Familiakuna, listo kashaychis

“Qankunapas wakichisqallapuni [listo] kashaychis, Runaq Churinqa mana suyasqaykichis horatan hamunqa.” (LUC. 12:40.)

1, 2. ¿Imaraykun kasukunanchis “wakichisqallapuni kashaychis” nispa Jesuspa nisqanta?

¿IMAN kanqa familianchismanta ‘runaq Churin [...] lliphlli-kayninpi hamuspa’ llapa runakunata ‘t’aqaqtin’? (Mat. 25:31, 32.) Qonqayllataq Jesucristo chayamunqa chayqa ‘wakichisqallapunin kashananchis’ (Luc. 12:40).

² Ñawpaq estudiopin yacharqanchis familianchis rikch’ashaqlla kananpaqqa sapankanchis Diospa kamachiwasqanchista hunt’ananchis kasqanta. Kunanqa huk yanapaykunamantañataqmi yachasun.

“Allin” ñawiyoq kasun

3, 4. a) ¿Ima trampamantan cristianokuna cuidakunanku? b) ¿Imataq “allin” ñawiyoq kayri?

³ Cristo kutimuqtin familianchis listo kananta munaspaqa manan Dios serviyninchista imaraykupas saqenanchischu, cuidakunanchistaqmi kay pachapi trampakunamanta. Huk trampaqa qolqe munapayaymi, chaymanmi askha familiakunaña urmanku. Chaymi Jesuspa nisqanta kasukuspa “allin” ñawiyoq kananchis (leey Mateo 6:22, 23). Allin ñawiyoq kayqa otaq ‘yuyayninchispi  k’anchayqa’ hark’aykuwanchismi huchaman urmaykunamanta, imaynan huk lámpara purinanchis ñanta k’anchaykuwaqtinchis hark’aykuwanchis urmananchismanta hinata (Efe. 1:18).

⁴ Ñawinchis qhali kaqtinqa ch’uyatan imatapas rikun. Kaqllataqmi suceden allin ñawiman rikch’akuq yuyayninchiswanpas. Allin ñawiyoq kayqa huk ruwayllapi yuyaykuymi. Imaymanayoq kanapaq otaq familiallanchispaq llank’aypi afanakunamantaqa Diospa kaqninkunata ñawpaqman churaymi (Mat. 6:33). Arí, Diosta ñawpaqta servispan kapuqnillanchiswan kusisqa kananchis (Heb. 13:5).

5. ¿Imaynatan huk sipas rikuchirqan allin ñawiyoq kasqanta?

⁵ Wawakunata allin ñawiyoq kanankupaq yachachiyqa ancha allinmi. Chayta yachasun kay willakuypi. Etiopía llaqtamanta huk sipasmi estudionta tukuspa allin notakunata horqokurqan, chaymi becata munachirqanku universidadpi estudiananpaq. Ichaqa manan chaskikurqanchu precursora kayta munasqanrayku. Chay qhepamanmi allin sueldoyoq llank’anata munachirqanku (3.000 euros). Chay sipasqa precursorapunin kayta munarqan chaymi mana munallarqantaqchu. Chaytaqa pay kikillanmantan decidirqan. ¿Imanirqanmi tayta-maman chay decidisqanmanta? Anchatan kusikurqanku nirqankutaqmi “kusa chay ruwasqayki”, nispa.

6, 7. ¿Imaraykun ‘[allinta] qhawarikunanchis’ ima ruwasqanchistapas?

⁶ Mateo 6:22, 23 texton rikuchin munapayay mana allin kasqanta. Arí, “mana allin” nisqa simiqa “millay”, “envidioso” ninanmi, chaymi tupan munapayaywan (Mat. 6:23). ¿Imaynatan Jehová Dios qhawarin munapayayta? Biblian nin: “Qankuna ukhupiqa ama rimayllapas kachunchu qhellipi puriymanta, tukuy mana chanin kaymanta, munapayaymantapas”, nispa (Efe. 5:3).

