Diosmi atiyta qowanchis sasachakuykunata atipanapaq

‘Atiy qowaqniypa kallpachawasqanwanmi tukuy imaymanata atini.’ (FILI. 4:13, NM.)

1. ¿Imaraykun Diosta serviqkunapaq imaymana sasachakuykuna kan?

JEHOVÁ DIOSTA serviqkunapaqqa imaymana sasachakuykunan kan. Chay sasachakuykunan hamun pantaq kasqanchismanta, millay runakunamanta, Diospa enemigonkunamantawan (Gén. 3:15). Jehová Diosqa ñawpaq tiempomantaraqmi llaqtanta yanaparqan qatiykachaymanta, ima mana allinmanpas tanqaykusqa kanankumanta, huk sasachakuykunamantawan. Kunanpas santo espirituntan qowasun ñawpaqllaman purinanchispaq.

Qatiykachasqa kaqtinchis

2. ¿Imaraykun religionpi kaqkuna qatiykachasqa kanchis? ¿Imakuna hinan Satanás chayta ruwan?

² Qatiykachay nispaqa nikun, huk religionniyoq runakunata maqaspa, tumpaspa otaq imatapas ruwaspa ñak’arichisqankutan. Chaytan ruwanku religionninta saqepunanpaq, chhaynapi chay religionnin chinkapunanpaq. Chaytaqa Satanasmi ruwachin; mayninpin león hina phawaykuwanchis, mayninpitaq mach’aqway hina pakallapi (leey Salmo 91:13).

3. ¿Imaynatan Satanás león hina otaq mach’aqway hina phawaykuwanchis?

³ Satanasqa phiña león hinan phawaykuwanchis hukkunawan maqachiwaspanchis, carcelpi wisq’achiwaspanchis, predicacionta hark’achispa ima (Sal. 94:20). Anuario libron willashan Jehová Diospa testigonkuna contra imaymana ruwasqanta. Askha llaqtakunapin mayninqa sacerdotekuna otaq politicokunaq umallisqan runakuna Dios serviqkunata maqarqanku. Chaywanmi wakin cristianokuna Dios serviyta manchakapurqanku. Huk kutikunapiqa mach’aqway  hinañataqmi qonqayllamanta kaniyta munawanchis. Chaytaqa ruwan yuyayninchista imawanpas waqllichispan, munasqanta ruwananchisrayku q’otuwaspanchis ima, chaywanmi iñiyninchista pisiyachiyta munan. León hinaña otaq mach’aqway hinaña phawaykuwasun chaypas, santo espirituq yanapayninwanqa atipasunmi.

4, 5. ¿Imatan ruwananchis qatiykachay chayamuqtin allin preparasqa kananchispaq? ¿Imaraykun chayta ruwananchis? Huk experienciata willay.

⁴ Llapanchismi preparasqa kananchis chhayna qatiykachaykunapaq. Ichaqa manan nishananchischu: “Khaynachá, haqaynachá kanqa”, nispaqa. Manan yachanchischu qhepaman imayna qatiykachaykuna kananta. Chaymi mana chaykunamantaqa llakikushanachu. Aswanmi ñawpaqkunapi qatiykachasqa kaspa iñiyninkupi qaqa sayaq cristianokunamanta yachashananchis. Paykunapas ñawpa cristianokunaq ejemplonta qhawarispa, Jesuspa yachachisqanta yuyarispa, ejemplonpi yuyaymanaspa iman imaymana ñak’ariykunata atiparqanku. Chaykunawanmi Jehová Diosta astawan munakurqanku, chaytaqmi yanaparqan huk sasachakuykunata atipanankupaq.

⁵ Yacharisun Malaui nacionpi tiyaq iskay cristianakunamanta. Askha runakuna huñunakuspan partido político nisqamanta tarjetata rantinankupaq obligarqanku. Mana munaqtinkutaqmi maqaykurqanku, p’achankuta ch’utiruspataq violayta munarqanku. Llullakuspan nirqanku: “Betelpi llank’aqkunapas llapankuñan kay tarjetata rantinku”, nispa. ¿Imanirqankun chay cristianakuna? “Ñoqaykuqa Jehová Diosllatan serviyku, cheqaqtaña Betelpi kaqkuna rantirqanku chaypas, ñoqaykuqa manan rantisaqkuchu wañuchisqaña kasaqku chaypas”, nispan nirqanku. Mana manchakuspa rimasqankuta uyarispan chay runakuna ripurqanku.

6, 7. ¿Imaynatan Jehová Dios yanapawanchis qatiykachayta aguantanapaq?

