Bibliaq yanapayninwan cambianku

¿Iman huk sipasta yanaparqan tayta-mamanpa yachachisqan religionman kutinanpaq? Paymi willawasun.

“Kunanqa sumaq kawsayniyoqmi kani” (LISA ANDRÉ)

1986 WATAPIN NACERQAN

LUXEMBURGO NACIONMANTA

HUCHANMANTA KUTIRIKUQ SIPAS

ÑAWPAQPI KAWSASQAY: Bertrange llaqtaqa munay llaqtan chaypin wiñarqani. Tayta-mamayqa Jehová Diospa testigonkunan karqanku, phisqa wawankumantan chana karqani, tukuy atisqankutan ruwarqanku cristiano hina allinta wiñanaykupaq.

Wiñaspaytaqmi Testigokunaq yachichasqankumanta iskayarqani. Chaymi iñiyniy pisi-pisimanta chiriyapurqan. Tayta-mamaymi anchata kallpachakurqan allin ñanllapi kanaypaq, ñoqan ichaqa mana munarqanichu. Pakallapi huk mana kasukuq wayna-sipaskunawan phawakachayta qallarirqani. Manan munarqanichu pipas ima ruway niwanankuta chay wayna-sipaskunata hina. Fiestakunallapin puriq kayku, machaspa, drogakuspa, piwanpas puñuspa ima. Qallariypiqa aycha kusichiq runakunallawanmi puriq karqani.

Ichaqa manan kusisqachu karqani, hawan ukhullanmi imapas karqan. Puriqmasiykunamanpas manan imapas qokuqchu, ñoqamanmi ichaqa kay pachapi tukuy mana chaninkuna kasqanmanta llakichiwaq. Chaymi sapa kuti astawan llaki phutiypi tarikuq kani.

BIBLIAQ YANAPAYNINWAN CAMBIAPUNI: Chunka qanchisniyoq wataypin mamitay llakisqa sonqoyoq kasqayta qhawariwaspan niwarqan: “Hukmanta Bibliata estudiay ichaqa tukuy yuyaywanmi chaytaqa ruwanayki chaymantañan decidinki imachus ruwanaykita”, nispa. Chay niwasqanpin yuyaymanarqani. Chaymi Caroline kurak ñañay qosan Akifwan Bibliamanta yachachiwarqanku. Ñañaypa qosanqa wiñay hunt’asqa kaspañan Testigo kapusqa, chaymi mana manchakuspa paywan rimanaypaq yuyaykurqani, chay ruwasqayqa ancha allinmi karqan.

Manan Testigo hinachu kawsarqani, chay ruwasqaymi ichaqa mana ñoqallatachu ñak’arichishawarqan.  Bibliata estudiaspaymi repararqani Jehová Diospa sonqonta k’irisqayta (Salmo 78:40, 41; Proverbios 27:11). Hinallataq munasqay runakunatapas.

Bibliamanta yachasqayman hinan astawan repararqani Diospa Simin kasqanta. Profeciakuna hunt’akusqan, huk yachachiykunapiwanmi astawan reparachiwarqan. Chaykuna yachasqaymi yanapawarqan ñawpa iskayasqaykuna chinkapunanpaq.

Biblia estudiasqaymanta huk wata pasasqan qhepamanmi tayta-mamaywan rirqayku Alemania nacionta. Chaypin turay Jehová Diospa testigonkunaq sucursalninpi yanapakurqan. Payqa ancha kusisqallañan chaypi karqan, ¡chhayna kusikuytan ñoqapas munarqani! Chaypi yanapakuqkunapas llamp’u sonqo runakunan karqanku. Manan ñawpa tiempopi millay puriqmasiykuna hinachu. Kutimpusqay qhepamanmi Diosmanta tukuy sonqo mañakurqani prometerqanitaq wañunaykama payta servinaypaq. Chunka isqonniyoq wataypin Jehová Diosman qokusqayta rikuchinaypaq bautizakurqani.

KUNAN KAWSASQAY: Kunanqa yachani imapaq kawsasqayta. Anchata kusikuni hukkunaman Bibliamanta yachachispa, Jehová Dios hamuq tiempopaq sumaq kawsay apamunanmanta yachachispapas. Familiaypas thakmi kawsan manaña llakichisqaymanta.

Ñawpaqpiqa mana allinkunatan ruwarqani, ichaqa kallpachakunin chaykunata mana yuyarinaypaq. Kunanqa Jehová Diospa munakuwasqanpi pampachawasqanpipas yuyaykunin. Proverbios 10:22 texton nin: “Señor Diospa saminchayninqa [bendicionninqa] qhapaqyachinmi, chay saminchaytaqa mana llakichinchu”, nispa. Chaypi nisqanmi sonqoyta ch’allaq nichin.

[24 paginapi willakuy]

“Fiestakunallapi puriq kayku, machaspa, drogakuspa, piwanpas puñuspa ima”

[25 paginapi willakuy]

“Ñawpaqpiqa mana allinkunatan ruwarqani, ichaqa kallpachakunin chaykunata mana yuyarinaypaq”