Jovengunapaca paicunapa taitamamacuna divorciarijpica shuj jatun llaquimi can. Chai llaquita aguantangapaca ¿imatata rurai ushangui?

Cai temapica cai yuyaicunatami ricupashun

•  Cai quimsa cosascunatami na rurana cangui

•  Cai quimsa cosascunatami rurana cangui

•  Jovengunaca ¿imatata nin?

 Cai quimsa cosascunatami na rurana cangui

 1. Na culparinachu cangui

 Dianaca ninmi: “Shuj viajeca ñuca mamaca nihuarcami, can nacirishca punllamandapachami canba taitahuanga problemacunata chari callarircanchi nishpa. Chaimi ñuca culpamandami ñuca taitamamacunaca divorciarishca nishpami pensan carcani” nin.

 Caita yaripai: Canba taitamamacunaca na canba culpamanda divorciarircachu. Paicunallatami divorciarishcamandaca responsable can. Paicunapa problemacunapica canga nimata na ricunata charinguichu. Arreglaitapash na arreglai ushanguichu. Matrimoniopi charishca problemacunataca paicunallatami arreglana can.

 2. Na risintirishca quidanachu cangui

 Riannaca ninmi: “Ñuca mamitata traicionashcamandami ñuca taitahuanga ninan culirashca cani. Ñuca taitapi confianzata cutin charinaca dificilmi ricurin” nin.

 Caita yaripai: Canba taitamamacunapa problemacunamanda culira, llaquilla sintirinaca normalmi can. Pero risintirishca quidanaca candaca na ayudangachu. Ashtahuanbash canba causaipipash, emocionalmentepashmi candaca llaquichinga. Risintirishca quidanaca ñucanchillata venenota ufiashpa, shuj personatara chai veneno llaquichichun shuyajushca cuendami can. a

 3. Ñucapashmi ñuca matrimoniopica fracazasha yashpaca na pensanachu cangui

 Jessicaca ninmi: “Ñuca taita imata rurashcatallata ruranatami ninanda manllani. Chaimi ñucapashmi ñuca taitamamacunashna divorciarisha yashpa cazaranata, huahuacunata charinatapash manllani” nin.

 Caita yaripai: Canba taitamamacunapa matrimonio fracazashca cajpipash, candaca shinallataca na pasangachu. Ashtahuanbash canba taitamamacuna ima pasashcamandaca ashtaca ali cosascunatami yachajui ushangui. Por ejemplo, cazarangapaj munashpaca chaishuj personapi ima cualidadcunata mascana cashcatami cunanga ashtahuan ali yachangui. Shinallata canba taitamamacuna divorciarishcaca candaca ashtahuan ali cusa o huarmi cachunmi ayudanga.

 Cai quimsa cosascunatami rurana cangui

 1. Parlanami cangui. Paicuna imashina sintirishcata pimanbash na parlaj personacunaca paicunallatami llaquipi urman, machan o droga viciopi urman. Canda ama shina pasachunga cai cati consejocunata catipai:

 Canba taitamamacunahuan parlai. Taita o mama o ishcandicunallata paicunapa problemacunapi candapash satingapaj munajpica, paicunapa problemacuna imashina canda afectajushcata parlai. Paicunahuan ñavi ñavi na parlai ushashpaca, shuj cartata escribishpami imashina sintirishcata ni ushangui.

 Shuj ali amigohuan parlai. Can imashina sintirishcata uyangapaj munaj amigota charinaca ashtahuan ali sintirichunmi ayudanga. Bibliapica ‘ali cumbaguca paipa cumbataca, tucui causaipimi juyajun. Llaqui punllacuna japijpipash, quiquin huauquitashnami llaquin’ ninmi (Proverbios 17:17).

 Taita Dioshuan parlai. Jehová Diosca ‘mañanajujtaca uyanmi’ (Salmo 65:2). Shinaca candapash uyangapami munan. Ashtahuanbash Bibliapica ninmi, Taita Diosca canmanda preocuparishpami, canba tucui llaquicunata paiman parlachun munan nin (1 Pedro 5:7).

•   Canba taitamamacunamandaca ¿maijanhuanda tranquilo, na culirashpa parlai ushangui?

•   Canba amigocunamandaca ¿pita candaca ayudaita ushanman?

•   Jehová Diosmanga ¿imacunatallata parlangapaj munanguiman?

 2. Cambiocunaman adaptarina

 Canba taitamamacuna divorciarishcamandaca ashtaca cambiocunami ricuringa. Por ejemplo huasita, escuelata, canba causaita o amigocunatapashmi talvez cambiana tucungui. Llaquilla, estresado sintirina, o tucui nalimi llujshin nishpa pensanaca normalmi can. Chai situación mejorachunga ¿imatata rurai ushangui? Cambiocuna ricurijpi adaptarinami ashtacata ayudanga.

•   Canba taitamamacuna divorciarijpica ¿ima cambiocunata ruranata shinlli ricurirca?

•   Chai cambiocunaman adaptaringapaca ¿imata rurai ushangui?

 3. Can imata rurai ushashcatami yachana cangui

 Canba taitamamacuna divorciarishcamandaca preocupadochari sintiringui. Pero chai situacionga can imata rurai ushashcata yachachunmi ayudanga. Huaquinbicarin cai situacionga mushuj cualidadcunata charichun o mushuj cosascuna ruranata yachajuchunmi ayudanga. Jeremypa taitamamacunaca pai 13 huatacunata charijpimi divorciarirca. Paica ninmi: “Ñuca taitamamacuna divorciarijpimi ashtahuan responsable canata yachajurcani. Punda churi cashcamandaca ñuca mamitata, ñuca uchilla huauquitapashmi ashtahuan ayudana tucurcani” nin.

•   Cai situacionbi cashpaca ¿ima cualidadcunata o imata ruranatata yachajupashcangui?

•   ¿Imapita mejorangapaj munanguiman?