“Qankunaman hap’ichisqa kashaq Diospa ovejankunata allintapuni michiychis”

“Qankunaman hap’ichisqa kashaq Diospa ovejankunata allintapuni michiychis, makilla qhawaspa, ama kamachisqa hinachu, aswanpas sumaq munakuywan.” (1 PED. 5:2.)

1. ¿Ima sasachakuykunapin cristianokuna tarikusharqanku Pedro ñawpaqkaq cartanta qelqashaqtin?

APÓSTOL Pedro ñawpaqkaq cartanta qelqashaqtinqa kamachikuq Neronmi Romapi cristianokunata qatiykachananpaqña kasharqan. Hinaspapas Saqran león hina iñiqmasikunata oqoykunapaq muyupayasharqan, chaymi Pedroqa paykunata kallpachayta munarqan. Chaykunata atipanankupaqqa ‘allin yuyayniyoqmi’ kananku karqan, huch’uyyaykukuspataqmi ‘atiyniyoq Diosta’ kasukunanku karqan (1 Ped. 5:6, 8). Hinaspapas huk hinallan kawsananku karqan. ‘Qhansanakuspa mikhuykunakuspa’ kawsankuman chayqa paykunapuran ‘ch’usaqyachinakunkuman’ karqan (Gál. 5:15).

2, 3. ¿Piwanmi maqanakushanchis? ¿Imakunamantan yachasun?

² Kunanpas Saqraqa imaymanawanmi oqoykuyta munawashanchis (Apo. 12:12). Hinaspapas ‘manchay ñak’ariymi kanqaña, chay hinaqa manan hayk’aqpas kay pachapi [...] kanqachu’ (Mat. 24:21). Ñawpa cristianokuna hinataqmi huk hinalla kawsananchis manataqmi ñoqanchispura hap’inakushananchischu. Chaykunata atipanapaqmi umallikunaq yanapayninta necesitanchis.

³ ¿Iman umallikunata yanapanqa ‘hap’ichisqa kashaq Diospa ovejankuna’ michiyta ancha chaninpaq qhawarinankupaq? (1 Ped. 5:2.) ¿Imaynatan chay llank’ayta aparinkuman? Chaykunamantan kay estudiopi yachasun. Qatimuq estudiopitaq yachasun imaynatan ñoqanchis ‘ukhupi llank’aqkunata respetasunman’ chaymanta (1 Tes. 5:12). Chaykunan yanapawasun Enemigonchispa contranpi qaqata sayananchispaq, yuyarichiwasuntaqmi payllawan maqanakunanchis kasqanta (Efe. 6:12).

“Diospa ovejankunata allintapuni michiychis”

4, 5. ¿Imaynatan umallikuna Diospa ovejankunata qhawarinanku? Huk rikch’anachiyta willay.

⁴ Pedron umallikunata yuyaycharqan cristianokunata sumaqta qhawarinankupaq (leey 1 Pedro 5:1, 2). Chaypi nisqan hina, iñiq t’aqapi allin tusa hinaña Pedro karqan chaypas, manan hatunchakuspachu umallikunata kamachirqan, aswanmi paykuna hinalla karqan (Gál. 2:9, MR). Pedro hinan kunanpas Umalliq T’aqa llapa umallikunata nin Diospa ovejankunata allinta michinankupaq.

⁵ Pedroqa nirqanmi “Diospa ovejankunata” michishasqankuta. Paykunaqa entiendenankun karqan ovejakuna Jehová Diospa Jesucristopa ima kasqanta, imayna michisqankumantataq Diosman cuentata qonanku karqan. Entiendenapaq kaywan rikch’anachisun. Huk amigonchismi viajanqa, valekuwanchistaqmi  wawankunata qhawapunanchispaq. Kallpachakunchischá chay wawakunata allinta cuidanapaq mikhuchinapaqpas. Mayqenninkupas onqorunman chayqa usqhayllachá doctorman apasunman. Umallikunapas yachankun ‘Diospa iglesianta michiq [kasqankuta], chay iglesianta Jesucristoq yawarninwan rantikusqantapas’ (Hech. 20:28). Arí, yuyashallankun sapanka oveja Jesucristoq yawarninwan rantisqa kasqanta. Diosman cuenta qonankuta yachaspan allinta mikhuchinku cuidankupas.

