¿Pitaq “allin yuyayniyoq hunt’aq kamachiri”?
“¿Pipunitaq kanman allin yuyayniyoq hunt’aq kamachiri? Paytan Patronninqa churanqa wasinpi kamachinkunata qhawarinanpaq” (MAT. 24:45, NM)
1, 2. ¿Pikunawanmi kunan Jesús espiritual mikhunata qowashanchis? ¿Imaraykun yachananchis pin chay hunt’aq kamachi kasqanta?
HUK cristianan principal oficinanchisman huk cartata apachimurqan, chaypin nirqan: “Turaykuna, necesitasqayman hinapuni tiempollanpi sumaq qelqakuna chayamuwasqantan manaña yupaytapas atipuniñachu”, nispa. ¿Yaqachu qanpas chay hinata yuyaykurqanki? Yaqa llapanchismi chay hinata yuyaykunchis. Ichaqa manan admirakunanchischu chaymantaqa.
2 Jesusqa iñiq t’aqata Umalliq hinapunin prometesqanman hina kamachinkunaman espiritual mikhunata qoshan, ¿imaynapin chayta yachanchis? Necesitasqanchisman hina chay mikhukunata chaskisqanchispin. Ichaqa, ¿pikunawanmi chay mikhunata qowashanchis? Chayamunan tiempomanta rimasqanpin Jesusqa willarqan ‘allin yuyayniyoq hunt’aq kamachiwan’ wasinpi kamachikunaman ‘tiempollanpi mikhunata qonanpaq’ (leey Mateo 24:45-47 *). *[1] Paykunawanmi Jesusqa kay tukukuy tiempopi cheqaq kamachinkunaman mikhuchishan. Chaymi yachananchis pin chay hunt’aq kamachi kasqanta. Paykunamanta espiritual mikhuna chaskisqanchismi yanapawasun Dioswan allinpi kananchispaq (Mat. 4:4; Juan 17:3).
3. ¿Imatan ñawpaq qelqanchiskunapi willarqanchis hunt’aq kamachimanta?
3 Chhaynaqa, ¿imatan yachananchis allin yuyayniyoq hunt’aq kamachimanta? Ñawpaqqa qelqanchiskunapin willarqanchis, Jesús 33 wata Pentecostés fiestapi wasinpi kamachikunata qhawarinanpaq hunt’aq kamachi churasqanta. Hinaspapas yuyaykurqanchismi chay watamantapacha kay pachapi qhepaq llapa akllasqa cristianokuna hunt’aq kamachi kasqanta, paykunallataq wasipi kamachikuna kasqankutapas. Chaymantapas yuyaykurqanchismi Jesusqa 1919 watapi hunt’aq kamachita “tukuy kaqninkunata qhawananpaq” churasqanta otaq Diospa Gobiernonmanta predicanapaq kay pachapi tukuy imaymana kaqninkunata qhawananpaq. Ichaqa Diosmanta mañakuspa, hunt’aq kamachimanta willakuyta astawan t’aqwirispa, yuyaymanaspa iman yachakun mana chay hinachu kasqanta (Prov. 4:18). Chay willakuyta astawan t’aqwirisun, hinaspa qhawarisun imaynatan chay afectawanchis hanaq pachapaq otaq kay pachapaq suyakuyniyoqkunata.
¿HAYK’AQMI CHAY RIKCH’ANACHIY HUNT’AKUN?
4-6. ¿Imaraykun ninchis hunt’aq kamachimanta Jesuspa willasqan rikch’anachiy 1914 qhepamanña hunt’akusqanta?
4 Mateo 24 capitulopi huk textokunata t’aqwirispan reparanchis hunt’aq kamachimanta rikch’anachiy kay tukukuy tiempopi hunt’akusqanta, mana 33 wata Pentecostés fiestapichu. ¿Imaraykun chayta ninchis?
5 Chay rikch’anachiytan Jesús willarqan ‘kutimusqanña [griegopi parousía]’, “kay tiempopas p’uchukapunanpaqña” kashasqanmanta señalkunata willaspa (Mat. 24:3). Mateo 24:4-22 textokunapi willasqanqa iskaypin hunt’akun. Ñawpaqtaqa 33 watamanta 70 watakama sucedesqanpin hunt’akurqan, qhepatataq kay tiemponchispi hunt’akushan. ¿Iskaypichu hunt’akunan karqan hunt’aq kamachimanta rikch’anachiypas? Manan.
