Ruwasqankunaqa paywanmi kashan

UMALLI T’aqapi llank’aq Theodore Jaracz iñiqmasinchismi kay pachapi Dios serviyninta tukupurqan 2010 wata isqon p’unchay junio killapi, 84 watanpi kashaspan wañupurqan. Familianmantan kawsashankuraq esposan Melita, kurak panan, sobrinon, iskay sobrinankuna ima, esposanwanqa phisqa chunka kinsayoq watan casado karqan.

Iñiqmasinchis Jaraczqa nacerqan 1925 watapi 28 p’unchay septiembre killapin Pike County llaqtapi (Kentucky, Estados Unidos). 1941 wata 10 agosto killapin bautizakurqan 15 watanpi kashaspa. 17 watanpi kashaspan precursor regular karqan, chaymantapachan payqa tukuy tiemponwan Jehová Diosta servirqan yaqa soqta chunka qanchisniyoq watata.

1946 watapin 20 watallanpi kashaspa misionerokunapaq Escuelaman rirqan, qanchiskaq claseman. Graduakusqan qhepamanmi kacharqanku Cleveland llaqtaman (Ohio, Estados Unidos) chaypi llapa iñiq t’aqakunata watukunanpaq. 1951 watapin nirqanku Australiapi Betelman rinanpaq, chaypin payqa sucursalpi umalli karqan. 1983 wata Anuario de los testigos de Jehová nisqa qelqapin khaynatan willakurqan: “Diospa llaqtanpi umallikunata anchata respetaspan predicaypipas allinta umallispan chay nacionpi tiyaq llapa iñiqmasikunata anchata iñiyninpi kallpacharqan”, nispa.

Estados Unidosman kutipuspan 1956 wata 10 p’unchay diciembre killapi Melita Lasko hermananchiswan casarakapurqan. Casarakusqan qhepamanmi nombrarqanku watukuq umalli kananpaq, payqa allintan chay llank’ayta hunt’arqan. 1974 watapin Umalli T’aqapi llank’ayta qallarirqan.

Iñiqmasinchis Jaraczqa tukuy sonqon Jehová Diospaq llank’arqan, payqa yuyarisqapunin kanqa. Chaymantapas allin esposon karqan, hukkunaq allinnintaraqmi ñawpaqta qhawariq (1 Cor. 13:4, 5). Chaymi payqa llapankuta munakuywan trataq, hukkunatapas kallpacharqanmi chhayna trataq kanankupaq. Runakunata munakusqanraykun tukuy sonqo predicaq.

Qhawarisqanchis hina payqa allin llank’aqmi karqan, Betelpipas ancha munasqan karqan hinallataq pachantinpi kaq iñiqmasinchiskunapaqpas. Maytaña sonqonchis nanan wañupusqanmanta chaypas, anchatan kusikunchis askha watakuna Jehová Diospaq tukuy sonqo llank’asqanmanta yuyarispa. Payqa wañunankaman Diospaq hunt’aq karqan, chaymi “wiñay kawsay coronata” chaskinña (Apo. 2:10). ‘Ruwasqankunapas paywan’ kuskan kashan (Apo. 14:13).