Jehová Diosqa qespichiqninchismi

‘Jehová Diosmi [...] yanapawasunpas qespichiwasunpas.’ (SAL. 37:40.)

1, 2. ¿Imamanta yachasqanchismi anchata kallpachawanchis?

LLANTHUQA Hallp’aq muyusqanman hinan cambian. Kay Hallp’ata Intitapas kamaqmi ichaqa mana hayk’aqpas cambianchu (Mal. 3:6). Chayrayku Biblia nin: “Payqa manan cambianchu, manataqmi llanthu hinachu kuyuykachanpas”, nispa (Sant. 1:17). Chayta yachayqa anchatan kallpachawanchis, astawanqa sasachakuykunapi tarikuqtinchis. ¿Imarayku chayta ninchis?

² Ñawpaq estudiopin yacharanchis Jehová Dios ñawpaq tiempopi serviqninkunata qespichisqanta (Sal. 70:5). Diosqa manan cambianchu hunt’antaqmi rimasqantapas, chaymi ñoqanchispas mana iskayaspa confianchis yanapawananchispi cuidawananchispipas (Sal. 37:40). ¿Imaynatan Jehová Dios kay tiempopi llaqtanta cuidan? ¿Imaynatan sapanka serviqninkunatapas cuidan?

Enemigonchiskunamanta librawanchis

3. ¿Imaraykun runakuna mana hayk’aqpas qolluchinqakuchu cristianokunaq predicasqanta?

³ Imataña ruwaspapas Satanasqa manan hayk’aqpas qolluchinqachu Jehová Dios serviyninchista. Biblian nin: “Manan ima ruwasqa armapas imanasunkipaschu, llapa huchachaqniykitapas upallachinkin”, nispa (Isa. 54:17). Diospa llaqtan contra hatariq runakunan cristianokunata hark’ayta munaranku manaña predicanankupaq, ichaqa manan atirankuchu. Chaymanta yachanapaq iskay ejemplota qhawarisunchis.

4, 5. ¿Ima sasachakuykunapin Diospa llaqtan 1918 watapi tarikuran? ¿Imaynapin tukuran?

⁴ 1918 watapin cristianon kayku niq religionpi umalliqkuna Diospa llaqtan contra hatariranku predicacionta qolluchinankupaq. 7 p’unchay mayo killapin Estados Unidosmanta gobierno ordenta apachiran J. F. Rutherford iñiqmasinchista yanapaqninkunatawan presota hap’inankupaq, chay tiempopiqa paymi Diospa llaqtanpi umallisharan. Yanqamantan tumparanku, gobiernoq contranpin hatarinku, nispa. Manaraq iskay killapitaq mana kaqmanta juzgaspanku J. F. Rutherford iñiqmasinchista yanapaqninkunatawan condenaranku askha watakuna carcelpi wisq’asqa kanankupaq. Chhaynaqa, ¿atinkumanchu religionpi umalliqkuna  predicacionta wiñaypaq qolluchiyta? Manapunin.

⁵ Jehová Diosmi prometeran: “Manan ima ruwasqa armapas imanasunkipaschu”, nispa. Isqon killa qhepatan 1919 watapi 26 p’unchay abril killapi mana piensaylla Rutherford iñiqmasinchista yanapaqninkunatawan pisi tiempollapaq carcelmanta kacharimuranku. 1920 watapitaq 5 p’unchay mayo killapi manaña imamantapas tumparankuñachu. Kay iñiqmasinchiskunaqa carcelmanta lloqsispa hinan usqhaylla llank’ayta qallariranku astawan Reinomanta predicakunanpaq. ¿Imaynapin tukuran kallpachakusqanku? Jehová Diosqa anchatan bendeciran kallpachakusqankuta, chaymi kunanqa pachantinpi yaqa qanchis millonña Diosta servishanchis (1 Cor. 3:7).

6, 7. a) ¿Imaynatan Alemania nacionpi Diospa testigonkunata trataranku? ¿Atiranchu Hitler predicacionta qolluchiyta? b) ¿Imatan yachanchis kay tiempopi Jehová Dios llaqtanta qespichisqanmanta?

