Bibliata liishpami Taita Dios ciertopacha tiashcata ricui ushapanchi. Shinallata Bibliapica gentecunapa crishcacunata crinapa randica, ñucanchillata ‘aliguta yuyashpa’ Taita Diospi tucui shunguhuan crichunmi Bibliaca ayudan (1 Juan 5:20; Romanos 12:1). Taita Dios tiashcataca ¿imashinata yachapanchi? Chaipaca Bibliapi huaquin textocunata ricupashun.

•   Cai muyundi alpapi, universopipash tucui cosascunami ordenbi can. Chashna causaita ricushpami, pipash rurajpillatami cai cosascunaca tianga nita ushapanchi. Bibliapica ninmi: “Huasicunaca, pipash huasichijpillami tian. Ashtahuangarin tucui caicunata rurashpa churajca, Taita Diosmi” can ninmi (Hebreos 3:4). Cai shimicunata uyashpaca, cierto cashcatami intindita ushapanchi. Shinapash preparado, estudiashca gentecunapashmi cai shimicuna cierto cashcata intindishca. a

•   Tucui gentecunallatami imapa, imamanda causajushcata yachangapaj munapanchi. Chaita na yachaimandami taucacunaca ninandapacha llaquilla causan. Ñucanchipa munaicunamandallaca na parlanajunchichu. Chaitami Bibliapica ‘Diosmanda yachajuna’ nishpa churashca. Taita Diosmanda yachajushpa, paita adorashpami ciertopacha cushilla causaitaca ushapanchi (Mateo 5:3; Apocalipsis 4:11). Taita Diosmanda yachajushpami Taita Dios ñucanchicunata ninanda juyashcata y ciertopacha cushilla causachun munashcatapash yachajui ushapanchi (Mateo 4:4).

•   Bibliapi parlashca ashtaca profeciacunaca tauca tauca huatacuna yalishca cajpipashmi cabalguta pactarishca. Caicunata ricushpami Bibliapi escribishca shimicunaca na gentecunapa shimicuna cashcata, Taita Diospa shimipacha cashcatapash cuenta japipanchi (2 Pedro 1:21).

•   Punda Bibliata escribijcunaca cunanbi estudiashca gentecunapash na yachashca yuyaicunatami Bibliapica ña escribishpa saquirca. Por ejemplo, punda tiempopi causashca gentecunaca cai alpaca shuj elefante, shuj jabalí, shuj toro o imapash animalpa jahuapimi can nishpami crin carca. Cutin Bibliapica Taita Diosca ‘cai alpataca, imapillapash na huarcushca’ charijunllu ninmi (Job 26:7). Shinallata cai alpa imashinapacha cashcata ningapaca, cai alpaca redondo o muyushcagu can ninmi (Isaías 40:22). Ashtaca gentecunaca Taita Dios villajpillatami, Bibliata escribijcunaca cai cosascunataca ña yachashpa escribishcanga ninmi.

•   Bibliapica Taita Diospi na crij gentecuna tapurishca tapuicunatami contestan. Por ejemplo, huaquin gentecunaca nishcami: “Si Taita Dios shuj juyaj, poderta charij Dios cashpaca ¿imamandata ashtaca llaquicuna tian? ¿Imashpata religiongunaca gentecunataca ninanda llaquichishca?” nishpa (Tito 1:16). Cai tapuicunamanda Biblia imata nijta yachajunami, quiquindaca Taita Diospi crichun ayudanga.