1. ¿Imaraykun iñiyniyoq kananchis? (Kay paginapi fotota qhaway.)

YAQAPASCHÁ tapukurqanki: “¿Salvawanqachu Jehová Dios manchay ñak’ariy tiempo chayamuqtin?”, nispa. Biblian nin chay tiempopi salvakunapaqqa iñiyniyoq kananchista, mana chaywanqa manan Diospa sonqonpaq hinachu kasunman (Heb. 11:6). Ichaqa manan llapa runachu iñiyniyoq kanku (2 Tes. 3:2 ). Chayraykun anchata kallpachakunanchis allin iñiyniyoq kananchispaq.

2, 3. a) ¿Imaraykun allin iñiyniyoq kananchis? b) ¿Ima tapuykunatan kay estudiopi kutichisun?

² Manchay ñak’ariy tiempon qayllaykamushanña, chayraykun “probasqa” iñiyniyoq kananchis chay hinapi salvasqa kananchispaq (leey 1 Pedro 1:7; Heb. 10:39). Chaymi anchata kallpachakunanchis sapa p’unchay allin iñiyniyoq kananchispaq. Chaypaqmi Diosmanta mañakunanchis: “¡Yanapaykuway astawanraq iñinaypaq!”, nispa (Mar. 9:24). Otaq Jesusmanta mañakuq apostolkuna hina, Diosmanta mañakunanchis: “Astawan iñinaykupaq yanapaykuwayku”, nispa (Luc. 17:5).

³ Kay estudiopin kinsa tapuykunata kutichisun. Chaykunan: ¿Imaynapin allin iñiyniyoq kasunman? ¿Imaynatan  rikuchisunman allin iñiyniyoq kasqanchista? ¿Imaraykun mana iskayanchischu Jehová Dios astawan iñinanchispaq yanapawananchismanta?

4. ¿Iman yanapawasunman allin iñiyniyoq kanapaq?

⁴ Allin iñiyniyoq kananchista munaspan Jehová Diosqa Bibliapi qelqachirqan allin iñiyniyoq runakunaq vidanta (Rom. 15:4). Wakinmi Abraham, Sara, Isaac, Jacob, Moisés, Rahab, Gedeón, Baracpiwan (Heb. 11:32-35). Ichaqa yanapawasunmi kay tiempopi iñiqmasinchiskunaq iñiyninmanta yachaypas. *

5. a) ¿Imaynatan Elías rikuchirqan allin iñiyniyoq kasqanta? b) ¿Imatan tapukunanchis?

⁵ Biblian willan Eliasmanta, payqa allin iñiyniyoqmi karqan. ¿Imaynatan rikuchirqan allin iñiyniyoq kasqanta? Huk kutinmi rey Ahabman willarqan para mana kananmanta. Eliasqa seguron kasharqan chay hunt’akunanmanta Jehová Diospa nisqanrayku (1 Rey. 17:1). Hinaspapas Eliasqa confiarqanmi paraq mana kasqan tiempopi Diospa yanapananmanta (1 Rey. 17:4, 5, 13, 14). Chaymantapas Eliasqa confiarqanmi viudaq churinta Diospa kawsarichipunanpi (1 Rey. 17:21). Confiallarqantaqmi Carmelo orqopi sacrificio haywasqanman Jehová Dios ninata kachaymunanpi (1 Rey. 18:24, 37). Hinaspapas Eliasqa confiarqanmi yapamanta Diospa parachinanpi, chaymi Ahabta nirqan: “Phaway mikhuq ukyaq, para kunununuymi uyarikushanña”, nispa (1 Rey. 18:41). Chay hina iñiyniyoqmi Eliasqa karqan. Ñoqanchisri, ¿chhayna allin iñiyniyoqchu kanchis?

6. ¿Imatan Diosmanta mañakunanchis allin iñiyniyoq kanapaq?

⁶ Allin iñiyniyoq kanapaqqa santo espiritutan Diosmanta mañakunanchis. Chay santo ‘espirituq rurusqanmi’ iñiyqa (Gál. 5:22, MR). Jesusmi niwarqanchis Diosmanta santo espiritunta mañakunanchispaq, mañakuqtinchis qowananchistapas (Luc. 11:13).

7. ¿Imatan ruwananchis allin iñiyniyoq kashanallapaq?

⁷ Allin iñiyniyoqña kashanchis chayqa, cuidashanallanchismi. ¿Imarayku? Iñiyqa nina hina kasqanrayku. Ninaqa wañupunmi llant’ata mana yapaqtinchisqa. Chay hinallataqmi iñiyninchiswanpas pasan, mana chiriyapunanpaqqa sapa p’unchaymi Bibliata leenanchis, estudiananchis ima. Chhaynapin astawan Jehová Diosta munakusun, astawan Bibliaq nisqanta kasukusun, allin iñiyniyoq kasqanchistataq cuidasun.

