Jehová Diospan kanchis khuyapayawasqanchisrayku
Jehová Diospan kanchis khuyapayawasqanchisrayku
“Señorpan kanchis.” (ROM. 14:8.)
1, 2. a) ¿Iman cristianokunata kusichiwanchis? b) ¿Ima tapuykunatan t’aqwisunchis?
JEHOVÁ DIOSMI Israel runakunaman prometerqan “qankunan llapa llaqtakunamanta aswan chaniyoq llaqtay kankichis”, nispa (Éxo. 19:5). ¡May sumaqmá chayqa! Kunanpas cristianokunaqa Jehová Diospa kaqninmi kanchis (1 Ped. 2:9; Apo. 7:9, 14, 15). Paypa kaqnin kasqanchisqa wiñay allinninchispaqmi kanqa.
2 Diospa kaqnin kayqa hatun responsabilidadmi. Chayraykun wakinqa tapukunkuman: “¿Atisaqchu Jehová Diospa lliw mañawasqanta hunt’ayta? ¿Hayk’aqllapas huchaman urmaqtiy, saqerpariwanqachu? ¿Paypa kaspay manañachu libre kasaq?”, nispa. Chay tapuykunaman kutichiyqa ancha importanten, chayraykun t’aqwirisun. Ichaqa ñawpaqtan huk tapuytaraq kutichisun: ¿ima allinkunan kan Jehová Diospa kaqnin kaqtinchis?
Jehová Diospa kayqa kusichiwanchismi
3. ¿Ima allinkunatan Rahab chaskirqan Jehová Diosta servispa?
3 ¿Cheqaqtachu allinninchispaq Jehová Diospa kay? ¡Riki! Jericó llaqtapi tiyaq Rahabpi yuyaykusun, payqa rabona warmin karqan canaanpi kaq millay dioskunatataq yupaychaq. Chhayna kawsayniyoqña kaspapas qhepamanmi yacharqan israelitakuna Jehová Diospa yanapasqanrayku lliw enemigonku atipasqankuta, paytaq cheqaq Dios kasqanta. Chayraykun Diospa akllasqan llaqtanrayku wañuytapas mana manchakuspa qhamiyaq runakunata yanaparqan, Diospa pakaykusqan kaytataq maskharqan. Paymantan Biblia nin: “Chhaynallataqmi rabona warmi Rahabpas ruwasqankunawan chaninchasqa karqan. Paymi qhamiyaq kachasqakunata qorpacharqan, hinaspan wak ñanninta paykunata kachapurqan”, nispa (Sant. 2:25) Paypaqqa imaymanapin allinninpaq karqan limpio Israel llaqtawan huñukusqan, chaypin Diospa kamachikuyninkunamanta, munakuyninmanta, chanin kasqanmanta ima yacharqan. ¡Maytachá kusikurqan millay kawsaynin saqepusqanmanta! Qhepamanqa huk Israel runawanmi casarakapurqan, wawankupas karqanmi paytan suticharqanku Boaz nispa, Boazqa Diospa allin serviqninmi karqan (Jos. 6:25; Rut 2:4-12; Mat. 1:5, 6).
4. ¿Imaynatan Rutta yanaparqan Jehová Diosta servinanpaq decidikusqan?
4 Moab llaqtamanta Rut sutiyoq warmipas, Jehová Dios yupaychaqmanmi tukupurqan. Sipasllaraq kashaspaqa yaqapaschá Kemós diosta Moabpi wak dioskunatawan yupaycharqan. Chaymantan Jehová Diosta reqsisqa israelita llaqtayoq runawantaq casarakapusqa (leey Rut 1:1-6). Qhepamanmi, Rut cuñadan Orfawan viuda kapusqaku, hinaspa suegranku Noemiwan Belén llaqtaman risqaku. Ñanpin Noemí qhachuninkunata nisqa llaqtankuman kutipunankupaq paykunapaq Israelpi tiyay sasa kananta yachasqanrayku. Orfaqa kasukuspan “llaqtanman diosninmanwan” kutipurqan. Rutmi ichaqa allin iñiyniyoq kaspa piqpa kay munasqanta rikuchirqan, chaymi Noemita nirqan: “Amaña saqepuway, t’aqakuway niwayñachu, maytachus qan rinki, chaytan ñoqaqa risaq, maypichus tiyanki, chaypin ñoqaqa tiyasaq. Llaqtaykin llaqtay kanqa, Diosniykin Diosniy kanqa”, nispa (Rut 1:15, 16). Chay ruwasqanraykun, viudakunapaq wakchakunapaq, mana hallp’ayoqkunapaq ima Diospa kamachikuyninkuna allinninpaq karqan. Arí, Jehová Diosmi paytaqa yanaparqan cuidarqan, kusisqa kawsaytataq qorqan.