6 Mateo 24:29 textomanta wichaymanmi ichaqa willan kay tukukuy tiempopi imakunachus sucedenanmanta (leey Mateo 24:30, 42, 44). Manchay ñak’ariymanta rimaspan willarqan kay pachapi tiyaq runakuna ‘Runaq Churinta rikunankuta, hatun atiywan lliphlli-kaywan phuyupi hamushaqta’. Chay qhepamanmi tukukuy tiempopi kawsaqkunata anyarqan: “Manan yachankichischu ima horatachus Señorniykichispa kutimunanta”, “Runaq Churinqa hamunqa mana yachasqaykichis horatan, chayrayku qankunapas makilla kashaychis”, nispa. *[2] Chay tukukuy tiempopi imakunachus sucedenanmanta rimashaspan willarqan hunt’aq kamachimanta. Chaypin yachanchis hunt’aq kamachimanta rikch’anachiy tukukuy tiempo qallarisqan qhepamanña hunt’akusqanta, 1914 watamanta wichayman. ¿Imaynapin yachanchis chhaynapuni kasqanta?
7. ¿Ima tapukuymi karqan cosecha tiempo qallarisqan qhepaman? ¿Imaraykun chay tapukuy karqan?
7 Yuyaykuy Jesuspa kay tapukuyninpi: “¿Pipunitaq kanman allin yuyayniyoq hunt’aq kamachiri?”. Chay tiempopiqa manan pipas chaytaqa tapukunmanchu karqan. ¿Imarayku? Ñawpaq estudiopi yachasqanchis hina, chay tiempopiqa llapa apostolkunan milagrokunata ruwaqku, hukkunamanpas atiyta qoqku chayta ruwanankupaq, chaypin sut’ita rikukurqan paykunawan Dios kashasqanta (Hech. 5:12). Chaykunata rikushaspaqa manachá pipas tapukurqanchu: “¿Pitan Cristo churan ovejankunata pusarinanpaq?”, nispa. 1914 watamanta wichaymanmi ichaqa hukniray karqan. Chay watapin cosecha tiempo qallarirqan, chaypitaqmi trigomanta mana allin qorata t’aqakunan karqan (Mat. 13:36-43). Chaypin kay tapukuy karqan: “¿Imaynapin yachakunman pikuna trigoman rikch’akuq akllasqa cristianokuna kasqanta?”, nispa. ¿Imaraykun chay tapukuy karqan? Cosecha tiempo qallariqtinmi askha nirqanku: “Jesusta qatikuq cheqaq cristianokunan kayku”, nispa. Ichaqa hunt’aq kamachimanta rikch’anachiymi sut’incharqan espiritual mikhunawan allin saksaykusqa kaqkuna akllasqa cristianokuna kasqanta.
¿PITAQ ALLIN YUYAYNIYOQ HUNT’AQ KAMACHIRI?
8. ¿Imaraykun hunt’aq kamachi akllasqa cristianokunamanta kanan?
8 Hunt’aq kamachiqa hanaq pachapaq akllasqa cristianokunamantan kanan. ¿Imarayku? “Reyta serviq sacerdotekuna” kasqankurayku, hinaspapas paykunan churasqa karqanku ‘laqhayaqmanta sumaq k’anchayninman waqyaqninkuq [...] musphana ruwasqankunamanta willanankupaq’ (1 Ped. 2:9). Chaymi “reyta serviq sacerdotekuna” kasqankurayku iñiqmasinkuman Diospa Siminmanta yachachinankupaq hina kanku (Mal. 2:7; Apo. 12:17, Mosoq Rimanakuy).
9. ¿Imaynapin yachanchis mana llapa akllasqa cristianokunachu hunt’aq kamachi kasqankuta?
9 Chhaynaqa, ¿kay pachapi qhepaq llapa akllasqa cristianokunachu kanku hunt’aq kamachi? Manan. Manan llapallankuchu teqsimuyuntinpi kaq iñiqmasikunaman espiritual mikhunata qoypi yanapakushanku. Trigoman rikch’akuq akllasqa cristianokuna ukhupiqa yanapakuq qharikuna umallikuna iman kashanku. Paykunaqa wasin-wasinta predicaspa, iñiq t’aqakunapi iman yachachishanku, tukuy sonqowantaqmi kasukunku oficina central nisqamanta chaskisqanku kamachikuykunata. Ichaqa manan espiritual mikhuna ruwaypiqa yanapakunkuchu. Hinaspapas chay akllasqa cristianokuna ukhupin kashan huch’uyyaykukuq cristianakuna, manataqmi paykunaqa iñiq t’aqapi qharikunalla ruwanan kaqtapas ruwankumanchu (1 Cor. 11:3; 14:34).
