¿Pukllaypaq hinachu qhawarina layqa ruwayta?

Sipasllaraq kashaspanmi Barbaraqa * rikhuriykunata rikuyta qallarirqan runa rimashaqta hinataq uyariq karqan. Hinaspapas wañusqa familiankunawansi rimasqa. Qosan Joaquinwanmi layqa librokunata leeqku iskayninkutaq kusata naypes qhawayta yacharqanku. Chaykunan rikuchirqan askha qolqe gananankuta chaypaq hinan negocionkupas allinta t’iqarirqan. Huk kutinmi, naypesta qhawashaspa rikurqanku mana allin runakuna wasinkuman hamunanta rikullarqankutaqmi imayna cuidakunankuta.

ÑAWPA tiempopi runakunaq ruwayninta hinaña layqa kayta qhawarinku chaypas, askha runa anchata gustasqankuraykun kunan tiempopipas mast’arikushan. Chaymi suerteyoq kanankupaq imaymanata hap’inku, tabla ouija nisqata pukllanku, layqa runakunata tapukunku imayna hamuq tiempopi tarikunankumanta chayta otaq ima mana allinmantapas cuidakunankupaq. Alemania nacionmanta Focus nisqa revistan “Luciferwan computadorakunapiwan” nisqa temapi nin: “Internetmi layqa ruwaykunata yapamanta kutichimun”, nispa.

Bibliaqa willanmi layqakuykunamanta. Chaypi nisqanta yachaspaqa yaqapaschá admirakunkiraq.

¿Ima ninmi Biblia?

Ñawpa Israel llaqtanman kamachikuy simita qosqanpin Jehová Dios nirqan: “Aman qankuna ukhupiqa mayqenpas [...] watuqpas, suerte qhawaqpas, ch’askata qhawaqpas, layqapas, mana allin espiritukunata rimachiqpas, wañuqpa alman rimachiqpas [...] kanqachu. Chay hina ruwaqkunataqa sinchitan Señor Diosqa cheqnikun”, nispa (Deuteronomio 18:10-12). ¿Imanaqtinmi Dios cheqnikun layqakunaq ruwayninta?

Bárbaraq willakusqanmi rikuchiwanchis askha runa chaykunapi creesqankuta, paykunaqa wañuqkunawan parlay atinankupaqmi yuyaykunku, wañupuqkunaq espirituntaq imaymana willasqanta. Chay creenciakunan paqarimun pantasqa religionkunamanta, paykunan yachachinku runa wañuqtinqa espiritukunaq tiyasqanman ripusqankuta. Biblian ichaqa mana chhaynatachu yachachin, aswanpas ninmi: “Wañukapuqkunan ichaqa mana imatapas yachankuchu”, nispa (Eclesiastés 9:5). Hinaspapas wañuyqa puñuywanmi rikch’anachikun, misk’ita puñuspaqa manan imatapas reparanchischu  chhaynallataqsi wañuypas (Mateo 9:18, 24; Juan 11:11-14). * Chhaynaqa, ¿imanaqtintaq runakunari ninku, wañupuqkunawan rimasqankuta? ¿Imaraykun chaykuna kan?

Espiritukunawan rimanakuymanta

Biblian willan Jesús kay pachapi kashaspa espiritukunawan tupasqanta rimasqantapas. Huk kutinmi “mana allin espíritu” Jesusta nirqan: “Reqsiykin pichus kasqaykita”, nispa (Marcos 1:23, 24). ¿Yacharqankichu espiritukuna qantapas reqsisusqaykita? Qanri, ¿imatan paykunamanta yachanki?

Manaraq runakunata kamashaspan Jehová Diosqa askha angelkunata kamarqan. Paykunaqa runakunamanta hukniraqmi kanku (Job 38:4-7; Hebreos 2:6, 7). Ancha yuyaysapa atiyniyoqtaq, Diospa munayninta ruwanankupaqmi kamasqa karqanku. Chhaynatan salmista nirqan: “¡Atiyniyoq angelninkuna, Señor Diosta saminchaychis! [...] ¡Munayninta ruwaq angelninkuna, Señor Diosta saminchaychis!” nispa (Salmo 103:20).

Bibliaq nisqan hina Diospa mana kamachisqanmi wakin angelkunaqa runakunaman rikhurirqanku. ¿Imata munaspan chayta ruwarqanku? Diosmanta karunchanankuraykun. Ñawpaqtaqa Adán Evatan huk ángel Diosmanta karuncharqan. Chaymi Saqra Satanás nisqa sutiwan kapurqan, llullakuq Diospa enemigonmanmi tukupurqan (Génesis 3:1-6).

Chay qhepamanmi wakin angelkunapas ‘hanaq pacha tiyanankuta saqespanku’ kay pachaman uraykamurqanku, runaman tukuspankutaq munay rikch’ayniyoq warmikunawan casarakurqanku (Judas 6; Génesis 6:1, 2). Chay millay angelkunan wawankunapiwan runakunata sinchita ñak’arichiqku. Paykunaq causanpin ‘pachantinpi lliw mana chanin-kay q’oñirirqan’. Diosmi ichaqa millay runakunata tukurqan millp’uq para unuwan, chaymi karqan Noepa tiemponpi. Yaqapaschá chay willakuytaqa uyarirqanki (Génesis 6:3, 4, 11-13).

Millp’uq para kasqanwanmi chay angelkunaqa runa cuerponkuta saqespa hanaq pachaman kutipurqanku. Diosmi ichaqa manaña paykunata chaskirqanchu manañataqmi allintachu qhawarirqan, chhaynapi tarikusqankuqa ‘laqhayaq ukhumanmi’ rikch’akun (2 Pedro 2:4, 5). Biblian chay mana kasukuq angelkunata sutichan “supaykuna” nispa (Santiago 2:19). Paykunaq atiyninwanmi layqakuykunata chayman rikch’akuqkunatapas runakuna ruwanku.

