Natán Cheqaq yupaychayta defienderqan

Manan facilchu atiyniyoq runata mana allin ruwasqanta reparachispa cambiachiyqa. Chhayna runata, ¿uyanpi niwaqchu mana allin ruwasqanta, allinpi qhepananrayku runa wañuchiq kasqanta yachashaspa?

Rey Davidmi Betsabewan wasanchay huchaman urmaspa onqoqta rikhurichirqan. Huchanta pakananpaqmi kamachirqan qosanta wañuchinankupaq, qhepamantaq Betsabewan casarakapurqan. Askha killakunan kawsarqan manapas imapas pasanmanchu hina, imachus ruwanankunatapas kaqllata ruwaspa. Diosmi ichaqa mana hinallatachu huchanta qhawarqan, chaymi profeta Natanta kacharqan anyamunanpaq.

Natanpa ruwananpi churakuwaq chayqa, entiendewaqmi chayta hunt’ay sasa kasqanta. Ichaqa Diosman hunt’aq sonqo kasqan kamachikuyninkunatapas kasukusqanmi paytaqa kallpacharqan Davidta reparachimunanpaq. ¿Imaynatan chayta ruwarqan? ¿Imaynatan entiendechirqan huchanmanta pesapakunanta?

ALLIN YUYAYWAN YACHACHIQ

Ama hina kaspa leey 2 Samuel 12:1-25 textota. Natanpas kawaq hina yuyaykuy, Davidmanmi kayta willashanki: “Huk llaqtapin iskay runakuna karqan, huknin wakcha, huknintaq qhapaq. Qhapaq runaqqa askhan ovejanpas wakanpas karqan. Wakcha runaqmi ichaqa huk rantikusqan oveja chitallan kapurqan. Chaytan munasqata uywakurqan, wawankunatawan kuska wiñachirqan, mikhunanmanta mikhuchispa, jarronmanta ukyachispa, qhasqonpi puñuchispa. Munakurqanmi ususinta hina. Huk p’unchaymi qhapaq runaman qorpachakuq chayarqan, hinan  qhapaq runaqa ovejankunamanta wakankunamanta mana nak’ayta munarqanchu, aswanpas wakcha runaq ovejachanta suwarqospa nak’arqan qorpachakuqman haywarinanpaq”, nispa (2 Sam. 12:1-4).

Davidqa oveja michiqmi karqan, chaypaschá willasqanta cheqaqpaq creerqan. Bibliata t’aqwiq runan nin: “Yaqapaschá Natanqa Davidman sapa kutilla riq mana kaqniyoqkunata defiendenanpaq, hinaspa Davidqa creerqan chay kutipipas chayllamantaq Natán rinanpaq”, nispa. Chhaynaña kanman karqan chaypas, Natanqa Diospaq hunt’aq kasqantan valorwan rikuchirqan. Natanpa willasqanta uyarispan David phiñakuspa nirqan: “¡Señor Diospa sutinpin jurani chay hina ruwaq runaqa wañuchisqan kanan!”, nispa. Hinan Natanqa mana manchakuspa nirqan: “¡Qanmi kanki chay runaqa!”, nispa (2 Sam. 12:5-7).

Yuyaykuy imarayku Natán chhaynata Davidpa huchallikusqanta reparachisqanpi. Manan facilchu amigonpa ruwasqanta mana sayapakuspalla sut’inchayqa. Chaymantapas runakunaqa imatapas mana allinta ruwaspaqa justificakunchismi. Natanmi ichaqa willasqanwan Davidta cuentata qochirqan ruwasqanta mana reparakuspalla huchachakunanpaq. Davidqa sut’itan repararqan qhapaq runaq ruwasqan llakikunapaq kasqanta. David kutichillaqtinmi Natanqa willarqan qhapaq runaqa Davidllataq kasqanta. Chhaynapin reyqa reparakurqan ruwasqan hucha kasqanta, chaytaqmi prepararqan anyayta chaskikunanpaq. Repararqanmi ruwasqanwan Jehová Dios pisichasqanta, hinan chaskikullarqan huchan hawa imaymana anyasqanta (2 Sam. 12:9-14; Sal. 51, qallariyninpi rimaykuna).

¿Imatan chaymanta yachanchis? Bibliamanta estudianteman yachachispaqa pay kikillanmi cuentata qokunan imamantapas. Natanqa respetarqanmi Davidta, chaymi allin yuyaywan rimapayarqan. Yacharqanmi rey Davidqa sonqonpi chanin kayta valorasqanta, chaymi rikch’anachiy willasqanwanqa chanin kayninman hina ruwananpaq kallpacharqan. Ñoqanchispas allin sonqoyoq runakunapiqa chanin kaqta munakusqankuman hinan entiendechinanchis Diospa kamachikuyninkunata. Ichaqa manan aswan Dios sonqo hina otaq aswan allin kawsayniyoq hina qhawarikuspachu chaytaqa ruwana, Bibliapin tarikun imachus allin otaq mana allin kaqqa, manan yuyayninchispichu.

Diospaq hunt’aq sonqo kasqanmi Natantaqa kallpacharqan atiyniyoq reyta huchachananpaqqa (2 Sam. 12:1). Pay hina kaymi ñoqanchistapas kallpachawasun Diospa chanin kamachikuyninkunata defiendenapaq.