5. ¿Imatan rikukun hunt’aq sonqowan Diosta serviq iñiqmasikunapi?
5 Yaqapaschá reqsinki askha watakunaña hunt’aq sonqowan Jehová Diosta serviq iñiqmasikunata. Tapuwaqmi: “¿Ima bendicionkunatan chaskirqanki Diosman qokusqaykimantapacha?”, nispa. Yachasqanchis hina, lliwmi sasachakuykunapi tarikunchis, ichaqa askha experienciakunan rikuchin salmistaq nisqan hunt’akusqanta: “¡Kusisamiyoqmi Señor Diosniyoq llaqtaqa!” (Sal. 144:15).
Jehová Diosqa atisqallanchistan mañawanchis
6. ¿Imaraykun mana yuyaykunanchischu Diospa mañawasqanchista mana hunt’ayta atinanchispaq?
6 Yaqapaschá pipas tapukunman atinmanchus Diospa mañasqanta hunt’ayta icha manachus chayta. Payta serviy, tukuypi kamachikuyninkunata kasukuy, paymanta rimaypas yaqapaschá sasa otaq manchakunapaq kanman. Chhaynatan Moisespas sientekurqan, Israel runakunaman Egipto faraonmanpas Jehová Diospa kamachikuyninkunata willananpaq kamachisqa kaqtin. Jehová Diosmi ichaqa ruway atinallanta kamachirqan. Chaymantapas prometerqanmi yanapananpaq: ‘Yachachisqaykin imatachus ruwanaykita’, nispa (leey Éxodo 3:1; 4:1, 10, 13-15). Moisesqa yanapayninwanmi kusisqa Diospa munayninta hunt’arqan. Kunanpas Jehová Diosqa comprendewanchismi, yachanmi huchayoq runa kasqanchista chayraykun yanapayta munawanchis (Sal. 103:14). Cristoq qatikuqninkuna hina Jehová Diosta serviyqa manan sasa ruwaychu, aswanpas kusichiwanchismi, chhaynapin sonqonta kusichinchis, runamasinchis munakusqanchistapas rikuchinchis. Chayta ruwaspaqa sut’itan rikunchis Jesuspa nisqan hunt’akusqanta: “Ñoqaman hamuychis [...] ñoqan samachisqaykichis. Yugoyman k’umuykukuychis, hinaspa ñoqamanta yachaqakuychis llamp’ulla, huch’uyyaykukuq sonqoyoq kasqayta, chaymi qankunaqa samakuyta tarinkichis” (Mat. 11:28, 29).
7. Diosqa yanapawasunmi imapas mañawasqanchista hunt’ananchispaq, ¿imaraykun chaymanta seguro kasunman?
7 Diosmanta hap’ipakuqtinchisqa paymi kallpachawasun. Jeremiastapas kallpacharqanmi, payqa manan faciltachu rimaq. Profeta hina churasqa kaqtinmi nirqan: “¡Ay, Apu Señor Diosníy! Sinchi waynallaraqmi kani, manan rimaytapas yachaniraqchu”, nispa. Tiempo pasaqtintaq nirqan: “Paypa sutinpipas amaña runaman willasaqchu”, nispa (Jer. 1:6; 20:9). Chhaynaña kaqtinpas, tawa chunka watan Diospa kamachikuyninkunata mana uyariyta munaq runakunaman willarqan. ¿Imaynatan chay ruwayta hunt’arqan? Jehová Diospa yanapayninwanmi. Paymi hukmanta nillasqataq: “Ñoqan qanwan kashani qespichinaypaqpas horqonaypaqpas”, nispa (Jer. 1:8, 19; 15:20).