⁷ Munapayay ñoqanchispi kanman chayqa ratollan hukkuna reparankuman ñoqanchistaqmi mana reparakusunmanchu. Chaymi Jesuspa nisqanta kasukunanchis, paymi nirqan: “[Allinta] qhawariychis, tukuy imaymana munapayaymanta cuidakuychis”, nispa (Luc. 12:15). Chaypaqmi sonqonchista allinta t’aqwikunanchis, chhaynapin yachasun iman sonqonchispi kashan chayta. Llapa familiakunan qhawarinanku hayk’a tiempon kusirikuykunapi kashanku hayk’a qolqetataqmi ima rantisqankupipas gastashanku chayta.

8. ¿Imaraykun ‘[allinta] qhawarikuna’ manaraq imatapas rantishaspa?

⁸ Imatapas rantikuyta munaspaqa manan hayk’a qolqeyoq kasqallanchistachu qhawarinanchis. Kaykunatawanmi tapukunanchis: “¿Serviwanqachu chay rantisqay? ¿Kanqachu qolqey malograkuqtin allichachinaypaq? ¿Ratollachu yachasaq imayna manejaytapas?” nispa. Wayna-sipaskunapas tapukunankun: “¿Allin yuyaywanchu imatapas akllani, icha propagandakunapi imaymanata uyarispachu tayta-mamayta tanqani valeq p’achata rantipuwanankupaq?” nispa. Hinaspapas kaytan tapukunanchis: “Tukuy munasqayta rantikuyman chayri, ¿atisaqchu familiay yanapayta Cristo kutimunan p’unchaypaq listo kashanankupaq?” nispa. Ama qonqasunchu Diospa promesanta, paymi nirqan: “Manan saqerparisqaykichu, manataqmi wikch’urparisqaykipaschu”, nispa (Heb. 13:5).

Kallpachakusun Diospaq astawan llank’ananchispaq

9. ¿Imapin yanapawasunman Diospaq astawan llank’ay munasqanchis?

⁹ Chaymantapas iñiyninchispi allin kanapaqqa qhawarisunmanmi Diospa llaqtanpi  ima llank’aykunamanmi aypayta atisunman chayta, kallpachakunataqmi chaykunaman aypanapaq. Chayta ruwaspan reparasun Dios serviyninchispi imayna kashasqanchista, ima ruway aswan allin kasqantapas (leey Filipenses 1:10).

10, 11. ¿Imakunata ruwanaykichispaqmi familiantin kallpachakushankichis? ¿Imakunatawanmi ruwawaqchis?

¹⁰ Kallpachakusunmanmi familiaq allinninpaq huk allin ruwaykunaman aypanapaqpas. Hukninmi kanman sapa p’unchay Diospa Siminta t’aqwiy. Chaypi tapuykunaman kutichisqankupin taytakuna reparanqaku familianpa iñiynin imayna kashasqanta. Chaymantapas familiantinmi Bibliata leenkuman, chaypin wawakuna Bibliamanta astawan yachanqaku, allintataqmi leeytapas yachanqaku (Sal. 1:1, 2). Hinaspapas kallpachakunanchismi Diosmanta aswan allinta mañakunapaq, kawsayninchispi santo espirituq rurunta ñoqanchispi astawan wiñachinapaqpas (Gál. 5:22, 23). Chaymantapas predicasqanchis runakunapin astawan interesakunanchis. Chayta ruwaspan wawanchiskunata yachachisun khuyapayakuq kayta, chaytaqmi paykunata kallpachanman precursor regular kanankupaq otaq huk llank’aykunapi yanapakunankupaq.

 ¹¹ ¿Imakunatawanmi familiaykiwan kuska ruwawaq? Kallpachakuwaqchismi astawan predicanaykichispaq. Mayqenniykichispas manchali kashan chayqa kallpachakuwaqchismi qhatunakunapi, callekunapi, telefonopi ima predicanaykichispaq. Atispaqa maypichus predicaqkuna necesitakun chaypin yanapakuwaqchis. Otaq pipas familiamanta huk rimayta yachaspa yanapakunman.