6. ¿Imakunapin tarikurqanku ñawpaq tiempopi michiqkuna?

⁶ Umallikunaqa ñawpa tiempopi oveja michiqkunamanmi rikch’akunku. Paykunaqa ‘p’unchaypi ruphay kankasqanmi, tutataq chiriq atisqan’ michiqku (Gén. 31:40). Mayninqa wañuypi imaraqmi rikukuqku. Davidmi wayna kashaspa chhaynapi tarikurqan, payqa leonmanta ukumarimanta iman ovejankunata kacharichirqan. Pay kikinmi nirqan: “Qhaqllinmanta hap’ispa[n] sipinaykama p’anaq kani”, nispa (1 Sam. 17:34, 35). Chaypin rikuchirqan mana manchakuq kasqanta. Arí, ovejankuna peligropi kaqtinqa manan imatapas manchakuqchu.

7. ¿Imatan umallikuna ruwanku ovejata Saqra hap’iykuqtin?

⁷ Umallikunapas chhaynatan iñiqkunata Saqramanta cuidashanku. Huk ovejata león hina Saqra hap’iykuqtinqa David hinan mana manchakuspa siminmanta qechunku. Saqraq toqllanman urmaykunanpaq kashaq cristianotapas paywan rimaspan chayta reparachinku (leey Judas 22, 23). Balsamowanpas hawiykunkuman hinan k’irisqakunatapas Diospa Siminwan sumaqta hampiykunku. Ichaqa tukuytapas Jehová Diospa yanapayninwanmi ruwanku.

8. ¿Maymanmi umallikuna iñiqkunata pusanku? ¿Imaynatan chayta ruwanku?

⁸ Imaynan michiqkuna ovejakunata unuman sumaq q’achukunaman ima apanku hinatan umalliqkunapas iñiqkunawan ruwanku. ¿Imaynatan chayta ruwanku? Huñunakuyman  hamunankupaq kallpachaspa, chaypi ‘tiempollanpi [...] mikhunata’ chaskikuspa iñiyninkupi allin kanankupaq (Mat. 24:45). Tiemponkutan t’aqanku iñiyninkupi onqosqakunata yanapanankupaq pacienciawantaqmi yanapanku espiritualpi mikhusqa kanankupaq. ¿Diospa llaqtanman kutimpuyta munaqkunatari? Manan manchachinkuchu, aswanmi sumaq sonqowan yanapanku Diospa kamachikusqanta kasukunankupaq.

9, 10. ¿Imaynatan iñiyninkupi onqosqa cristianokunata umallikuna yanapanan?

⁹ Onqosqa kashaspa, ¿imayna doctortan munanchis? ¿Hukta atiendenanrayku yanqa-yanqata willaruspa usqhaylla medicamentokuna qoqta? ¿Icha ima onqoyniyoqchus kasqanchista allinta willawaspanchis imayna hampichikunanchista willaq doctortachu? Chhayna doctortachá munasunman.

¹⁰ Chay rikch’anachiymi umallikunata yanapan imaynatachus iñiyninkupi onqosqa cristianokuna yanapanankuta. Allinta uyarispan Diospa ‘sutinpi aceitewan paykunata hawiykunanku’ (leey Santiago 5:14, 15). Chhaynapin Diospa Siminpi yuyaychaykuna Galaadmanta hampi hina paykunapaq kanqa (Jer. 8:22; Eze. 34:16). Bibliapi yachachikuykunata kasukuspan yapamanta Diosta servinqaku. ¡May allinpunin onqosqa cristianokunata umallikunaq hampiykusqan paykunawan kuska mañakusqankupas!

“Ama kamachisqa hinachu, aswanpas sumaq munakuywan”

11. ¿Iman umallikunata tanqarin tukuy sonqowan Diospa ovejankunata michinankupaq?

¹¹ Chay qhepamanmi Pedro umallikunata nirqan imachus ruwanankuta mana ruwanankutapas. Kallpacharqanmi “ama kamachisqa hinachu, aswanpas sumaq munakuywan” llank’anankupaq. ¿Iman umallikunata yanapanman tukuy sonqowan iñiqmasinkuta yanapanankupaq? Munakuymi, Pedrotapas Señorta munakusqanmi kallpacharqan Jesuspa ovejankunata michinanpaq mikhuchinanpaqpas (Juan 21:15-17). Arí, munakuymi umallikunata kallpachan amaña “paykuna kikinkupaq kawsanankupaq, aswanpas paykunarayku wañuspa kawsarimpuq Cristopaqña” (2 Cor. 5:14, 15). Cristota, Diosta, iñiqmasinkutapas munakusqankun umallikunata tanqarin kaqninkuwan, tiemponkuwan, kallpankuwan ima llank’anankupaq (Mat. 22:37-39). Chaymi tukuy sonqowan llank’anku manataq kamachisqa hinachu.

