Moundsville llaqtapin nacerqani, Virginia Occidental nisqa Inti lloqsimuy wichay ladopi, Ohio mayuq qayllanpi. Ñoqaykuqa tawan karqayku kinsa qhari huk warmi, kusisqataqmi kawsarqaykupas. Tayta-mamayqa runamasinkuta munakuq, allin llank’aq, honradon karqanku. Manaña qhapaqchu karqayku chaypas kaqmi ima necesitasqaykupas. Paykunaqa Jehová Diospa testigonkunan karqanku, chaymi kallpachakurqanku huch’uychaykumantapacha Bibliamanta yachachiwanankupaq.

Wayna kapuspan tayta-mamaypa yachachiwasqanmanta karunchakapuyta qallarirqani. Manañan allin sonqowanchu qhawarirqani Bibliaq yachachisqanta. Ñoqaqa hawapi kaspa libre kaytan aswan allinpaq qhawarirqani. Chaymi manaña huñunakuykunaman ripurqanichu. Panaypas kurak wawqeypas kaqllatataqmi ruwarqanku. Tayta-mamayku tukuy atisqankutaña ruwarqanku yanapawanankupaq chaypas, manan uyarikurqaykuchu.

Manan hayk’aqllapas yuyaykurqanichu libre kay munasqay pisi-pisimanta vicioman tanqaykuwananta. Huk kutinmi escuelamanta kutipushaqtiy huk amigoy cigarrota munachiwaqtin chaskikurqani. Chaymantapachan imaymana millay ruwaykunaman urmaykurqani: drogakuyman, machayman, qhelli kawsayman ima. Tiempoq pasasqanman hinan fuerte drogakunata mallirqani, hinan chayman viciollikurqani. Qhepamanmi chay viciokunata rantinaypaq drogakuna vendeyta qallarirqani.

Imaymanataña ruwarqani kusisqa kanaypaq chaypas, sapa kutillanmi concienciay huchachawaq mana allin kawsasqaymanta. Ichaqa sonqoypin niq kani: “Kunanqa manañan imatapas ruwayta atiymanchu”, nispa. Fiestakunapi askha runa ukhupiña tarikuq kani chaypas, sapaypas kashayman hinan sinchita llakikuq kani. Manan umaypi cabeqchu honrado allin tayta-mamayoq kashaspa chhaynapi urmasqay.

“Ñoqaqa hinapichá wañupusaq” niqmi kani, ichaqa manan llapallachu chhaynata yuyaykurqanku. 2000 watapin tayta-mamay kinsa p’unchay huñunakuyman invitawarqanku. Hinan hawa sonqolla kasukurqani. Ichaqa admirakurqanin chaypi ñoqa hina karunchakuq wawqeyta panaytawan rikuspa.

Chaypi kashaspan yuyarirqani huk wata ñawpaqta chay local-llapitaq huk fiesta kasqanta. Sonqoyraqmi “phoq” nirqan chay localta huknirayta qhawaykuspa. Chay fiestapiqa q’opa patallapiñan purirqayku, cigarroq q’osñillañan karqanpas. Chaypi runakunaqa mana rimaykukuqmi karqanku, takikunataq llakichikuq millay takikuna karqan. Chay hatun huñunakuypin ichaqa llapapas kusisqa kasharqanku, unaymantaña rikuwarqanku chaypas sumaqtan chaskiwarqanku. Localpas limpion kasharqan, kusikunapaq willakuykunatataqmi uyarirqani. Chaykunata rikuspan tapukurqani: “¿Imaraykun kay sumaq kawsayta saqerqani?” nispa (Isaías 48:17, 18).

Chaymi chay p’unchaypacha decidekurqani Diospa llaqtanman kutipunaypaq. Kaqtan wawqeypas panaypas decidekurqanku chay huñunakuyta sumaqta qhawarispa. Hinan kinsantiyku Bibliata estudiapurqayku.

Sonqoymanmi chayarqan Santiago 4:8 textoq nisqan: “Diosman asuykuychis, hinan payqa asuykamusunkichis”, nispa. Chaymi yuyaykurqani Diosman asuykunaypaqqa kawsayniypiraq cambianay kasqanta. Chaypaqqa cigarro pitayta, drogakuyta machayta iman astawanqa saqenay karqan (2 Corintios 7:1).

Mana allin amigoykunata saqespan Jehová Diosta yupaychaq amigokunata maskharqani. Iñiq t’aqapi umallin anchata yanapawarqan paywantaqmi Bibliata estudiarqani. Sapa kutillanmi telefonopi waqyawaq otaq wasiyta hamuq imayna kasqayta yachananpaq. Paymi kunankamapas aswan munasqay amigoy.

2001 watapin Diosman qokuspa wawqeywan panaywan ima bautizakurqayku. Maytan tayta-mamay sullk’a wawqeypiwan (payqa manan Diosta saqerqanchu) kusikurqanku yapamanta familiayku huk hinalla Dios yupaychasqaykumanta.

Ñawpaqqa Bibliapi kamachikuykunatan hark’awaqniyta hina qhawariq kani, kunanmi ichaqa peligrokunamanta hark’aykuwaqniyta hina qhawarini. Biblian kallpata qowarqan drogakunata saqespa allin runaman tukupunaypaq.

May kusisqan kani, pachantinpi huk familia hina Jehová Diosta servispa munanakuq runakuna ukhupi kasqaymanta (Juan 13:34, 35). Paykuna ukhupin huk sumaq iñiqmasita tarirqani, payqa Adrianne esposaymi, anchatataqmi respetani munakunipas. Iskayniykun kusisqa kashayku Diosta servispa.

Kunanqa manañan munasqayta ruwaspachu kawsani, aswanmi tukuy tiempoywan Diosta servishani paymanta runakunaman yachachispa. Chayta ruwaspan ancha kusisqa kani. Ñoqataqa Biblian yanapawarqan kawsayniyta cambianaypaq. ¡Chayraqmi kunan cheqaqtapuni libre kani!