⁶ Apóstol Pablon Tesalónica llaqtapi cristianokunata nirqan: “Sinchita ñak’arishaspaykichispas Diospa siminta chaskirqankichis Santo Espirituq kusikuy qosqanwan”, nispa (1 Tes. 1:6). Qatiykachasqa tarikuq cristianokunan willakunku ñak’ariykunapi tarikushaspapas sonqonkupi thak kay kasqanta. Chay thak kayqa santo espirituq rurunmi, chaymi paykunaq yuyayninta sonqonkutapas pakaykurqan (Gál. 5:22). Jehová Diosqa santo espirituntan kamachinkunaman qon ima llakipi tarikuqtinkupas yachaywan aguantanankupaq sasachakuykunatapas atipanankupaq. *

⁷ Wakin runakunan admirakunku cristianokuna sinchi sasachakuykunapi kashaspapas iñiyninkupi qaqa sayasqankuta rikuspa. Reparankun paykunapi hatun atiy kasqanta. Chay atiymantan Pedro nirqan: “Cristoraykuchus k’amisqa kankichis chayqa, kusisamiyoqmi kankichis. Diospa atiyniyoq Espiritunmi qankunaman uraykamun”, nispa (1 Ped. 4:14). Arí, Diospa chanin kamachikuyninkunata kasukunanchisrayku ñak’arichisqa kasun chayqa Diospa allin qhawarisqanmi kasun, chayqa anchatan kusichiwanchis (Mat. 5:10-12; Juan 15:20).

Runakuna imamanpas tanqaykuyta munawaqtinchis

8. a) ¿Imaynapin Josuepas Calebpas mana huk israelitakuna hinachu yuyaykurqanku? b) ¿Imatan paykunamanta yachanchis?

⁸ Mayninpiqa mach’aqway hinañataqmi runakunawan huchaman tanqaykuyta munawanchis. Ichaqa Jehová Diospa espiritunmi aswan atiyniyoq. Chay espirituq yanapayninwanmi atipasun runakuna burlakuwasqanchista, tumpawasqanchista, manataqmi paykunaq munasqanman hinachu  kawsasun. Josueta Calebtawan yuyarisun. ¿Imaraykun paykuna mana chunka qhamiyaq runakuna hinachu yuyaykurqanku? Paykunaqa Diospa santo espirituntan chaskikurqanku chaymi huknirayta yuyaykurqanku (leey Números 13:30; 14:6-10, 24).

9. ¿Imaraykun kay pacha runakunamanta hukniray kananchis?

⁹ Jesuspa apostolninkunapas santo espiritutan chaskikurqanku, chaymi Diospa kamachikusqanta kasukurqanku manataqmi religionpi umallikunata manchakurqankuchu (Hech. 4:21, 31; 5:29, 32). Kay tiempopi runakunaqa llapa runakunaq ruwasqantan qatikunku mana imatapas ninankurayku. Cheqaq cristianokunan ichaqa chanin kaqta ruwanchis imataña runakuna niwanchis chaypas. Santo espiritun kallpata qowanchis runata mana manchakunanchispaq (2 Tim. 1:7). Qhawarisun imapin mana hukpa ruwasqanta qatikunachu chaymanta.

10. ¿Ima sasachakuypin wakin cristianokuna tarikunku?

¹⁰ Wakin wayna-sipaskunaqa manan ima ruwaytapas atinkuchu amigonku huchaman urmasqanta yacharqospa. Ninkupaschá: “Cheqaq amigokunaqa manan ima ruwasqankutapas hukkunaman willanankuchu. Amigoypa huchallikusqanta umallikunaman willaspaqa amigoytachá traicionashayman”, nispa. Mayninpiqa huchallikuqmi amigonta nin ama pimanpas willakunanpaq. Chayqa manan wayna-sipaskunallapichu rikukun. Wakin kurak cristianokunapas sasapaqmi qhawarinku huk amigonkuq otaq familiankuq huchallikusqanta umallikunaman willayta. ¿Imatan ruwasunman chhaynapi tarikuspa?

11, 12. ¿Imatan ruwananchis huchaman urmasqanmanta amigonchis mana willakunanchista munaqtin? ¿Imarayku chayta ruwananchis?

