Taitamamacuna mayoriajpica churicuna, ushicunami cuidana responsabilidadta charin. Bibliapica Jesusta ali catijcunataca cashnami mandan: ‘Huahuacunara llaquishpa caranata, pundapi yachajuchun. Paicunapa taitamamata pagui nishpa chashna carachun. Shina caranaca alipachami. Shina carachunmi, Taita Diospash munan’ (1 Timoteo 5:4). Mayorlla taitamamacunata ali cuidashpaca, Bibliapi mandashcatami ali pactachinajupanchi (Efesios 6:2, 3).

 Mayoriashca taitamamacunata imashinapacha cuidana cashcataca Bibliapica na ricuchijunllu. Shinapash punda tiempopi Taita Diosta sirvijcuna, paicunapa taitamamacunata imashina cuidashcatami Bibliapica ricuchijun. Shinallata, pipash shuj mayorguta ña cuidajujpi imata rurai ushashcatapashmi Bibliapica yachachin.

•  Punda tiempopi Taita Diosta sirvijcunaca ¿imashinata paicunapa mayorlla taitamamacunataca cuidarca?

•  Mayorlla taitamamacunata cuidanamandaca ¿imatata Bibliapica aconsejan?

•  ¿Bibliapica churicuna, ushicunapash huasipillata mayorlla taitamamacunata cuidana cashcatachu nijun?

 Paicunapa mayorlla taitamamacunata cuidangapaca usharishcagutami rurarca.

•   José runaguca paipa taita mayorgu cajpica carupimi causajurca. Pero paipa taitata ña cuidai ushashpaca uchallami paihuan causachun paipa taitataca aparca. José runaguca paipa taita micunaguta charichun, maipi causanatapash charichunmi ricuriajurca (Génesis 45:9-11; 47:11, 12).

•   Rut huarmiguca paipa suedrata cuidangapami suedrapa llactaman rishpa shinllita trabajarca (Rut 1:16; 2:2, 17, 18, 23).

•   Jesús ña huañugrijushpaca paipa mama Mariata pipash cuidachunmi mingarca. Chai tiempopica María huarmiguca viudami cashca yarin (Juan 19:26, 27). a

 Taitamamacunata cuidashpaca ashtacatami shaijushca, llaquillapash sintirita usharin. Chaimi Bibliapica ama shina sintiringapaj huaquin consejocunata taripanchi.

•   Taitamamacunata respetohuan, ali tratapai.

   Bibliapica ninmi: “Cambaj taitata, cambaj mamata alicachingui” (Éxodo 20:12).

   ¿Imashinata pactachi ushapanchi? Fuerzaguta charishcacamanga taitamamacunallata imashina cuidarinata decidichun saquipangui. Shinallata paicuna imashina sintirishcata intindishpa, respetohuan tratapangui.

•   Taitamamacunata intindingapaj, perdonangapapash esforzaripangui.

   Bibliapica ninmi: “Aliguta yarishpa causaj runaca, ñapash fiñarishpapash jarcarinmi. Fiñachijpipash upalla yalij runami, alicachi tucun” (Proverbios 19:11).

   ¿Imashinata pactachi ushapanchi? Quiquin imaguta rurashpa esforzarijujpipash quiquinba taitamamacunaca talvez na agradicingachu o talvez culiraitarami culiraita ushan. Shina pasajpica, cashna nishpa tapuripaichi: “Ñucanchi munashcashna imatapash na rurai ushashpaca ¿imashinata sintirinchiman? ¿Nachu ñucanchipash culiranchiman?”. Taitamamacunata intindingapaj, paicunata perdonangapapash esforzarishpaca tucuicunami ali caita ushapanchi.

•   Taitamamacunata imashina cuidanamanda ashtahuan informaciongunata mascapangui.

   Bibliapica ninmi: “Ali yuyaita pipash na cujpica, imapash na ali llujshinllu. Ashtahuangarin ali yuyaita taucacuna cujpimi imapash ali llujshin” (Proverbios 15:22, TNM).

   ¿Imashinata pactachi ushapanchi? Taitamamacunapa saludta imashina cuidanata ashtahuan yachangapaj esforzaripangui. Quiquin causajushca llactapi ima ayudacunalla tiashcata mascapai. Shuj amigocunapash paicunapa mayorlla taitamamacunata cuidanajujpica, paicuna imashina cuidajta yachangapaj tapupangui. Familiapi taucacuna cashpaca taitamamacunata imashina cuidanata parlaripaichi.

•   Ama quiquinlla tucuita rurapaichu.

   Bibliapica ninmi: “Ali yachaica, na jariyashcacunahuanmi” can (Proverbios 11:2).

   ¿Imashinata pactachi ushapanchi? Na tucuita quiquinlla rurai ushashcatami cuenta japina capangui. Taitamamacunata alipacha cuidangapaj munashpapash, huaquinbica shaijushcami sintirita ushapangui. Taitamamacunata na cuidai pactajushpaca, shujcuna quiquinda ayudachunmi mañanalla capangui. Huaquinbica quiquinba taitamamacunaca doctorcuna, enfermeracunapash cuidachunmi minishtinga.

•   Quiquinllatapash cuidaripangui.

   Bibliapica ninmi: “Pipash paipaj cuerpotallataca na millanayachinllu. Ashtahuangarin aliguta micushpa alichirinatami yachan” (Efesios 5:29).

   ¿Imashinata pactachi ushapanchi? Quiquinba taitamamacunata cuidajushpapash, quiquinbashmi cuidarina capangui. Cazarashca cashpacarin, quiquinba familiatapashmi cuidana capangui. Micuitapash alimi micuna capangui, samaitapashmi ali samana capangui (Eclesiastés 4:6). Shinami sano, ali sintirishpa, ali yuyashpa taitamamacunata ali cuidashpa cati ushapangui.

 Bibliapica chaita rurana o na ruranachu canguichi nishpaca na nijunllu. Huaquin familiacunapica mayorlla taitamamacunaca paicunapa churicunapa, ushicunapa huasipimi causan. Huaquinbica mayorlla taitamamacuna ashtahuan ali cuidashca cachunmi, huaquingunaca mayorgucunata cuidaj huasicunaman cachan. Shinapash chaita decidingapaca, familia enteromi ali parlarina can (Gálatas 6:4, 5).