Siria nacionmanta reymi Diospa profetan Eliseota hap’inanpaq maskhasharqan. Hinan Dotán llaqtapi kasqanta yachaspa (chay llaqtaqa moqo patapin karqan allin perqawan muyuchisqa), tutallapi “kacharqan askha soldadokunata caballokunantinta, carretakunantinta ima”. Tutaymantanpaqqa chay llaqtan muyuykusqaña kasharqan (2 Rey. 6:13, 14).

Eliseoq kamachinmi lloqsimuspa rikurqan chayta, hinan sinchita mancharikuspa nirqan: “¡Achacháw! ¿Imanaykusuntaq kunanqa, wiraqocháy? nispa. Eliseotaq nirqan: Ama manchakuychu, paykunamantaqa aswan askhan ñoqanchiswan kashaqkunaqa, nispa. Señor Diosmantataq mañakurqan: Señor Diosníy, qhawarichiy rikunanpaq, nispa. Hinan Señor Diosqa Eliseoq kamachinta qhawarichirqan, paytaq qhawarispa rikurqan Eliseoq muyuriqnin orqopi nina caballokuna, nina carretakuna hunt’a kashaqta”, nispa (2 Rey. 6:15-17). ¿Imatan yachanchis Eliseo chhaynapi tarikusqanmanta?

Eliseoqa Jehová Diospin confiarqan chaymi thaklla karqan chhaynapi tarikuspapas, hinan rikurqan Diospa qespichisqanta. Kunanqa manan Diosqa milagrokunata ruwanchu, chaywanpas rikushanchismi llaqtanta imayna cuidasqanta. Chayqa ‘caballokunata, nina carretakunatapas’ rikushasunman hinan. ¿Yanapawanchischu iñiyninchis chaykunata rikunapaq? ¿Tukuy sonqowanchu Diospi confianchis? Chhayna kaqtinqa thakmi kasun, rikusuntaqmi Diospa saminchayninkunata (Sal. 4:8). ¿Imakunatawanmi Eliseomanta yachasunman?

Huk kutinmi Eliseoqa chakrapi torokunawan llank’asharqan, hinan Elías chayman rispa Eliseoman capanta churarqan. Eliseoqa yacharqanmi chay capata imapaq churasqanta, chaymi fiestata ruwarqan, tayta-mamanta much’aykuspa saqespataq Eliasta qatikurqan kamachin kananpaq (1 Rey. 19:16, 19-21). Payqa tukuy sonqowanmi Dios serviyta munarqan, chayraykun Diospa allin serviqnin kapurqan, qhepamantaq Eliaspa rantinpi profeta kapurqan.

 Eliseoqa yaqapaschá soqta wata hina Eliaspa kamachin karqan. Chay tiempopin payqa “Eliaspa makinman unuta hich’aq karqan” (2 Rey. 3:11, NM). ¿Imaraykun chayta ruwaq? Chay tiempokunapiqa makinkuwanmi mikhuqku, chaymi mikhusqanku qhepaman kamachikunaqa patronninkuq makinkuman unuta hich’aqku maqchikunankupaq. Chaypi yachasqanchis hina Eliseoq wakin llank’ayninkunaqa pisipaq qhawarisqa hinan karqan. Chaywanpas, Eliaspa kamachin kaytaqa ancha chaninpaqmi qhawarirqan.

Kay tiempopipas askha cristianokunan Diospi iñispa astawan llank’ayta munaspa ima, tukuy tiemponkuwan Diosta servinku. Chaymi wakinqa amigonkutapas familiankutapas saqespa, Betelman ripunku otaq Diosta yupaychanapaq wasikuna ruwaypi yanapakunku. Wakinqa pisipaqmi chay ruwaykunata qhawarinku. Ichaqa chaykunapi llank’ayqa ancha chaniyoqmi, manataqmi pisipaqchu qhawarichin chaypi llank’aqkunatapas. Hinaspapas paykunaqa ancha chaniyoqmi Jehová Diospaq kanku. ¿Manachu ñoqanchispas chhaynallatataq qhawarinanchis? (Heb. 6:10.)

Diosqa ‘Eliasta muyuq wayrapi’ manaraq “hanaq pachaman” apashaspan, kamachirqan Gilgal llaqtamanta Betel llaqtaman rinanpaq. Chaymi Eliasqa Eliseota nirqan qhepakunanpaq, Eliseotaq nirqan: “Manan qhepaymanchu”, nispa. Ñanta rishaspapas Eliasqa iskay kutitan Eliseota nirqan qhepakunanpaq (2 Rey. 2:1-6). Imaynan Rutpas Noemita mana saqerqanchu, chay hinatan Eliseoqa hunt’aq sonqo kaspa Eliasta qatikurqan (Rut 1:8, 16, 17). Eliseoqa ancha chaninpaqmi qhawarirqan Eliaspa kamachin kananpaq Diospa kamachisqanta.

¿Imaynapin ñoqanchispas Eliseo hina kasunman? Diospa llaqtanpi ima ruwaytapas chaskispaqa, ancha chaninpaqmi qhawarinanchis. Diosta serviyqa ancha kusikunapaqmi, ama chayta qonqasunchu (Sal. 65:4; 84:10).