10. ¿Pitaq allin yuyayniyoq hunt’aq kamachiri?
10 Chhaynaqa, ¿pipunitaq allin yuyayniyoq hunt’aq kamachiri? Kayta yuyarisun, Jesusqa kay pachapi kashaspan pisi runakunawan askhaman mikhuchirqan. Chay hinatan kunanpas chayamusqan tiempomantapacha huk huch’uy t’aqa akllasqa runakunawan espiritual mikhunata ruwachispa llapa kamachinkunaman qoshan, paykunan kanku allin yuyayniyoq hunt’aq kamachi. Tukukuy tiempopi kasqanchismantapachan chay hunt’aq kamachiqa oficina central nisqapi huk hinalla llank’ashanku. Paykunan kanku Jehová Diospa Testigonkunata Umalliq T’aqa. Chay hunt’aq kamachi t’aqapiqa manan huk iñiqllachu kashan, chaywanpas Jesuspa willasqan rikch’anachiypiqa hukllamantapas rimashanman hinatan nirqan ‘kamachi’ nispa. ¿Imatan chaywan yachanchis? Llapallanku huk hinalla llank’aqtinkun kanku allin yuyayniyoq hunt’aq kamachi. Chay hinapin huk hinalla imatapas decidinku.
¿PIKUNAN KANKU WASIPI KAMACHIKUNA?
11, 12. a) ¿Ima ruwaykunata ruwananpaqmi hunt’aq kamachi churasqa kanan karqan? b) ¿Hayk’aqmi Jesús allin yuyayniyoq hunt’aq kamachita churarqan wasinpi kamachikunata qhawananpaq? ¿Pikunatan akllarqan?
11 Jesuspa willasqan rikch’anachiypin hunt’aq kamachi iskay ruwaykunata ruwananpaq churasqa karqan. Ñawpaqtan patronqa churan wasinpi kamachikunata qhawananpaq, qhepamantaq tukuy kaqninta qhawananpaq. Ñawpaqpi yachasqanchis hina chay rikch’anachiyqa kay tukukuy tiempopin hunt’akun, chaymi chay iskay ruwaykunapaq churasqa kasqan 1914 watamanta wichayman hunt’akun, Jesús hanaq pachapi kamachikuyta qallarisqanmantapacha.
12 ¿Hayk’aqmi Jesús hunt’aq kamachita churarqan wasinpi kamachikunata qhawananpaq? Chayta yachanapaq, astawan yachasun 1914 watapi cosecha qallarisqan tiempomanta. Ñawpaqpi yachasqanchis hina, chay watapaqqa askha t’aqakunan nirqanku: “Cheqaq cristianokunan kayku”, nispa. ¿Mayqen t’aqamantan Jesús hunt’aq kamachita churanman? Chayta yachananpaqmi Jesusqa Taytanwan kuska espiritual yupaychana wasita qhawaq hamurqanku, chayqa aparikurqan 1914 watamanta 1919 wata qallariykaman (Mal. 3:1). *[3] Paykunaqa anchatan kusikurqanku qhawaq hamuqtinku, Biblia Estudiaq huch’uy t’aqa runakuna Diostapas Simin Qelqatapas tukuy sonqowan munakusqankuta rikuspa. Chaywanpas chay huch’uy t’aqa runakunaqa allinyanankuraqmi kasharqan, chaymi huch’uyyaykukuspa huk pisi tiempo hinalla ch’uyanchachikurqanku (Mal. 3:2-4). Paykunan karqanku rikch’anachiypi kaq trigo hinapuni. Chaymi 1919 watapi paykuna ukhumanta akllarqan allin wakichisqa akllasqa cristianokunata allin yuyayniyoq hunt’aq kamachi kanankupaq, chaypin churarqan wasinpi kamachikunata qhawananpaq.
13. ¿Pikunan kanku wasipi kamachikuna? ¿Imaraykun chayta ninchis?
