Sichus Diospa amigon kayta munanki chayqa, ñaupaqtan payta reqsinayki munasqantataq ruwanaykipas. Jinan Diosqa qanman achhuykamusunki (Santiago 4:8). Bibliapiqa willanmi: “Diosqa manan sapankanchismantapas nishu karupichu kashan”, nispa (Hechos 17:27).

•  Imatan ruwana Diospa amigon kanapaq

•  Diospa amigon kaymanta wakin runakuna pantasqata nisqanku

 Bibliata leey

•  Biblian kayta nin: “Diospa simin qelqapi qelqasqa kaqqa llapanmi Diospa yuyaychasqan”, nispa (2 Timoteo 3:16).

•  ¿Ima ninantaq chayri?: Diosmi Bibliataqa yuyaycharan. Paymi piensasqanta wakin runakunaq yuyayninman churaran Bibliapi qelqanankupaq. Bibliapin Diosqa niwanchis imayna runa kananchista, chaymantapas willawanchismi imayna pay kasqanta, payqa munakuq, chanin, khuyapayakuq iman (Éxodo 34:6; Deuteronomio 32:4).

•  Kayta ruway: Sapa p’unchay Bibliata leey (Josué 1:8). Leesqaykipi piensay. Jinaspa tapukuy: “¿Imatan kay leesqay Diosmanta yachachiwan?” nispa (Salmos 77:12).

   Ejemplopaq, leey Jeremías 29:11 textota chaymantataq tapukuy: “¿Imatan Dios munan noqapaq? ¿Thakpi kanaytachu munan icha llakisqa kanaytachu? ¿Vengakuq Dioschu, icha allin kanaytachu munan?”.

 Diospa kamasqanta qhaway

•  Biblian kayta nin: “Imaynachus kasqanqa imachus kamasqankunapin sut’ita reparakun”, nispa (Romanos 1:20).

•  ¿Ima ninantaq chayri?: Imaynan juj munay pintasqa cuadropas pintaqninmanta imaymanata yachachiwanchis, juj maquinapas ruwaqninmanta, chhaynatan Diospa kamasqankunapas imaymanata paymanta yachachiwanchis. Ejemplopaq ñosqonninchis imaymana ruway atisqanqa admirakunapaq jinapunin, chaymi yachachiwanchis Diosqa ancha yachayniyoq kasqanta. Chaymantapas intipas, ch’askakunapas yachachiwanchismi atiyniyoq kasqanta (Salmos 104:24; Isaías 40:26).

•  Kayta ruway: Tiempota t’aqay campopi plantakunata, animalkunata qhawanaykipaq jinaspa chaykunamanta yachay. Chayta ruwaspataq tapukuy: “¿Imakunatan yachachiwan Diosmanta kay plantakuna kay animalkunapas?” nispa. a Ichaqa, manan kamasqankunata qhawaspallachu Diosmantaqa yachasun. Bibliata leespa iman paymantaqa yachallasuntaq. Chaymi Diosqa Bibliata qelqachiran.

 Diosmanta rimaspapas mañakuspapas sutinmantapuni wajay

•  Biblian kayta nin: “Sutiy reqsiqtan waqaychasaq. Wajamuwaqtinmi, payman kutichimusaq”, nispa (Salmos 91:14, 15; Traducción del Nuevo Mundo).

•  ¿Ima ninantaq chayri?: Diospa sutinqa Jehová, paymi sutinta reqsiqkunata, respetowan sutinmanta mañakuqkunatapas makilla uyarin mañakusqankuta b (Salmos 83:18; Malaquías 3:16). Bibliapin Diosqa pay kikinpuni sutinta willawanchis, paymi nin: “Noqan Jehová Diosqa kani. Chaymi sutiyqa”, nispa (Isaías 42:8; Traduccción del Nuevo Mundo).

•  Kayta ruway: Jehová Diosmanta rimaspapas mañakuspapas sutinmantapuni wajay.

 Jehová Diosmanta mañakuy

•  Biblian kayta nin: “Jehová Diosqa llapa wajakuqninkunaq qayllallanpin kashan”, nispa (Salmos 145:18; Traducción del Nuevo Mundo).