8. ¿Iman yanapawasun allin iñiyniyoq kashanallapaq?

 ⁸ Allin iñiyniyoq kashanallapaqqa manan chayllaraq Bibliata estudiashaspa yachasqanchiswanchu contentakunanchis (Heb. 6:1, 2). Aswanpas estudiananchismi profeciakunaq imayna hunt’akusqanmanta, chaymi yanapawasun allin iñiyniyoq kashanallanchispaq. Chaymantapas Bibliata estudiaspan reparananchis iñiyninchispi allinchus icha manachus kashasqanchista (leey Santiago 1:25; 2:24, 26).

9, 10. a) ¿Imaynatan iñiqmasinchiskuna yanapawanchis aswan allin iñiyniyoq kanapaq? b) ¿Imaynatan huñunakuykuna yanapawanchis aswan allin iñiyniyoq kanapaq? c) ¿Imaynatan predicación yanapawanchis aswan allin iñiyniyoq kanapaq?

⁹ Apóstol Pablon iñiqmasinkunata nirqan: “Iñiyniykichismi kallpachawanqa, ñoqaq iñiyniytaq qankunata kallpachasunkichis”, nispa (Rom. 1:12). Chaypi nisqan hina, iñiqmasinchiskunan yanapawasun iñiyninchispi aswan allin kanapaq, astawanqa sinchi sasachakuykunapi tarikuspa hunt’aq sonqolla kaqkuna (Sant. 1:3). Allin amigokunaqa aswan allin iñiyniyoq kananchispaqmi yanapawanchis, mana allin amigokunataq iñiyninchista chiriyachin (1 Cor. 15:33). Chaymi Bibliaqa kamachiwanchis huñunakuykunaman ama faltakunanchispaq, chaypin hukkuna-hukkunawan kallpachanakunchis (leey Hebreos 10:24, 25). Chaymantapas huñunakuykunapi yachasqanchismi yanapawanchis iñiyninchispi aswan allin kanapaq. Sichus Bibliamanta astawan yachasun chayqa, astawanmi iñisun (Rom. 10:17). Chaymi tapukunanchis: “¿Mana p’itiytachu huñunakuykunaman rini?”, nispa.

¹⁰ Hinaspapas predicacionmi yanapawanchis aswan allin iñiyniyoq kanapaq. Predicaspan yachanchis ñawpa cristianokuna hina Jehová Diospi confiayta, valiente runa kaytapas (Hech. 4:17-20; 13:46).

11. a) ¿Imaraykun Josuewan Calebwan allin iñiyniyoq karqanku? b) ¿Imaynapin paykuna hina kasunman?

¹¹ Chaymantapas mañakusqanchisman Diospa kutichimusqanta, yanapawasqanchistawan rikuspan aswan allin iñiyniyoq kasun. Chaymi pasarqan Josueta Calebtawan. Paykunaqa Diospa prometesqan hallp’ata qhawaq rispaqa allin iñiyniyoq kasqankutan rikuchirqanku. Watakunaq pasasqanman hinan astawan rikurqanku Diospa yanapayninta, astawantaq paypi iñirqankupas. Chaymi Josueqa Israel runakunata nirqan Diosqa llapa promesankuna hunt’asqanta. Nillarqantaqmi: “Kunanqa Señor Diosta manchakuychis hinaspa yupaychaychis [...]. Ñoqaqa familiantinmi Señor Diosllatapuni servisaqku”, nispa (Jos. 23:14; 24:14, 15). Ñoqanchispas Jehová Diospi confiaspaqa  yanapaynintan rikusun, chhaynapin allin iñiyniyoq kasun (Sal. 34:8).

12. ¿Imaynatan rikuchisunman allin iñiyniyoq kasqanchista?

¹² Discípulo Santiagon nirqan: ‘Allinkaqta ruwaspan iñiyniyta rikuchisaq’, nispa (Sant. 2:18). Chaypi nisqan hina, allin iñiyniyoq kasqanchistaqa ruwasqanchiskunawanmi rikuchinanchis. ¿Imakunata ruwaspan allin iñiyniyoq kasqanchista rikuchisunman?

13. ¿Imaraykun predicaspa rikuchinchis allin iñiyniyoq kasqanchista?

¹³ Allin iñiyniyoq kasqanchistan rikuchisun predicaspa. Chhaynapin confianchis ‘tiemponpipuni’ kay pacha tukukunan kasqanta (Hab. 2:3). Iñiyninchispi allin kasqanchista yachanapaqqa tapukunanchismi: “¿Ancha importantepaqchu predicacionta qhawarini? ¿Tukuy imatachu ruwani llapa runaman predicanaypaq?”, nispa (2 Cor. 13:5). Sichus kallpachakusun predicanapaq chayqa, allin iñiyniyoq kasqanchistan rikuchisun (leey 2 Corintios 4:13).

