¿Mana munashaqtachu Testigokuna runakunaq religionninta cambiachinku?

QALLARIY

Manan noqaykuqa pitapas mana munashaqtachu religionnintaqa cambiachiyku. “Qhawaq” nisqa revistapipunin niran: “Pitapas mana munashaqta cambiasunman chayqa manan allinchu kanman”, nispa. a Imaymana razonkunan kan mana chayta ruwanapaq, chayta kunan yachasunchis.

Jesusqa manan pitapas obligaqchu yachachisqanta chaskinanpaqqa, chaymantapas payqa yacharanmi pisilla uyarikuqkunaqa kanankuta (Mateo 7:13, 14). Juj kutinmi runakunaqa Jesús yachachishaqtin ripuyta qallariranku, Jesusqa manan jark’aranchu paykunata, jinallatan qhawaran ripunankuta (Juan 6:60-62, 66-68).
Jesusqa manan jayk’aqpas niranchu: “Cambiachinaykichispunin runakunataqa” nispaqa, aswanmi payqa niran: “May llaqtamanpas may ayllumanpas jaykuspaqa maskhaychis pichus chaypi qankunata chaskinasuykichispaq jina kaqta”, nispa (Mateo 10:7, 11-14).
Pitapas religionninta cambiananpaq obligasunman chayqa manan allinchu kanman. Chhaynata ruwasunman chayqa manachá tukuy sonqowanchu Diosta servinkuman; payqa tukuy sonqowan servinatan munan (Deuteronomio 6:4, 5; Mateo 22:37, 38).

¿Mana munashaqtachu Testigokuna runakunata religionninkuman pusamunku?

Bibliapi nisqan jina, noqaykuqa Bibliamanta yachachikuykunatan “kay pachaq k’uchunkunakamaraq” apashayku, chaytan ruwayku wasin-wasinta purispa, maypichus runakuna kashanku chaykunaman rispa ima (Hechos 1:8; 10:42; 20:20). Ichaqa ñaupa cristianokunata jinan noqaykutapas runakunaqa runa obligaqta jina qhawariwanku (Hechos 18:12, 13). Chhayna piensasqankun ichaqa mana allin kashan. Llapa runapas libren kashanku imapipas creenankupaq, chaytan noqaykuqa respetayku. Ichaqa llapa runapas Diospa palabranta reqsinankutan munayku, chhaynapi chayman jina ima ruwaytapas ajllakunankupaq.

Noqaykuqa manan pipas noqaykuq creesqayku jinata creenankutapunichu munayku. Manataqmi religión cuentollawanchu politicamanpas jaykuyku. Manan qolqetachu ni imatachu regalayku chhaynapi runakuna Testigo kanankupaq. Manan “cristianon kayku” nishaspa Cristoq yachachisqan contrapi imatapas ruwaq runakuna jinachu kayku. b

¿Derechonkupichu kashanku runakuna religionninkuta cambianankupaq?

Profeta Abrahamqa saqepuranmi familiankunaq religionninta

Arí, llapapas munaspaqa cambiasunmanmi religionninchista, chhayna ruwaqkunamantan Bibliapipas willashan, paykunaqa tayta-mamankuq religionninta saqepuspan Jehová Diosta serviranku. Paykunamanta wakinmi kashan Abrahán, Rut, Atenas llaqtamanta runakuna, apóstol Pablo ima (Josué 24:2; Rut 1:14-16; Hechos 17:22, 30-34; Gálatas 1:14, 23). Libretaq kashanchis chayqa wakin runakunapas lloqsipurankun Diospa allin qhawarisqan religionmanta, chaykunamantapas willanmi Bibliaqa (1 Juan 2:19).

