¿Imaraykun ancha kusisqa kanchis?

KAMAQNINCHIS Diosqa “manan ch’aqwa hatarichiq [otaq ch’arwita ruwaq] Dioschu”. Chaytan yachanchis mana rikuna huch’uy kawsaykunata hanaq pachapi hatunkaray ch’askakunatapas kamasqanpi (1 Cor. 14:33). Llaqtanpi imaynatachus payta yupaychanankupaq sumaqta allichasqanpas musphanapaqmi. Hanaq pachapi millonninpi angelkuna hinallataq kay pachapi kikillankumanta allin yuyaywan akllakuq runakuna iman huk llaqta hinalla Diosta servishanku. ¡Chayqa anchata admirakunapaqmi!

Ñawpaq tiempopiqa Jerusalén llaqtan kay pachapi Diospa llaqtan karqan, chaypin karqan yupaychana wasipas Diospa akllasqan reypas. Babiloniaman apasqa israelitan chay llaqta munakusqanmanta khaynata nirqan: “Jerusalén llaqtalláy, manachus yuyarisqayki chayqa, ima kusikuymantapas manachus astawanraq hatunchasqayki chayqa, qalluy upayapuchun”, nispa (Sal. 137:6).

¿Chhaynatachu munakunki Diospa llaqtanta? ¿Kusisqachu kanki chay llaqtapi? ¿Allintachu wawaykikuna yachanku Diospa llaqtan imayna qallarisqanmanta imayna allichasqa kasqanmantapas? ¿Reparankuchu Jehová Diospa testigonkuna pachantinpi huk llaqta hinalla kasqankuta? (1 Ped. 2:17.) ¿Imaynatan paykunata yanapawaq Diospa llaqtanta munakunankupaq? Chaypaqqa familiantin estudianaykichis ch’isipin kaykunawan yanapachikuwaqchis.

Willay ‘ñawpa p’unchaykunapi ruwakusqanmanta’

Israel runakunaqa sapa watanmi Pascua fiestata ruwanankupaq familiantin huñunakuqku. Chayllaraq chay fiesta qallarishaqtinmi Moisés kayta kamachirqan: ‘Qhepamanchus churiykichis tapusunkichis: ¿Imatataq ruwashankichis? nispa chayqa, paykunata ninkichis: Kamachi kashaqtiykun, Señor Diosqa ancha atiyninwan Egipto suyumanta horqomuwarqanku’, nispa (Éxo. 13:14). Chaytaqa willananku karqan Jehová Dios llaqtanrayku ruwasqanta wawanku mana qonqanankupaqmi. Moisespa kamachisqantaqa yaqa llapa tayta-mamakunan kasukurqanku, chaymi unay watakuna qhepaman salmista qelqarqan: “Diosníy, ninriykuwanmi uyarirqayku, ñawpa taytaykun willawarqanku p’unchayninkupi ruwasqaykita, ñawpa p’unchaykunapi ruwasqaykita”, nispa (Sal. 44:1).

Kay tiempopi wayna-sipaskunaqa “unay watakunañapas” pasanman karqan hinatapaschá qhawarinku pachaq watakuna ñawpaqta Jehová Diospa llaqtanpi imakunachus sucedesqanta. ¿Imaynatan wawaykikunata yanapawaq chayllaraqpas chaykuna sucedenman hinata qhawarinankupaq? Wakin tayta-mamakunaqa Los testigos de Jehová, proclamadores del Reino de Dios, Anuario librokunawan, revistanchiskunapi iñiqmasinchiskunaq kawsayninmanta willakuykunawan, Diospa llaqtanmanta willaq DVD nisqawan iman wawankuman yachachinku. Alemania, Rusia nacionkunapi iñiqmasinchiskuna qatiykachasqa kasqankumanta videokunata qhawaypas yanapanmi familiakunata sasachakuykunapi kaspa Jehová Diospi astawan hap’ipakunankupaq. May allinmi kanman chaykunamanta Familiantin Diosta Yupaychana Ch’isipi yachayqa. Chayta ruwaspan wawaykikunata iñiyninpi kallpachanki, allin preparasqataqmi kanqaku sasachakuypi tarikuspa Diospaq hunt’aq sonqo kanankupaq.

