Wakin runakunan mosoq pachapi yapamanta casarakuyta munanku esposanku otaq qosanku kawsarimpuqtin. Huk viudon nirqan: “Esposaywanqa manan wañunaykukamallachu casarasqa kayta munarqayku, aswanpas wiñaypaqmi warmi-qhari hina Jehová Diosta serviyta munarqayku. Kunankamapas chhaynatan yuyaykuni”, nispa. Chhaynaqa, ¿casarakunqakuchu kawsarimpuqkuna? Chaytaqa manan yachanchischu.

Askha watakunan qelqanchiskunapi nirqanchis chay textopi Jesuspa nisqanqa, kay pachapi kawsarimpuymanta rimashasqanta. Chayraykun yuyaykurqanchis kay pachapi kawsarimpuqkunaqa manaña casarakunankuta (Mat. 22:29, 30; Mar. 12:24, 25; Luc. 20:34-36). Ichaqa, ¿yaqachu Jesús chayta nispa rimashanman karqan hanaq pachapi kawsarimpuymanta? Chaypaq allinta t’aqwisun Jesuspa nisqanta.

¿Imamanta rimashaspan Jesús chayta nirqan? (Leey Lucas 20:27-33.) Saduceo runakunan Jesusta urmachiyta munaspa huk tapuyta ruwarqanku. Paykunaqa manan creeqkuchu kawsarimpuypi. Hinan tapurqanku cuñado-kayninkuta hunt’ashaspa wañupuqkuna kawsarimpuspa, kaqllachus casarasqa kankuman chayta. * Chaymi Jesusqa kutichirqan: “Kay pachallapin qharipas warmipas casarakunku, casarachisqataq kankupas, ichaqa wañusqakunamanta kawsarimpunankupaq Diospa akllasqankunaqa hamuq kawsaypiqa manañan casarakunqakuchu, manallataq casarachisqapaschu kanqaku, mana wañuq kasqankurayku. Paykunaqa angelkuna hinan, Diospa wawankunan kanku wañusqankumanta kawsarimpusqankurayku”, nispa (Luc. 20:34-36).

¿Imanaqtinmi qelqanchiskunapi nirqanchis Jesusqa kay pachapi kawsarimpuymanta rimashasqanta? Saduceokunaq tapusqankuraykun. Paykunaqa kay pachapi kawsarimpuymanta yuyaykuspan tapunkuman karqan. Hinaspapas chay tapusqankuta kutichishaspan Jesusqa rimallarqantaq Abrahammanta, Isaacmanta Jacobmantawan, paykunaqa kay pachapin kawsarimpunqaku (Luc. 20:37, 38).

Jesusqa yaqapaschá hanaq pachapi kawsarimpuymanta yuyaykusharqan. ¿Imanaqtinmi chayta ninchis? Chaypaq t’aqwirisun Jesuspa kaykuna nisqanmanta.

Jesusmi nirqan: “Wañusqakunamanta kawsarimpunankupaq Diospa akllasqankuna”, nispa. Arí, akllasqakunaqa Diospa gobiernonpi kanankupaq hinan kanku (2 Tes. 1:5, 11). Paykunatan Diosqa chaninpaq qhawarin Jesuspa sacrificionrayku. Paykuna wañupuqtinkuqa Jehová Diosqa mana huchayoqpaq hinan qhawarin (Rom. 5:1, 18; 8:1). Sapankankutan nikun “kusisamiyoqmi, ch’uyataqmi” nispa, hanaq pachapi kawsarinankupaq hinataqmi kanku (Apo. 20:5, 6). Kay pacha kawsarimpuypin ichaqa ‘mana chanin’ runakuna kallanqataq (Hech. 24:15). Paykunapas, ¿akllasqakuna  hina kawsarimpunankupaqchu kanku?

