Leeqkunaq tapukusqan
Leeqkunaq tapukusqan
¿Hayk’aqmi Gran Bretaña, Estados Unidos nacionkuna Bibliaq nisqan qanchis kaq hatun nacionman tukupurqanku?
▪ Nabucodonosorpa mosqoyninpi rikhuriq hatunkaray runaqa, manan llapa hatun nacionkunawanchu tupan (Dan. 2:31-45). Aswanpas, Danielpa tiemponmantapacha phisqa hatun nacionkunallawanmi, chaykunan Diospa llaqtan contra hatarirqanku.
Hatunkaray runa imachus kasqanta Daniel sut’inchaspaqa, manan willanchu Gran Bretaña, Estados Unidos nacionkuna (hukllachasqa hatun nación) Roma nacionta atipananta, aswanpas willanmi chay nación ukhumanta lloqsimunanta. Danielmi rikurqan Hatunkaray runaq chakan fierromanta kasqanta; chakinpas, chaki dedonkunapas fierromantan karqan ichaqa t’uruwan chaqrusqa. * Chaymi rikuchin hukllachasqa hatun nacionqa hatunkaray runaq fierro chakanmanta lloqsimunanta. ¿Imaynatan chayta sut’inchasunman? Gran Bretañaqa Roma nacionpa atiyninpin karqan, ichaqa 1700 watakuna tukuytan allin qhawarisqa kayta qallarirqan. Estados Unidos nacionpas qhepamanmi allin qhawarisqallataq kapurqan. Chaywanpas, manaraqmi qanchis kaq hatun nacionraqchu karqanku. ¿Imarayku? Iskaynin nacionkunaq hukllachasqa kasqankuqa manaraqmi sut’itachu rikukurqan. Chaypaqqa primera guerra mundial kanantaraqmi suyakurqan.
Chay watakunapin hanaq pacha Reinoq ‘wawankunaqa’ allinta llank’asharqanku, astawanqa Estados Unidos nacionpi, paykunan chayta apariqku Brooklyn (Nueva York) llaqtamantapacha (Mat. 13:36-43). Chaymantapas, akllasqa cristianokunaqa Gran Bretañaq atiyninpi kaq nacionkunapin predicasharqanku. Gran Bretaña, Estados Unidos nacionkunaqa, primera guerra mundialpin hukllachanakurqanku contrankupi kaq kamachikuqkunata atipanankupaq. Chaymantapas, Gran Bretaña, Estados Unidospas guerra kasqanraykun nacionninkuta aswan allinpaq qhawarirqanku, chayraykun ‘warmiq’ mirayninpi kaqkunata cheqnikuyta qallarirqanku, qelqakuna rakikunantan hark’arqanku, predicacionpi umalliqkunatapas carcelpin wisq’arqanku (Apo. 12:17).
Chay hinaqa, Bibliaq profetizasqan qanchis kaq hatun nacionqa, manan rikhurimurqan Gran Bretaña 1700 watakuna tukuypi allin reqsisqa kaqtinchu, aswanpas Señorpa p’unchaynin qallariqtinmi. *
[Uranpi willakuykuna]
^ párr. 4 Fierroman chaqrukuq t’uruqa tupanachikun, hukllachasqa hatun nacionpa atiynin ukhupi runakunawanmi. Hukllachasqa hatun nación rikhurisqanmantapachan chay runakuna hark’an llapa atiynin rikuchinanta.
^ párr. 6 Kaypi willasqanmi allichashan, Las profecías de Daniel libropi; 57 paginapi, 24 parrafopi willakuyta, hinallataq 56, 139 paginakunapi kaq dibujokunatapas.
[19 paginapi foto]
Predicacionta umalliq 8 cristianokunan 1918 watapi junio killapi carcelpi wisq’asqa karqanku