14, 15. a) ¿Imaynatan allin iñiyniyoq kasqanchista rikuchisunman problemakuna kaqtin? b) ¿Imaynatan Rebecapas qosanpas rikuchirqanku allin iñiyniyoq kasqankuta?

¹⁴ Hinaspapas allin iñiyniyoq kasqanchistan rikuchisun problemakunata aguantaspa. Sichus qolqewan pisichikunchis, onqonchis, pisi kallpa kashanchis, sinchi llakiq ñit’isqan tarikushanchis otaq huk sasachakuykunapipas chayqa, Jehová Diospas Jesuspas ‘yanapaykuwananchispin’ confiananchis (Heb. 4:16).  Jehová Diosta yanapawananchispaq mañakuspaqa, paypi iñisqanchistan rikuchishanchis. Jesusmi niwarqanchis “sapa p’unchay t’antaykuta qowayku” nispa mañakunanchista (Luc. 11:3). Biblian willawanchis Israel llaqtapi mikhuna mana tarikushaqtin Eliasta Dios mikhuchisqanta, ukyachisqantapas. Ninmi: “Alqamarikunan sapa paqar ch’isintawan aychata t’antatawan aparqanku. Unutataq mayumanta ukyarqan”, nispa (1 Rey. 17:3-6). Ñoqanchispas confiananchismi necesitasqanchista Jehová Dios qowananchispi.

¹⁵ Sichus Bibliaq niwasqanchista kasukusun chayqa, Diosqa manan faltachiwasunchu familianchista uywananchispaq. Chaymi pasarqan Asia ladomanta Rebeca cristianawan. Qosanmi repararqan Dioswan amigontin kananpaq llank’anan mana yanapashasqanta, chaymi saqepurqan. Paykunaqa Mateo 6:33 textoq nisqanta kasukuspan Diospa gobiernontaraq ñawpaqman churarqanku, Proverbios 10:4 textoq nisqanman hinataq anchata llank’arqanku tawa wawankuta mantenenankupaq. Hinan mikhunata vendeyta qallarirqanku. Rebecan nin: “Askha watakunañan mikhunata vendeshayku,  Jehová Diosqa necesitasqaykutan qowanku”, nispa. ¿Hayk’aqllapas chay hinapi tarikurqankichu?

16. ¿Imatan Dios ruwanqa paypi confiaqtinchis?

¹⁶ Jehová Diospi confiasun paypa nisqantataq ruwasun chayqa, manan hayk’aqpas saqerpariwasunchu. Biblian nin: “Chanin runaqa iñiyllawanmi kawsanqa”, nispa (Gál. 3:11; Hab. 2:4). Nillantaqmi Diosqa ‘mañakusqanchismantapas yuyaykusqanchismantapas aswan askhataraq tukuy imatapas atiyninwan ruwapuwasqanchista’ (Efes. 3:20). Ñoqanchistaq tukuy atisqanchista ruwananchis Diosta servinanchispaq, ichaqa manan llapantapunichu ruwayta atisun. Chaywanpas kallpachakusun chayqa, Diosmi bendeciwasun. ¡Maytan agradecekunchis yanapawasqanchismanta!

17. a) ¿Imaynatan Jesús apostolninkunaman kutichirqan astawan iñiyta mañakuqtinku? b) ¿Imaynapin yachanchis astawan iñinanchispaq Diosmanta mañakuqtinchis yanapawananchista?

¹⁷ Kay estudiopi yachasqanchis hina, yaqapaschá ñoqanchispas apostolkuna hina mañakusun, paykunan Jesusta nirqanku: “Astawan iñinaykupaq yanapaykuwayku”, nispa (Luc. 17:5). Chaymi Jesusqa 33 watapi pentecostés fiestapi santo espirituta paykunaman qorqan. Chhaynapin aswan allinta entienderqanku Diospa munayninta, chaymi allin iñiyniyoq kapurqanku. Hinaspan mana hayk’aq predicasqankuta hina lliw llaqtakunapi predicarqanku (Col. 1:23). Kunanpas Jehová Diosqa prometewanchismi “munayninman hina” imatapas mañakuqtinchisqa qowananchista (1 Juan 5:14). Chaymi yachanchis astawan iñinanchispaq mañakuqtinchisqa yanapawananchista.

18. ¿Imaynatan Jehová Dios bendicen allin iñiyniyoq kaqkunata?

¹⁸ Sichus Jehová Diospi tukuy sonqonchiswan confiasun chayqa, bendeciwasunmi yanapawasuntaqmi astawan iñinanchispaq. Chhaynapin Diospa gobiernonpi tiyananchispaq hina kasunchis (2 Tes. 1:3, 5).