t’oqonawan ninri ura puntanta t’oqonqa, hinan wiñaypaq kamachin kapunqa”, nispa. Chaypi nisqan hina, kamachiqa atirqanmi khuyapayakuq patronninwan qhepakuspa ñawpaq hina kawsayta, sichus paywan rimanakunman manaña libre kananpaq chayqa.

6, 7 a) ¿Imaynatan yanapawanchis hunt’aq kanapaq kallpachakuy? b) ¿Imaynapin cristianokuna Dioswan sumaq amigontin kanchis?

⁶ Casadokunapas comprometekusqankuman hina hunt’aq kanankupaqmi kallpachakunanku. Paykunaqa manan contratota ruwaspallachu comprometekunku aswanpas paykuna puran compromisota ruwanku. ¿Imaynapin chay ruwasqanku allinninkupaq? Iskayninkun seguro sientekunku hinallataq wawankupas, mana casarakuspa tiyaqkunan ichaqa mana hayk’aqpas chhayna sientekunkumanchu. Chaymantapas, sichus casadokuna cristiano kanku chayqa, Bibliaq nisqanman hinan ruwanankuta hunt’anqaku, kallpachakunqakutaq munakuywan sasachakuyninkuta allichanankupaq (Mat. 19:5, 6; 1 Cor. 13:7, 8; Heb. 13:4).

⁷ Kunantaq qhawarisunchis llank’anapi contrato ruwaymanta. Ñawpa tiempomantapachan contrato ruwayqa allinpuni karqan (Mat. 20:1, 2, 8). Ima negociota ruwanapaqpas huk runapaq llank’ayta qallarinapaqpas contratota firmayqa iskayninkupaqmi allinpuni. Qhawarisqanchis hina, amigokunata, casadokunata, llank’anapi contrato ruwaqkunatapas hunt’aq kanankupaq kallpachakusqankun yanapan. Ñoqanchismi ichaqa Jehová Dioswan sumaq amigontin kanchis payman qokusqanchisrayku, chayta ruwaspan tukuy sonqomanta payman entregakapunchis. Kunanmi rimasun ñawpaq tiempopi Diosman qokusqankumanta ima allinkunas karqan chaymanta, yachallasuntaq imaraykus mana huk compromisollachu kasqanta.

Israel llaqtatan yanaparqan Diosman qokusqanku

8. ¿Imaynatan qhawarirqanku Israel runakuna Diosman qokusqankuta?

⁸ Israel llaqtaqa llapankun Jehová Diosman qokurqanku huk promesata ruwaspa. Diosmi paykunata huñusqa Sinaí orqoq chimpanpi, chaypin nisqa: “Kasuwaspaykichis rimanakusqaytapas hunt’ankichis chayqa, qankunan llapa llaqtakunamanta aswan chaniyoq llaqtay  kankichis”, nispa. Hinan llaqtaqa huk sonqolla jurarqanku: “Señor Diospa tukuy kamachikusqantan ruwasaqku”, nispa (Éxo. 19:4-8). Chhaynata Diosman qokusqankuqa manan huk compromisollachu karqan. Chaywanqa Jehová Diospaña kasqankutan rikuchisharqanku, Diospas “aswan chaniyoq” llaqtanta hinan paykunata tratanan karqan.

9. ¿Ima allinkunatan israelitakuna chaskirqanku Diosman qokusqankumanta?

⁹ Israelitakuna Jehová Diospa kasqankuqa imaymanapin yanaparqan. Diosqa hunt’aqmi, munakuqtaq paykunapaq karqan, wawankunata hinataq tratarqanpas. Chaymi nirqan: “¿Warmiqa ñuñusqan wawata qonqanmanchu? ¿Wachakusqan wawata mahipunmanchu? Mamanña qonqapunqa chaypas, manan ñoqaqa qonqasaqchu”, nispa (Isa. 49:15). Kamachikuykuna qosqanwanmi Diosqa llaqtanta pusarqan, profetankunawanmi kallpacharqan, angelninkunawataq waqaycharqan. Salmistan nirqan: “[Jehová Diosmi] siminta Jacobman sut’incharqan, kamachikusqankunatapas kuskachasqankunatapas Israelman sut’incharqan. Manan chay hinatachu mayqen wak suyuwanpas ruwarqan”, nispa (Sal. 147:19, 20; leey Salmo 34:7, 19; 48:14). Imaynan Diosman qokuq Israel llaqtanta cuidarqan, chhaynatan kunanpas payman qokuq llapan cristianokunata cuidan.

