1. a) ¿Imaynatan Jehová Dios llank’ayta qhawarin? b) ¿Imatan Jehová Dios angelkunamanpas runakunamanpas qorqan?

JEHOVÁ DIOSQA kusikunmi llank’asqanwan (Sal. 135:6; Juan 5:17). Chaymi munan angelninkunapas runakunapas chhayna kusikunankuta, chayraykun llank’anakunata qorqan. Tukuy imata kamashaspapas sapallan churinwanmi yanapachikurqan (leey Colosenses 1:15, 16). Biblian willan manaraq kay pachaman Jesús hamushaspa hanaq pachapi taytanwan ‘llank’asqanmanta’ (Prov. 8:30).

2. ¿Imaynapin yachanchis angelninkunaman Dios llank’aykuna qosqanta?

² Jehová Diosqa qallariymantapachan angelninkunaman llank’anakunata qorqan. Edén huertamanta Adán Evaq qarqochikusqanku qhepamanmi, Jehová Diosqa “kawsay sach’aman ñanta hark’ananpaq” querubinkunata churarqan “tukuyneqman wach’iq nina espadatapas” (Gén. 3:24). Apocalipsis 22:6 textopipas ninmi: “Diosmi angelninta kachamurqan yaqaña sucedenan kashaqkunata kamachinkunaman rikuchinanpaq”, nispa.

3. ¿Imatan taytan hina Jesús ruwarqan?

³ Jesusqa kay pachapi kashaspan taytanpa llank’aykuna  qosqanta kusisqa ruwarqan. Hinaspapas taytan hinan qatikuqninkunaman llank’aykunata qorqan. Allinkuna ruway atisqankuta reparachinanpaqmi nirqan: “Ñoqapi iñiqqa ñoqaq ruwasqaykunatan ruwallanqataq, chaykunamantapas astawanraqmi ruwanqa”, nispa (Juan 14:12). Hinaspapas chay llank’aykuna usqhaylla ruwana kasqanta reparanankupaqmi nirqan: “P’unchayraq kashaqtinmi kachamuwaqniy Diospa ruwanankunata llank’anaypuni, tutayaqtinmi ichaqa mana pipas llank’ayta atinqañachu”, nispa (Juan 9:4).

4-6. a) ¿Imaraykun Noepa kasukusqan allinninchispaq? b) ¿Imatan yachasunman Moisespa kasukusqanmanta? c) ¿Imapaqmi Diospa qosqan llapa llank’anakuna?

⁴ Kay pachaman Jesús manaraq hamushaqtinmi Diosqa runakunaman llank’aykunata qorqanña, chaykunan runakunata kusichirqan. Adanmanpas Evamanpas llank’aykunatan qorqan, ichaqa manan hunt’ayta atirqankuchu (Gén. 1:28). Hukkunan ichaqa hunt’arqanku. Paykunamantan karqan Noé, paytan Diosqa nirqan imaynatachus arcata ruwananta, chay hinapin paypas familianpas hatun parapi mana wañurqankuchu. Noeqa Diospa tukuy kamachisqanman hinapunin ruwarqan, chayraykun ñoqanchisqa kawsashanchis (Gén. 6:14-16, 22; 2 Ped. 2:5).

⁵ Moisesmanpas Diosqa huk llank’aytan qorqan, paymi Dios yupaychana karpata ruwanan karqan Diospa tukuy kamachisqanman hinapuni, hinaspapas Diosta serviq sacerdotekunatan churanan karqan (Éx. 39:32; 40:12-16). Moisesqa chhayna kusatan llank’arqan kasukuqtaq karqan. ¿Imatan chaykunamanta yachasunman? Apóstol Pabloq nisqan hina, Diosta yupaychana karpapas Diosta serviq sacerdotekunapas rikch’anachiykunallan karqan hamuq tiempopi allinkuna kananmanta (Heb. 9:1-5, 9; 10:1).

⁶ Diospa munaynin hunt’akusqanman hinan llank’aykuna qosqanpas cambian. Ichaqa llapa llank’aykunan Diosta hatunchan hunt’aq runakunaq allinninpaqtaq. Jesuspas chay hina kananpaqpunin hanaq pachapipas kay pachapipas ruwarqan (Juan 4:34; 17:4). Kunan tiempopi llank’ayninchispas chay hinatan Diosta hatunchan (Mat. 5:16; leey 1 Corintios 15:58). ¿Imaynapi?

7, 8. a) ¿Ima ruwaykunatan kay tiempopi cristianokuna aparishanku? b) ¿Imatan ruwananchis cambiokuna kaqtin?