Wawakunaqa usqhayllan sayk’upunku ima willakuytapas uyarispaqa. Chhaynaqa, ¿imatan ruwasunman mana sayk’unankupaq? Sapankankutan niwaq mayqen nacionmanta yachay munasqankuta akllakuspa chay nacionpi  predicación imayna qallarisqanmanta yachaspa familiaman willanankupaq. Chaymantapas unayña Diosta serviq cristianota reqsispaqa invitawaqchismi familiantin estudiasqaykichisman. Chaypin wawaykichista niwaqchis chay iñiqmasita tapunankupaq. Chaymantapas niwaqmi sucursal nisqa wasita imayna sayarichisqankumanta, askha nacionkunamanta hatun huñunakuykuna aparikusqanmanta, apaykachana tocadiscokunawan predicasqankumanta otaq huk sumaq ruwaykunamanta dibujanankupaq.

‘Sapankaq ruwananta’ allinta t’aqwiy

Apóstol Pablon iñiq t’aqata cuerponchispa miembronkunawan rikch’anachirqan, khaynatan nirqan: “[Diospa] yanapasqanmi llapa cuerpoqa allin k’askanasqa kashan, sapanka moqokuna allin ch’antasqa, sapankataq ruwananman hina allinta llank’aqtin llapa cuerpo munakuypi aswan-aswanta wiñashan”, nispa (Efe. 4:16). Cuerponchis imayna ruwasqa kasqanta yachaspan Kamaqninchista hatunchanchis. Diospa llaqtan imayna kasqanmanta yachaspapas ‘Diospa tukuy imaymana yachayninmantan’ admirakusun (Efe. 3:10).

Jehová Diosqa willawanchismi imaynatas hanaq pachapi imapas ruwakun chayta. Chaymantan apóstol Juan nirqan: ‘Diosqa payman [Jesusmanmi willarqan] [...]. Chaymi Jesucristoqa angelninwan chaykunata kamachin Juanman willachirqan’, nispa (Apo. 1:1, 2). ¿Hanaq pachapi imapas imayna ruwakusqanta willawashaspanchischu Jehová Dios mana munanman kay pacha llaqtanpi ‘sapanka ruwanapas’ imayna ruwakusqanta yachananchista?

Sichus iñiq t’aqa umalli watukamuwasunman chayqa, ¿imatan familianchiswan ruwasunman? Allinmi kanman imayna yanapawasqanchismanta imachus ruwanankunamantawan yuyariy. Chaymantapas kay tapuykunatan kutichisunman: ¿Imanaqtinmi hayk’a horachus predicasqanchista willananchis? ¿Ima qolqewanmi Diospa llaqtanpi imapas ruwakun? ¿Imaynatan Umalli T’aqa llank’anankuta hunt’anku? ¿Imaynatan apachimuwanchis espiritual mikhunata?

¿Imapin yanapawasun Diospa llaqtan imayna kasqanmanta yachasqanchis? Ñoqanchisrayku iñiqmasinchiskunaq llank’asqankutan aswan allinpaq qhawarisunchis (1 Tes. 5:12, 13). Imakunachus kamachiwasqanchistan kasukusunchis (Hech. 16:4, 5). Diospa llaqtanpi umallikunaq decidesqantan Bibliaq nisqanta hinapuni qhawarisun, manataqmi paykunamanta iskayasunchu (Heb. 13:7).

“Muyuriq perqantapas allinta qhawaychis”

Salmistan nirqan: “Sión llaqta muyuriqta puriychis, torrenkunata yupaychis, muyuriq perqantapas allinta qhawaychis, palacionkunatapas allinta rikuychis, qhepa wiñayman willanaykichispaq”, nispa (Sal. 48:12, 13). Chaywanmi israelitakunata kallpachasharqan Jerusalén llaqtata rispa perqankunata allinta qhawanankupaq. Watapi fiestakunaman familiantin riq judiokunaqa yuyashallaqkuchá Diosta yupaychananku llaqtata, kutispapas rikurqankuchá yupaychana wasiq sumaq perqankunata. Hinaspapas ancha kusisqachá ‘qhepa wiñaykunaman’ chaykunata willarqanku.

