ANDREAN * Jehová Diospa testigon kapurqan, chaymi qosanqa sinchitapuni phiñakurqan. Andrean nin: “Manan huñunakuykunaman rinayta munaqchu, Diospa sutinta rimanaytapas hark’awaqmi, mana hinaqa k’araqtan phiñakuq”, nispa.

Hinaspapas manan munaqchu wawankunaman Diosmanta yachachinanta. Andrean nin: “Hark’awarqanmi huñunakuykunaman wawaykuna pusanayta, manataqmi Bibliamanta yachachinayta munaqchu chaymi pakallapi estudiaq kayku”, nispa.

Yaqapaschá qanpas chay hina sasachakuypi tarikurqanki. Testigo kananchista familianchis hark’akuqtinqa sasan. Ichaqa manan chayllachu Dios serviyninchistaqa hark’awasunman. Yaqapaschá unayña onqosqa tarikushanki, mayqen familiaykipas wañupurqan otaq Jehová Diosta saqepurqan, chaykunapas sasa aguantaymi kanman. Chaykuna kaqtin, ¿imaynatan Jehová Diospaq hunt’aq sonqollapuni kasunman?

Apóstol Pablon nirqan: “Qankunaqa anchatapunin pacienciakunaykichis”, nispa (Heb. 10:36). Chhaynaqa, ¿iman yanapawasunman aguantananchispaq?

Sasachakuykunata aguantanapaqqa Diosmanmi orakunanchis. Chaytan Anapas ruwarqan qonqaylla qosan wañupuqtin. Paykunaqa 30 watañan casarasqa kasharqanku. Paymi nin: “Llank’aq risqanmantan manaña kutimpurqanchu, 52 watallanpiraqmi kasharqan”, nispa.

¿Imaynatan aguantarqan? Tukuy yuyay llank’ananpi kaspan chikanta qonqariq, ichaqa manan llakikuyninqa chinkarqanchu. Paymi nin: “Jehová Diosmanmi willakuq kani imaynachus kashasqayta, valekuqtaqmi kani kallpachawananpaq”, nispa. ¿Uyarirqanchu Jehová Dios mañakusqanta? Arí,  Anan nin: “Sichus Jehová Dios thak kayta mana qowanmanchu karqan chayqa, locamanmi tukupuyman karqan. Qosayta paraisopi Jehová Dios kawsarichimpunanta yuyariymi, ¡mayta yanapawarqan!”, nispa (Filip. 4:6, 7).

Jehová Diosqa tukuy necesitasqanchispin yanapawasun, chay hinapi hunt’aq sonqolla kananchispaq (Sal. 65:2). Chayta yachaymi, ¡mayta kallpachawanchis!

Jehová Diosqa iñiqmasinchiskunawanmi kallpachawanchis. Ñawpa cristianokunaq tiemponpin Tesalónica iñiq t’aqa qatiykachasqa karqan. Chaymi Pabloqa paykunata nirqan: “Chayrayku, hukkuna hukkunawan sonqochanakuychis kallpachanakuychis, imaynan ruwashankichispuni hinata”, nispa (1 Tes. 2:14; 5:11). Tesalónica iñiqmasikunaqa aguantarqanku huk nisqalla kasqankuraykun, paykunapuran cuidanakuqku. ¿Imaynatan ñoqanchispas paykuna hina kasunman?

Iñiq t’aqanchispin amigokunata armananchis. Chhaynapin sasachakuy tiempopi kallpachasqa kasun ñoqanchispas kallpachasun (Rom. 14:19). Pablo kikinpunin imaymana mana allinkunata  pasarqan, ichaqa Jehová Diosmi kallpata qorqan iñiqmasikunawan. Chaymi Pabloqa nirqan: “Paykunan anchata kallpachawarqanku”, nispa (Col. 4:10, 11). Chay iñiqmasikunaqa Pablota anchata munakuspankun yanaparqanku. Yaqapaschá qanpas chay hina kallpachasqa karqanki.

Jehová Diosmi yanapawallanchistaq umallikunawan. Paykunaqa Bibliawanmi kallpachawanchis consejokunatapas qowanchis. Chaymi paykunamanta Biblia nin: “Wayramanta pakakuna hina, chikchi pukllaymanta pakakuna hina, ch’aki hallp’api qarpana unu yarqha hina, ch’in pampapi llanthuykukuna hatun qaqa hina”, nispa (Is. 32:2). ¡May kusikunapaqmi chay hina kasqankuqa! Chaymi sasachakuykunapi tarikuspaqa paykunawan parlarinayki. Paykunan yanapasunkiku Jehová Diosta servishanallaykipaq.

Umallikunaqa ñoqanchis hina pantaq runakunan kanku (Hech. 14:15). Chaymi mana llapa sasachakuyninchiskunatachu tukuchinqaku, ichaqa Diosmantan ñoqanchisrayku mañakunqaku chaytaqmi yanapawasun (Sant. 5:14, 15). Italia nacionmanta iñiqmasin unay watakuna sinchi onqosqa karqan. Paymi nin: “Umallikunaq munakuyninpas, sapa kutin visitamuwasqankupas anchatan kallpachawarqan”, nispa. Sichus qanpas ima sasachakuywanpas ñak’arishanki chayqa, umallikunawan yanapachikuy, chaytan Jehová Diosqa munan.

Sasachakuykunata aguantanapaqqa manapunin Dios serviyninchispi pisipananchischu. 39 watanpi kaq Juantan cáncer onqoy hap’irqan. Chhayna watallanpiraq onqosqa kasqanmi sinchita llakichirqan. Hinaspapas huk wawachayoqmi karqan. Chaymi nin: “Esposaymi wawayta atiendenan kashaqtinpas ñoqatawan atiendewanan karqan”, nispa. Onqoyninmanta hampichikuqtinmi mana kallpayoq tarikurqan, aqtunay ganaswan. Hinaspapas taytanmi sinchi onqosqa wañunan patapiña kasharqan, hinan cuidanata necesitarqan.

¿Iman Juanta familiantapas yanaparqan? Diosta servinankupaq kallpachakusqankun. Paymi nin: “Sinchi sayk’usqaña kaspaykupas riqpunin kayku huñunakuykunaman, predicacionmanpas, familiantin Biblia estudiaytapas manan saqerqaykuchu”, nispa. Paymi repararqan sasachakuykunata aguantanapaqqa iñiyninchispi qaqa kananchista. Paymi consejawanchis: “Mana allin noticiakunaqa ñawpaq p’unchaykunallapin sinchita llakichiwanchis, chay qhepamanqa Jehová Diospa kallpanwanmi thak sientekunki. Jehová Diosqa cheqaqpaqpunin yanapawanchis, chaytan ñoqa kikiy rikurqani”, nispa.

Chhaynaqa Jehová Diosmi yanapawasun ima sasachakuytapas aguantanapaq. Paypa yanapayninta mañakuy, ama karunchakuychu iñiqmasikunamanta, umallikunawan yanapachikuy, Diostataq servishallay. Apóstol Pablon nirqan: “Qankunaqa anchatapunin pacienciakunaykichis”, nispa. Chaypaqmi Jehová Dios yanapawasun.