Wawaykikunata yanapay

KAY revistapin 2010 watapi 15 enero killapi 16-20 paginakunapi tayta-mamakunata kallpachakurqan wawankuta sasachakuyninkupi yanapanankupaq. Kay yachachikuypin rimashan imaynata tayta-mamakuna wawankuta yanapankuman escuelapi sasachakuyninkuta atipanankupaq chaymanta. Chaytan ruwankuman Familiantin Diosta Yupaychana Ch’isipi.

JEHOVÁ DIOSTA serviq wawakunaqa imaymana sasachakuypin escuelankupi tarikunku. Compañeronkunaqa sapa kutillan tapupayashanku imanaqtin himno nacional nisqata mana takisqankumanta, banderata mana napaykusqankumanta, nacesqanku p’unchayta hinallataq colegiopi huk fiestakunatapas mana festejasqankumanta. ¿Imaynatan wawaykichiskuna chay tapuykunaman kutichishanku?

Wakinqa khaynata nispallan kutichinku: “Manan ruwaymanchu. Religionniymi hark’awan”, nispa. Chhaynata nispanku iñiyninkupi qaqa sayasqankuqa allinmi. Hinaspapas manañapaschá huk tapuykunata ruwanqakuñachu. Biblian ichaqa kallpachawanchis iñiyninchismanta ‘pipas tapuwaqtinchisqa allinta kutichinanchispaq wakichisqallapuni kashananchispaq’ (1 Ped. 3:15). Chaypaqqa manan ninallanchischu, “manan ruwaymanchu” nispallaqa. Manaña llapankuchu ‘allinmi chay nisqayki’ niwasunman chaypas, wakinqa agradecekunqakun imarayku imatapas mana ruwasqanchismanta willaqtinchis.

Wakin Testigo wawakunaqa Aprendamos del Gran Maestro libroq otaq huk qelqakunapi yachachikuykunawanmi sut’inchanku compañeronkuman imachus ruwasqankumanta otaq mana ruwasqankumantapas. Wakin compañeronkuqa tukuy yuyaywan uyarispankun Biblia estudiayta qallarinku, wakintaq mana uyarinkuchu. Wakin yachachikuykunaqa sasan wawakunaq entiendenanpaq chaymi allinta entiendechina. Yachasunchis 11 watanpi kashaq Minhee sutiyoq imaynatas kutichirqan compañeran cumpleañonman invitaqtin chaymanta, paymi nirqan: “Bibliaqa manan kamachiwanchischu nacesqanchis p’unchayta festejananchispaqqa. ¿Yacharqankichu chhayna fiestapi Bautizaq Juanta wañuchisqankuta?” nispa. Compañeranmi ichaqa mana entiendesqachu chhayna kutichisqanta.

Qelqanchiskunaq yachachikuyninkunapas dibujonkunapas allintapunin wawakunataqa yanapan. Wakin escuelakunaq umallinmi ichaqa mana munankuchu religionmanta rimaq qelqakunata compañeronkunaman leechinankuta. Chhayna kaqtin, ¿atinmanchu wawaykichiskuna mana chay qelqakunaq yanapaynillanwan iñiyninkumanta rimayta? ¿Imaynatan chaypaq yanapawaqchis?

Ensayaychis

Wasipin ensayanaykichis. Tayta-mamakuna qankunan compañeronkumanta kawaqchis. Qhawariychis imaynatan wawaykichiskuna iñisqankumanta rimasqankuta, “kusa” niychis kallpachakusqankumanta. Yanapay fácil entiendey rimaykunallawan  kutichinankupaq, reparachiytaq chay ruway aswan allin kasqanta. Isqon watayoq Joshuan nin: “Compañeroykunaqa manan entiendewaqkuchu ‘concienciaymi huchachawanman, Jehová Diospaqqa hunt’aqmi kanay’ nisqayta”, nispa. Chaymi payqa fácil entiendey rimaykunallawan compañeronkunata yuyaymanachiq (1 Cor. 14:9).

Wakin wawakunaqa ratollan sayk’urqapunku tapukuyninkuman kutichinankupaq askhata rimaqtinku. Ichaqa sichus Testigo wawakuna tapukusqankuman munayllata kutichispa paykunatapas tapurinqaku chayqa, tukuy yuyaywanmi uyarinqaku. Chaytan ruwan 10 watanpi kashaq Haneul sutiyoq sipascha, paymi nin: “Compañeroykunaqa manan munankuchu huklla rimananta, paykunapas rimarikuytan munanku”, nispa. Sumaqta parlarinapaqqa tapuykunatan ruwana, kutichisqankutataq tukuy yuyaywan uyarina chhaynapi imachus yuyaykusqankuta yachanapaq.

Qatiqninpin yachachishan imaynatan compañeronkuwan yuyaymanankuman chaymanta. Chaytaqa manan kaqllatachu rimananku  kanqa, compañeronkunapas imaynapi tarikusqankupas mana kaqllachu kasqanrayku. Aswanpas wawaykichiskunatan yanapanqa entiendesqankuman hina paykunallamanta kutichinankupaq. Wawayki escuelapi kashan chayqa allinmi kanman ñawpaqmanta chaykunata ensayay.

Iñiyninkupi qaqata sayanankupaq wawakunata yachachiyqa sasan. Cristiano tayta-mamakunaqa kallpachakunkun, tiemponkutapas t’aqankun wawankuq sonqonman Diospa yachachikuyninkunata churanankupaq chayta hunt’anankupaqpas (Deu. 6:7; 2 Tim. 3:14).

