1, 2. a) ¿Piqpa casarakuyninwanmi hanaq pachapi ancha kusikuy kanqa? b) ¿Ima tapukuykunamantan kay estudiopi yachasun?

HUK Reypa casarakuyninmi qayllaykamushan. Casarakuypaq preparakuyqa tiempopaqmi, chaymi chay Reypas iskay waranqa wata hinaña preparakushan novianwan casarakunanpaq. Pisi tiempollamantan Reypa palacionpi ancha kusikunapaq takikuna uyarikunqa, hanaq pachapi kaqkunan takinqaku: “¡Yupaychasqa Señor Diosqa kachun! ¡Tukuy-atiyniyoq Señor Diosninchismi kamachikushanña! Kusikusunchis, q’ochukusunchis, payta hatunchasunchis, Corderoq casarakuyninmi chayamunña, novianpas wakichikamunñan [preparakamunñan]”, nispa (Apo. 19:6, 7).

² Casarakunanpaq preparakuq ‘Corderoqa’ Jesucriston, chaymi casarakuyninwan hanaq pachapi ancha kusikuy kanqa (Juan 1:29). ¿Imayna p’achasqan kanqa casarakunanpaq? ¿Pin novian kanqa? ¿Imaynatan noviapas preparakushan chay p’unchaypaq? ¿Hayk’aqmi casarakunqaku? ¿Imaynan sientekunqaku kay Hallp’api wiñay kawsayta suyakuq cristianokuna? Llapallanchischá chaykunamanta yachayta munashanchis. Chaymi  kunan astawan yachasun 45 Salmo qelqamanta.

3, 4. a) ¿Imayna p’achasqan kashan casarakuq Rey? b) ¿Iman sonqonta kusichin? c) ¿Pikunan kanku reypa ususinkuna, Reywan kusikuq ‘reynapas’?

³ (Leey Salmo 45:8, 9.) Jesucristoqa ancha sumaq p’achawanmi casarakunanpaq churakun. P’achanqa mirra, casia akllasqa ‘sumaq q’apaq’ aceitekunamanmi q’apashan. Chay aceitekunawanmi ñawpa Israel runakuna hawikuqku (Éx. 30:23-25).

⁴ Palaciopi sumaq takikuna uyarikusqanmi casarakuq Reypa sonqonta kusichin. ‘Reinapas’ otaq hanaq pachapi Diospa llaqtanpas ancha kusisqan kashan, chay llaqtapin kashanku “ñust’akuna [reypa ususinkuna]”, paykunaqa kanku angelkunan. Paykunan takishanku: “Kusikusunchis, q’ochukusunchis, [...] Corderoq casarakuyninmi chayamunña”, nispa.

5. ¿Pin ‘Corderoq esposan’?

⁵ (Leey Salmo 45:10, 11.) ¿Pitaq noviari? Noviaqa manan huk warmichu, aswanpas huk t’aqa runakunan, chay t’aqatan Jesús umallin (leey Efesios 5:23, 24). Paykunan Cristowan kuska hanaq pachamanta kamachikamunqaku (Luc. 12:32). Chay t’aqa runakunaqa 144.000 akllasqakunan kanku, “paykunan Corderowan kuska purirqanku maytaña riqtinpas” (Apo. 14:1-4). Paykunaqa ‘Corderoq esposan’ kasqankuraykun hanaq pachata rinqaku Jesuswan kuska kanankupaq (Apo. 21:9; Juan 14:2, 3).

6. a) ¿Imaraykun akllasqa cristianokunata nikun reypa ususin nispa? b) ¿Imaraykun llaqtankuta qonqapunanku?

⁶ Chay noviataqa ‘ñust’a’ otaq reypa ususin nispan sutichakun (Sal. 45:13). ¿Pitaq chay reyri? Jehová Diosmi, paymi llapa akllasqa cristianokunata “wawankuna” kananpaq chaskirqan (Rom. 8:15-17). Hanaq pachapi Reypa novian kasqankuraykun paykunata nikun: “Llaqtaykitapas aylluykitapas qonqapuy”, nispa. Paykunaqa manan ‘kay pacha kaqkunapichu yuyaykunanku, aswanpas hanaq pacha kaqkunapin yuyaykunanku’ (Col. 3:1-4).