⁶ Alemania nacionpi sucedesqanmantañataq yachasunchis. 1934 watapin Adolf Hitler juraran Jehová Diospa testigonkunata ch’usaqyachinanpaq. Chaymi askha iñiqmasinchiskunata carcelpi wisq’aranku; sinchita llank’achisqanku cheqaskunapitaq waranqanpi Testigokunata khuyayta ñak’arichiranku, iskay pachak phisqa chunka más Testigokunatataq wañuchiranku. ¿Atiranchu Hitler Jehová Diospa testigonkuna ch’usaqyachiyta? ¿Qolluchiranchu Alemania nacionpi allin willakuykuna predicakunantapas? ¡Manan atiranchu! Qatiykachashaqtinkupas iñiqmasinchiskunaqa pakallapin predicasharanku. Hitlerpa gobiernon tukupuqtintaq manaña qatiykachasqa kaspanku astawanraq predicaranku. Kunanqa pachak soqta chunka phisqayoq waranqa más Testigokunañan chay nacionpi predicashanku. Arí, qespichiwaqninchis Diosqa “manan ima ruwasqa armapas imanasunkipaschu” nispa prometesqantan hunt’aran.

⁷ Kay tiemponchispi chhaynata Jehová Dios llaqtanta qespichisqanpin kayta yachanchis: Diosqa manan hayk’aqpas permitinqachu llaqtan ch’usaqyachisqa kananta (Sal. 116:15). Ichaqa, ¿imanisunmantaq sapanka Dios serviq cristianokunamanta? ¿Imaynatan Jehová sapankanchista yanapawanchis?

¿Cuidawasunmanchu mana imapas sucedewananchispaq?

8, 9. a) Diosqa manapaschá librawasunmanchu peligropi tarikuqtinchis, ¿imaynapin chayta yachanchis? b) ¿Imatan yuyarinanchis?

⁸ ¿Cuidawasunmanchu Jehová Dios kay tiempopi mana imapas sucedewananchispaq? Diosqa manan chaytaqa prometeranchu. Chayraykun ñoqanchispas ñawpaq tiempopi kinsa hebreo waynakuna hina yuyaykunchis, paykunaqa manan munarankuchu rey Nabucodonosorpa sayarichisqan ídolo yupaychayta. Khaynatan rey Nabucodonosorta niranku:  ‘Diosniykuqa atiyniyoqmi makiykimanta qespichiwanankupaq, manaña qespichiwanqaku chaypas manan diosniykikunataqa yupaychasaqkuchu’, nispa (leeychis Daniel 3:17, 18). Diosmi ichaqa rawrashaq hornopi wañunankumanta qespichiran (Dan. 3:21-27). Ichaqa kaytan yachananchis: ñawpaq tiempopipas Diosqa maynillanpin serviqninkunataqa milagrota ruwaspa qespichiran, askha Dios serviqkunan enemigonkuq wañuchisqan karanku (Heb. 11:35-37).

⁹ ¿Imanisunmantaq kay tiempomantari? Qespichiqninchis Diosqa atiyniyoqmi pi munasqantapas qespichinanpaq. Ichaqa pipas ima peligromantapas librakunman chayri, ¿asegurasunmanchu Jehová Diosmi paytaqa libraran nispa? Manan. Ichaqa, sichus pipas ninman: Jehová Diosmi chay peligromantaqa milagrota ruwaspa librawaran nispa chayqa, manan imaraykupas nisunmanchu manan chayqa cheqaqchu nispaqa. Ichaqa kaytan yuyarinanchis: askha cristianokunan imaynapi tarikuspapas millayta wañuranku otaq qatiykachasqa kaspa, imaynan Alemania nacionpipas sucederan hinata (Ecl. 9:11). ¿Nisunmanchu Diosqa manan paykunataqa cuidaranchu nispa? Manan.

10, 11. ¿Imamantan runakuna mana ayqeyta atisunmanchu? Ichaqa, ¿imatan Jehová Dios ruwanqa?

