Diospa Siminmanta yachachikuykuna

¿Imaraykun Diosta reqsinanchis?

Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Imaraykun Diosta reqsinanchis?

Diosmi sumaq suyakuymanta runakunaman willan. Chay willakuyqa tarikun Diospa Siminpin. Arí, Bibliaqa huk sumaq carta hinan hanaq pachapi kaq taytanchispa apachimuwasqanchis. (Leey Jeremías 29:11.)

2. ¿Ima willakuytan Dios qowanchis?

Manan mayqen gobiernopas maqanakuyta, mana chanin kayta, onqoykunata wañuyta ima chinkachiyta atinchu. Diosmi ichaqa chanin gobiernota apamunqa, chayllan llapa runakunaq ñak’ariyninta tukuchinqa. (Leey Daniel 2:44.)

3. ¿Imaraykun kay tiempopi Diosta reqsinanchis?

Diosmi pisi tiempollamanta millay runakunata chinkachinqa. Manaraq chayta ruwashaspan waranqanpi runakunata yachachishan runamasinta munakunanpaq allinta kawsanankupaqwan. Biblian yanapawanchis sasachakuykunata atipananchispaq, kusisqa kananchispaq, Dioswan allinpi kananchispaqwan. (Leey Sofonías 2:3.)

4. ¿Piqpa yuyaychasqantaq Bibliari?

Biblian qelqasqa kashan 66 librokunapi 40 runakunataq qelqarqanku. Phisqa ñawpa librokunataqa Moisesmi qelqarqan, chay tiempomantan 3500 wataña pasan. Apocalipsis librotataq apóstol Juan qelqarqan, chaymantaqa 1900 watañan pasan. Paykunaqa manan mayqenninkupas yuyayninkutachu qelqarqanku aswanpas Diospa yuyaynintan, chaymi Bibliaqa Diospa yuyaychasqan. (Leey 2 Timoteo 3:16 ; 2 Pedro 1:21.)

¿Imaraykun chayta ninchis? Bibliapiqa k’apaqtan willawanchis hamuq tiempomanta, chaytaqa manan pi runapas willanmanchu (Isaías 46:9, 10). Willawanchistaqmi imayna Dios kasqanta. Chaymantapas Bibliaqa cambianmi runakunaq kawsayninta. Chaymi askha runakuna seguro kashanku Bibliaqa Diospa yuyaychasqan kasqanmanta. (Leey Josué 23:14 ; 1 Tesalonicenses 2:13.)

5. ¿Imatan ruwana Bibliata entiendenapaq?

Jesusqa Diospa Siminmanta allin yachachiqmi karqan. Chay tiempopaqqa askha runakunan Diospa Siminmanta yacharqanku ichaqa manan entienderqankuchu. Chayraykun paykunata yachachinanpaq huk textokunamanta rimaspa sut’inchaq. Kaypipas chhaynatan yachachisunki, ahinapi Bibliata allinta entiendenaykipaq. (Leey Lucas 24:27, 45.)

Yachaytachá munanki Diosmanta, runakuna imapaq kawsasqanchismantapas. Manan llapa runachu kusikunqa Biblia estudiasqaykimantaqa, ichaqa ancha importanten chaymanta yachay. Biblian willan Diosmanta yachaqkunalla wiñaypaq kawsanankuta. (Leey Mateo 5:10-12 ; Juan 17:3.)

Astawan yachayta munanki chayqa ¿Imatapunin Biblia yachachin? nisqa librota qhaway 2 capitulota, chaytaqa Jehová Diospa testigonkunan ruwan.