⁷ Maytan kusikunchis huchasapa runakunaña kashaqtinchispas Diosqa llank’aysiqmasin kananchispaq invitawasqanchismanta (1 Cor. 3:9). Wakinmi asambleakuna aparikunanpaq wasikunata, huñunakuna wasikunata, sucursalkunatawan hatarichinku imaynan Noepas Moisespas ruwarqanku hinata. Yaqapaschá huñunakuna wasikunata hatarichiypi otaq allichaypi yanapakushanchis otaq Estados Unidos Betel  wasita hatarichiypi yanapakushanchis (16 paginapi dibujota qhaway). Chay ruwaykunaqa Diospaq llank’aykunan, chaymi chaninpaq qhawarinanchis. Wakintaq runakunaq iñiyninpi yanapashanku, chayta ruwanapaqqa llapallanchismi invitasqa kashanchis. Chay llank’ayqa predicacionmi, chaywanmi Jehová Diosta hatunchanchis runakunaq allinninpaqtaq kanpas (Hech. 13:47-49). Chay llank’ayta allinta aparinanchispaqmi hunt’aq kamachi yachachiwanchis, chaymi mayninpiqa huk llank’aykunata chaskinchis.

⁸ Jehová Diosta tukuy sonqonkuwan serviqkunaqa tukuy tiempon hunt’aq kamachinwan pusarichikunku (leey Hebreos 13:7, 17). Mayninpiqa yaqapaschá mana entiendenchischu imarayku huk llank’aytañataq qowasqanchista otaq imarayku imatapas kamachiwasqanchista. Ichaqa mana iskayaspan Jehová Diospa niwasqanchisman hina ruwananchis, chay hinapin yachasun allinpuni chay cambiokuna kasqanta.

9. ¿Imaraykun umallikuna iñiq t’aqakunaq qatikunankupaq hina kanku?

⁹ Iñiq t’aqakunapi umallikunaqa Diospa munayninman hinan imatapas ruwanku (2 Cor. 1:24; 1 Tes. 5:12, 13). Paykunaqa chanintapunin llank’anku imaynapiña tarikuspankupas. Hukniraykunamanta predicanapaq kamachikuykunata chaskispapas, kusisqan chayman hina predicanku. Yaqapaschá ñawpaqpiqa sasa karqan telefononta, barcokunaq chayananpi otaq huk ladokunapipas predicacionta apariy. Ichaqa allinpin chaykuna tukurqan. Chaytan willakunku Alemania nacionmanta tawa precursorkuna, paykunan negociokunapi predicaq rirqanku. Umalli kaq Michaelmi nin: “Unayñan chhaynataqa mana predicarqaykuchu, chaymi mancharisqa kasharqayku. Ichaqa tukuy imata rikumuq Jehová Diosmi bendeciwarqanku. Maytan kusikurqayku Jehová Diospi confiaspa Diosmanta Willasunchis nisqa hojanchispi nisqanman hina ruwasqaykumanta”, nispa. Ñoqanchispas chay hinatan ruwasunman, yaqapaschá hukniraymantañataq predicaspa.

10. ¿Ima cambiokunan Diospa llaqtanpi karqan qayna watakunalla?

¹⁰ Sucursalkunapipas karqanmi cambiokuna. Qayna watakunallan Diospa llaqtanqa wakin sucursalkunata wisq’apurqanku otaq huk sucursalkunaman  huñupurqanku, hinaspa chaypi llank’anakuna huk sucursalpi aparikapurqan. Chay cambiokunaqa chaypi llank’aqkunapaqmi sasa karqan, tiempoq pasasqanmanmi ichaqa allinninkupaq karqan (Ecl. 7:8). ¡May munaymi paykuna hina chay cambiokunapi participayqa!

11-13. ¿Imakunatan wakin cristianokuna ruwananku karqan cambiokunaq kasqanwan?

¹¹ Chay cambiokunapi participaq cristianokunamantan imaymanata yachasunman. Wakinmi tukuy tiemponkuwan unay watakunaña Betelpi llark’arqanku. Huk casarasqa iñiqmasikunan Centroamérica Betelpi llank’arqanku, paykunatan invitarqanku México Betelman astakunankupaq, chayqa karqan 30 kuti aswan hatunmi. Rogelion nin: “Sasan karqan familiaytapas amigoykunatapas saqeyqa”, nispa. Juanmi nillantaq: “Manan pitapas reqsirqaykuchu, hukmantan amigokunata ruwanayku karqan, huk costumbrekunaman yachakunayku karqan hukniray ruwaykunamanpas”, nispa.

¹² Huk sucursalkunamanta Alemania nacionpi sucursalman astakuq betelitakunapaqpas sasan karqan. Suiza nacionpiqa munay orqokunan kan, chaykunaman yachasqa cristianokunapaqqa sasachá karqan huk ladoman astakuyqa. Austria nacionmanta cristianokunapaqpas sasachá karqan huch’uy familia hinalla tiyasqanku Betelta saqeyqa.

¹³ Huk Betelkunaman astakuqkunaqa mana reqsisqanku cristianokunawanmi llank’ananku karqan, hukniray wasikunapin tiyananku karqan, wakintaq huk llank’aykunata yachananku karqan. Hinaspapas mosoq iñiq t’aqamanmi rirqanku, mana reqsisqanku llaqtakunapi predicananku karqan, wakintaq huk simipi imaraq predicananku karqan. Chaykunaqa manan facilchu, chaywanpas askha betelitakunan kusisqa astakurqanku. ¿Imanaqtin?

14, 15. a) ¿Imaynatan askha iñiqmasikuna maypiña kaspapas Dioswan llank’ayninkuta chaninpaq qhawarirqanku? b) ¿Imaynapin paykuna hina kasunman?