¿Imaraykun Diosman qokunanchis?

10, 11. ¿Imaraykun mana Diospa familian ukhupichu nacerqanchis?

¹⁰ Wakinmi tapukunku: “¿Imaraykun Diosman qokunay bautizakunaypas Diosta servinaypaq?”, nispa. Chayta yachanapaqqa yuyarinanchismi imaynachus Diospa qhawarinanpaq kashanchis chayta. Adanpa huchallikusqanraykun lliwpas mana Diospa familian ukhupichu nacerqanchis (Rom. 3:23; 5:12). Chaymi familianpi chaskisqa kanapaqqa Payman qokunanchis, yachasunchis imarayku.

¹¹ Manan mayqenninchismanpas papanchis wiñay kawsayta qoyta atiwarqanchischu (1 Tim. 6:19). Adán Evaq huchallikusqankuraykun nacenchis munakuq Kamaqninchis Diosmanta karunchasqa, manataq wawan hina qhawarisqapas kayta atirqanchischu (tupachiy Deuteronomio 32:5). Chaymantapachan runakunaqa kawsarqanku Diospa familianmanta kikin Jehová Diosmantapas karunchasqa.

12. a) ¿Imaynapin huchayoq runa Diospa familian kayta atisunman? b) ¿Imakunatan ruwana manaraq bautizakushaspa?

¹² Chhaynaña kaqtinpas sapankanchismi Jehová Diosmanta mañakusunman familianpi chaskiwananchispaq. * Ichaqa ¿imaynan chaskiwasunman huchallikuqtaq kanchis chayqa? Apóstol Pablon nirqan: “Diospa awqan kashaqtinchistaq payqa Churinpa wañusqanwan sumaqta chaskiykapuwarqanchis”, nispa (Rom. 5:10). Dios chaskiwananchispaqqa allin concienciayoq kananchispaqmi mañakunanchis, chaytaqa ruwasunman bautizakuspan (1 Ped. 3:21). Ichaqa ñawpaqtan kaytaraq ruwana: Jehová Diostan allinta reqsina, paypitaq confiana chaymantataq huchanchismanta pesapakuna, kawsayninchispipas cambiana (Juan 17:3; Hech. 3:19; Heb. 11:6). ¿Imatawanmi ruwana?

13. ¿Imaraykun huk promesata ruwananchis Diospa familian ukhupi chaskisqa kanapaq?

¹³ Diosta yupaychaq familia ukhupi kanapaqqa, huk promesatan ruwananchis. ¿Imarayku? Huk rikch’anachiywan entiendesun. Huk taytan llaqtanpi allin respetasqa, paymi reqsin huk wakcha wawata, payta munakuspan uywakapuyta munan. Ichaqa ninmi: “Prometeway taytaykita hina qhawariwanaykipaq, munakuwanaykipaq respetawanaykipaqpas”, nispa. Chay waynaqa chay promesata ruwaspallan chay runaq wawan hina chaskisqa kanman. Chay ruwasqanqa allinmi. Chhaynallataqmi Jehová Diospas familianpi chaskin pikunachus sonqomanta prometekunku  servinankupaq paykunallata. Chaymantan Biblia nin: “Cuerpoykichista Diosman haywaychis kawsashaq ofrendata, ch’uyata, Diospa sonqonman chayaq kananpaq”, nispa (Rom. 12:1).

Munakuyta iñiyta iman rikuchinchis

14. ¿Imaynapin Diosman qokuspa pay munakusqanchista rikuchinchis?

¹⁴ Diosman qokuspaqa payta munakusqanchistan rikuchinchis. Casarakuspa promesa ruway hinan. Casarakusqan p’unchaymi cristianoqa novian munakusqanta rikuchin, allinpi mana allinpi tarikuspapas paywan kuska kananpaq prometespa. Manan casado kawsaypi imakuna hunt’anallanpaqchu prometeshan, aswanpas huk runamanmi hunt’aq sonqo kananpaq jurashan. Chaymantapas manan kuska tiyankumanchu chay promesata mana ruwaspaqa. Chhaynallataqmi Jehová Dios familian ukhupi allinkuna qowasqanchistapas mana llapanta chaskiyta atisunmanchu, sichus mana payman promesata ruwasunmanchu chayqa. Arí, Diosmanqa qokunchis paypa kayta munaspan, chaymantapas huchayoqña kanchis chaypas, decidisqan kashanchis imaña kaqtinpas hunt’aq sonqo kananchispaq (Mat. 22:37).