12. ¿Imaynatan Pablo iñiqmasinkunata qhawarirqan?

¹² Imaynan Pablopas Jesuspas Diospa ovejankunata cuidarqan chhaynatan umallikunapas kallpachakunku iñiqkunata cuidanankupaq (1 Cor. 11:1). Pablopas llank’aqmasinkunapas anchatan Tesalónica llaqtapi iñiqmasinkuta munakuqku, chaymi ‘mana Diosmanta allin willakuykunallatachu willayta munarqanku, aswanpas kikin kawsayninkutawanmi qoyta munarqanku’. ‘Imaynan mamaqa ñuñuq wawanta sumaqta uywan hinatan’ sumaqta rikurqanku (1 Tes. 2:7, 8). Pabloqa yacharqanmi huk mama wawanrayku imaymana ruwasqanta, wawanta ñuñunanrayku (ñuñuchinanpaq) kuska tutakuna hatarisqantapas.

13. ¿Ima ruwaytan mana saqenankuchu umallikuna?

¹³ Ichaqa manan familiankutapas qonqanankuchu (1 Tim. 5:8). Paykunaqa familiankuwan kananku tiempopin Diospa llaqtanpi llank’anku. Chaymi familiankutapas iñiqkunatapas yanapananpaqqa Diosta Yupaychana Ch’isipi huk iñiqmasikunata invitanman. Chaytan Japonmanta Masanao umalliq familianwan ruwanku. Payqa unayñan soltero cristianokunata, mana iñiq qosayoq, taytayoq iñiqmasikunatapas invitan familianwan kuska estudianankupaq. Chay cristianokunamanta wakinmi kunanqa umalliña kapunku Masanao hinataqmi paykunapas  hukkunata wasinkuman invitanku estudianankupaq.

“Ama qolqeraykullachu, aswanpas tukuy sonqo”

14, 15. ¿Imaraykun umallikuna cuidakunanku ‘qolqeraykulla’ imatapas ruwaymanta? ¿Imaynatan Pablota qatikunkuman?

¹⁴ Pedroqa nillarqantaqmi umallikunata “ama qolqeraykullachu, aswanpas tukuy sonqo” Diospa ovejankunata michinankupaq. Askhataña llank’anku chaypas manan qolqepaqchu chaykunata ruwanku. Chaywanpas Pedroqa nirqanmi ‘qolqeraykulla’ imatapas ruwaymanta cuidakunankupaq. Chaytaqa manan yanqallachu nirqan, chaytan rikunchis “Hatun Babilonia” nisqapi umallikunaq ruwasqankupi, paykunaqa imaymana kaqniyoqmi kanku religionninkupi runakunataq yarqaymanta wañushankuña (Apo. 18:2, 3). Diospa llaqtanpi umallikunaqa manapunin chhaynaqa kanankuchu.

¹⁵ Umallikunaqa Pablotan qatikunku. Payqa apóstol kayninpin Tesalónica llaqtapi iñiqkunata ‘gastachinman’ karqan. Ichaqa ‘tuta-p’unchay makinwan llank’aspan’ ‘mana piqpa mikhunantapas yanqallaqa mikhurqanchu’ (2 Tes. 3:8). Kay tiempopipas askha umalliqkunan hinallataq iñiq t’aqakunata watukuqkunapas allin ejemplo kanku. Sumaqtaña iñiqmasikuna chaskiykunku chaypas manan pitapas ‘gastachinkuchu’ (1 Tes. 2:9).

16. ¿Imaynatan umalliqkuna “tukuy sonqo” llank’anku?

¹⁶ Umallikunaqa ‘tukuy sonqon’ llank’anku. Arí, tukuy sonqo llank’aspan kallpachakunku iñiqmasinkuta yanapanankupaq. Ichaqa cuidakunkun tanqashaspalla imatapas ruwachinankumanta nitaqmi hukpa ruwasqanwan tupanachispa aswan allin kanankupaqchu kallpachanku (Gál. 6:4). Paykunaqa yachankun sapanka cristianokuna hukniray kasqankuta kallpachankutaqmi Diosta kusisqa servinankupaq.