8. ¿Imaynatan Diospi hap’ipakusqanchista rikuchinchis?
8 Kunanpas, Jehová Diosqa kallpachawanchismi Moisesta Jeremiasta hina, espiritual ruwayninchiskunata hunt’ananchispaq. Chaypaqqa kasukunanchismi Bibliapi kay yuyaychaykunata: “Tukuy sonqoykiwan Señor Diosman hap’ipakuy, amataq qan kikiykiq yuyayniykimanqa k’askakuychu. Tukuy ruwasqaykikunapi Señor Diosta yuyariy, paymi cheqan ñanninta pusasunki” (Pro. 3:5, 6). ¿Imaynatan Diosmanta hap’ipakusqanchista rikuchinchis? Simin Qelqawan congregacionninwan ima kamachiwasqanchista kasukuspan. Jehová Dioswan pusachikusun chayqa, imaña kaqtinpas hunt’aqmi Diospaq kasunchis.
Jehová Diosqa sapankanchistan cuidawanchis
9, 10. Salmo 91 qelqapi nisqan hina, ¿imapin Dios ‘pakaykuwanchis’?
9 Wakinqa manchakunkun Diosman qokuyta, imaynapipas huchaman urmaspa manaña paypa allin qhawarisqan kanankupaq yuyaykuspa. Ichaqa manan chayqa sucedenmanchu, Jehová Diosqa llapan serviqninkunatan yanapan paywan allinpi kanankupaq. Salmo 91 qelqapin willashan imayna yanapasqanta.
10 “Ancha Hatun Diospa pakaykusqan tiyaqqa, Tukuy-atiyniyoqpa llanthuykusqan tiyaqqa Señor Diostan ninman: Qanqa yanapaykuwaqniymi, pukaraymi, hap’ipaykukunay Diosmi kanki, nispa. Paymi qespichisunki pakasqa toqllamantapas.” (Sal. 91:1-3.) Chaypi nisqan hina, Diosmi prometen payta munakuqkunata paypi confiaqkunatapas yanapananpaq (leey Salmo 91:9, 14). Chhaynaqa, ¿cuidawasunmanchu Dios ima mana allinpas mana sucedewananchispaq? Mayninpin chayta ruwarqan Jesuspa ñawpa taytankunawan chhaynapi Mesías nacenanpaq. Ichaqa, permitirqanmi askha siervonkunata Saqraq qatikuqninkuna carcelpi wisq’anankuta, ñak’arichinankuta, wakintataq wañuchinankuta ima (Heb. 11:34-39). Chaywanpas, paykunatan cuidarqan aguantanankupaq kallpata qospa, chhaynapi paypaq hunt’aq sonqo kasqankupi mana pisipanankupaq. Chhaynaqa, Salmo 91 qelqapin yachanchis Dios espiritualpi pakaykuwasqanchista.
11. ¿Imakunamantan Dios cuidawanchis?¿Pikunallatan cuidan?
11 Arí, ‘pakaykuymanta’ salmistaq rimasqanqa, espiritualpi Ancha Hatun Dios pakaykuwasqanchismi, paymi cuidawanchis iñiyninchispi, hunt’aq sonqo kayninchispi ima, runakunapas otaq imapas waqllichiwananchismanta (Sal. 15:1, 2; 121:5). Chhaynata Dios cuidawasqanchistaqa manan paypi mana iñiqkunaqa yachankuchu. Payqa cuidan “Qanqa [...] hap’ipaykukunay Diosmi kanki” niqkunallatan. Diospa pakaykusqan kananchispaq kallpachakushallasun chayqa, manan nishutachu llakikunanchis Saqraq ‘toqllanman’ urmaspa Diospa mana allin qhawarisqan kananchismanta.
12. ¿Imakunan Jehová Dioswan allinpi kasqanchista waqllichinman?