Sabá llaqta reinamanta yachasun. Payqa manan cheqaqpaqchu hap’irqan Salomonpa sumaq kamachikuyninmanta yachayniyoq kasqanmanta willakuykunata. ¿Imaynapiñan chayta creerqan? Pay kikinpunin nirqan: “Runakunaq rimasqantaqa manan cheqaqpaqchu hap’irqani, kunanmi ichaqa ñawiykunawan rikuspa creeni”, nispa (2 Cró. 9:6). Chaypi qhawarisqanchis hina, ñawinchiswan imatapas rikuspan astawanqa creenchis.

¿Imaynatan wawaykikuna Diospa llaqtanpi ancha sumaq kaqkunata ñawinkuwan rikunkuman? Llaqtaykipi Betel wasi kan chayqa, ancha allinmi kanman chayta rispa reqsimuy. Yachasun Mandy, Bethany sipaskunamanta. Tiyasqankumanta 1.500 kilómetro karupiña Betel wasi kasharqan chaypas, tayta-mamankun sapa kutilla paykunata pusaq, astawanqa sipas kasqanku tiempopi. Paykunan  willakunku: “Manaraq Betel wasita reqsishaspaqa khaynatan niq kayku: ‘Chaypiqa kurak runakunallachá kanku hinaspapas manachá ima kusirikuyllapas kanchu’, nispa. Ichaqa askha wayna-sipaskunatan kusisqa llank’ashaqta chaypi rikumurqayku. Hinaspapas Diospa llaqtanqa manan tiyasqayku nacionllapichu kasqa. Sapa kuti Betel wasita risqaykun yanapawarqanku Jehová Diosman astawan asuykunaykupaq”, nispa. Mandy Bethanywanqa kikinkupunin rikurqanku Diospa llaqtan imayna kasqanta, chaytaqmi kallpacharqan precursora kanankupaq. Hinaspapas huk tiempon Betel wasipi llank’anankupaq invitasqa karqanku.

Israelitakunaq tiemponmantaqa kay tiempopin astawan imaymana yanapaykuna kan Diospa llaqtanmanta yachanapaq. Kay watakunallapin Hasta los cabos de la Tierra, Los testigos de Jehová: organizados para predicar las buenas nuevas, Toda nuestra asociación de hermanos, Unidos gracias a la enseñanza divina DVD nisqakunapi Diospa llaqtanpi imakuna ruwakusqanmanta lloqsimurqan. Sichus familiaykiwan kuska Betelpi llank’aq iñiqmasikuna, huk llaqtakunapi hatun sasachakuykuna yanapaq iñiqmasikuna, misionerokuna, hatun huñunakuykunapi yanapakuqkunaq ruwasqankumanta yachanki chayqa, astawanmi Hallp’antinpi iñiqmasikunata munakunki.

Iñiq t’aqa huñunakusqanchispi cristianomasinchiskunaqa anchatan yanapawanchis predicananchispaq sapankanchistaqmi kallpachayta chaskinchis. Chaywanpas familiantinmi kallpachakunanchis ‘kay pachantinpi kaq iñiq-masinchiskunata’ reqsinapaq. Chay ruwaymi yanapawasun ‘iñiyninchispi allinta takyananchispaq’ kusisqa kananchispaqpas (1 Ped. 5:9).

 [18 paginapi foto recuadropiwan]

Diospa llaqtanmanta yachayqa allinpunin

Askha yanapaykunan kapuwanchis Diospa llaqtan imayna qallarisqanmanta imayna kasqanmantawan yachananchispaq. Qatimuq tapuykunan yanapawasun.

☞ ¿Imaynatan qallarirqan iñiq t’aqata watukuqkunaq llank’aynin? (Los testigos de Jehová, proclamadores del Reino de Dios, 222-228 paginakuna.)

☞ ¿Imaraykun allinpuni karqan 1941 watapi “Día de los hijos” nisqa hatun huñunakuy? (Los testigos de Jehová, proclamadores del Reino de Dios, 86, 88 paginakuna.)

☞ ¿Imaynatan Kamachiq T’aqa imatapas decidenku? (“Testimonio cabal” del Reino de Dios, 108-114 paginakuna.)