Chaymantapas kanmi juj organización “ONU” nisqa, chay organizacionpin ruwakuran juj cartata, chay cartatan sutichakuran “Declaración Universal de Derechos Humanos” nispa, chay cartapin willashan imakunas runakunaq derechon chayta. Chay cartapi nisqanman jinaqa llapa runas “derechonpi kashan religionninta saqespa juj religionman jaykupunanpaq”. Chaymantapas chay cartaq nisqanman jinaqa lliu runas derechonpi kashan imatapas estudiananpaq, yachachisqa kananpaq, estudiasqanta jujkunaman yachachinanpaqpas. c Chhaynataq chayqa lliumi libre kashanku imapichus creenankupaq, chay creesqankuta defiendenankupaqpas; jinallataq noqaykuq yachachisqaykuta chaskinankupaq mana chaskinankupaqpas.

¿Juj runa religionninta cambiaspa, manachu respetonta faltashan familianman?

Manan chhaynachu, Bibliaq nisqan jina cristianokunaqa llapa runatan respetayku ima religionmantaña kanku chaypas (1 Pedro 2:17). Chaymantapas Testigokunaqa respetanaykun tayta-mamaykuta, Bibliapipunin nin: “Tayta-mamaykitan respetanki”, nispa, chaytan noqaykuqa kasukuyku imapiña paykuna creenku chaypas (Efesios 6:2, 3).

Noqayku respetaykuña paykunata chaypas, manan Bibliaq nisqanman jinachu wakinqa ruwanku. Zambia nacionmanta juj warmin nin: “Llaqtaypiqa manan librechu karayku religionniykuta cambianaykupaq, pipas cambiaqtaqa familianta llaqtanta traicionaqta jinan rikuqku”, nispa. Chhaynaña llaqtanpi karanku chaypas, payqa sipasllaraq kashaspan Testigokunawan Bibliata estudiasqa, chhaynapin payqa cambiapusqa religionninta. Paymi nillantaq: “Tayta-mamaymi sapa kutillan niwaq: ‘Manan noqaykuqa munaykuchu chay estudianaykita, manan “waway” nisaykikupaschu’, nispa. Maytan sonqoy nanaq sapa chhaynata niwaqtinku; noqaqa Jehová Diosta servispayqa acaso paykunatachu traicionasharani, chhaynata sientechiwaqtinkun sonqoyqa astawanraq nanaq”, nispa. d

a Qhaway 2002 watamanta juj p’unchay enero killamanta “La Atalaya” nisqa revistata, 12 paginata 15 parrafota.

b 785 watapin rey Carlomagno juj leyta orqomuran, chay leypa nisqanman jinaqa, manachus “Sajonia” nisqa ladomanta kaqkuna católico jina bautizakunkuman karan chayqa wañuchisqas kananku kasqa. Chaymantapas Roma ladopin kasharan juj guerra, chaymi 1555 watapi aparikuran juj juñunakuy, chaypin firmaranku juj compromisota thaj kausay kananpaq, chay compromiso firmasqankupi nisqanman jinaqa, sapanka llaqtapi gobernaqsi ajllakunan kasqa catolicochus kanqa icha “Luterano” nisqachus kanqa chayta, chay ajllakusqanman jinas gobiernasqan runakunapas kaqllatataq ajllakunanku kasqa. Mana imatapas ajllakuqkunaqa chay llaqtamantas qarqosqa kananku kasqa.

c Chhayna imaymana cartakunan kashan runakunaq derechonmantaqa, kashanmi “Carta Africana de Derechos Humanos y de los Pueblos” nisqa, “la Declaración Americana de los Derechos y Deberes del Hombre” nisqa, “la Carta Árabe de Derechos Humanos de 2004” nisqa, “la Declaración de Derechos Humanos de la Asociación de Naciones del Sudeste Asiático” nisqa, “el Convenio Europeo de Derechos Humanos” nisqa, “el Pacto Internacional de Derechos Civiles y Políticos” nisqapiwan. Ichaqa manan llapa nacionkunachu chay compromiso firmasqankutaqa junt’anku.

d Diospa sutinmi Jehová.