Ñanta rishaspankun Eliasqa Eliseota nirqan: “Manaraq qayllaykimanta hoqarisqa kashaqtiy mañakuway, ¿imatan qanpaq ruwanayta munanki?”, nispa. Eliseopas ñawpaqpi Salomonpa mañakusqanta hina mañakurqan, nirqanmi: “Valekuykin, espirituykiq atiyninwan kallpachawanaykita”, nispa (1 Rey. 3:5, 9; 2 Rey. 2:9). ¿Imatan chaywan mañakusharqan? Chaywanqa Eliaspa rantinpi profeta kananpaqmi Eliseoqa mañakusharqan. Hinaspapas Eliseoqa, Elías hina mana manchakuq, ‘anchata Diosmanta sienteq’ kayta munarqan (1 Rey. 19:13, 14).

Eliasmi kutichirqan: “Sinchi sasatan mañakunki, ichaqa qayllaykimanta hoqarisqa kasqayta rikunki chayqa chaskinkin, mana hinaqa, manan chaskinkichu”, nispa (2 Rey. 2:10). Chaywanmi nisharqan Jehová Dioslla chay mañakusqanta qoy atisqanta, hinaspapas chaskiyta munaspaqa Eliaswanmi tukuy tiempo qhepakunan karqan.

¿Qorqanchu Dios Eliseoq mañakusqanta? Biblian nin: ‘Iskayninku parlaspa rishaqtinkutaq, huk nina carreta nina caballokunantin chawpinkuman haykuspa t’aqarqan. Hinan Eliasqa huk muyuq wayrapi hanaq pachaman wicharipurqan. Eliseotaq chayta rikusharqan’, nispa. * Eliseoqa rikurqanmi Eliaspa ripusqanta, hinan Jehová Diosqa mañakusqanta qorqan. Arí, Eliaspa rantinpin Eliseoqa profeta kapurqan (2 Rey. 2:11-14).

Eliseoqa Eliaspa capanwanmi churakurqan. Chaymi rikuchirqan Diospa profetan kapusqanta. Chay qhepamanmi Eliseoqa Jordán mayuta iskayman t’aqarqan, chaywantaqmi yachakurqan Jehová Diosqa allinpaq qhawarisqanta.

Muyuq wayrapi Elías hanaq pachaman hoqarisqa kashaqtinmi, Eliseoqa rikurqan nina caballokunata nina carretakunatapas, chayta rikuspaqa maytachá admirakurqan. Chayta rikuchispan Jehová Diosqa mañakusqanman kutichimusharqan. Kay tiempopiqa manan chhayna rikhuriykunawanchu Jehová Dios mañakusqanchista kutichimuwanchis, ichaqa reparanchismi atiyninwan yanapawasqanchista munayninta hunt’asqantapas. Kay pachapi llaqtanta imayna pusarisqanpin rikunchis Diospa carron purishasqanta (Ezeq. 10:9-13).

 Eliseoqa kawsayninpin rikurqan Jehová Diosqa ancha atiyniyoq kasqanta. Payqa Diospa atiyninwanmi 16 milagrokunata ruwarqan, Eliaspa ruwasqanmantaqa iskay kutitawanraq. * Qallariypi willakusqan hinan, Eliseoqa Dotán llaqtapi yapamanta rikurqan nina caballokunata nina carretakunatapas.

Eliseoqa manan mancharikurqanchu enemigonkuna Dotán llaqtata muyuykusqankuta rikuspa. ¿Imaraykun mana mancharikurqanchu? Allin iñiyniyoq kasqanraykun. Ñoqanchispas pay hinan allin iñiyniyoq kananchis. Chaypaqmi ichaqa Jehová Diosmanta santo espiritunta mañakunanchis allin iñiyniyoq kananchispaq, sumaq kaykunata rikuchinanchispaqpas (Luc. 11:13; Gál. 5:22, 23).

Dotán llaqtapi rikusqanmi Eliseotaqa astawan kallpacharqan Diospipas mana rikuna ejercitonpipas confiananpaq. Payqa rikurqanmi Diospa angelninkuna Dotán llaqtata enemigonkunatapas muyuykusqanta. Hinan Eliseopas kamachinpas qespichisqa karqanku enemigonkunata Dios ñawsayachipuqtin (2 Rey. 6:17-23). Chhayna sasachakuypi tarikuspan, ñawpaq kutikunapi hina rikuchirqan allin iñiyniyoq kasqanta Diospi confiasqantapas.

Ñoqanchispas Eliseo hina Diospi confiasun (Prov. 3:5, 6). Chayta ruwasun chayqa ‘Diosmi khuyapayawasun saminchawasuntaq’ kanpas (Sal. 67:1). Manaña rikunchischu nina caballokunata nina carretakunata chaypas, Diosqa kunanpas llaqtantaqa cuidashanmi, kaqllatataqmi ruwanqa ‘manchay ñak’ariy’ p’unchay chayamuqtinpas (Mat. 24:21; Apo. 7:9, 14). Chay p’unchay chayamunankamaqa ama qonqasunchu ‘Diosqa pakakunanchis’ kasqanta (Sal. 62:8).