¹⁰ Runakunaqa manan wañuymanta ayqeyta atisunmanchu, manan pi runapas ‘wañuy-pachaq [“Sheolpa”, NM] atiyninmantaqa kawsayninta kacharichinmanchu’, Sheolqa llapa wañupuqkunaq kasqanmi (Sal. 89:48). ¿Jehová Diosri kacharichiwasunmanchu wañuymanta? Alemania nacionpi Testigokuna qatiykachasqa kashaqtinkuqa askhan wañuranku, chay iñiqmasinchiskunaq wañusqanmanta consolananpaqmi huk hermananchista mamitan khaynata nisqa: “Sichus Jehová Dios wañuymanta runakunata mana kawsarichiyta atinmanchu chayqa, wañuychá paymanta aswan atiyniyoq kanman”, nispa. Diosmantan kawsayqa paqarimun chaymi wañuyqa mana tukuy atiyniyoq Diosmanta aswan atiyniyoqchu kanman (Sal. 36:9). Sheolpi otaq Hadespi kaqkunaqa llapallanmi Diospa yuyarisqan kanku, chaypi kaqkunatan Diosqa kawsarichimpunqa (Luc. 20:37, 38; Apo. 20:11-14, NM).

¹¹ Ichaqa kunan tiempopipas qespichiqninchis Diosqa yanapashanmi serviqninkunataqa. ¿Imaynatan yanapawanchis? Chaymanta yachasunchis qatimuq parrafokunapi.

Yanapawanchis paywan allinpi kananchispaq

12, 13. Diosqa yanapawanchismi paywan allinpi kananchispaq, ¿imaraykun chay yanapaynin aswan importante? ¿Imaynatan Dios yanapawanchis paywan allinpi kananchispaq?

¹² Jehová Diosqa yanapawanchismi paywan allinpi kananchispaq, chay yanapayninmi aswan importanteqa. Cristianokunaqa Dioswan allinpi kasqanchistan aswan chaniyoqpaqqa qhawarinchis (Sal. 25:14; 63:3). Manachus Dioswan allinpi kasunman chayqa, manan imapaqpas valenmanchu kay tiempopi kawsasqanchisqa, manataqmi wiñay kawsaytapas suyakusunmanchu.

¹³ Jehová Diosqa lliw necesitasqanchistan qowanchis paywan allinpi kananchispaq. Payqa Simin Qelqawan, santo espiritunwan, llaqtanwan iman yanapawanchis. ¿Imatan ruwananchis chaykunawan allinta yanapachikunanchispaq? Simin Qelqatan tukuy yuyaywan sapa kutilla estudiananchis, chayta ruwasun chayqa, allin iñiyniyoqmi kasunchis, manataq iskayasunchu hamuq tiempopaq suyakuyninchismantapas (Rom. 15:4). Chaymantapas, sichus Diosmanta mañakusun santo espiritunta qowananchispaq chayqa, atisunmi mana allin ruwaykunamanta ayqeyta (Luc. 11:13). Allin yuyayniyoq hunt’aq kamachi qelqakunapi, huñunakuykunapi, hatun huñunakuykunapipas niwasqanchisman hina ruwaspapas, allin alimentasqan kasunchis ‘tiempollanpi mikhuna qowasqanchiswan’ (Mat. 24:45). Llapa chaykunawanmi Diosqa yanapawanchis paywan allinpi kananchispaq (Sant. 4:8).

14. ¿Imaraykun Dioswan allinpi kay aswan importante? Huk experienciata willay.