CHEQAQ YUPAYCHAYTA DEFIENDEN

Reparasqanchis hina, chay iskaynin runakunaqa allin amigontinmi karqanku, Davidqa Natán sutitan huknin wawanman churarqan (1 Cró. 3:1, 5). Natanmanta Biblia chayllaraq rimaqtinqa Davidwan kuskan kashan. Iskayninkupas Diostan munakurqanku. Rey Davidqa Natanpin confiarqan, chaymi willarqan Diospaq huk templo sayarichiy munasqanta, nirqanmi: “Qhawariy, ñoqaqa cedro kurku llaqllasqa wasipin tiyani Diospa arcantaq ichaqa karpallapi kashan”, nispa. Hinan Natanqa kutichirqan: “Qanwanmi Señor Diosqa kashan, ima munasqaykita ruway”, nispa (2 Sam. 7:2, 3).

Diospaq hunt’aq kaspan Natanqa tukuy kallpanwan yanapakurqan, Diosta yupaychanankupaq templo sayarichiyta David yuyaykuqtin. Ichaqa yaqachus hina chay kutipiqa yuyaykusqallanta Davidman nirqan manataq Diospa nisqantachu. Chay tutan Dios kamachirqan Davidman hukniray willakuyta apananpaq: Manan Davidchu chay templotaqa sayarichinan karqan aswanpas huknin wawanmi. Chaymantapas Diospa kamachisqanmi Natanqa willallarqantaq Davidwan huk contratota Dios ruwasqanta; ‘kamachikuyninmi wiñaypaq takyanan karqan’ (2 Sam. 7:4-16).

Rikusqanchis hina, templo sayarichiymanta Natanpa yuyaykusqanqa, manan Diospa munayninman hinachu kasharqan. Chaywanpas k’umuykukuq kaspan Diospa munaynin hunt’akunanpaq mana quejakuspalla yanapakurqan. Sichus hayk’aqllapas Dios mana allin ruwasqanchista reparachiwasunman chayqa, allinmi  kanman Natanpa ejemplonta qatikuy. Qhepamanpas Diospa allin qhawarisqallanmi kasharqan chaytan yachanchis profeta llank’ayninta mana saqesqanwan. Chaymantapas yaqachus Diosqa ‘profeta Gadtawan’ yuyaycharqan templopi 4.000 tocaqkunata David churaqtin allichaypi (1 Cró. 23:1-5; 2 Cró. 29:25).

KAMACHIKUQTA DEFIENDEN

Natanqa yacharqanmi qhepa kaq reyqa Salomón kananta. Chayraykun David wañupunanpaqña kashaqtin Adonías kamachikuq kayta munaqtin hark’arqan. Ichaqa hunt’aq kaspan munayllata ruwarqan. Ñawpaqtaqa Betsabetan nirqan Salomón wawanman rey kananpaq jurasqanta yuyarichinanpaq. Chaymantataq pay kikin reyman rirqan Adoniastachus paypa rantinpi reyta churasqanta tapumunanpaq. Chay sasachakuyta reparaspan Davidqa Natanta huk serviqninkunatawan kamachirqan Salomonta hawispa reyta churanankupaq, chhaynapin mana Adoniaspa munasqan hinachu karqan (1 Rey. 1:5-53).

MANA ALABAKUSPA QELQAQ

Natanwan Gadwanmi qelqarqanku 1 Samuel 25-31 capitulokunata, 2 Samuel 1-24 librotapas. Diospa yuyaychasqan chay qelqasqa librokunamantan Biblia nin: “Rey Davidpa ruwasqankunaqa qallariymanta p’uchukaykama qelqasqan kashan profeta Samuelpa Willakuynin Qelqapi, profeta Natanpa Willakuynin Qelqapi, profeta Gadpa Willakuynin Qelqapiwan”, nispa (1 Cró. 29:29). Chaymantapas Natanmi qelqarqan “Salomonmanta” rimaq huknin willakuyta (2 Cró. 9:29). Chaywanmi yachanchis David wañupusqan qhepamanqa reypa palacionpi servishallasqanta.

Profeta Natanmanta yachasqanchistaqa yaqapaschá pay kikin qelqarqan. Ichaqa wakin willakuykunata mana qelqasqanqa sut’in kashan. Chaypin rikuchin mana hatunchasqa kaytachu maskhasqanta. Bibliamanta huk qelqaq nisqan hina, Diospa Siminpiqa “manan tarikunchu may llaqtamanta kasqanta”. Manataqmi yachanchischu imatapas kawsayninmantaqa.

DIOSPAQ HUNT’AQ SONQO KASQANMI KALLPACHARQAN

Bibliapi Natanmanta pisillata willasqanpin yachanchis k’umuykukuq kasqanta, ichaqa Diospa kamachikuyninkunatan valorwan defienderqan, chhaynapin hatun llank’aykunata Dios qorqan. Allinmi kanman Natan Diospaq hunt’aq sonqo kasqanpi, kamachikuyninkunata valorasqanpiwan yuyaymanayqa, hinaspa qatikunapaq kallpachakuyqa.

Ñoqanchisqa manaña wasanchay huchaman urmaq ima reytapas anyasunchu otaq kamachikuq contra sayariqta hark’asunchu chaypas, Diospa yanapayninwanqa hunt’aq sonqon kasun, atisuntaqmi ch’uya kamachikuyninkuna kasukuyta. Chaymantapas mana manchakuspan cheqaq kaqta yachachisunman defiendesunmanpas, ichaqa allin yuyaywan ruwaspa.

[25 paginapi dibujo]

Natán Davidpa reinonta defienderqan Betsabeta allin yuyaywan sumaqllata rimapayaspa