Colegiopica, estricto profesorcuna, shinlli examenguna, molestoso compañerocunami tian. Debercunatapash ashtacatami cachan. ¿Chaicunamandachu colegioman rinataca na gushtangui? Shina sintirinaca normalmi can. Raquel a shuti jovenga ninmi:

 “Ñucaca maipipashmi cangapaj munani pero menos escuelapi. Por ejemplo, ñuca amigocunahuan, playapi o ñuca taitamamacunata cocinapi ayudashpa o limpiashpa quidangapami munani” ninmi.

 Raquelshna pensarijushpaca, graduaringacamanmi colegiopica shuj carcelpishna cagrini yashpachari nali sintiringui. Ama shina sintiringapaca ¿imatata rurai ushapangui?

 ¿Yachapashcanguichu? Colegioman rinata pensarishpaca na yapata estresarijunachu capangui. Colegioman rishpa ima ventajacuna tianata pensarishpaca, talvez colegioman rinataca gushtanguimi. Por ejemplo, colegiopimi jipacunaman sirvina cosascunata o imagutapash ashtahuan ali ruranata yachachin.

 Colegionman rinami can nishpa ama yapata estresarijungapaca cai ventajacunapi pensaripai:

 Sirvina cosascunatami yachajungui. Ashtahuan yachajushpaca, na shujcunatalla shuyashpa causanguichu. Sino quiquinllatami trabajopi o quiquinba causaipi problemacuna ricurijpica, chaicunata solucionanata yachajungui. Aunque colegiopi huaquin cosascunata na gushtashpapash, “colegiopi estudiashca cosascunaca imapata sirvihuashca” nishpa pensaripai.

 Bibliapica ninmi: “Ñuca huahualla, caicunataca ricuriajunallami cangui. Mandashcatapash, ali yuyaita cushcatapashmi alichina cangui” (Proverbios 3:21).

 Ali costumbrecunata charichunmi ayudanga. Colegiopica quiquinba tiempota aliguta organizachun, cosascunata ordenadamente rurachun y ali trabajadorcuna cachunmi ayudaita ushan. Huatacuna yalijpica, chai cosascunatami minishtingui. Chaimi pensarina capangui “colegioca ¿imashinata cosascunata ordenadamente rurachun, ali trabajador cachun ayudajuhuan? ¿Imashinata mejoraita ushani?” nishpa.

 Bibliapica ninmi: “Tucui imata rurashcamandapash, japina tianmi” (Proverbios 14:23).

 Shujcunahuan parlachunmi ayudanga. Colegiopi cumbacunahuan parlashpami shujcuna imashina sintirijta intindinata y shujcunata respetanata yachajungui. Josué shuti jovenga ninmi: “Imashinami historia y ciencias materiacunata yachajunaca importante can, shinallatami shujcunahuan comunicarinata yachajunapash importante can. Comunicarinata yachajunaca jipacunapapashmi sirvinga” ninmi. Pensaripai: “Colegiopica ¿imashinata aunque shujcuna shuj creenciacunata o shuj culturata charijpipash paicunahuan llevarichun ayudahuashca?” nishpa.

 Bibliapica ninmi: “Tucuicunahuan tranquilo ali causanatami mascana capanguichi” (Hebreos 12:14).

 Trabajachunmi ayudanga. Colegiopica ima habilidadta charishcata cuenta japishpa jipacunaman imata rurangapaj munashcata yachachunmi ayudaita ushan. Brooke shuti jovenga ninmi: “Ñucaca colegiopi cashpallatami shuj areapilla especializarircani. Shinami colegiota tucuchishpaca, trabajangapaj listo caita usharin” ninmi. Pensaripai: “Graduarishca jipa mantiniri ushangapaca ¿imapita trabajagrini? Chai trabajopi trabajangapaca ¿imatata estudiana cani?” nishpa.

 Bibliapica ninmi: “Can saruna chaqui ñandapash, imashna cajta ali ricungui” (Proverbios 4:26).