13 Chhaynaqa, ¿pikunataq kanku wasipi kamachikuna? Espiritual mikhunata llapa chaskikuqkunan. Tukukuy tiempo qallarishaqtinqa llapa akllasqa cristianokunallan chay espiritual mikhunata chaskikurqanku. Qhepamanmi ichaqa wak ovejakunamanta ancha askha runakuna chay mikhunata chaskikullarqantaq, chay iskaynin t’aqataqmi kanku wasipi kamachikuna. Llapallankun kunan ‘ch’ulla t’aqa’ hinalla Cristota qatikushanku (Juan 10:16). Akllasqa cristianokunapas wak ovejakunapas, hunt’aq kamachi ‘tiempollanpi mikhuna’ qosqantan huk hinalla chaskikushanku. ¿Allin yuyayniyoq hunt’aq kamachimanta kaq iñiqmasikunari? Paykunapas necesitankun chay espiritual mikhunata, chaymi chay mikhunata sapankupi mikhuspanku wasipi kamachikuna kapullankutaq.
Hanaq pachapi otaq kay pachapi kawsaytaña suyakunchis chaypas, llapallanchismi tiempollanpi espiritual mikhunata necesitanchis, chaymi llapallanchis kanchis wasipi kamachikuna
14. a) ¿Ima hatun llank’aytan Jesús qorqan hunt’aq kamachiman? b) ¿Imanispan Jesús anyarqan hunt’aq kamachita? (Qhaway “Chay kamachi millay kanman chayqa...” nisqa recuadrota.)
14 Chay hunt’aq kamachimanmi Jesús huk hatun llank’anata qorqan. Ñawpa israelitakunaq tiemponpiqa, patronmi confianapaq hina kamachita otaq mayordomota churaq wasinpi llapa kaqninkunata qhawananpaq (Luc. 12:42). Chay hinatan Jesuspas allin yuyayniyoq hunt’aq kamachita churan kay pachapi llapa kaqninkunata qhawananpaq. Paykunaqa qhawarinku: gastokuna ruwakusqanta, imaymana rantikusqanta, predicacionta, hatun huñunakuykunata ima. Hinaspapas qhawarinkun qelqakuna ruwakusqanta, chaywan predicananchispaq, sapanchispi estudiananchispaq, huñunakuykunapi yachananchispaq ima. Tukuy chaykunata hunt’aq kamachi apachimusqantan wasipi kamachikuna necesitanchis.
TUKUY KAQNINKUNA QHAWANANPAQ CHURAN
15, 16. ¿Hayk’aqmi Jesús hunt’aq kamachita churanqa tukuy kaqninkunata qhawananpaq?
15 ¿Hayk’aqmi Jesús hunt’aq kamachita ‘churan tukuy kaqninkuna qhawaqta’? Jesusmi nirqan: “Chay kamachiqa kusisamiyoqmi patronnin kutimuspa chay hina ruwashaqta payta tariqtinqa. Cheqaqtan niykichis, paytan patronninqa churanqa tukuy kaqninkunata qhawananpaq”, nispa (Mat. 24:46, 47). Chaypi nisqan hina, Jesusqa kutimuspa otaq hamuspa hunt’aq kamachita “chhayna ruwashaqta” otaq espiritual mikhuna qoshaqta tarispañan churanan karqan tukuy kaqninkuna qhawaqta. Chhaynaqa manan kaq watapichu hunt’aq kamachiqa iskaynin ruwayta chaskinan karqan. ¿Imaynapin Jesús hunt’aq kamachita churan tukuy kaqninkuna qhawaqta? ¿Hayk’aqmi chay hunt’akun? Chaypaqqa iskaymantan yachananchis: ¿Hayk’aqmi chayamun? ¿Imakunan Jesuspa kaqninkuna?
16 ¿Hayk’aqmi Jesús hamunqa? Mateo 24 capituloq qallariyninpi textokunan kutichin. Kayta yuyarisun, chay textokunapi Jesuspa ‘hamunanmanta’ otaq ‘kutimunanmanta’ willaspaqa, tukukuy p’unchaypi Juez hina hamunantan willashan (Mat. 24:30, 42, 44). *[4] Chaypin yachanchis hunt’aq kamachimanta rikch’anachiypi Jesuspa hamunanmanta willasqanqa manchay ñak’ariypiña hunt’akunanta.
17. ¿Imakunan Jesuspa tukuy kaqninkuna?
17 ¿Imakunan Jesuspa ‘tukuy kaqninkuna’? Jesuspa kaqninkunaqa manan kay pachallapichu kashan kallantaqmi hanaq pachapipas. Jesusmi nirqan: “Diosmi qowarqan tukuy atiyta hanaq pachapipas kay pachapipas”, nispa (Mat. 28:18; Efes. 1:20-23). Arí, kunanqa hanaq pachapi Diospa Gobiernonmi paypa kapun, chaytataqmi 1914 watapi chaskikurqan (Apo. 11:15). Chaytan payqa akllasqa qatikuqninkunaman qollanqataq.