Nillarqantaqmi: “Mana wañuq kasqankurayku”, nispa. Huk Bibliakunan chay simikunata t’ikranku kay hinata: “Manañan wañuyqa paykunata atipanmanchu”, nispa. Diospaq hunt’aq akllasqa cristianokunaqa hanaq pachapi kawsarispan manaña hayk’aqpas wañunkuchu (1 Cor. 15:53, 54). Hanaq pachapi kawsariqkunataqa manañan wañuyqa atipanñachu. *

Chaykunan rikuchiwanchis kawsarimpuymanta casarakuymantawan Jesús rimashaspaqa, hanaq pachapi kawsariymanta rimashasqanta. Chhayna kaqtinqa, hanaq pachapi kawsariqkunaqa manan casarakunkuchu, mana wañuqmi kanku hinaspapas angelkuna hinan kanku. Ichaqa kashanraqmi tapukuykuna.

¿Imanaqtinmi Jesús hanaq pachapi kawsariymanta rimasharqan kay pachapi kawsarimpuymanta saduceokuna yuyaykushaqtinku? Mayninpin Jesusqa enemigonkunaman kutichispa, mana paykunaq yuyaykusqankuman hinachu kutichiq. Huk kutinmi judiokuna huk señalta rikuchinankuta munarqanku, chaymi khaynata kutichirqan: “Thuniychis kay yupaychana wasita, kinsa p’unchayllapin sayarirqochisaq”, nispa. Jesusqa yacharqanmi judiokunaqa yupaychana wasi templopi yuyaykushasqankuta, paymi ichaqa ‘pay kikinpa cuerponmanta rimasharqan’ (Juan 2:18-21). Yaqapaschá Jesusqa saduceokunaq tapusqankuta mana kutichiyta munarqanchu iskay uyakuna kasqankurayku, hinaspapas paykunaqa manan creeqkuchu kawsarimpuypi nitaq angelkunapipas (Prov. 23:9; Mat. 7:6; Hech. 23:8). Aswanpas yaqapaschá qatikuqninkunaman willayta munarqan hanaq pachapi kawsariymanta, paykunan chayta chaskikunanku karqan.

Hinaspapas, ¿imanaqtinmi Jesús rimallarqantaq kay pachapi kawsarimpuyta suyakuq Abraham, Isaac Jacobmantapas? (Leey Mateo 22:31, 32.) Paykunamanta rimananpaqmi Jesusqa nirqan: “Wañusqakunaq kawsarimpunanmantapas”, nispa. Chhaynaqa manañan casarakuymantachu rimasharqan, aswanpas kay pachapi kawsarimpuymantañan rimasharqan. Hinaspapas Moisespa qelqankunamantan saduceokunaman rimapayarqan, chaykunata respetasqankurayku. Chaywanmi rikuchiyta munarqan kay pachapi kawsarimpuyqa Jehová Diospa munaynin kasqanta (Éx. 3:1-6).

Chaymantapas, hanaq pachapi kawsariqkuna mana casarakunankumantataq Jesús rimarqan chayqa, kay pachapi kawsariqkunari, ¿casarakunqakuchu? Diospa simin qelqaqa manan chaymantaqa sut’itachu willan. Chhaynaqa, Jesusqa manan imatapas nirqanchu kay pachapi kawsarimpuqkuna casarakunqakuchus icha manachus chaytaqa.

Biblian ichaqa sut’ita willan casarasqa kayqa wañuywan tukupusqanta. Chhaynaqa sichus huk viudo otaq huk viuda casarakuyta munanman chayqa, manan huchachakunanchu. Ichaqa sapankan decidinan casarakunqachus icha manachus chayta, manataqmi pipas huchachananchu decidisqankutaqa (Rom. 7:2, 3; 1 Cor. 7:39).

Mosoq pachapi kawsay imayna kananmantaqa imaymanatan tapukunchis. Ichaqa manan mana allinta yachashaspaqa imatapas yuyaykunachu. Aswanpas chay tiempoq chayamunanta suyakusun, chaypiñan yachasun imayna kananta. Kaymantan ichaqa mana iskayananchischu: Jehová Diosqa paypaq hut’aq sonqo kaqkunamanmi tukuy munasqankuta qonqa, chhaynapi kusisqa kanankupaq (Sal. 145:16).