•  ¿Yangata asirijunaca imata can?

•  ¿Huaquingunaca imamandata shina ruran?

•  ¿Ima llaquicunamanda apai ushan?

•  Huaquin jovengunaca caitami nin

 Huaquin jovengunapaca, shuj jarihuan shuj huarmihuan imatapash rurashpa asirijunaca paita munashcata ricuchingapami can. ¿Chaita ruranaca nalicha can? Na shinachu can. “Ann jovenga cashnami nin, cazarangapaj edadta charishpa pitapash gushtashpaca alimi can. ¿Imagutapash na nishpa, na asirishpaca, shuj jovenda, gushtashcata na gushtashcatapash imashinata yachashunyari?” ninmi.

 Caipica huaquin jovenguna na cazarangapaj munashpata yangata imatapash nishpa asirishpa pugllan cashcatami ricupashun.

 Deanna jovenga ninmi:“Huaquin jovengunaca juyaimanda gushtaimandami paihuan cangapaj munan, shinapash shujcunaca yangata crichingapaj munashpami na cierto nircanichu nishpami llaquichin”.

 Shujcunaca paicunallata ali sintiringapaj munashpami imatapash nishpa asirijunata yachan. Hailey shuti jovenga cashnami nin: “Shina rurashpa paicunapaman quimirishpa asirishpa parlarij cashpaca, shina rurashpa catingapami munangui”.

 Can gushtashca jovenda na cierto cajpita yangata crichishpaca, chai jovenba sentimientocunata na respetashcatami ricuchinajunchi. Ashtahuanbash na ali yuyashpa rurashcatami ricuchijungui. Imatapash na ali pensashpa rurajcunapaca, Bibliapica ninmi, “shinlli shungu causanaca cushijuimi” nishpa. (Proverbios 15:21).

 Chaimi Hailey jovenga cashna nin: “Pihuanbash yangata asirijuna parlarijunaca nalichu can, shujcunatami llaquichishun” nishpa.

•   Pipash yangata asirishpa parlarijushpaca paillatami na alipi quedanga.

   Jeremy jovenga ninmi: “Yangata asirishpa parlarishpa cajcunaca, imatapash na ali yuyashpa ruraj cashcatami ricuchinajun. shuj joven ñucahuan asirishpa parlajujpica, yangata crichishpa pugllangapa munajun yanimi”.

   Bibliapica ninmi: “Juyaita charishpaca [...] na ñucami ashtahuan ali cani ninllu, na jariyanllu” nishpa (1 Corintios 13:4, 5).

   Caipi yuyapai: ¿pihuanbash yangata asirishpa parlarijunata gushtashpaca, caicunamanda jarcaringapaca imatata rurai ushapangui?

•   Pipash yangata asirishpa parlarijunata gushtashpaca shujcunatami llaquichishun.

   Jaqueline jovenga ninmi: “Shuj joven ñucahuan yangata asirishpa parlarijunata gushtajpica, paihuan cangapaca ñana munanichu. Huarmi cajpilla, ñucahuan parlangapaj munajtami sintini. Yangata asirishpa parlarijunata gushtajcunapaca na importanguichu, paicunalla ali sintiringapami munan”.

   Bibliapica ninmi: “Pipash na quiquimbajlla ali cachun imatapash ruranachu, ashtahuangarin shujpajpash ali cachunmi, imatapash rurana” nishpa. (1 Corintios 10:24).

   Caita yuyapai: ¿shuj joven canda munajshnalla cashpapash, na cierto cashcata cuenta japishcanguichu? Shina pasajpica, ¿imashinata sintirircangui? ¿Shuj jovengunata ama shina llaquichingapaca imatata rurana capangui?

•   Pihuanbash yangata asirishpa parlajushpaca ciertopacha juyaitaca na taringuichu.

   Olivia jovenga ninmi: “Pihuanbash yangata asirishpa parlarijunata gushtajcunahuanga na cazaraimanllu. Paihuanga llujshitallapash na llujshimanllu. ¿Shuj joven imatapash yangata nishpa umachingapaj munajpica, imashinata paita rijsishpa paipi ashtahuan confiashayari?”.

   Bibliapi, Rey Davidca escribircami, “Mishqui shimi jayaj shungu runacunahuanga, na tiarircanichu” nishpa (Salmo 26:4).

   Caipi yuyai: Yangata asirishpa parlarijunata gushtajpica, ¿ima laya jovengunata quiquinman quimiringa? ¿Chashna jovenguna quiquinman quimirichunllu munangui?