Familiantin Diosta Yupaychana Ch’isitan recuadropi kaq yanapaykunata ensayawaqchis, chaypin reparankichis allinpuni kasqanta. Ichaqa manan chayqa sapanka simikunata wawakuna umankupi hap’inankupaqchu. Sapanka ensayasqaykichispi ama kaqllatachu kutichiychis, chhaynapin reparankichis wawaykichis imayna kutichisqanta. Sut’inchayta munaqtinkutaq yanapaychis allinta chayta ruwanankupaq. Chhaynapin wawaykichisqa iñiyninkumanta allinta rimanqaku compañeronkunawan, profesorninkunawan, vecinoykichiskunawanpas.

[4, 5 paginakunapi dibujokuna recuadropiwan]

CUMPLEAÑOKUNA

Melisa: Imaynallan Julio. ¿Hamuwaqchu fiestayman?

Julio: Gracias invitawasqaykimanta. Ichaqa, ¿ima fiestatan ruwanki?

Melisa: Nacesqay p’unchaytan fiestakusaq

Julio: Agradecekuykin invitawasqaykimanta. Ichaqa, manan ñoqaqa chay fiestakunataqa ruwanichu.

Melisa: ¿Imanaqtin? Llapa runakunamá riki festejakunku. Tayta-mamaypas kusikurqankun ñoqa naceqtiyqa.

Julio: Ñoqaqpas kusikurqankun. Ichaqa manan nacesqay p’unchaypiqa fiestata ruwankuchu. Fiestakuqmi mayninpiqa importante runaman tukun. Ichaqa Diosmi aswan importanteqa. Paytan agradecekunanchis kawsay qowasqanchismantaqa.

Melisa: Chhaynaqa, ¿manachu fiestayta ruwayman?

Julio: Chaytaqa qanmi decidinayki. Fiestanku p’unchaypiqa askha runakunan regalo chaskiyta munanku, Biblian ichaqa niwanchis “aswan kusisamiyoqqa qoqmi chaskiqmantaqa”, nispa. Ñoqapaqqa aswan importanteqa manan fiestakuspa regalokuna chaskiychu, aswanmi kawsay qowasqanchismanta Diosta agradecekuy hukkunata yanapay ima.

Melisa: Manan chaypiqa yuyaykusqanichu. Chhaynaqa, ¿manachu tayta-mamayki hayk’aqllapas regalota qorqasunkiku?

Julio: Qowankuyá, maypitaq manari. Ichaqa manan nacesqay p’uchaytaraqchu suyanku. Imay ratopas qowankun. ¿Yachankichu imanaqtinmi nacesqanku p’unchaypi fiestakuy qallarisqankuta?

Melisa: Qanri ¿yachankichu?

Julio: Paqarin willasqayki imas pasarqan unay tiempoña huk cumpleaño ruwakusqanpi chayta.

BANDERA NAPAYKUYMANTA HIMNO TAKIYMANTAWAN

Gisela: Carla, ¿imaraykun banderata mana napaykunkichu himnotapas takinkichu?

Carla: Kusan chay tapukuyniykiqa. Qanri ¿imaraykutaq chayta ruwanki?

Gisela: Nacionniyta munakuspayá.

Carla: Mamaykitapas munakunkin riki, ichaqa ¿himnota takispachu otaq makiykita qhasqoykiman churaykuspachu napaykunki?

Gisela: Manan. Ñoqaqa respetanin banderata, chaymi chayta ruwani. Qanri, ¿manachu respetanki?

Carla: Ñoqapas respetanin, ichaqa manan llapa respetasqanchistachu chhaynata napaykunchis, riki.

Gisela: Cheqaqtan nishanki chaytaqa. Manan yachanichu imanaqtin banderata chhaynata napaykusqaytaqa. Yaqapaschá hukkunata qhawarispa ñoqapas qatikuni.

Carla: ¿Yachankichu imaraykun runakuna himnota takinku banderatapas napaykunku? Chaykuna nacionninkuta representasqanraykun, chaymi runaqa kawsayninkutapas qonkumanraq. Ñoqaqa manan chhaynatachu yuyaykuni. Diosmi kawsaytaqa qowarqan manan nacionniychu, chaymi Diosllaman kawsayniyta qoyta munani. Respetanin banderata himno takisqankutapas, ichaqa manan chaykunata qatikuymanchu.

Gisela: Kunanqa entiendenin imanaqtin banderata mana napaykusqaykita.

Carla: Kusikunin kaykuna yachayta munasqaykimanta. Imaraykuchus imatapas ruwani otaq mana ruwanichu chaykunamanta yachayta munaspaqa tapuwallanki. Huk reymi ñawpa tiempopi runakunata kamachirqan ruwachisqan idoloman k’umuykukunankupaq. Wakinmi ichaqa mana kasukurqankuchu wañuchinankupaqña amenazarqanku chaypas.

Gisela: ¿Cheqaqta? ¿Chayri imapitaq tukurqan?

Carla: Recreopiña willasqayki.

COLEGIOPI ELECCIÓN KAQTIN

Miguel: Diego, ¿pin colegiopi aswan allin kanman presidente kananpaq?

Diego: Ñoqaqa manan mayqentapas qhawarinichu.

Miguel: ¿Imanaqtin?

Diego: Ñoqaqa ñan akllakuniña lliwmantapas aswan allin presidenteta. Cristianotaq kani chayqa, Señor Jesusta qatikunaypaqmi prometekurqaniña. Chayraykun mana pitapas qatikuymanñachu. ¿Yachankichu imanaqtin Señor Jesusta qatikuy aswan allin kasqanta?

Miguel: Manan, manataqmi yachaytapas munanichu.

Diego: Hayk’aqllapas yachayta munanki chayqa, tapuwallanki.

[Foto]

“Julio, hamunkiyá fiestayman”

[3 paginapi foto]

“¿Imanaqtinmi himno nisqata mana takinkichu banderatapas napaykunkichu?”