7. a) ¿Imaynatan Cristo novianta preparashan? b) ¿Imaynatan novia novionta rikun?

⁷ Jesusqa unayñan novianta preparasharqan casarakunankupaq. Chaymantan Pablo qelqarqan: ‘Criston iglesiata [iñiq t’aqata] munakuspa payrayku wañurqan [...]. Chaytan payqa ruwarqan iglesiata unupi mayllispa Diospa siminwan ch’uyanchananpaq, ancha sumaq iglesiata pay kikinman qayllaykachinanpaq, mana qhelliyoqta, mana sip’uyoqta, mana imaq tupaykusqanta, aswanpas ch’uyata, mana huchachanata ima’, nispa (Efes. 5:25-27). Ñawpa Corinto llaqtapi cristianokunatan nillarqantaq: “Ñoqapas qankunamanta mayta sientiykichis, huk qosallamanmi casarakunaykichispaq prometechirqaykichis, huk ch’uya doncella sipasta hinan Cristoman entregayta munaykichis”, nispa (2 Cor. 11:2). Jesucristoqa novian iñiyninpi “sumaq” kasqantan ancha chaniyoqpaq qhawarin, noviataq ‘wiraqochanta’ hina rikuspa hatunchan.

8. ¿Imaraykun novia ancha ‘munayllaña’ kashan casarakunanpaq?

⁸ (Leey Salmo 45:13, 14a.) Reypa casarakuynin hanaq pachapi kasqanraykun noviaqa ancha ‘munayllaña’ kashan. Payqa ‘sumaq k’acha p’achasqan’ kashan. Apocalipsis 21:2 texton noviata  tupanachin mosoq ch’uya Jerusalén llaqtawan. Chay llaqtaqa ‘Diospa lliphlli-kayninwanmi k’anchashan, lliphipipiyninpas ancha chaniyoq umiña hinan [...], k’anchaq q’omer umiña qespi hinan sut’i illaqtaq’ kanpas (Apo. 21:10, 11). Apocalipsis qelqan willan chay ch’uya Jerusalén llaqta ancha sumaqpuni kasqanta (Apo. 21:18-21). ¡Chaychá salmistaqa nirqan novia ancha ‘munayllaña’ kasqanta!

9. a) ¿Pimanmi noviata pusanku? b) ¿Imayna p’achasqan novia kashan?

⁹ ¿Pimanmi noviata pusanku? Rey Jesucristomanmi. Reyqa noviantan prepararqan “unupi mayllispa Diospa siminwan ch’uyanchananpaq”, chay hinapi ‘ch’uya, mana huchachana’ kananpaq (Efes. 5:26, 27). Noviapas casarakunanpaq hinan p’achasqa kashan. P’achanqa “qoriwan minisqan” kashan. “Pallaysapa sumaq p’achawan churaykusqatan reyman pusanku”. “Noviamanqa ch’uya k’ancharishaq sumaq lino p’achan qosqa karqan p’achakunanpaq [...]. Chay sumaq linoqa Diospaq ch’uya kawsaqkunaq chanin ruwasqankunan” (Apo. 19:8).

10. ¿Hayk’aqmi Cordero casarakunqa?

¹⁰ (Leey Apocalipsis 19:7.) ¿Hayk’aqmi Cordero casarakunqa? ‘Noviaqa wakichisqañan’ kashan casarakunanpaq, ichaqa Apocalipsis qelqan chay qhepallaman willan manchay ñak’ariy p’unchaypa tukukuynin qallarisqanta (Apo. 19:11-21). Chhaynaqa, ¿manaraq enemigonkunata Jesucristo atipashaqtinchu casarakuy kanqa? Manan, Apocalipsis qelqaqa manan qayllallamantachu willan imachus sucedenanta. 45 Salmo qelqa willasqan hina, Reyqa espadanta warkuykukuspa enemigonkunata ‘llallinanpaq ñawparisqan’ qhepamanñan casarakunqa (Sal. 45:3, 4).

11. ¿Imakunatan Jesús ruwanqa enemigonkunata atipananpaq?

