1. ¿Imayna tiempopin kawsashanchis?

TUKUKUY p’unchaykuna qallarisqanmantapachan sasa tiempokunapi kawsashanchis, chayqa 1914 watapin qallarirqan. Chaymi aswan-aswan sasachakuypi tarikushanchis (2 Tim. 3:1-5). Ichaqa astawanraqmi sasachakuykuna kanqa, Bibliaq nisqan hina runakunan aswan millayman tukupushanku (2 Tim. 3:13).

2. ¿Imakunawanmi kay tiempopi runakuna kusirikunku? (Kay paginapi fotokunata qhaway.)

² Kay tiempopi runakunaqa Jehová Diospa cheqnisqan ruwaykunawanmi kusirikunku. Askha runakunan kusirikunku maqanakuqkunata qhawaspa, qhelli ruwaykunata qhawaspa, layqakunata magia ruwaqkunata qhawaspa ima. Chaykunatan internetpi, televisionpi, cinepi, librokunapipas churamunku allin ruwaykunata hina. Wakin nacionkunapin chhayna millaykunata leykuna hark’aq, ichaqa tiempowanmi chay leykunapas cambiapun. Jehová Diosmi ichaqa kamachikuyninkunata mana  cambianchu, payqa kaqllan cheqnikushan chay mana allin ruwaykunata (leey Romanos 1:28-32).

3. ¿Imaynatan askha runa qhawariwanchis?

³ Ñawpa tiempopi cristianokunapas manan Diospa cheqnisqan ruwaykunawanqa kusirikuqkuchu. Chayraykun askha runakunaq cheqnisqan, k’amisqan karqanku. Apóstol Pedron nirqan: “Diospi mana iñiq runakunaqa musphaspan qhawasunkichis sinchi millay hucha ruwayninkupi mana paykunawan kuskachu ruwaysikusqaykichismanta, chaymi qankuna contrapas rimanku”, nispa (1 Ped. 4:4). Kay tiempopi cristianokunapas Diospa kamachikuyninkunatan kasukunchis. Chaymi askha runakuna mana allinpaq qhawariwanchis. Biblian willarqanña cheqaq cristianokuna qatiykachasqa kanankuta (2 Tim. 3:12).

4. ¿Imaraykun kay pachaq kaqninkunata mana munakunanchischu?

⁴ Diosta kasukuyta munaspaqa manan kay pachaq kaqninkunata munakunanchischu (leey 1 Juan 2:15, 16). ¿Imarayku? Kay pachata Saqra kamachisqanrayku. Paymi runakunata engañashan pantasqa religionkunawan, gobiernokunawan, hatun negociokunawan, televisionwan, radiowan, internetwanpas (2 Cor. 4:4; 1 Juan 5:19). Chaymi kay pacha mana engañawananchispaq allin amigokunata akllakunanchis. Biblian nin: “Mana allin runakunawan huñukuspaqa samaykachikunkun”, nispa (1 Cor. 15:33).

5, 6. a) ¿Pikunawanmi mana juntakunanchischu? b) ¿Imaraykun mana amigontinchu kananchis mana allin ruwaqkunawan?

⁵ Diospa amigon kayta munaspaqa manan mana allin runakunawan juntakunanchischu. Manataqmi juntakunanchischu Testigo kashaspa Diosta mana kasukuqkunawan. Sichus hatun huchapi urmaspa mana pesapakunchu chayqa, manañan rimaypunchischu nitaq juntakunchispasñachu (Rom. 16:17, 18).

⁶ Yaqa llapa runakunan amigonchis hina kayta munanchis, kusichiytataqmi munanchispas. Chaymi mana allin ruwaqkunawanqa mana juntakunanchischu, mana hinaqa ruwasqankutan ruwasunman. Sichus qhelli huchapi puriqwan juntakusun chayqa, qhelli huchatan ruwallasuntaq, chaymi pasarqan wakin Testigokunawan. Wakinmi huchankumanta mana pesapakurqankuchu, hinan Diospa llaqtanmanta qarqochikurqanku (1 Cor. 5:11-13). Sichus kaqlla huchankupi kanqaku chayqa, mana allinpipunin tarikunqaku (leey 2 Pedro 2:20-22).

7. ¿Pikunawanmi amigontin kananchis?

 ⁷ Llapa runawanña sumaq sonqo kanchis chaypas, manapunin Diosta mana kasukuq runakunawanqa purinanchischu. Hinaspapas casarakunapaqqa manan reqsinakunachu mana Testigo kaqwanqa. Aswan importanteqa Dioswan amigontin kaymi, mana allin runakunawan amigontin kaymantaqa. Chayraykun Diospa nisqanman hina kawsaq runakunallawan amigontin kananchis. Jesusmi nirqan: “Pipas Diospa munayninta ruwaqmi wawqeypas, panaypas”, nispa (Mar. 3:35).