¹⁴ Grethel cristianan nin: “Invitawasqankutan chaskikurqani, chay hinapin Jehová Diosta nisharqani sonqomanta munakusqayta. Manan llaqtallaypi kaspachu paytaqa munakuni, nitaq Betelpi tiyaspallachu, nitaq sumaq llank’anapi kaspallachu”, nispa. Dayskan nillantaq: “Jehová Diosmi invitawasharqan chaymi mana iskayaspa chaskikurqani”, nispa. Andreswan Gabrielawanpas kaqllatataqmi yuyaykurqanku, paykunan ninku: “Chay cambiokunatan qhawarirqayku Jehová Diosta astawan servinaykupaq hina, chaymi ima munasqaykutapas saqesparaq chaskikurqayku”, nispa. Paykunaq nisqanku hina, Jehová Diospa llaqtanpi cambiokuna kaqtinqa aswan facilmi kusisqa chaykunata chaskikuy k’ulluchakushanamantaqa.

¹⁵ Chhayna cambiokuna kaqtinmi, Betel wasipi wakin llank’aqkunata precursor kanankupaq invitanku. Chaymi sucederqan Dinamarca, Noruega Suecia sucursalkunapi wakin llank’aqkunawan, chay sucursalkunan huñukuspa Escandinavia sucursalman tukupun. Florian  Anja iñiqmasikunan ninku: “Precursor kasqaykutaqa chaninpaqmi qhawariyku. Maytan kusikuyku Jehová Diospa may munasqanpi llank’asqaykumanta. Askha bendicionkunatan chaskirqayku”, nispa. Yaqapaschá mana chhayna cambiokunatachu pasananchis kanqa, ichaqa paykuna hinan ñoqanchispas kusisqa sonqowan ima cambiotapas chaskikunanchis, Diospa gobiernontataq ñawpaqta maskhananchis (Is. 6:8). Jehová Diosqa sumaq bendicionkunatan qowasun maypiña kaspapas paywan llank’ayninchista chaninpaq qhawarisqanchismanta.

16. a) ¿Imatan Gálatas 6:4 texto yuyaychawanchis? b) ¿Iman ñoqanchispaq aswan chanin?

¹⁶ Huchayoq runakuna kasqanchisraykun hukkunawan ruwasqanchista tupanachinchis. Biblian ichaqa yuyaychawanchis kikinchis imachus ruway atisqallanchispi yuyaykunanchista (leey Gálatas 6:4). Manan llapanchischu kayta atinchis umallikuna, precursorkuna, misionerokuna otaq betelitakunapas. Ichaqa llapanchismi Diospa llank’aysiqmasin kanchis, chaytan ruwanchis predicaspa. ¡May chaninpunin Diospa llank’aysiqmasin kayqa!

17. a) ¿Imakunan hark’awanchis Jehová Diosta munasqanchisman hina servinanchista? b) ¿Imaraykun mana pisikallpayananchischu?

¹⁷ Saqraq kamachisqan kay millay pachapiqa, imaymana sasachakuykunan kan. Chaymi mana tukuy munasqanchistachu Jehová Diospaq ruwayta atinchis. Yaqapaschá familianchista uywananchis, onqoshanchis otaq imapipas tarikushanchis, ichaqa manan chayraykuchu pisikallpayananchis. Aswanpas kusisqan kananchis tukuy atisqanchista Jehová Diospaq llank’aspaqa, chaytan ruwasun maypiña kaspapas paypa sutinta  gobiernonmantapas hukkunaman willaspa. Chay ruwaytaqa manan pisipaqchu qhawarinanchis. Hinaspapas, Diostan mañakunanchis tukuy tiemponkuwan serviqkunata bendeciykunanpaq. Ama qonqasunchu, Jehová Diosqa ancha valorniyoqpaqmi qhawarin paypa sutinta hatunchaqkunata.

18. ¿Imatan qhepaman saqenchis, imarayku?

¹⁸ Huchasapa runakunaña kanchis chaypas, Jehová Diosqa kusikunmi llank’aqmasinkuna kasqanchismanta. Chaymi anchata valorananchis tukukuy p’unchaykunapi Diosninchiswan llank’asqanchista. Chayraykun imapas munasqanchista qhepaman saqenanchis, chaykunataqa mosoq pachapiñan chaskisun. Chaypin thakpi, kusisqa wiñaypaq kawsakusun (1 Tim. 6:18, 19).

19. ¿Imatan Jehová Dios prometewanchis?

¹⁹ Diospa promesankunaqa ñan hunt’akunqaña. Yuyarisun prometesqa hallp’aman Israel llaqta haykunanpaqña kashaqtin Moisespa nisqanta, paymi nirqan: “Diosniykichis Señor Diostaq tukuy ruwayniykichispi allinyachisunkichis”, nispa (Deut. 30:9). Armagedón qhepatan Jehová Diosqa prometesqanman hina llank’aqmasinkunaman kay hallp’ata qopunqa. Chay qhepamanmi kay hallp’ata paraisoman tukuchisun. ¡Maytachá kusikusun chay llank’anawanqa!