¹¹ Bibliaq willasqan hina, Reyqa kaykunatan ruwanqa enemigonkunata atipananpaq. Ñawpaqtaqa ‘millay rabona warmiman’ rikch’akuq llapa pantasqa religionkunatan chinkachinqa (Apo. 17:1, 5, 16, 17; 19:1, 2). Chay qhepamanmi Saqraq kamachisqan millay pachata chinkachinqa Armagedonpi, chayqa ‘Tukuy-atiyniyoq Diospa hatun taripay p’unchayninpaq hatun maqanakuymi’ (Apo. 16:14-16; 19:19-21). Llapa enemigonkunata atipananpaqtaq Saqrata supayninkunatawan chinkay-chinkay ukhuman wikch’uykunqa. Chaypiqa manañan pitapas urmachinqakuchu, wañusqapas kashankuman hinan kanqaku (Apo. 20:1-3).

12, 13. a) ¿Hayk’aqmi kanqa Coderoq casarakuynin? b) ¿Pikunan hanaq pachapi kusikunqaku Corderoq casarakusqanmanta?

¹² Akllasqa cristianokunaqa, hanaq pachapi Jesuspa kamachikusqan tiempopi wañupusqankuman hinan hanaq pachapaq kawsarimpunqaku. Hatun Babilonia chinkachisqa kasqanmanta, Armagedón p’unchaypaq pisillaña kasqan tiempokaman Jesusqa novianta otaq kay pachapi qhepaq qatikuqninkunata hanaq pachapi huñunqa (1 Tes. 4:16, 17). Armagedón p’unchay qallarinanpaqqa, noviamanta kaq llapa akllasqa cristianokunan hanaq pachapiña kashanqaku. Hinan Diospa guerran tukusqan qhepaman Corderoq casarakuynin kanqa. ¡May kusikunapaqchá chay p’unchayqa kanqa! Apocalipsis 19:9 texton nin: “Kusisamiyoqmi Corderoq casarakuynin mikhuyman waqyasqakunaqa”, nispa. Noviaqa ancha kusisqan kashanqa chay p’unchay, Noviopas anchatan kusikunqa kamachikunankupaq llapa akllasqa cristianokuna ladonpi kashasqankumanta (Luc. 22: 18, 28-30). Ichaqa, ¿paykunallachu kusikunqaku chay p’unchaypi?

¹³ Ñawpaqpi yachasqanchis hina, hanaq pachapi kaqkunan takinqaku: “Kusikusunchis, q’ochukusunchis, payta hatunchasunchis, Corderoq casarakuyninmi chayamunña, novianpas wakichikamunñan”, nispa (Apo. 19:6, 7). Kay Hallp’api Diosta serviq cristianokunari, ¿kusikunqakuchu chay p’unchay chayamusqanmanta?

14. ¿Pikunan kanku noviaq qhepanta riq ‘sipasmasinkuna’?

¹⁴ (Leey Salmo 45:12, 14b, 15.) Profeta Zacariasmi willarqan tukukuy tiempopi, teqsimuyuntinmanta askha runakuna Diosta agradecekuspa akllasqa cristianokunawan kuska Dios servinankumanta. Nirqanmi: “Chay p’unchaykunapin suyukunapi kaq imaymana rimay rimaqkunamanta chunka runa huk judío runata capanmanta qaqata hap’iykuspa ninqa: Ñoqaykun uyariyku qankunawan Dios kashasqanta, chayrayku pusakapuwayku, nispanku”, nispa (Zac. 8:23). Chay ‘chunka runakunatan’ Salmo 45:12 textopi nin ‘Tiro llaqta runakuna’, ‘qhapaqkuna’ nispa. Paykunan akllasqa cristianokunaman regalokunawan rinku yanapayninta maskhaspa. 1935 watamantapachan akllasqa cristianokuna, millonninpi runakunataña yanapashanku ‘chanin kawsayman kutirichispa’ (Dan. 12:3). Chay ‘chunka runakunaqa’ kawsayninkuta tukuy mana allin kaqkunamanta ch’uyanchaspan akllasqa cristianokunawan kuska llank’ashanku. Paykunan kanku noviaq qhepanta riq  ‘sipasmasinkuna’. Paykunaqa Diospa munayninta ruwanankupaqmi prometekunku, hunt’aq sonqowantaqmi Jesucristota kasukushanku.