“Ama [...] munaychakuq hinachu, aswanpas paykunapaq yachaqakunankupaq hina”

17, 18. a) ¿Imaraykun apostolkunapaq sasa karqan huch’uyyaykukuq kay? b) ¿Imatan yachanchis paykunaq pantasqanmanta?

¹⁷ Umallikunaqa yuyarinankun sapanka cristianopas Diospa ovejan kasqanta. Chaymi mana hatunchakuq hinachu ‘Diospa qosqankunata’ tratananku (leey 1 Pedro 5:3 *). Jesuspa tiemponpi kamachikuqkunaqa hatun kayta allin qhawarisqa kaytan munaqku. Yaqapaschá chayta qhawarispa apostolkunapas ñawpaqpiqa allin qhawarisqa kayta munarqanku (leey Marcos 10:42-45).

¹⁸ Diospa llaqtanpi ‘umalli kaytapuni munaqqa’ kaytan tapukunan: “¿Imaraykun umalli kayta munani?” nispa (1 Tim. 3:1). Umallikunapas tapukunankun: “¿Apostolkuna hinachu ñoqapas allin qhawarisqa kayta munashani?” nispa. Paykunaqa sasatan chay munapayayta sonqonkumanta horqorqanku, chaymi umallikunaqa chaykunamanta cuidakunanku.

19. ¿Imatan umallikuna yuyarinanku ovejakuna cuidasqankupi?

¹⁹ Mayninpin ichaqa umalliqkuna tukuy atiywan imatapas ruwananku. Chayqa kanman “yarqasqa lobokuna” iñiqkunata urmachiyta munaqtinmi (Hech. 20:28-30). Hinaspapas Titoman Pabloq yuyaychasqanta kasukuspan ‘tukuy atiywan kallpachanku anyankupas’ (Tito 2:15). Chhaynataña imapi huchallikuqtapas anyankuman chaypas respetowanmi rimapayanku. ¿Imarayku? K’arakta phiñakunkuman chayqa manan sonqonman chayankumanchu nitaq mana allin ruwasqankuta saqenkumanchu.

20. ¿Imapin umallikunata yanapan Jesusmanta yachasqanku?

²⁰ Allin ejemplo kaspan astawanqa hukkunata  yanapankuman, chaytan Jesusmanta yachanchis. Paymanta astawan yachaspan umallikuna payta qatikunku pay hinataqmi hukkunata sumaqta qhawarinku (Juan 13:12-15). Qatikuqninkunata sumaqta yachachisqanta qhawarispan sonqonchis llanllarin. Jesuspa huch’uyyaykukusqanmi sonqonkuman chayarqan, chaymi paykunapas huch’uyyaykukuspa ‘hukkunata aswan allinpaq hap’irqanku’ (Fili. 2:3). Kay tiempopi umallikunapas Jesuspa ejemplonta qatikuspan ‘yachaqakunapaq hina’ kanku.

21. ¿Ima suyakuymi kashan umallikunapaq?

²¹ Chaykunata nisqan qhepamanmi Pedroqa imachus chaskinankumanta rimarqan (leey 1 Pedro 5:4). Hanaq pachapaq akllasqa umallikunan Cristowan kuska ‘sumaq k’anchashaq coronata chaskinqaku’. ‘Wak ovejakunamanta’ kaq umallikunataq ‘michiqkunaq Qollananpa’ umallisqan kay Hallp’api runakunata michinqaku (Juan 10:16). Qatimuq estudiopin astawan yachasun imaynatas sapankanchis umallikunata yanapasunman chayta.

[Uranpi willakuy]

Yuyarisun

• ¿Imaraykun Pedro umallikunata nirqan Diospa ovejankunata allinta michinankupaq?

• ¿Imaynatan umallikuna espiritualpi onqosqa cristianokunata qhawarinanku?

• ¿Imaraykun umallikuna tukuy sonqowan Diospa ovejankunata michinku?

[Tapuykuna]

[21 paginapi dibujo]

Ñawpa tiempopi michiqkuna hinan kunanpas umallikuna ovejakunata cuidashanku