•  ¿Ima ninantaq chayri?: Jehová Diosqa iñiywan mañakuqkunamanmi achhuykun. Jehová Diosmanta mañakuspaqa paytan adorashanchis, jinaspapas rikuchishanchismi anchata respetasqanchista.

•  Kayta ruway: Sapa kutillan Diosmanta mañakuy (1 Tesalonicenses 5:17). Diosman willakuy imayna kashanki chayta, imakunamanta llakikushanki chaytapas (Salmos 62:8). c

 Diospi iñiy

•  Biblian kayta nin: “Manachus iñisunman chayqa manapunin Diospa sonqonpaq jinachu kasunman”, nispa (Hebreos 11:6).

•  ¿Ima ninantaq chayri?: Sichus Diosman achhuykuyta munayki chayqa, paypin iñinayki. Bibliapi nisqan jina, iñiyniyoq kayqa manan Dios kasqanpi iñiyllachu. Aswanpas tukuy sonqowan paypi confiay iman, chaymantapas promesankuna junt’akunanpi, kamachikuyninkuna allinninchispaq kasqanpi confiay iman. Diospi confiayqa ancha allinpunin paypa amigon kanapaqqa.

•  Kayta ruway: Cheqaq iñiyniyoq kanapaqqa Bibliatan estudiana (Romanos 10:17). Sichus Bibliata estudianki chayqa, qan kikiykipunin yachanki Diospas, kamachikuyninkunapas confianapaq jinapuni kasqanta. Jehová Diospa testigonkunan yanapasunkikuman Bibliaq nisqanta allinta entiendenaykipaq. d

 Diospa munasqanta ruway

•  Biblian kayta nin: “Diosta munakuyqa kamachikuyninkunata kasukuymi”, nispa (1 Juan 5:3).

•  ¿Ima ninantaq chayri?: Sichus Dios munakusqaykita rikuchinki, kallpachakunkitaq kasukunaykipaq chayqa, Jehová Diosmi qanman achhuykamusunki.

•  Kayta ruway: Bibliata estudiasqaykiman jinan, yachanki ima ruwaykunas Diosta kusichin ima ruwaykunataq mana kusichinchu chayta. Tapukuy: “¿Ima ruwaykunatan saqepunay Diosta kusichinaypaq?”, nispa (1 Tesalonicenses 4:1).

 Diospa kamachikuyninkunata kasukuy jinaspa reparay munakusqasuykita

•  Biblian kayta nin: “Reqsiykuychis, jinaspa rikuychis may sumaqchus Señor Diosqa kashasqanta”, nispa (Salmos 34:8).

•  ¿Ima ninantaq chayri?: Diosmi munan qan kikiykipuni reparanaykita may sumaqchus pay kasqanta. Munakuq kasqanta reparaspan astawan payman achhuykuyta munanki.

•  Kayta ruway: Bibliata leesqaykiman jina, kasukuy chaypi kamachikuykunata. Chayta ruwanki chayqa, rikunkin ima ruwasqaykipas allinpuni kasqanta (Isaías 48:17, 18). Chaymantapas qhawariy Diospa yanapayninwan imaymana sasachakuykunata atipaspa, familiankuwan kuska sumaqta kausaq runakunaq ejemplonta. e

 Wakin runakunan ninku: “Manan Diospa amigon kayta atisunmanchu, imayna pay kasqanmanta mana tukuytapuni entiendesqanchisrayku”, nispa.

 Cheqaq kaq: Imayna Dios kasqanqa manan llapanchu fácil entiendey, ejemplopaq mana rikuna espíritu kasqanqa manan fácil entiendeychu. Ichaqa chaywanpas atisunmanmi Diospa amigon kaytaqa. Bibliapipunin niwanchis sichus munanchis wiñaypaq kausayta chayqa payta reqsinanchis kasqanta (Juan 17:3). Bibliaqa fácil entiendeyllatan Diosmantaqa willawanchis. Willawanchismi imayna kasqanta, imata runakunapaq kay allpapaqpas munasqanta, kamachikuyninkunatapas (Isaías 45:18, 19; 1 Timoteo 2:4). Chaymantapas, ña nisqanchis jina, willawallanchistaqmi sutintapas (Salmos 83:18). Chhaynaqa, manan Diostaqa reqsillasunmanchu, aswanpas amigonkuna iman kayta atisunman (Santiago 4:8).