12 ¿Imakunan Jehová Dioswan allinpi kasqanchista waqllichinman? Biblian willan ‘laqhayaqpi chayamuq onqoymanta’ ‘chawpi p’unchaypi mast’aq wañuymantawan’ (Sal. 91:5, 6). Arí, Saqraq kallpachasqanraykun runakunaqa munayninkuman hinalla kawsanankurayku Diosmanta t’aqakunku (2 Cor. 11:3). Chaymantapas askha runatan urmachishan imaymana munapayaywan, hatunchakuywan, qhapaq kaykuna maskhaywan ima. Hinallataq askhata q’otun patriotismo, evolución nisqawan, pantasqa religionkunawanpas (Col. 2:8). Urmachillantaq askha runata qhelli hucha ruwaykunaman. Chaykunaqa mast’arikuq onqoy hinan, chaywanmi Satanasqa millonninpi runakunaq Dios munakuyninkuta chiriyachirqan (leey Salmo 91:7-10; Mat. 24:12).
Diosta munakushanallanchispaq yanapay
13. ¿Imaynatan Dios pakaykuwanchis espiritualpi peligrokunamanta?
13 ¿Imaynatan Dios pakaykuwanchis chay peligrokunamanta? Salmistan nin: “Angelninkunatan Diosqa kamachimunqa mayta riqtiykipas waqaychanasuykipaq”, nispa (Sal. 91:11). Cheqaqtapunin angelkunaqa waqaychawanchis, yanapawanchistaq allin willakuykunata willamunanchispaq (Apo. 14:6). Chaymantapas, Diosqa umalliqkunawanmi cuidawanchis, paykunaqa Bibliaq nisqanman hinapunin yachachinku, chhaynapin llulla yachachikuykunamanta pakaykuwanchis. Yanapankutaqmi pipas kay pachaq mana allin ruwayninta saqenanpaq kallpachakuqtaqa (Tito 1:9; 1 Ped. 5:2). Chaymantapas, Jehová Diosqa “allin yuyayniyoq hunt’aq kamachi[tan]” churarqan espiritual mikhunata qowananchispaq, chhaynapi evolución nisqamanta, qhelli huchamanta, qhapaq-kaykuna maskhaymanta, allin reqsisqa-kaymantapas pakaykuwananchispaq (Mat. 24:45). Tapukuy: “¿Imakunan ñoqata yanapawarqan chay peligrokunata atipanaypaq?” nispa.
14. ¿Imatan ruwananchis Jehová Dios pakaykuwananchispaq?
14 ¿Imatan ruwananchis Jehová Diospa pakaykusqan kananchispaq? Imaynan accidentekunamanta, suwakunamanta, onqoymanta ima cuidakunanchispaq iman necesitakusqanta ruwanchis, chay hinatan espiritualpi peligrokunamantapas cuidakunanchis. Jehová Dios qelqakunapi, huñunakuykunapi, hatun huñunakuykunapi ima niwasqanchistan kasukunanchis. Chaymantapas umalliqkunatan nisunman aconsejawananchispaq huk iñiqmasinchiskunamantataq yachasunman. Congregacionpi kayqa, ¡maytan yanapawanchis allin yuyaywan kawsananchispaq! (Pro. 13:20; leey 1 Pedro 4:10.)
15. ¿Imaynapin yachanchis Dios espiritualpi peligrokunamanta pakaykuwananchispaq atiyniyoq kasqanta?
15 Jehová Diosqa atiyniyoqmi espiritualpi peligrokunamanta pakaykuwananchispaq (Rom. 8:38, 39). Chaytan rikunchis atiyniyoq kamachikuqkuna religioso enemigonchiskuna ima Diospa llaqtan contra hatariqtinku. Paykunaqa astawanqa manan wañuchiytachu munawanchis aswanpas ch’uya Diosninchismanta karunchaytan. Jehová Diosmi ichaqa sapa kutilla cuidawanchis Isaías qelqapi prometesqanman hina, chaypin nin: “Manan ima ruwasqa armapas imanasunkipaschu”, nispa (Isa. 54:17).
