Necesitanchismi santo espirituta

HATUN huchaman urmasqanraykun rey Davidqa Diosmanta rogakurqan: “Ama qayllaykimanta wikch’uwaychu, ama Santo Espirituykita qechukapuwaychu”, nispa (Salmo 51:11).

Huk kutinmi waynachallaraq kashaqtin chay espíritu payta kallpachasqa hatunkaray Goliat sutiyoq soldadota atipananpaq (1 Samuel 17:45-50). Hinallataq yanapasqa ima munay salmo takikunata qelqananpaq. Paymi nirqan: “Señor Diospa Espiritunmi ñoqanta riman, siminkunan simiypi kashan”, nispa (2 Samuel 23:2). Davidqa askha kutipin rikusqa santo espirituq yanapasqanta, chaymi manapuni munarqanchu Diospa qechukapunanta.

Señorninchis Jesucristopas nirqanmi: “Davidmi Santo Espirituq yuyaychasqan nirqan: ‘Señor Diosmi Señorniyta nirqan: Paña ladoypi tiyaykuy, chakiykiq sarunanman awqaykikunata churanaykama’”, nispa. (Marcos 12:36; Salmo 110:1). Chaypi nisqan hina, Jesusqa yacharqanmi Davidpa santo espirituq yanapayninwan chay salmo takikuna qelqasqanta. ¿Chaskikusunmanchu ñoqanchispas chay espirituta?

 “Diosmanta mañakuychis qosunkichismi”

Manaña hayk’aqpas huk salmo takita qelqasunchu chaypas, David hinan hatun pruebakunapi rikukusunman. Isabelmanta yachasun. * Qosanmi payta iskay wawayoqta wikch’upusqa huk sipas warmirayku. Manan qolqetapas qosqachu, aswanmi manu-manutaraq saqesqa. Isabelmi nin: “Sonqoypas phatarqonman karqan hinan sientekurqani chhayna wikch’uwasqanmanta. Chaywanpas Diospa santo espiritunmi allinta kallpachaykuwarqan”, nispa.

Payqa chay espiritutan necesitarqan mana pisipananpaq, wawankunata allinta uywananpaq, llakikuynintapas atipananpaqwan. Chaymi sapa p’unchay tukuy sonqo Diosta rogakurqan santo espiritunta qonanpaq. Chhaynapin kasukurqan Jesuspa: “Diosmanta mañakuychis qosunkichismi, maskhaychis tarinkichismi, waqyakuychis kicharimusunkichismi”, nispa nisqanta (Mateo 7:7).

Robertomantañataq yachasunchis. Payqa tabaco, hachís nisqa drogakunamanmi yachasqa kasqa. Iskay watañan chaykunata saqeyta munasqa, ichaqa manan atisqachu. Mayninpiña saqeyta atirqan chaypas, pisi tiempollamantaqa wakmantan chaykunaman kutipuq. Paymi willakun: “Sinchi sasapunin droga saqeyqa kasqa, ima hinallañan cuerpoyki chaykunata sapa p’unchay mañakun, manataq kallpayki kanchu cuerpoykita kamachinaykipaq”, nispa.

Paymi nillantaq: “Diospa munasqanman hinan kawsayta munarqani, reparakurqanitaqmi paypa espiritunta necesitasqayta, chaymi kallpachakurqani Bibliapi kaq yachachikuykunata sonqoyman churanaypaq, sapa p’unchaytaq Diosmanta mañakurqani santo espiritunta, chhaynapi allin kaqta ruwanaypaq. Chaymi rikurqani mañakusqayman hina Jehová Dios yanapawasqanta, astawanqa yanapawarqan wakmanta vicioman urmasqay hawa pisipasqa kaqtiymi. Diospa santo espiritunmi yanapawarqan, mana chaywanqa manan hayk’aqpas vicioykunata saqeymanchu karqan”, nispa (Filipenses 4:6-8).

‘Anka hinan phawanqaku’

Imaynan Isabeltapas Robertotapas santo espíritu yanaparqan chhaynallataqmi yanaparqan Jehová Diospa testigonkunatapas, paykunaqa askha millonñan kanku. Chay kallpawanmi Diosqa kamarqan tukuy ima kaqtapas, chayllawantaqmi qantapas yanapasunkiman. Arí, payqa qosunkimanmi chay kallpata. Chaypaqmi ichaqa tukuy sonqowan paymanta mañakunayki, paymanta cheqaq kaqta yachanayki, munasqanman hinataq kawsanayki (Isaías 55:6; Hebreos 11:6).