15. ¿Imaynatan noviaq qhepanta riq ‘sipasmasinkuna’ kay Hallp’api qhepaq akllasqa cristianokunata yanapakushanku?

¹⁵ Kay Hallp’apiraq kashaq akllasqa cristianokunaqa anchatan agradecekunku qhepanta riq ‘sipaskunata’, ‘allin willakuykunata kay pachantinpi willayta’ yanapakusqankumanta (Mat. 24:14). “Santo Espirituwan Corderoq esposanwanmi ninku: ¡Hamuy!” nispa, ichaqa chay invitacionta uyariqkunapas “¡hamuy!” nishankun (Apo. 22:17). Arí, chaypi nisqan hina, ‘wak ovejakunan’ noviaq “¡hamuy!” nisqanta uyarispa, paykunapas “¡hamuy!” nishanku teqsimuyuntinpi runakunata (Juan 10:16).

16. ¿Ima q’ochukuymanmi wak ovejakuna invitasqa kashanku?

¹⁶ Akllasqa cristianokunaqa ‘wak ovejakunatan’ munakunku. Paykunaqa kusisqan kashanku wak ovejakunapas Corderoq casarakuyninpi q’ochukunankupaq invitasqa kasqankumanta. Bibliaqa willarqanñan Noviaq qhepanta riq ‘sipaskuna’ ‘ancha kusisqallaña asuykunankuta’. Arí, Cordero casarakuqtinqa, kay Hallp’api wiñay kawsayta suyakuq cristianokunapas anchatan kusikunqaku. Apocalipsis qelqan willan ‘ancha askha runakuna’ ‘kamachikuy tiyanaq ñawpaqenpi Corderoq ñawpaqenpiwan sayashasqankuta’ (Apo. 7:9, 15).

17, 18. a) ¿Imaynapin Rey Jesucristo mosoq pachapi wawakunayoq kapunqa? b) ¿Pikunan Jesuspa wawankuna kapullanqakutaq waranqa wata kamachikuyninpi?

¹⁷ (Leey Salmo 45:16.) Noviaq qhepanta riq ‘sipaskunaqa’, astawanraqmi kusikunqaku Rey Jesucristo mosoq pachapi wawakunayoq kaqtin. Arí, casarakuq Jesucriston kay Hallp’ata qhawarimunqa, hinaspan ‘ñawpa taytankunata’ kawsarichimunqa, paykunan ‘churinkuna’ kapunqaku (Juan 5:25-29; Heb. 11:35). Paykunamantan akllanqa kay “pachapi kamachikunankupaq”. Yaqapaschá kay tiempopi wakin umallikunapas, mosoq pachapi ima ruwaykunatapas umallinankupaq churasqa kanqaku (Is. 32:1).

¹⁸ Jesucristoq waranqa wata kamachikuyninpin huk runakuna churinkuna kapullanqakutaq. ¿Imaynapin churinkuna kapunqaku? Paykunaqa Jesucristoq sacrificakusqanpi iñisqankuraykun wiñay kawsayta chaskikunqaku (Juan 3:16). Chay hinapin Jesucristo paykunapaq “Wiñay Yaya” kapunqa (Is. 9:6, 7).

19, 20. ¿Imaynapin llapa cristianokunaq allinninpaq 45 Salmo qelqamanta yachasqanchis?

¹⁹ (Leey Salmo 45:1, 17.) 45 Salmo qelqamanta yachasqanchisqa llapa cristianokunaq allinninchispaqmi. Kay Hallp’api qhepaq akllasqa cristianokunaqa, maytachá suyakushanku hanaq pachapi kaq wawqenkunawan huñukuyta. Wak ovejakunapas, akllasqa cristianokunawan llank’ay aparisqankumanta agradecikuspan, astawan kallpachakushanku Rey Jesucristota kasukunankupaq. Casarakusqanku qhepamanmi Jesucristo kamachikuqmasinkunapiwan runakunata anchata saminchanqaku (Apo. 7:17; 21:1-4).

²⁰ Rey Jesucristoq kamachikuyninmanta ‘sumaq simikuna’ yachasqanchismi kallpachawanchis, ‘sutinta sapanka mirayman yuyarichinanchispaq’ otaq willananchispaq. Chayrayku, ¡Reyta ‘wiñay-wiñaypaq yupaychasun’!