Diosta allinta reqsiy

“Ñoqa Diosniykichisqa ch’uyan kani”

Levítico 19 capítulo

BIBLIAN Jehová Diosmanta nin: “Ch’uyay-ch’uya, ch’uyapunin Tukuy-atiyniyoq Señor Diosqa”, nispa (Apocalipsis 4:8). Chaypi nisqan hina manan pipas Jehová Dios hina ch’uyapuniqa kanmanchu. Paypiqa manan ima huchapas kanchu, manataqmi huchamanqa hayk’aqpas urmanmanchu. Chhaynaqa, ¿atisunmanchu huchasapa runakuna Dioswan allinpi kayta? Arí, atisunmanmi. Chaypaq qhawasunchis Levítico libropi 19 capitulota.

Chaypin Jehová Dios Moisesta niran: “Llapa Israel runakunata nimuy, Señor Diosmi nin: Ch’uyan kankichis, ñoqa Diosniykichis Señor Dios ch’uya kasqayrayku”, nispa (2 versículo). Chaypi rikusqanchis hina, Jehová Diosqa Israel runakunata kamachisharan ch’uya kanankupaq. ¿Mana atinankutachu chaywan mañasharan? Manan.

Jehová Diosqa manan kamachiranchu: “Ñoqa hina ch’uyay ch’uyapunin kankichis” nispaqa. Aswanmi kamachiran pay ch’uya kasqanrayku paykunapas ch’uyallataq kanankupaq. Lliwmantapas Diosllan aswan “ch’uyaqa”, chaymi mana pipas pay hinapuni ch’uyaqa kanmanchu (Proverbios 30:3). Chhaynaña kaqtinpas, paymi munan huchayoqña kaqtinchispas ch’uyata kawsananchista. ¿Imaynatan chayta ruwasunman?

Chaypaq yachasunchis Israel runakunaman Jehová Dios imatawan kamachisqanmanta. Payqa manan ch’uya kanallankupaqchu kamachiran; kamachillarantaqmi tayta mamankuta kuraq runakunatapas respetanankupaq (3, 32 versículos); mana uyariqkunata, ñawsakunata, wakchakunatawan yanapanankupaq (9, 10, 14 versículos); honrado kanankupaq, mana pimanpas sayapakuq kanankupaq (11-13, 15, 35, 36 versículos); kikinkuta hina runamasinkutapas munakunankupaqwan (18 versículo). Chay kamachikuykunata huk kamachikuykunatawan hunt’aqtinkun Israel runakunaqa ‘Diospaq t’aqasqa kankuman’ karan (Números 15:40).

Ch’uya kaymanta Diospa kamachisqanmi yachachiwanchis paywan allinpi kanapaqqa kamachikuyninkunata kasukuspa ch’uyata kawsananchis kasqanta (1 Pedro 1:15, 16). Chayta ruwasunchis chayqa, ancha sumaq kawsaytan tarisun (Isaías 48:17).

Hinallataq chay kamachikuy yachachiwanchis Jehová Dios serviqninkunapi confiasqanta. Payqa manan hayk’aqpas mañawasunmanchu mana ruway atinanchistaqa (Salmo 103:13, 14). Payqa yachanmi rikch’ayninman hina kamasqa kasqanchisrayku ch’uyata kawsay atisqanchista (Génesis 1:26). Chhaynaqa, kallpachakusun Jehová Diosta aswan allinta reqsinanchispaq.

[29 paginapi foto]

Atisunmanmi ch’uya kawsayta