¹⁴ Arí, Diosqa paywan allinpi kananchispaqmi astawanqa yanapawanchis, chaymanta huk  experienciata qhawarisunchis. Ñawpaqkaq estudiopin qallariy parrafopi rimaranchis huk tayta mamaq ususinku qonqaylla chinkapusqanmanta, chayrayku paykunaqa sinchi llakisqa kasharanku. Chay qhepallamanmi yacharanku ususinku Theresa wañuchisqa kasqanta. * Theresaq taytanmi khaynata willakun: “Ñoqaqa Jehová Diosmantan mañakurani ususiyta cuidananpaq [...]. Wañuchisqa kasqanta yachaspaymi tapukurani: ¿Imaraykun Dios mana mañakusqayta uyariwaranchu? nispa. Yacharanin Diosqa mana milagrota ruwaspachu sapanka serviqninkunata librasqanta, chaywanpas mañakushallaranin imaynata ususiyta cuidaran chayta entiendenaypaq. Diosqa paywan allinpi kananchispaqmi yanapawanchis, chayta entiendesqaymi anchata consolawaran. Chhayna cuidawasqanchismi aswan importanteqa, sichus Dioswan mana allinpichu kasunman chayqa, manan ima suyakuyninchispas kanmanñachu. Diosqa cuidaranmi Theresata, ¿imaynata? Payqa wañupunankamapas hunt’aqmi Diospaq karan. Qhepa tiempoman kawsarimpunanqa Diospa makinpiñan kashan, chayta entiendeqtiymi sonqoy tiyaykuran”, nispa.

Onqoshaqtinchis kallpachawanchis

15. ¿Imaynatan Jehová Dios yanapawasunman onqoshaqtinchis?

¹⁵ Jehová Diosqa ‘nanaywan puñunapi kashaqtinchispas’ kallpachawasunmanmi, imaynan Davidtapas kallpacharan hinata (Sal. 41:3). Manaña milagrota ruwaspachu onqoyninchismanta qhaliyachiwasun chaypas, hukniraymantan yanapawanchis. Bibliaq yachachikuyninkunan yanapawasunman imayna hampichikuyta allinta decidinanchispaq (Pro. 2:6). Chaymantapas Qhawaq, ¡Despertad! nisqa revistanchiskunapin willakushan wakin onqoykuna imayna kasqanta imayna hampinatapas, chaykunapas yanapawasunmanmi. Diosqa santo espiritunwanmi ‘hatun atiyta’ qowasunman onqoyninchista aguantananchispaq imaynapiña tarikuqtinchispas payta hunt’aq sonqowan servinanchispaqpas (2 Cor. 4:7). Chhaynapin mana nishutachu llakikusun onqoyninchismanta, mana chayqa Diosmantan karunchakapusunman.

16. ¿Imaynatan huk iñiqmasinchis onqoyninta aguantan?

¹⁶ Ñawpaq estudiopin rimallaranchistaq sinchi onqosqa hermanonchismanta. 1998 watapin payta niranku: Esclerosis lateral amiotrófica nisqa onqoyniyoqmi kanki, nispa, chay onqoywanmi pisi-pisimanta llapan cuerpon wañupuran. * ¿Imaynatan chhayna onqoyniyoq kashaspapas kallpachakuran? Paymi willakun: “Mayninpi sinchi nanaywan llakikuywan kaspaymi nirani, wañupullaymanña kay onqoywan amaña sufrinaypaq, nispa. Manaña atispayqa Diosmantan mañakuni mana sinchita llakikunaypaq, pacienciakunaypaq, aguantanaypaqpas.  Jehová Diosqa mañakusqayman hinan yanapawan. Mana llakikuspa allinlla kashaspayqa allin kaqkunapin yuyaykuni, ejemplopaq Paraisopi, chaypiqa atisaqmi puriyta, sumaqtan mikhusaq, familiaywanpas hukmantan rimasaq. Kay onqoywan cuerpoy pisi-pisimanta imayna wañupusqanta aguantanaypaqqa ancha pacienciayoqmi kanay. Onqoyniyta pacienciawan aguantasqaymi yanapawan Diosta tukuy sonqowan servishanallaypaq paymanta ama karunchakunaypaqpas. Jehová Diosqa Davidta hinan ñoqatapas kallpachawan onqoywan nanaypi kashaqtiy”, nispa (Isa. 35:5, 6).

Necesitasqanchistan qowanchis

17. ¿Imatan Jehová prometewanchis? Ichaqa, ¿imatan ruwananchis?