¹¹ Yaqapaschá kay sucedenman. Luiswan Carloswanmi iñiqmasintin kanku. Luismi yacharqon amigon qhelli ruwaykunata sapa kutilla qhawasqanta, chaymi Carlosta kallpachan umallikunaman willakunanpaq. Ichaqa manan chay nisqanta kasunchu, aswanmi nin: “Amigoy kanki chayqa aman willakunkichu”, nispa. ¿Chayta manchakuspachu mana willanan? Luisqa yuyaykushanpaschá: “Willarqoqtiy Carlos mananchakunqa chayri, ¿umallikuna creewanqakuchu? nispa. Ichaqa yachanmi upallalla kaqtinqa amigon mana allinkunapi rikukunanta otaq Jehová Diosmanta karunchakunantapas. Hinaspapas yuyarinmi Proverbios 29:25 textopi nisqanta, chaypin nin: “Runakunata manchapakuyqa huk toqllan, Señor Diosman hap’ipakuqmi ichaqa waqaychasqa kashan”, nispa. Carlosta yanapayta munaspan kallpachakun paywan yapamanta rimananpaq, yuyaykunmi: “Kunanqa uyariwanqachá, agradecekuwanqataqchá yanapay munasqaymanta”, nispa. Chaymi Luisqa nin: “Umallikunawan rimay, mana chayqa ñoqan  paykunaman willarqosaq”, nispa (Lev. 5:1).

¹² Yaqapaschá ñoqanchispas chhaynapi hayk’aqllapas tarikusun. Amigonchisqa phiñakunqapaschá umallikunaman willasqanchismanta. Ichaqa qhepamanqa yaqapaschá reparanqa payta munakuspa chayta ruwasqanchista. Sichus umallikunaq yanapayninta chaskikunqa chayqa agradecekunqan yanapasqanchismanta. ¿Phiñakapunqa qanwan chayri? Chhayna kaqtinqa yuyarinanchismi aswan allin amigonchista kusichiy aswan allin kasqanta. Arí, sichus Jehová Diosta munakuspa paytaraq kasukusun chayqa, payta munakuq cristianokunapas respetawasunmi, allin amigonchiskunan kapunqakupas. Ama Saqraman gustota qosunchu Diospa llaqtanta qhellichananpaq. Hinallata imatapas qhawasunman chayqa, santo espiritutan llakichisunman. Chaymi kallpachakunanchis Diospa llaqtan ch’uya kananpaq (Efe. 4:27, 30).

Ima ñak’ariypipas tarikuqtinchis

13. ¿Ima ñak’ariykunapin cristianokuna tarikunchis? ¿Imaraykun chaykuna kashan?

¹³ Cristianokunamanqa imaymana ñak’ariykunan hamuwanchis, mayninqa qolqen mana aypawanchischu, llank’anamanta qarqomuwanchis, terremotokuna kan, para mana kanchu, munakusqanchis runakuna wañupunku otaq sinchi onqoykunapi tarikunchis. ‘Sasa tiempokunapin’ tiyanchis chaymi sasachakuykunaqa kanqapuni (2 Tim. 3:1). Chhaynapi tarikuspaqa manan mancharikunanchischu, santo espirituq atiyninwanqa atipallasunmi ima sasachakuytapas.

14. ¿Iman Jobta yanaparqan ñak’ariykunata aguantananpaq?

¹⁴ Jobpas imaymana ñak’ariykunapin tarikurqan. Imaymana kaqninkunan chinkarqan, wawankuna wañupurqan, amigonkuna saqepurqan, nishuta onqorqan, warminpas manañan Diospi hap’ipakurqanchu (Job 1:13-19; 2:7-9). Chhayna sasachakuykunapi tarikushaqtinmi Eliu wayna kusata yanaparqan. Nirqanmi: “Job, makilla uyariykuway, Diospa imaymana musphana ruwasqankunata qhawariy”, nispa (Job 37:14). ¿Imatan chaywan nisharqan? Jehová Dios santo espiritunwan tukuy imaymana ruwasqanpin yuyaymananan karqan (Job 38:1-41; 42:1, 2). Chaytan ñoqanchispas ruwananchis. ¿Yuyashankichu qanrayku Jehová Dios ñawpaqpi ruwasqanta? Kunanpas Diosqa interesakunmi ñoqanchispi.

15. ¿Iman Pablota yanaparqan sasachakuykunata atipananpaq?

¹⁵ Diosta munakuspan Pablopas imaymana sasachakuykunata muchurqan (2 Cor. 11:23-28). ¿Iman payta yanaparqan allin yuyaywan Diosta servinanpaq? Jehová Diosmanta mañakusqanmi paymanta hap’ipakusqan iman. Sinchi sasachakuykunapi tarikushaspan kayta qelqarqan: “Señormi ñoqawan kasharqan, hinaspa kallpachawarqan, chaymi hunt’asqata allin willakuykunata willarqani llapa mana judío runakunaq uyarinanpaq. Ahinapin leonpa siminmanta  hina qespichisqa karqani”, nispa (2 Tim. 4:17). Chaymi Pabloqa iñiqmasinkunata nirqan: “Ama imamantapas llakikuychischu”, nispa (leey Filipenses 4:6, 7, 13).