12. ¿Imatan taytakuna ruwankuman familianku iñiyninkupi allin takyasqa kananpaq?

¹² Taytakunaqa qhawarinankun imakunapi familianku allinyanan kashan chayta, chayman hinataqmi sapankanku hunt’ay atisqankuman hina ruway atisqankuman hina ima ruwanankutapas ninkuman (Pro. 13:12). Allin ruwaykunata aypanapaqqa tiempon necesitakun. Chaymi televisión qhawayta otaq kusirikunapaq huk ruwaykunata pisiyachinanchis kanqa, astawantaq Diosta servinanchis kanqa (Efe. 5:15, 16). Mana pisipaspa kallpachakusqankun familiakunata yanapanqa ima yuyaykusqankutapas aypanankupaq (Gál. 6:9). Chhaynapin iñiypi wiñasqankuta “lliwpas sut’ita rikunqaku” (1 Tim. 4:15).

Familiantin Diosta Yupaychasun

13. ¿Ima cambion karqan huñunakuykunapi? ¿Imatan tapukunanchis?

¹³ 2009 wata 1 de enero killamantapachan huñunakuykunapaq mosoq horario familiakunata yanapashan Cristo kutimuqtin listo kashanankupaq. Ñawpaqpiqa Qelqamanta Yachanapaq Huñunakuyqa huk p’unchaypin aparikuq, kunanmi ichaqa Bibliamanta Allin Yachachiq Kanapaq Escuelawan, Predicayta Yachanapaq Huñunakuywan kuska aparikun. Chaytaqa ruwakurqan familiakuna chay huñunakuypa rantinpi huk kutita semanapi Diosta yupaychaspa iñiyninkupi kallpachanakunankupaqmi. Kunanqa iskay wata masñan pasarqon, chaymi tapukunanchis: “¿Chay horariopichu familiaywan otaq sapaypi Diosta yupaychashani?” nispa. Ichaqa, ¿imapaqmi chay horario cambiakurqan?

14. a) ¿Imapaqmi huñunakuykunapi cambio ruwakurqan? b) ¿Imaynapin familiantin estudiasqanchis yanapawasun qespichisqa kanapaq?

¹⁴ Chay cambioqa ruwakurqan familianchiswan otaq sapanchispi estudiaspa Diosman astawan asuykunanchispaqmi (Sant. 4:8). Sapa semana Diosmanta yachaspaqa astawanmi payman asuykunchis. Diosman asuykuspataq astawan tukuy sonqonchiswan, tukuy almanchiswan, tukuy yuyayninchiswan, tukuy kallpanchiswan ima munakunchis (Mar. 12:30). Astawan munakusqanchistaq tanqawanchis payta kasukunapaq payman rikch’akunapaq ima (Efe. 5:1). Chayta ruwasqanchismi yanapawasun familiantin ‘manchay ñak’ariy’ p’unchaypaq listo kashanapaq (Mat. 24:21). Arí, chayta ruwaspallan qespichisqa kasun.

15. ¿Imaynatan Diosta yupaychay familiakunata hukllachan?

¹⁵ Familiantin Diosta yupaychayqa yanapawallanchistaqmi familiantin munanakuspa kawsanapaq. Arí, sapa semana familiantin Bibliapi sumaq yachaykunata tarisqanchismi sapankanchista tanqariwanchis familianchista munakunapaq. Casarasqa warmi-qharipas astawanmi hukllachanakunku (leey Eclesiastés 4:12). Diosta yupaychaq tayta-mamakunaq wawakunaq munanakuyninkupas ‘sumaqtan hukllaman tukun’ (Col. 3:14).

16. ¿Imakunapin kinsa cristianakunata yanaparqan Bibliata estudiasqanku?