8. ¿Imapin Israel runakuna tarikurqanku mana allin runakunawan juntakusqankurayku?

⁸ Mana allin runakunawan puriqqa, sinchi problemakunapin tarikunqa. Manaraq prometesqa hallp’aman Israel runakuna haykushaqtinkun, Jehová Diosqa paykunata nirqan: “Aman diosninkuman k’umuykukunkichu, amallataq chaykunata yupaychankipaschu. Aman chay runakuna hina yupaychankichu, aswanpas llapan diosninkutan ch’usaqyachinki, yupaychana saywa ruminkutapas llapallantan p’akirqarinki. Ñoqa Diosniyki Señor Diostan yupaychawanki”, nispa (Éx. 23:24, 25). Israel runakunan ichaqa mana kasukurqankuchu (Sal. 106:35-39). Chayraykun Dios rechazapurqan, paykunaq rantinpitaq huk llaqtata paqarichirqan (Mat. 23:38; Hech. 2:1-4).

9. ¿Imaraykun mana allin kanman askha peliculakuna, takikuna, internetpi kaqkuna, hukkunapas?

⁹ Televisionpi churamusqanku wakin programakuna, peliculakuna, takikuna, internetpi kaqkuna, wakin librokunapas mana allinkaman. Chaykunan Dioswan amigontin kasqanchista tukuchinman. Chaykunaqa mana allin amigokuna hinan Diospi confiananchismantaqa, Saqraq kamachisqan pachapi confiananchispaq tanqawasun. Chaymi mana comuntaqa imatapas qhawanachu, leenachu, uyarinachu (Tito 2:12).

10. ¿Iman pasanqa mana allin kusirikuykunawan?

¹⁰ Pisillamantan Saqraq kamachisqan pachaqa tukukapunqa, chaywan kuskataq mana allin ruwaykunawan kusirikuykunapas. Biblian nin: “Kay pachaqa tukukapushanmi, tukuy imaymana mana chanin munayninkunapiwan. Diospa munayninta ruwaqmi ichaqa wiñaypaq kawsanqa”, nispa (1 Juan 2:17). Nillantaqmi mana allin runakuna chinkachisqa kanankuta, allin runakunataq wiñaypaq kusisqa kay hallp’api tiyakunankuta (Sal. 37:9, 11, 29).

11. ¿Imaynatan Jehová Dios yanapawanchis paypaq hunt’aq sonqo kananchispaq?

¹¹ Biblian nin wiñay kawsayta munaspaqa Jehová Diosta, churintapas reqsinanchis kasqanta (Juan 17:3). Dios kikinpunin yanapawanchis payta reqsinanchispaq, hunt’aq sonqo kananchispaqpas. ¿Imaynata? Llaqtanwanmi yanapawanchis. Chaypaqmi librokunata, videokunata, internetpi direccionkunatapas ruwachin. Hinaspapas pachantinpin 110.000 más iñiq t’aqakunapi Bibliamanta yachachiwanchis. Chay huñunakuykunapi, asambleakunapi  yachasqanchismi yanapawanchis Jehová Diospi confiananchispaq, promesankunata hunt’ananpi confiananchispaqpas (Heb. 10:24, 25).

12. ¿Ima ninanmi “Señorpi iñiqwanpuni” casarakuy nispa Bibliaq kamachisqan?

¹² Biblian niwanchis Diospi mana iñiq runawanqa manapuni casarakunachu kasqanta. ¿Imarayku? K’anchaywan tutawan hina hukniray kasqanrayku (2 Cor. 6:14). Nillantaqmi “Señorpi iñiqwanpuni” casarakunata (1 Cor. 7:39). ¿Ima ninanmi chay? Casarakuyta munaspaqa Diospa kamachikuyninkunata respetaq bautizasqa Testigollawanmi casarakuna. Jehová Diosta munakuqqa yanapawasunmi tukuy tiempo Diospaq hunt’aq sonqolla kanapaq.

13. ¿Imatan Israel runakunata Jehová Dios kamachirqan?

¹³ Jehová Diosqa kusisqa kananchista munaspan kamachiwanchis payta serviq runallawan casarakunanchispaq. Paymi Israel runakunata kamachirqan: “Aman ususiykichista paykunaq churinkuwan casarachinkichischu, amallataq churiykichistapas ususinkuwan casarachinkichischu, paykunawan ama aylluntin kanaykichispaq. Mana chayqa wawaykichistan Señor Dios servinankuta waqllichinqa, hinaspa wawaykichis wak dioskunata servinqaku. Hinan Señor Diosqa qankuna contra sinchita phiñakuspa ñawi ch’ipiq-niypi ch’usaqyachisunkichis”, nispa (Deut. 7:3, 4).

14, 15. ¿Iman Salomonta pasarqan Jehová Diosta mana kasukusqanrayku?

