JESUSMI huk llaqtapi kashaspa yacharurqan amigon Lázaro onqosqanta. Payqa karupin kasharqan Lázaro panankunawan Betania llaqtapi tiyasqanku llaqtamanta. Chaywanpas, turankuta qhaliyachinanpaqmi Martawan Mariawan huk runata kacharqanku Jesusman willamunanpaq. Paykunaqa yacharqankun huk kutikunapi chhayna karumanta huk runakuna qhaliyachisqanta (Mateo 8:5-13; Juan 11:1-3).

Ichaqa manan Jesús Lazarota qhaliyachirqanchu. Biblian nin: “Iskay p’unchaytawanraq kasqanpi qhepakurqan”, nispa (Juan 11:6). ¿Imaraykun mana qhaliyachirqanchu? *... Chaymantan kunan yachasun.

Iskay p’unchay qhepamanmi Jesús apostolninkunata nirqan: “Haku Judea provinciata”, nispa. Paykunataq nirqanku: “Yachachikuq, manaraqmi unaychu Judeapi tiyaq runakunaq ch’aqeyta munasqasuykiqa, ¿chaychu Judeaman kutiwaq?” nispa. Jesustaq nirqan: “Amigonchis Lazaron puñushan, payta rikch’arichimuqmi risaq”, nispa.

Apostolkunan nirqanku: “Señor, puñushan chayqa, qhaliyanqan”, nispa. Chaymi Jesusqa paykunata sut’ita nirqan: “Lazaroqa wañupunmi”, nispa. Qhepamanmi nirqan: ‘Chaypi mana kasqaymantan kusikuni, chhaynapi qankunapas ñoqapi iñinaykichispaq, ichaqa haku payman risunchis’, nispa. Chaytan apostolkunaqa astawan mana entienderqankuchu.

Tomasmi apostolmasinkunata nirqan: “Haku ñoqanchispas paywan kuska wañunanchispaq”, nispa. Paykunaqa yacharqankun enemigonkuna Jesusta yapamanta wañuchiy munasqankuta, yaqapaschá paykunatapas wañuchiyta munallarqankutaq. Chaywanpas Jesuswan kuskan kutirqanku. Iskay p’unchay purisqanku qhepamanmi Betania llaqtaman chayarqanku, chaymantaqa kinsa kilómetro hinallañan Jerusalén llaqtaman kasharqan (Juan 11:7-18).

¿Imaraykun Jesús mana Lázaro onqosqa kashallaqtinraqchu kutirqan?... Jesusqa ñan askha runakunataña kawsarichisqa, ichaqa wañupusqanku qhepallaman (Lucas 7:11-17, 22; 8:49-56). Jesusqa tawa p’unchay Lazaroq wañupusqan qhepamanñan chayarqan. Chaywanmi llapa reqsiqnin runakuna yacharqanku Lázaro cheqaqtapuni wañupusqanta.

Jesuspa chayamushasqanta yacharuspan Martaqa phawaylla ayparqan, paywan tuparuspataq nirqan: “Señor, kaypi kashawaq karqan chayqa, turayqa manan wañunmanchu karqan”, nispa. Ichaqa sonqochananpaqmi Jesús nirqan: “Turaykiqa kawsarimpunqan”, nispa. Wasinman kutispan ñañan Mariata pakallapi nirqan: “Yachachikuqmi kaypi kashan, waqyashasunkin”, nispa.

 Wasinpi kaq amigonkuna vecinonkunan Mariaq usqhaylla lloqsisqanta rikuspa, qhepanta rirqanku “aya p’ampanatachá rishan chaypi waqaq” nispanku. Ichaqa Jesuswan tupaqmi rirqan. Mariata paywan kaq runakunatapas waqaqta rikuspan Jesuspas waqarqan. Chay qhepamanmi aya p’ampana t’oqoman rirqanku, hatun rumiwan wisq’aykusqata rikuspataq nirqan: “Rumita suchuchiychis”, nispa. Martataq nirqan: “Señorníy, asnashanñachá, tawa p’unchayñan karqon”, nispa.

Chaymi rumita suchuchirqanku, hinan Jesusqa Diosmanta mañakuspa agradecekurqan Lazarota kawsarichinanpaq atiy qosqanmanta. Kunkawan waqyaspataq nirqan: “¡Lázaro, lloqsimuy!”, nispa. ¿Iman chay qhepaman sucederqan? ¡Wañuq Lazaron lloqsimurqan! ‘Chakin makin k’uyusqa, uyanpas pañowan p’istusqata’ rikuspataq Jesús paykunata nirqan: “Paskaychis, purinanpaq”, nispa (Juan 11:19-44).

¿Kunanri entiendenkichu imaraykun Jesús mana kaqratopachachu amigon Lazarota yanaparqan?... Jehová Taytanpa atiyninta aswan allinta rikuchinanpaqmi. Arí, Jesusqa allinta yuyaykuspan chayta ruwarqan, chhaynapi aswan askha runakuna Diospi iñinankupaq (Juan 11:45). Qanrí, ¿imaynatan Jesuspa ruwasqanta qatikuwaq?...

Manan runakunata kawsarichiyta atiwaqchu, ichaqa Jesús hinan qhawariwaq imaynapin hukkunaman willawaq Diospa sumaq ruwasqanmanta, qhepaman imakuna ruwananmantapas. Willawaqmi escuelapi compañeroykikunaman profesorniykikunamanpas. Yaqapaschá escuelapi imapas yachasqaykichis tumpa Diospa Gobiernon allinkuna apamunanmanta willawaq. Chayta ruwaspan hukkunata yanapawaq, wañupuqkuna kawsarichiy munaq Diosta reqsinankupaq.