18. ¿Imaraykun Jesús hunt’aq kamachita churanqa tukuy kaqninkuna qhawaqta?
18 ¿Imatan tukuy chaykunamanta yachanchis? Manchay ñak’ariypi Jesús Juez hina hamuqtinmi, hunt’aq kamachita tarinqa wasinpi kamachikunaman tiempollanpi mikhuna qoshasqanta. Chayta rikuspan payqa hunt’aq kamachita churanqa tukuy kaqninkunata qhawananpaq. Chaytan hunt’aq kamachi chaskinqa hanaq pachaman ripuqtin Cristowan kuska kamachikuyta qallariqtinku.
19. ¿Aswan hatun saminchaytachu hunt’aq kamachi chaskinqa wakin akllasqa cristianokunamanta?
19 ¿Aswan hatun saminchaytachu hunt’aq kamachi chaskinqa wakin akllasqa cristianokunamanta? Manan. Huk huch’uy t’aqallamanña saminchaykuna qonanta prometerqan chaypas, huk runakunapas chaskillankumantaqmi. Manaraq Jesús wañupushaqtin 11 apostolninkunaman nisqanpi yuyaykusun (leey Lucas 22:28-30). Chaypin chay huch’uy t’aqaman prometerqan hunt’aq kasqankumanta saminchaykuna chaskikunankuta. Arí, Jesuswan kuskan atiyta chaskinanku karqan kamachikuq kanankupaq. Ichaqa qhepamanmi willarqan llapa akllasqa 144.000 cristianokuna paywan kuska kamachikuy tiyanapi tiyaykunankuta (Apo. 1:1; 3:21). Chay hinatan Mateo 24:47 nisqan textopipas pisi runakunata otaq hunt’aq kamachita prometerqan tukuy kaqninkuna qhawaqta churananpaq. Ichaqa llapa 144.000 cristianokunan chay saminchaytaqa chaskikunqaku (Apo. 20:4, 6).
Llapa 144.000 akllasqa cristianokunan hanaq pachapi Jesuswan kuska kamachikamunqaku (19 parrafota qhaway)
20. ¿Imapaqmi Jesús hunt’aq kamachita churarqan? ¿Imata ruwanapaqmi kallpachakunanchis?
20 Jesusqa allin yuyayniyoq hunt’aq kamachiwanmi ñawpaqpi ruwasqanta hina, pisi runakunawan askhaman mikhuchishan. Chay hunt’aq kamachitan Jesús churarqan, akllasqa cristianokunaman wak ovejakunamanpas ‘tiempollanpi mikhunata qonanpaq’. Chayrayku kallpachakushallasun chay hunt’aq kamachita yanapakunanchispaq, chaywanmi rikuchisun tukuy ruwasqankumanta agradecido kasqanchista (Heb. 13: 7, 17).
^ párr. 2 Mateo 24:45-47 (NM): “¿Pipunitaq kanman allin yuyayniyoq hunt’aq kamachiri? Paytan Patronninqa churanqa wasinpi kamachinkunata qhawarinanpaq, tiempollanpi mikhunata qonanpaqwan. Chay kamachiqa kusisqan kanqa Patronnin chayamuspa chhayna ruwashaqta tariqtinqa. Cheqaqtan niykichis: Paytan churanqa tukuy kaqninkuna qhawaqta”.
^ párr. 2 2 párrafo: [1] Huk kutipin Jesús kaq rikch’anachiyta willaspa ‘kamachita’ nirqan ‘mayordomo’ nispa (Luc. 12:42-44).
^ párr. 6 6 párrafo: [2] Griego simipi Mateo 24:42, 44 textokunapi “érkjomai” simin, hamuq tiempopi Juez hina Jesuspa hamunanmanta rimashan. Griego simipi Mateo 24:3 textopi “parousía” simitaq, hanaq pachapi kamachikuyta qallarisqan tiempomanta rimashan.
^ párr. 12 12 párrafo: [3] Qhaway kay revistapi “Ñoqaqa qankunawanmi sapa p’unchay kashani”, nisqa estudiota, 10-12 paginakunapi, 5-8 parrafokunata.
^ párr. 16 16 párrafo: [4] Qhaway kay revistapi “¿Hayk’aqtaq chaykunaqa kanqa?” nisqa estudiota; 7, 8 paginakunata, 14-18 parrafokunata.