¿Pin librawanchis?
16. ¿Imaraykun kay pacha mana libre kawsayta qowasunmanchu?
16 ¿Pierdepunchischu libre kasqanchista Jehová Diospa kaqnin kaspa? Manapunin. Aswanpas kay pachaq kaspan manaña librechu kasunman, kay pachaqa Jehová Diosmanta karunchasqan kashan, mana khuyapayakuq Saqraq makinpitaq kashan. (Juan 4:30). ¿Imaynatan Satanás runata kamachinman tukuchin? Hukninpi, qolqe maskhayman qokunankupaq kallpachaspa (tupachiy Apocalipsis 13:16, 17). Chaymantapas huchawanmi runakunata q’otun (Juan 8:34; Heb. 3:13). Chayraykun kay millay pachapi libre kawsayqa yanqa. Imayna kawsanapaq yachachisqanqa Diospa yachachikuyninkunaq contrantaq chayqa, pipas chayta kasukuqqa huchaq kamachinmi kapunqa (Rom. 1:24-32).
17. ¿Imamantan Jehová Dios librawasun?
17 Ichaqa, sichus vidanchista Jehová Diosman qopusun chayqa, paymi tukuy mana allinkunamanta librawasun. Imaynan huk allin médico millay onqoyniyoq runata hampin, chay hinatan Jehová Diospas hampiwasun millay onqoy huchamanta. Arí, Cristoq sacrificionrayku Diosman qokuspallan hucha hawa imaymana mana allinkunamantaqa librakuyta atisunman, chhaynapitaq wiñay kawsayman aypasunman (Juan 3:36). Medicota astawan reqsispaqa astawanmi paypi confianchis, chhaynatan Jehová Diosmanta astawan yachaqtinchispas iñiyninchis yapakun. Chayraykun Bibliata aswan allinta t’aqwinanchis, chay ruwayqa yanapawasunmi astawan Diosta reqsinanchispaq munakunanchispaqpas, chhaynapin manaña manchakusunchu paypa kaytaqa (1 Juan 4:18).
18. ¿Imatan chaskinqaku Diospa kaqkuna?
18 Jehová Diosqa consentiwanchismi ñoqallanchismanta imatapas akllakunanchista. Chaymi sapankanchista niwanchis: “Akllakuychis kawsayta, qankunapas mirayniykichispas kawsanaykichispaq. Diosniykichis Señor Diosta munakuychis”, nispa (Deu. 30:19, 20). Payqa kikinchis decidikusqanchisrayku servinanchistan munan, chhaynapi munakuyninchista rikuchinapaq. Chhaynaqa, munakuq Diosninchispa kaqnin kaspanchisqa libren kunanpas hamuq tiempopipas kasun, manan chayllachu, wiñay wiñaypaqmi kusisqa kawsasun.
19. ¿Imaraykun mana atinchischu Jehová Diospa kaqnin kayta?
19 Huchayoq kasqanchisraykun mana atinchischu ch’uya Diospa kaqnin kayta. Chayraykun paypa kaytaqa atinchis khuyapayawasqanchisraykulla (2 Tim. 1:9). Pablon qelqarqan: “Kawsanchischus chayqa Señorpaqmi kawsashanchis, wañupunchischus chaypas Señorpaqmi wañupunchis. Chay hinaqa, kawsaspapas wañuspapas Señorpan kanchis”, nispa (Rom. 14:8). Payman vidanchista entregasqanchismantaqa, ¡manan hayk’aqpas pesapakusunchu!
¿Ima nispan kutichiwaq?
• ¿Ima allinkunatan chaskinchis Jehová Diospa kasqanchisrayku?
• ¿Imaraykun Diospa mañawasqanchista hunt’ayta atinchis?
• ¿Imaynatan Jehová Dios serviqninkunata pakaykun?
[Tapuykuna]
[8 paginapi foto]
Iñiqmasikunata tapuy Jehová Diospa kasqankurayku ima allinkuna chaskisqankumanta
[10 paginapi foto]
¿Pikunawanmi Jehová Dios cuidawanchis?