Diospa santo espiritunta chaskispaqa kallpatan hap’inki Diosta servinaykipaq, ima sasachakuytapas atipanaykipaqwan. Biblian khaynata nin: “[Jehová Diosqa] sayk’usqatan kallpachan, pisipaqtapas wakmantan kallpachan. [...] Señor Diospi confiakuqkunan [...] wakmanta kallpachasqa kanqaku, anka hinan phalanqaku, phawanqakun, manataqmi sayk’unqakuchu, purinqakun, manataqmi pisipanqakuchu”, nispa (Isaías 40:28-31).

[Uranpi willakuy]

[24 paginapi willakuy]

‘Reparakurqanin Diospa espiritunta necesitasqayta, chaymi sapa p’unchay Diosmanta mañakurqani. Hinan rikurqani mañakusqayman hina Jehová Dios yanapawasqanta’

 [23 paginapi dibujokuna recuadropiwan]

DIOSQA IMAYMANATAN RUWARQAN SANTO ESPIRITUNWAN

Kay pachata hanaq pachatawanmi ruwarqan. Davidmi nirqan: “Señor Diosníy, ¡mana yupay atiyraqmi ruwasqaykikunaqa! Llapallantan yachaywan ruwarqanki, kamasqaykikunan teqsimuyuntinta hunt’aykun. Kawsachiq samaywan [espirituykiwan] phukuykuqtiykin kamasqa kanku”, nispa (Salmo 104:24, 30; Génesis 1:2; Job 33:4).

Biblia qelqaqkunatan yuyaycharqan. Apóstol Pablon nirqan: “Diospa Simin Qelqakunaqa llapallanmi Diospa yuyaychasqan, chayraykun allinpuni”, nispa (2 Timoteo 3:16). Griego simipi “Diospa yuyaychasqan” nisqa simiqa “Diospa phukuykusqan” ninantan nin. Arí, Jehová Diosqa santo espiritunwanmi Biblia qelqaqkunata yanaparqan paypa “siminta” qelqamunankupaq (1 Tesalonicenses 2:13).

Serviqninkunatan yanaparqan profetizanankupaq. Apóstol Pedron nirqan: “Diospa Simin Qelqaqa manan profetakunaq yuyaykusqanman hina qelqasqachu, manataq sapankanchispa munasqanchisman hina sut’inchanapaqchu, manan hayk’aqpas profetakunaqa runakunaq munayninman hinachu rimarqanku, aswanpas paykunaqa Santo Espirituq yuyaychasqan kaspan Diosmanta rimarqanku”, nispa (2 Ped. 1:20, 21; Joel 2:28).

Jesuspas hukkunapas Diospa Gobiernonmanta willamunankupaq milagrota ruwanankupaq iman yanaparqan. Jesusmi nirqan: “Señor Diospa Espiritunmi ñoqapi kashan, wakchakunaman allin willakuykunata willanaypaqmi akllawarqan. Payqa kachamuwarqan presokunaman kacharisqa kanankuta willanaypaq, ñawsakunaman qhawarinankuta willanaypaq”, nispa (Lucas 4:18; Mateo 12:28).

 [25 fotokuna recuadropiwan]

¿IMAYNATAN SANTO ESPÍRITU YANAPAWANCHIS?

Yanapawanchismi viciokunata ima tentaciontapas atipanapaq. Apóstol Pablon nirqan: “Diosqa hunt’aqpunin. Maykamachus pruebata muchuyta atiwaqchis chaykamallan Diosqa probachisunkichis, chaypin kallpachasunkichis qaqata sayanaykichispaq, ahinapin Diosllataq yanapasunkichis chay pruebamanta lloqsinaykichispaq”, nispa (1 Corintios 10:13).

Yanapawanchismi Diospaq hina kawsanapaq. “Santo Espiritun [...] kawsayni[nchispi] ruruchin: munakuyta, q’ochukuyta, sumaq kawsayta, pacienciayoq-kayta, sumaq sonqo-kayta, allin runa-kayta, rimasqanta hunt’aq-kayta, llamp’u sonqo-kayta, cuerpo kamachiq kaytawan.” (Gálatas 5:22, 23.)

Kallpachawanchismi ima llakikuytapas aguantanapaq. “Qespichiwaqniyqa Diospunin, manan manchakunichu, paymanmi hap’ipakuni, Señor Diosmi kallpachawaqniy”, nispa (Isaías 12:2).