Kay revista leeqkunaq tapukuynin

¿Diospa qhaliyachisqanchu kanku milagrowan hampisqa runakuna?

Jehová Diosqa atiyniyoqmi onqosqakunata qhaliyachinanpaq, munaspaqa qonmanmi chay atiyta kamachinkunamanpas. Apostolkunaq tiemponpin chayta ruwaran santo espiritunpa yanapayninwan. Chaymi apóstol Pablo kayta niran: “Diosmi sapankaman rikuchin Santo Espirituq atiynin paypi kashasqanta llapankuq allinninpaq. Wakinmanmi Santo Espíritu qon yachaywan kusa rimayta.[...] Wakinmanmi qon onqosqakuna qhaliyachiy atiyta. [...] Wakinmanmi qon profetizay atiyta. [...] Wakinmanmi qon mana yachasqa simikuna rimayta”, nispa (1 Corintios 12:4-11).

Ichaqa Corinto llaqtapi tiyaq cristianokunaman qelqasqan cartallapitaqmi Pabloqa willaran chay ruwaykuna manaña kananmanta. Khaynatan niran: “Profetizaykunan ichaqa tukukapunqa, mana yachasqa simi rimaykunapas manan kanqañachu, yachaypas tukukapunqan”, nispa (1 Corintios 13:8).

Jesucristopas apostolninkunapas imaymana milagrokunatan ruwaranku. ¿Imaraykun chaykunata ruwaranku? Chay milagrokuna ruwasqankuwanmi Jehová Diosta hatuncharanku, chaymantapas chay milagrokuna ruwasqankupin rikuchiranku chay tiempopi chayllaraq rikhurimuq iñiq t’aqa Diospa llaqtan kasqanta. Qhepamanmi ichaqa reqsichikunanku karan allin iñiq kasqankuwan, suyakuyninkuwan, munakuyninkuwan ima, manañan milagrokunata ruwaspañachu (Juan 13:35; 1 Corintios 13:13). Chaymi Jehová Diosqa pachak wata hinapaqqa manaña pimanpas ima atiytapas qoranñachu. *

Yaqapaschá tapukushanki: “¿Chhaynaqa, imaraykutaq kunanri milagrokunata ruwashanku?” nispa. Huk kutinmi periodicopi lloqsimuran cáncer onqoyniyoq runamanta willakuy. Chay runaqa umanpi, rurunninpi, tullunkunapi imas cancerniyoq kasqa, mana qhaliyananpaq hinañas kasqa. Chayllamansi paypa willakusqan hina “Dios rimapayasqa”. Chay qhepamantaqsi periodicopi willakusqan hina chay runaq onqoynin chinkarapusqa.

Chhayna willakuykunata uyrispaqa kaykunatan tapukunanchis: “¿Cheqaqchu kanman chay willakusqanku? ¿Imaninmi doctorkuna chaymanta? Cheqaqtaña qhaliyankuman chaypas, ¿imaninmi Biblia chaykunamanta? ¿Dioschu chay runakunata qhaliyachishanman?” nispa.

Chay qhepakaq tapuymantan astawanqa yacharinanchis. Chaymanta rimaspan Jesús kayta niran: “Llulla profetakunamanta allinta cuidakuychis. [...] Manan llapa “¡Señor! ¡Señor!” niwaqniychu hanaq pacha qhapaqsuyumanqa haykunqa, aswanpas hanaq pachapi kaq Yayaypa munayninta ruwaqllan haykunqa. Askhan taripay p’unchaypi niwanqaku: ¡Señor! ¡Señor! ¿Manachu qanmanta willakurqayku, sutiykipi supaykunatapas qarqorqayku, sutiykipi askha milagrokunatapas ruwarqayku? nispa. Chaymi paykunata nisaq: Manapunin reqsiykichischu, qayllaymanta anchhuriychis mana allin ruwaqkuna”, nispa (Mateo 7:15, 21-23).

Jesuspa nisqan hina kay tiempopi runakunaq milagro ruwasqanqa manan Jehová Diospa atiyninwanpunichu ruwakun. Diospa sutinpi milagro ruwaqkunaq toqllanman mana urmanapaqqa Jehová Diostan allinta reqsinanchis, allintan qhawarinanchis chay ruwasqanku allinchus kashan icha manachus chaytapas, chhaynapin yachasun pichus Diospa munaynin ruwaq kasqanta (Mateo 7:16-19; Juan 17:3; Romanos 12:1, 2).

[Uranpi willakuy]