¹⁶ Qhawarisun imaynatan kinsa kurak viuda cristianakunata chay mosoq horario  yanaparqan. Chay cristianakunaqa unaymantañan amigantin kanku kaq llaqtallapitaqmi tiyankupas. Paykunaqa kuskallan kusirikuykunaman riqku, chaymi rimanakullarqankutaq semanapi huk kutita Bibliata kuska estudianankupaq. “Testimonio cabal” del Reino de Dios nisqa librotan estudiayta qallarirqanku. Hukninkun nin: “Kusikuykun chay estudiota aparispayku, chaymi huk hora mastapuni estudiayku. Ñawpa cristianokunaq ruwasqankuta imapi tarikusqankutapas rikushaykuman hinan estudiayku, parlariykutaqmi imatan sapankaykupas ruwaykuman chhaynapi tarikuspa chayta. Chaypi yachasqaykuman hinan predicaykupas. Chaymi yanapawanku aswan allinta predicanaykupaq sumaqta yachachinaykupaqpas”, nispa. Paykunaqa allinmi iñiyninkupi kashanku, hinaspapas astawanmi hukllachasqa kashanku. Paykunan ninku: “Manan imawanpas chay estudianayku horataqa cambiaykumanchu”, nispa.

17. ¿Imatan ruwasunman familiantin Diosta yupaychasqanchis allinta aparikunanpaq?

¹⁷ ¿Imaynatan yanapawashanchis familianchiswan otaq sapanchispi Biblia estudiasqanchis? Maynillanpi estudiashanchis chayqa manan imapipas yanapawasunchu. Hinaspapas manan yanqa ruwaykunaraykuqa saqenanchischu. Estudiananchis horaqa llapallanchismi listo kashananchis. Estudianapaq akllasqanchis qelqapas familianchista yanapananpaq hinan kanan. Ichaqa, ¿imatan ruwasunman estudiasqanchispi kusikuyta tarinapaq? Sumaqtan yachachina, kananmi respeto, sonqonchispas thakpin kashanan (Sant. 3:18). *

“Rikch’ashasunchis” listotaq kashasun

18, 19. ¿Imapaqmi kallpachawananchis Jesuspa chayamushasqantaña yachasqanchis?

¹⁸ Kay pachapi imaymana millaykuna kasqanmi rikuchiwanchis 1914 watamantapacha Satanaspa imaymana rikhurichisqan tukukunanpaqña kashasqanta. Parananpaq yana phuyu hinaraqmi Armagedón p’unchay qayllaykamushanña. Ñan runaq Churin mana kasukuq runakunata juzganqaña (Sal. 37:10; Pro. 2:21, 22). Chaymi familianchiswan rikch’ashaqlla chay p’unchayta suyashananchis.

¹⁹ ¿Jesusta kasukuspachu “allin” ñawiwan Diosta servishankichis? ¿Kallpachakushankichischu Diospa llaqtanpi astawan llank’anaykichispaq, icha kay pachapi runakuna hinachu qolqe maskhaypi, imaymanayoq kaypi, allin reqsisqa kaypi afanakushankichis? ¿Allintachu aparishankichis familiaykichiswan otaq sapallaykichispi estudiota? ¿Aypashankichischu chay estudiopi imakunachus yuyaykusqaykichista? Ñawpaq estudiopi yachasqanchis hina, ¿yanapakushankichischu familiaykichis makilla kashananpaq imachus ruwanaykichiswan hunt’aspa? (1 Tes. 5:6.) Sichus chaykunata allinta ruwashankichis chayqa familiaykichismi rikch’ashaqlla kashanqa runaq Churin chayamuqtin.

[Uranpi willakuy]

¿Yuyashankichu?

• ¿Imaynatan familiakunata yanapan?

“Allin” ñawiyoq kay.

Diospaq astawan llank’ay.

Familiantin Diosta Yupaychanapaq Ch’isi.

[Tapuykuna]

[13 paginapi foto]

“Allin” ñawiyoq kayqa hark’aykuwasunmi yanqa ruwaykunamanta