¿Imatan supaykuna munanku?

Supaykunaqa runakunawan parlanku Jehová Diosmanta karunchananpaqmi. Layqakuykunapi atiykuna qosqankuqa hark’anmi runakunata Diosmanta cheqaq kaqta yachanankuta, payman asuykunankutapas.

Hinaspapas supaykunaqa yupaychanatan munanku, chaytan reparanchis Satanás umallinku Jesusman ‘lliw suyukunata lliw hatun atiyninkunatawan” munachisqanpi. ¿Imata munaspan chaykunata munachirqan? ‘Qonqoriykukuspa yupaychananta’ munaspan. Jesusmi ichaqa mana hayk’aqpas munarqanchu pitapas yupaychaytaqa aswanpas Jehová Diosllatan (Mateo 4:8-10).

Manaña supaykuna kunan tiempopi uya-uya purachu runakunawan parlanku chaypas, runakunatan aysanku coca  qhawaywan, maki qhawaywan, despacho churaywan, naypeskunawan, ch’askakunata qhawaywan horoscopokunawan ima. ¡Amapuni chay trampakunapi urmaychu! Chaykunaqa manan cheqaqchu. Chay ruwaykuna runakunaman gustasqanraykun supaykunaqa Diosman asuykunankuta hark’anku. Mana chhayna kaqtintaq tukuy tiempo chay runakunata ñak’arichinku. Chhayna kashanki chayqa, ¿imatan ruwawaq paykunamanta karunchakunaykipaq?

¿Imaynatan supaykunamanta karunchakusunman?

Ama q’otuchikuychu, runakunawan rimaq espiritukunaqa Diospa enemigonkunan kanku wañuchisqa kanankupaqtaq huchachasqa karqanku (Judas 6). Paykunaqa llulla q’otukuqkunan kanku wañusqa runakunamantataq pasachikunku. ¿Imaynan sientekuwaq sichus amigoyki llulla runa mana allinniykita maskhashasqanta yachaspa? ¿Imatan ruwawaq sichus internetpi reqsisqayki runa violador kaqtin? Supaykunawan hukllachakuyqa aswan mana allinraqmi. Tukuy atisqaykitan ruwanayki paykunamanta karunchakunaykipaq. ¿Imaynatan chayta ruwawaq?

Layqakuykunata Diospa Simin huchachasqanta yachaspan Éfeso llaqtamanta runakuna layqakunanku libronkuta kanaykurqanku. Bibliaq nisqan hina askha qolqeña valeshaqtinpas ‘llapankuq qayllanpin kanaykurqanku’ (Hechos 19:19, 20). Kunan tiempopiqa manan librokunallachu, suerteyoq kanapaq cosaskunallachu nitaq tabla ouija hina pukllaykunallachu kan, aswanpas internetpiwanmi askha willakuykuna chaykunamanta mast’arikushan. Manan hap’inaykichu supaykunawan hukllachaq cosaskunataqa, llapantan wikch’upunayki.

Ñawpaqpin Joaquinmanta Barbaramantawan rimarqanchis. Paykunan naypeskunawan yacharqanku “mana allin” runakuna wasinkuman hamunanta, hinaspan naypeskuna rikuchirqan ama paykunawan parlanankuta nitaq imatapas chaskikunankutapas. Ichaqa Jehová Diospa testigonkuna Conniewan, Gudrunwan allin willakuykunamanta, cheqaq Diosmantawan rimapayaqtinkun paykunaqa uyarirqanku. Chaymantataq layqakuykunamanta rimarqanku, Testigokunataq Bibliaq ima nisqanta rikuchirqanku. Hinaspan Joaquinwan Barbarawan Bibliata estudianankupaq qheparqanku.

Paykunaqa supaykunamanta karunchakunankupaqmi decidikurqanku. Jehová Diospa testigonkunataq willarqanku millay espiritukuna ñak’arichinankumanta. Chaymi chay p’unchaymantapacha Joaquinpas Barbarapas sasachakuykunapi tarikurqanku supaykunataq paykunata ñak’arichiyta qallarirqanku. Sapa tutanmi manchakuqku, huk wasiman astakapuqtinkuñan thak sientekurqanku. Filipenses 4:13 (NM) textoq nisqanmi paykunata anchata kallpacharqan, chaypin nin: “Atiy qowaqniypa kallpachawasqanwanmi tukuy imaymanata atini”, nispa. Jehová Diosmi anchata bendecirqan kallpachakusqankumanta, supaykunataq manaña ñak’arichinkuñachu. Kunantaq Joaquinwan Barbarawan kusisqa Diosta servishanku.

Diospa bendicionninkunata chaskiy munaqkunamanmi Biblia nin: “Diostapuni kasuychis, saqraq contranpitaq qaqata sayaychis, chaymi payqa qayllaykichismanta ayqekapunqa. Diosman asuykuychis, hinan payqa asuykamusunkichis”, nispa (Santiago 4:7, 8). Tukuy atiyniyoq Diosmi yanapasunkiman supaykunamanta karunchakunaykipaq. Ñawpa kawsayninkuta yuyarispan, Joaquinwan Barbarawan Salmo 121:2 textoq nisqanman hina ninku: ‘Señor Diosmi yanapaykuwaqniyqa’, nispa.

[Uranpi willakuykuna]

[27 paginapi willakuy]

Layqa ruwaykunaqa hark’anmi Diosman asuykunanchista

[28 paginapi willakuy]

“Diosman asuykuychis, hinan payqa asuykamusunkichis.” (SANTIAGO 4:8.)