16, 17. ¿Imaynatan Jehová Dios yanapawanchis ima sasachakuypipas tarikuqtinchis? Huk ejemplota willay.

¹⁶ Roxana sutiyoq precursoran rikullarqantaq Jehová Diospa yanapayninta. Hatun huñunakuyman rinanpaqmi patronninmanta permisota mañakurqan, patronninmi ichaqa nirqan: “¡Mana hamunki chayqa, qarqosqaykin kay llank’anamanta!”, nispa. Chaywanpas Roxanaqa rirqanmi chay huñunakuyman. Jehová Diosmantan mañakurqan llank’ananmanta ama qarqonankupaq, chaytaqmi sonqonta “thak” niyachirqan. Hatun huñunakuy qhepata llank’ananman ripuqtinmi cheqaqta patronnin llank’ananmanta qarqonpurqan, chayqa sinchitan llakichirqan. Pisillataña chay llank’anapi ganarqan chaypas, chaywanmi familianta uywaq. Wakmantan Jehová Diosmanta mañakurqan. Sonqonpin yuyaykurqan: “Jehová Diosqa qowanqakun wiksaykupaq necesitasqaykuta imaynan huñunakuypipas espiritual mikhunata qowarqanku hinata”, nispa. Wasinman ripushaspan huk wasipi willakuyta rikurqan maquinapi siray yachaqkuna necesitakusqanta. Chaypi jefewan rimaq riqtinmi, chay runa repararqan mana ancha siray atisqanta, chaywanpas contratarqanmi llank’ananpaq allin sueldotataqmi munachirqanpas, ñawpaqpi ganasqanmantaqa iskay kutita hinaraq. Roxanaqa anchatan Jehová Diosta agradecekurqan mañakusqanman kutichimusqanmanta. Hinaspapas chaypi llank’aqmasinkunatan predicarqan, paykunamantan tawa runakuna jefen ima bautizakurqanku.

¹⁷ Mayninpiqa manapaschá entiendesunchu imaraykun Jehová Dios mana mañakuqtinchis hinachu nitaq munasqanchisman hinachu imatapas qowanchis. Ichaqa yuyarinanchismi pay ñoqanchismanta astawan yachasqanta. Manataqmi hayk’aqpas paypa munaynin ruwaqtaqa saqerparinqachu (Heb. 6:10).

Ima tentacionpipas sasachakuypipas tarikuqtinchis

18, 19. a) ¿Imaraykun cristianokuna sasachakuykunapi tentacionkunapi tarikunchis? b) ¿Iman yanapawasun sasachakuykunata atipanapaq?

¹⁸ Diosta serviqkunaqa cheqnikuwaqninchis runakuna ukhupin kawsashanchis, chaymi tentacionkuna kan, pisi kallpayanchis, qatiykachasqa kanchis otaq mana allin ruwaykunaman runakuna tanqaykuyta munawanchis (Juan 15:17-19). Ichaqa santo espirituq yanapayninwanmi ima sasachakuytapas atipasun. Diosqa maykamachus pruebata muchuyta atisunman chaykamallan probasqa kananchista hinallata qhawanqa (1 Cor. 10:13). Payqa manan saqerpariwasunchu, nitaqmi wikch’urpariwasunpaschu (Heb. 13:5). Diospa kamachikuyninkunata kasukuymi pakaykuwanchis kallpachawanchistaqmi kanpas. Chaymantapas santo espiritunwanmi iñiqmasinchiskunaq sonqonta kuyurichinqa ima necesitasqanchispipas yanapaykuwananchispaq.

¹⁹ Chhaynaqa Diosmanta mañakushallasun Bibliatapas estudiashallasun santo espirituq atiyninta chaskinapaq. Ahinapin ‘Diospa ancha hatun atiyninwan kallpachasqa’ kaspa ‘tukuy pacienciawan lliw imatapas muchusun’ (Col. 1:11).

[Uranpi willakuy]

¿Imaynatan kutichiwaq?

• ¿Imatan ruwananchis qatiykachay chayamuqtin allin preparasqa kananchispaq?

• ¿Imatan ruwananchis amigonchis huchallikusqanta mana pimanpas willananchista munaqtin?

• ¿Imatan mana qonqananchischu ima ñak’ariypipas tarikuspa?

[Tapuykuna]

[28 paginapi dibujo]

¿Imatan yachanchis Josuemanta Calebmantapas?

[29 paginapi foto]

¿Imaynatan yanapasunman huchaman urmaq amigonchista?