¹⁷ Jehová Diosqa prometewanchismi kawsananchispaq necesitasqanchista qowananchispaq (leeychis Mateo 6:33, 34; Hebreos 13:5, 6). Ichaqa chaywanqa manan nishanchischu imapas necesitasqanchista milagrota ruwaspa Dios qowananchista otaq manaña llank’ananchistapas (2 Tes. 3:10). Jehová Diosqa qowasunpunin kawsananchispaq necesitasqanchista, sichus Reinonta ñawpaqman churaspa imapipas tukuy atisqanchista llank’asun chayqa (1 Tes. 4:11, 12; 1 Tim. 5:8). Diosqa mana piensayllan yanapawasunman; yaqapaschá huk iñiqmasinchispa sonqonta kuyurichinman llank’anata qowananchispaq otaq hukniraymantapas yanapawananchispaq.

18. Jehová Diosqa qowanchismi necesitasqanchista, chaymanta huk experienciata willay.

¹⁸ Ñawpaq estudiopin rimaranchis necesidadpi tarikuq hermananchismanta. Huk llaqtaman astakapuqtinmi mana llank’anata tariranchu. Paymi willakun: “Tutamantanmi predicaq lloqsiq kani, tardentataq llank’anata maskhaq kani. Huk kutinmi tiendata rirani leche rantikuq, verdurakunatawanmi rantikuyta munarani ichaqa manañan qolqey karanchu. Manan hayk’aqpas chay kuti hinaqa sinchita llakikuranichu. Wasiyman chayaspaymi ichaqa admirakurani, patioypin askha bolsakuna imaymana clase verdurakunayoq kashasqa. Askhallañan kasqa killan-killan mikhunaykupaqraq. Waqaspayraqmi Jehová Diosta agradecekurani”, nispa. Kay hermanaqa chaymantañan yacharan huk huertayoq hermanonchis chay bolsakuna saqesqanta. Hinan payqa chay hermanoman khaynata qelqaran: “Anchatan agradecekuyki verdurakuna apamuwasqaykimanta, Jehová Diostapas anchatan agradecekuni yanapawanaykipaq sonqoykita kuyurichisqanmanta, chaywanmi Diosqa yuyarichiwan ancha munakuwasqanta”, nispa (Pro. 19:17).

19. ¿Imamantan mana iskayasunchu manchay ñak’ariy tiempo chayamuqtin? ¿Imatan ruwananchis chay p’unchay chayamunankama?

¹⁹ Ñawpaq tiempopi, kay tiempopipas Jehová Dios serviqninkunata yanapasqanqa kallpachawanchismi paypi confiananchispaq, Diosqa manan pay sonqo runakunataqa hayk’aqpas saqerparinqachu. Satanaspa kamachisqan pachamanqa ñan chayamunqaña manchay ñak’ariy, chay tiempopiqa anchatan necesitasun Diospa yanapayninta. Diosta tukuy sonqowan serviqkunaqa mana iskayaspan payman achhuykusunchis qespichiwananchispaq, kusikuywantaq qhawasunchis Diospa kacharichiwananchis tiempo chayamusqanta (Luc. 21:28). Chhaynaqa, chay p’unchay chayamunankama ima sasachakuykunaña kaqtinpas tukuy sonqonchiswan Diospi confiashallasun. Jehová Diosqa manan cambianchu paytaqmi qespichiqninchispas chaytaqa amapuni hayk’aqpas qonqasunchu.

[Uranpi willakuykuna]

¿Yuyarishankichu?

• ¿Imaynatan Jehová Dios wañupuqkunata qespichin?

• Jehová Diosqa paywan allinpi kananchispaqmi yanapawanchis, ¿imaraykun chay yanapaynin aswan importante?

• Jehová Diosqa prometewanchismi imachus necesitasqanchista qowananchispaq, ichaqa ¿imatan sapankanchis ruwananchis?

[Tapuykuna]

[12 paginapi foto]

1918 watapin Rutherford iñiqmasinchista yanapaqninkunatawan carcelman wisq’aranku. Qhepamanmi ichaqa libre lloqsipuranku yanqamanta tumpasqanku sut’inchakapuqtin

[14 paginapi foto]

Jehová Diosqa kallpachawasunmanmi ‘nanaywan puñunapi kashaqtinchis’