Leeqkunaq tapukusqan

Pornografía qhaway vicioman urmaq cristiano, ¿qarqosqa kanmanchu Diospa llaqtanmanta?

▪ Arí, qarqochikunmanmi. Chayraykun manapuni qhawanachu ima clase pornografiatapas, chaykunan lloqsimunman librokunapi, fotokunapi, peliculakunapi videokunapi otaq Internetpipas.

Pornografiaqa tukuyneqpin kashan. Internetpi kasqanraykun lliw runaq qhawananpaq hina kashan, huk onqoy hinan kuraktapas huch’uytapas hap’ishan. Mayninpiqa Internetpi kashaqtinkun qonqaylla pornografía rikhurimurqan. Wakinmi ichaqa yuyaypi qhawanku otaq leenku, yaqapaschá wasinkupi, llank’anankupi otaq maypipas mana rikuchikuq hinalla. Chaykuna qhawayqa cristianokunataqa afectawasunmanmi, ¿imarayku?

Jesusmi huk razonta willarqan, nirqanmi: “Pipas huk warmita munapakuspa qhawaqqa ñan sonqonpi chay warmiwan wasanchay huchata ruwanña”, nispa (Mat. 5:28). Casado kawsaypi warmi-qhari puñuyqa manan huchachu, aswanpas paykunapaq kusikuy tariymi (Pro. 5:15-19; 1 Cor. 7:2-5). Pornografian ichaqa qhelli hucha ruwaykunata rikuchin, chaykunan Jesuspa huchachasqan qhelli piensaykunata paqarichin. Sut’i rimaypiqa, pipas pornografiata leen otaq qhawan chayqa Diospa kay kamachisqantan p’akin: “Chay hinaqa, qankuna kay pachapi lliw millay ruwaykunamanta t’aqakuychis [‘cuerpoykichispa miembronkunata wañuchiychis’, NM], ama qhelli huchapi puriychischu, ama millay map’ata ruwaychischu, ama cuerpoykichispa munasqanta ruwaychischu, ama mana allinta yuyaykuychischu, ama munapayaychischu, munapayayqa ídolo yupaychay hinan” (Col. 3:5).

 Sichus huk cristiano huk otaq iskay kutipi pornografiata qhawarqan chayqa, Asaf hinan huk peligropi tarikushanman. Paymi nirqan: “Ñoqan ichaqa yaqa urmaykurqani, yaqallan llusk’aykurqani”, nispa. Sichus qhawarqan q’alalla warmikunata, qharikunata otaq qhelli hucha ruwaqta chayqa, manan conciencian thakchu kanqa, nitaqmi Dioswanpas allinpichu kanqa. Aswanpas Asaf hinan sientekunqa, paymi nirqan: “P’unchay-ch’isiyaqmi muchuchiwarqanki, sapa paqartaq hasut’iwarqanki”, nispa (Sal. 73:2, 14).

Huk cristiano chay huchaman urmarqan chayqa, entiendenanmi espiritualpi yanapay necesitasqanta. Biblian willan chay runata yanapay atikusqanta, ninmi: ‘Pitapas ima huchapipas qonqaylla hap’iwaqchis chayqa, santo espirituq pusasqankuna, payta llamp’u sonqo-kaywan sayarichiychis, ichaqa sapankapas pay kikinta allinta qhawakuspa, paqtan paypas wateqasqallataq kanman’, nispa (Gál. 6:1). Arí, huk otaq iskay umallikunan yanapankuman, paywan kuskataq mañakunkuman Jehová Dios ‘qhaliyachinanpi’, ‘pampachananpiwan’ iñispa (Sant. 5:13-15). Pornografía qhawayta saqenankupaq yanapayta maskhaqkunaqa Asaf hinan sientekunku, nirqanmi: “Aswan allinqa Diospa qayllanpi kayniymi”, nispa (Sal. 73:28).

Apóstol Pablon ichaqa willarqan wakinqa “millaykaymanta [otaq map’a kaqmanta], qhelli huchapi puriymanta, viciokunapi [mana p’enqarikuspa ruwaymantapas, NM]” mana pesapakusqankuta * (2 Cor. 12:21). Simikunamanta yachaq Marvin R. Vincent runaq willasqanman hina, Griego rimaymanta t’ikrakuq kay textopi “map’a” nisqa simiqa, qhelli kaqmantapas aswan qhelli ninanmi. Llakikunapaqmi, wakin clase pornografiaqa sinchi qhellin. Manan q’alalla runakunallatachu nitaq qhelli huchata ruwashallaqtachu rikuchin. Rikuchillantaqmi warmipura, qharipura, uywakunawan, wawakunawan qhelli hucha ruwashaqta, hinallataq grupopi, warmikunata maqaspa, askhamanta violasqankuta, maltratanakuspa ruwasqanku qhelli ruwaykunapas. Pabloq nisqan hina, wakinqa ‘tutayasqa yuyayniyoq kaspankun’ ‘mana p’enqarikuspa tukuy imaymana sinchi millaykunata ruwarqanku, lliw mana chanin kaqkunatapas mana amikuspa [“tukuy ima map’a kaqtapas wañurikusparaq ruwarqanku”, NM]’ (Efe. 4:18, 19).

Gálatas 5:19 textopin Pablo rimallarqantaq ‘qhelli hucha’ otaq map’a kaqmanta. Huk teólogo britanicon nin: “Kay textopi rimasqan simiqa runakunaq lliw millay munapayayninmantan rimashan”, nispa. Llapa cristianopas manan neganmanchu ñawpaqpi willakusqankunaqa ‘mana allin munapayaykuna’, qhelli, millakunapaq, p’enqakunapaq kasqanta. Gálatas 5:19-21 textopin Pablo sut’ita willarqan chay map’a kaqkunata “ruwaqkunaqa” mana Diospa Gobiernonman haykunankuta. Chhaynaqa, ¿iman sucedenman sichus huk cristiano unay tiempoña qhawashanman sinchi qhelli pornografiata chay? Sichus chay viciota mana saqenqachu nitaq pesapakunqachu chayqa qarqosqan kanqa, chhaynapi Diospa llaqtanpi ch’uya kawsaypas thak kawsaypas kashanallanpaq (1 Cor. 5:5, 11).

Wakinqa chhayna qhelli pornografiakunata qhawaspan umallikunaq yanapayninta maskharqanku, hinaspataq saqepurqanku, chayqa kusikunapaqmi. Sardis iñiq t’aqamanmi Jesús kayta willarqan: ‘Wañupushanña chay qhepaqkunata kallpachay. [...] Yuyariy chaskisqaykita uyarisqaykitawan, hinaspa kasukuspa kawsay, huchaykikunata saqepuspataq Diosman kutirikuy. Manachus rikch’anki chayqa [...] manan yachankichu ima horatachus qanman hamunayta’, nispa (Apo. 3:2, 3). Chhaynaqa, ‘nina’ hina pornografía qhawaymanta pesapakuspa ayqekuytaqa atikunmi (Jud. 22, 23).

Ichaqa, aswan allinqa chay qhelli kaqkunata ama qhawanapaq ñawpaqmantaraq decidisqa kaymi. Chhaynaqa, ¡karunchakusun ima clase pornografía qhawaymantapas!

[Uranpi willakuy]

[30 paginapi willakuy]

Huchaman urmaq cristianoqa entiendenanmi espiritualpi yanapay necesitasqanta