¹⁴ Ichaqa, ¿iman pasawasunman Diosta mana serviq runawan casarakuqtinchis? Salomonta sucedesqanmi pasawasunman (Ecl. 4:13). Payqa Israel llaqtapi rey kaspan Diosmanta yachayta mañakurqan, Diostaq allin yachayta allin yuyaytawan qorqan. Chay yachaywanmi Salomonqa allin reqsisqa kapurqan. Biblian willan Salomonpa yachayninmanta uyarispa Sabá llaqtamanta reina payta visitasqanta. Paymi Salomonta nirqan: “Yachayniykipas qhapaq kayniykipas willawasqankumantaqa ancha hatunmi kasqa”, nispa (1 Rey. 10:7).

¹⁵ Chaywanpas Salomonqa Diostan mana kasukurqanchu, aswanpas Diosta mana reqsiq askha warmikunawanmi casarakurqan. ¡1.000 warmiyoqmi kapurqan! Chay warmikunaqa Salomonpa sonqontan q’ewichipurqanku. Chaymi kuraqña kashaspa Salomonqa Jehová Dios contra kapurqan (1 Rey. 11:1-6). Chay hinallapitaqmi ñoqanchispas tarikusunman. Chayraykun Diosta mana munakuq runawanqa manapuni casarakunachu.

16. ¿Imatan ruwanan mana iñiq runawan casarasqa Testigo?

 ¹⁶ Ichaqa yaqapaschá casarasqa kasqayki qhepamanña Testigo kapurqanki, parejaykitaq mana. ¿Imatan ruwawaq? Bibliaq kamachisqanta kasukuy, ninmi: “Qankunapas, casarasqa warmikuna, qosaykichista kasuychis. Ahinapin Diospa siminpi mana iñiq mayqen qosapas mana rimapayasqalla iñinqa warminpa allin purisqanta, ch’uya kawsasqanta [...] rikuspa”, nispa (1 Ped. 3:1, 2). Chay textoq nisqan hina, sichus cristiana warmi Bibliaq nisqanman hina aswan allin esposa kananpaq kallpachakunqa chayqa, yaqapaschá qosanpas Testigo kapuyta munanqa. Chaymi pasarqan askha casarasqakunawan. Chaytan mana Testigo esposayoq qharikunapas ruwananku.

17, 18. a) ¿Iman Noeta yanaparqan millp’uq paramanta salvakunanpaq? b) ¿Imaraykun ñawpa tiempopi cristianokuna salvakurqanku Jerusalén thunisqa kaqtin?

¹⁷ Mana allin amigokunaqa Jehová Diosmantan t’aqawanchis. Allin amigokunan ichaqa yanapawasun Jehová Diospaq hunt’aq sonqolla kananchispaq. Yuyarisun Noeta, paypa tiemponpiqa mana allin runakunallan karqan (Gén. 6:5). Sinchi millaymi runakuna  karqanku, chaymi Diosqa millp’uq parawan wañuchirqan. Noemi ichaqa chanin runa karqan, Jehová Diospa nisqantataq kasukurqan (Gén. 6:7-9). ¿Imatan ruwarqan hunt’aq sonqolla kananpaq?

¹⁸ Manan hayk’aqpas Jehová Diosta mana munakuq runawanqa juntakuqchu. Aswanpas esposanwan, churinkunawan, qhachuninkunawan iman karqan. Paykunawanmi arcata ruwarqan, runakunamantaq predicamurqan (2 Ped. 2:5). Chaymi millp’uq paramanta Diosqa salvarqan. Paykunamantan lliwpas paqarirqanchis. Chaymi agradecekunanchis kasukuq kasqankumanta, mana allin runakunawan mana juntakusqankumanta. Paykuna hinallataqmi ñawpa tiempo cristianokunapas kasukuq karqanku, Diosta mana munakuq runakunamanta t’aqakurqanku. Chayraykun salvakurqanku 70 watapi Jerusalén llaqta thunisqa kaqtin (Luc. 21:20-22).

19. ¿Imatan ruwananchis Jehová Diospaq hunt’aq sonqolla kananchispaq?

¹⁹ ¿Imatan ruwananchis kay tukukuy p’unchaykunapi Jehová Diospa amigon kashanallanchispaq? (1 Cor. 16:13; Prov. 13:20.) Noé hina, familian hina, ñawpa tiempopi cristianokuna hinan kananchis. ¡Ama hayk’aqpas Diosta mana munakuq runakunawanqa juntakusunchu! Aswanpas Diospa kamachisqanman hina kawsaq iñiqmasinchiskunallawanmi amigontin kananchis. Paykunan yanapawasun Diospaq hunt’aq sonqolla kananchispaq, Saqraq kamachisqan pacha thunisqa kaqtin salvakunanchispaq, paraisopi tiyananchispaqpas. Chayraykun allin amigokunata maskhananchis.