15. ¿Imaraykun ninchis Diosman qokuspaqa paypin iñinchis nispa?

¹⁵ Chaymantapas Diosman qokuyqa iñiymi. Arí, chay promesataqa Jehová Diospi iñispan ruwanchis, payta maskhay allinninchispaq kasqanta yachaspa ima (Sal. 73:28). Diosta serviyqa sasan ‘waqllisqa miray ukhupi tiyasqanchisrayku’. Ichaqa, kallpachakusun chayqa payqa hunt’anqapunin promesankunata (Fili. 2:15; Isaías 12:2). Diosqa pampachawasunmi huchayoq runa kasqanchisrayku imapipas pantaqtinchisqa (leey Salmo 103:13, 14; Romanos 7:21-25). Jehová Diosqa manan qonqanqachu paypaq hunt’aq sonqo kananchispaq kallpachakusqanchista (Job 27:5, NM).

Diosman qokuyqa kusichiwanchismi

16, 17. ¿Imaraykun kusichiwanchis Diosman qokuy?

¹⁶ Diosman qokuspaqa paymanmi vidanchista entreganchis chaymi kusichiwanchis, Jesusmi nirqan: “Aswan kusisamiyoqqa qoqmi chaskiqmantaqa”, nispa (Hech. 20:35). Kay Hallp’api predicashaspan Diospa wawanqa kawsarqan chay textoq nisqanman hina, chayraykun qoykukuq kaspa kusikuyta tarirqan. Payqa mana samaspa, mana mikhuspa, ima kaqnintapas saqesparaqmi runakunaman yachachirqan wiñay kawsay aypanankupaq (Juan 4:34). Manan imapas anchata kusichirqanchu taytanta kusichinanpaq ruwaymantaqa. Chaymi nirqan: “Ñoqaqa paypa sonqonman chayaqtapunin ruwani”, nispa (Juan 8:29; Pro. 27:11).

¹⁷ Jesusqa qatikuqninkunatan yachachirqan kusisqa kawsanapaq ima ruwanata, nirqanmi: “Pipas qhepayta hamuyta munaqqa, pay kikinta negakuchun”, nispa (Mat. 16:24). Negakunchis  chayqa, munakuq Diosmanmi kawsayninchista qonchis payña pusawananchispaq. Mana paypa makinpi kaspa, ¿allinchu huk ladopi kasunman?

18. ¿Imaraykun anchata kusichiwanchis Diosman qokuy huk runaman otaq imamanpas qokuymanta?

¹⁸ Jehová Diosman qokuspa munayninman hina kawsaqkunaqa aswan kusisqan kanku runakunaman, huk ruwayman otaq qhapaq kaykuna maskhayman qokuqkunamantaqa. Chay runakunamantaqa, cristianokunan cheqaq kusikuyta tarinku (Mat. 6:24). Chaymantapas ‘Diospa llank’aysiq-masinkuna’ kasqankuraykuña kusikuyta tarinku chaypas, manan qonqankuchu kayta: promesataqa ruwarqanku manan ima llank’aymanchu, aswanpas munakuqninku Diosmanmi (1 Cor. 3:9). Manan pipas pay hinaqa anchata valoranmanchu hunt’aq sonqo kasqankuta, tukuy kallpachakusqankutapas. Manan chayllachu, serviqninkunataqa wayna-sipasmanmi kutichipunqa chhaynapi paypa cuidasqan wiñaypaq kawsanankupaq (Job 33:25; leey Hebreos 6:10).

19. ¿Imaraykun Jehová Diosman qokuqkuna ancha kusisqa kanku?

¹⁹ Bibliapin kayta invitawanchis: “Diosman asuykuychis, hinan payqa asuykamusunkichis”, nispa (Sant. 4:8; Sal. 25:14). Arí, Jehová Diosman qokuqkunaqa paywanmi sumaq amistadta ruwanqaku. Qatimuq estudiopin yachasun imaraykun mana iskayaspa Diospa kaqnin kananchispaq payman qokusunman chayta.

[Uranpi willakuy]

¿Imanispan kutichiwaq?

• ¿Iman Diosman qokuy?

• ¿Imakunapin allinninchispaq Diosman qokusqanchis?

• ¿Imaraykun cristianokuna Jehová Diosman qokunanchis?

[Tapuykuna]

[6 paginapi foto]

Diosman qokusqanchisman hina kawsaspaqa cheqaq kusikuytan tarinchis